السلام عليكم
بداية احب اشكر كل اخواني الي دعوا النة وبارك الله بيكم
اليوم قابلنة المحلفة وكانت القاعة مليانة عراقيين بس الغريب انه تفرج يارب و lazordy مكانوا موجوديين !!!
ولو اني مسالت يابه منو من عنكاوا لان الاغلبية كانو كبااار بالعمر يعني عمرهم ب ال 50 وال 60 وماعتقد يستعملون النت
والبقية بنات اعتقد اكبرهم عمرها 25 سنة و فد 3 شباب اعبارهم هم 25
على العموم ياريت لو كانوا موجوديين يعرفونة بنفسهم وين كانوا كاعديين
المهم قابلنة المحلفة واول مدخلنة كالت اني راسي يوجعني واريدكم تجاوبون بسرعة وجواب كامل حتى نخلص بسرعة
شكل المحلفة من جنوب افريقيا سودة ولاببسة مناظر
راسا كالت اوكفوا ارفعوا ايدكم رددوا القسم ( تكدرون تكولوا بالعربي والمترجم يشوف شغلة )
وراها كعدنة
بالبداية تعاملها استفزازي مو يعني تخليك تتعصب وانما تتوتر ومتعرف تجاوب
راسا سئلت الكل بدت بالكبير وبعدين بالصغير وشبجتها حتى تفاجئ كل واحد بالسؤال
الاسئلة كانت اسمك اعماركم موالديكم تاريخ مغادة العراق مزوج خاطب وكذالك للبنت
مثل انطيناها الثلاثي صارت عصبية كالت اريد الكل من الاول للعشيرة
وكالت كل ماسالكم سؤال تجاوبون عليه ب نعم او لا وبسررعة
يعني تريد تخربطك بالحجي
المهم سالت الاسئلة الروتينية دعمتوا جماعة ارهابية عليك حكم شي ووو الخ
وراها يلا الكل تتفضل برة يبقة صاحب الكيس
تسئل عاد على الجيش والتهديد وهاي اهم شي اخوان حاولوا لا تخربطون بالحجي
وتسالك بالجيش هل اطلقت رصاص من السلاح الخاص بك
وبالجيش الاسلحة الي دربتوا بيها شنية وهل شاركت بالجبهة
وحرب الكوييت
اعتقد كل هاي الاسئلة موجودة بالمنتدى ياريت تدربون عليها اليوم وتراجعون يكون افضل
وراها طلع صاحب الكيس
تروحون للقاعة شوية ويدزون عليكم علمود البصمات يسوها كل العائلة
وراها يسلموكم تذكرة بحالة الاتصال بكم او انتو تتصلون ويكولون موافقة المحلف طلعت تروحون تكشفون فحص طبي
بالعنوان الموجود في التذكرة
وبحالة لا سامح الله رفض هم يبلغون شنو الاجراءات الي الواحد يسويها
بعد شنوو بلة ؟؟؟
هاي هيه عموما يعني المقابلة هيه والله العظيم سهله وشغلة المحلف يخليك تتوتر شي طبيعي لان هم مدربيين على هذا الشي
الاعتماد يبقة عاد على صاحب الكيس يعني لا الزوجة ولا الاولاد الهم علاقة لان مراح يسئلوهم عن شي يغير الي ذكرته
بس يكون صاحب الكيس ميخربط بالحجي
وعلى العموم ان شاء الله يارب الموفقية لجماعتنة الي حيقابلون باجر
ويارب تتسهل كل اموركم
وان شاء الله تصدر موافقة المحلف للجميع
بالمناسبة بالنسبة شوكت تبيين نتيجة المحلف ورا العيد ننتصل او هم يتصلون ويبلغونة بالنتيجة
واذا عدكم شي اسئلوا
وتحياتي للجميع
