اخوانا العراقيين الله يخليكم اني اريد جواب على سؤالي اذا امكن واني ممنون الكم

[nickazawee]

السلام عليكم اني عراقي كنت اعمل مترجم وي الجيش الامريكي واني هسه بامريكا وعندي كرين كارت قدمت لابويه و لامي على ال iom وحقيقه القول اجاني الي يسموه ال iz  نمبر اريد اعرف بعد شراح اتطول العمليه وشنو الخطوات التاليه بعد الحصول على iz نمبر ... وهل وجودي بامريكا ينطي دفعه للمعامله الهم اي تسريع بعض الشي لان اني ما عندي اي خبره بمعامل اللجوء بس اسمع انه اذا اكو واحد يكفلهم بامريكا يسهل الموضوع شويه .... ردوا عليه باسرع وقت فدوه اروح الكم لان اني اهنا جسد وروحي ابغداد ومستعد ادمر كل حياتي وارجع لبغداد اذا موضوعهم ما صار .... جزيل الشكر الكم

اخوكم العراقي ابو محمد

[المهندس سيوفي]

اخوية ابو محمد
بارك الله بيك على مشاعرك الصادقة تجاه والديك وربي يسهل امرهم مدام انت ولد بار تجاهم
ماطول انت بامريكا وعندك الكرين كارد وهمة حصوا الاي زي نمبر --- اذن الامور ماشية عال العال والسالفة كلها مسالة وقت لا اكثر ولااقل--- وصحيح بالفعل ماطول انت هناك امورهم راح تسهل بالتاكيد لان همة ميحتاجون قصة تهديد ومن هاي السوالف --- هم متقدمين للبرنامج باسمك وانت اصلا هناك وواصل امريكا  يعني المسالة كلها فقط روتين يمشي لا اكثر --- همة الاي او ام صحيح بطيئين بس دنلاحظ بالفترة الاخيرة اكو تسريع بالمعاملات واجراء المقابلات فان شاء الله خير

ابقى هناك واطمئن وان شاء الله همة شكم شهر ويكونون يمك ويلتم شملكم ويرتاح كلبك

اتمنالك التوفيق

[nickazawee]

صدكني والله دمعت عيوني من قريت جوابك اني جدا ممنون الك وشاكر فضلك على الرد عليه صدكني والله احس انه اني لاشي بدون رضاهم عني وكل امريكا متحلا بعيني من غير رضاهم عني .... انشاء الله تتحقق اماني كل العراقيين بالاستقراروالي يريد السفر  الله ينطيه الي يتمناه يارب .... شكرا الك مره ثانيه الله يرضى عليك

اخوك ابو محمد

[الحافي]

اخي ابو محمد انشاء الله يلتم الشمل عن قريب وفعلاً هي مسئلة وقت ليس الا ...

تحياتي الك واتمنالك الموفقيه في مشوارك


اخوك الحافي

[ســـرى]

يارب يجمع شملكم وتشوفهم باقرب وقت.اخوية العزيز ممكن تكوللنا شلون سويت المعاملة؟يعني انت دزيت الايميل للiom؟ وبلكي تشرحلنا عن الخطوات ربي يبارك بيك.

[nickazawee]

عيني سرى ممنون الك على الرد اني بديت بارسال سؤال للاي او ام اسال بيه اذا من حقي اقدم لاهلي يعني امي وابويه وجاوبوني بالتاكيد تكدر وكالولي دز المستمسكات مالتهم ومالتك الي هيه الهويه  والجواز و "البايوكرافيك داتا" الي هيه عباره عن معلومات عامه عنا احنه الثلاثه ودزولي وره 5 ايام الكيس نمبر وسؤال عن رقم تلفوني الي يكدرون يتصلون بيه من خلاله .... وصارلي حوالي 20 يوم منتظر الرد يارب ميطول اكثر لان الواحد تلفت اعصابه من معامله الاس اي في  على ما كملت ... بس الحمد لله ادعو  للجميع بالموفقيه ... بس سؤال شنو هيه الخطوه التاليه ؟؟ واني ممنون الك ..

[ســـرى]

والله اخوية اعتقد راح تمشي امورهم عادي مقابلات وفحص وان شاء الله ما يتأخرون بالسفر بس للامانة اني سألتك لان ما اعرف شلون الخطوات وياريت توافينا من يصير عندك تطورات موفق ان شاء الله.

[nickazawee]

تدللين بعيوني شي يصير اني اخبرك واني الممنون