السفر من سوريا الى الاردن

[ابو رافد]

السلام عليكم اخواتي واخواني,


       هل باستطاعة العراقي المقيم في سوريا الحصول على فيزا الى الاردن من قبل السفارة الاردنيه في سوريا ؟والف شكرا يااخواني الطيبين

[mys]

السلام عليكم
نعم اخى بسنطيع العراقي المقيم في سوريا من الحصول على تاشيرة الدخول من الاردن الى سوريا وهي على نوعين الفيزة التي تطلب عن طريق البريد السريع اي الفاكس وهي مقابل ثمن وتستغرق الاجابة بالقبول او الاعتذار خلال فترة الاسبوعين والثانيةعن طريق البريد الاعتيادي وتستغرق اكثر من الشهرين  ونتمنى لك السفر السعيد

[ابو رافد]

الف الف شكر mys والف رحمه على والديك

[mys]

تدلل اخي العزيز واي استفسار احنة بالخدمة

[مهاجرين بلا حدود]

اخي الكريم
الاخ سايم ماقصر بالتوضيح وحبيت اضيف الك هذه المعلومة

التقديم سهل ولكن ... هل اقامتك سنوية (صاحب ملك او اقامة عشائرية او اقامة صحية او اقامة يو ان او .....)

اذا كانت سنوية ام الكارت تكون اضبط بالتقديم واحتمالية الحصول على الموافقة اكثر من غيرها
اذهب الى السفارة وشاهد الاستمارات على لوحة الاعلانات التي فيها الاسماء المرفوضة وقارنها بالموافقات ...ليس هناك نسبة كما اذكر ...

اضبط شي
 عندك شخص مقيم في عمان ويقيم لك دعوة (فيزة دخول ) ويكون هو الكفيل لك

تحياتي
ابو محمد .....عمااانــ-ـ_-_-ـ_-

[rafid82]

أخي الكريم اني دخلت من سوريا الى الاردن  بعد ان يأست من التوطين مال سوريا 

أخي الكريم تروح للسفارة الاردني بالمزه  و تاخذ وياك الجوازات  الجنسية شهادة الجنسية  و 3 أو 4 صور لكل شخص و اهم شئ تكون عندك أقامة سنوية لان نسبة القبول  بها 90 % 
أخي الكريم اهم مافي الفقرة انه من  تروح  للسفارة اكو بصف السفارة استنساخ خلي هو يستنسخلك شنو المطلوب لان يعرف شنو الترتيب
بعدين من تدخل جوه راح ينطوك أستمارة تمليهه واهم فقرة  اكو  بالاستمارة سبب الدخول للاردن اني بوكتها سويت سبب الدخول  للعلاج و سويت تقرير طبي  وترة حتى بالحدود يسألوك أذا جاي عن طريق البر لان اني دخلت  من سوريا للاردن عن طريق البر بالسيارات  المهم

شغلة ثانية الموظف بعد ان تملاء الاستمارة راح يقول لك أتريده بالبريد  لو بالفاكس طبعا الفاكس اغلى  بس أسرع اني طولت شهر اما بالبريد فأنت وال 6 أشهر

راح بعدين ينطوك وصل هذا الوصل تراجع بي السفارة حتى اتشوف مقبول لو لا  وان شاء الله تجي موافقه واذا تريد تجي عن طريق البر  قول لي  حتى انبهك على شغلات  بالحدود لان اني  أبو الحدود الظابط مامصدك قال لي شنو لازم عندك  واسطة بالسفارة  و انطوك فيزا لان يقول صار فترة طويلة محد جاي من سوريا للاردن  ههههههه

شغلة ثانية مهمه اذا ان شاء الله تسافر  ترة اهم شئ اكو البطاقة الوردية اول مادخلت لسوريا أذا تتذكر  هاي راح اطلبوهه منك بالحدود و كلش ضرورية طبعا مع المصاري
وبالتوفيق
أخوك رافد

[bobon]

ااشكر الاخوان سبقوني بل المعلومات واشكرهم جدا

1- السفارة الاردنية موجودة في المزة (نزلة جامع الاكرم)

2- بل البريد السريع (اي الفاكس) طول اسبوعين فقط

3- بل البريد العادي (اي مراسلة) طول 20 يوم الى 25 يوم

4- اذا  كنت تعمل ولديك برنامج هجرة (اي -  او - ام ) يمكنك التراسل مع الهجرة الدولية في عمان لتسهيل الدخول وبدون فيزة الى ان تصل المعبر مثل معبر جابر يعملون لك فيزة شرط ان تقول لهم انا اتي عن طريق البرنامج    ----------- وهذا ما حدث معي  اشكر الجميع

[ابو رافد]

عمي شنو انتو,تاج على الراس قليله بحقكم ياناسي ياطيبين,الله يحفظكم جميعا ويسهلكم امركم اللهم امين

وشكرا والف شكر للاخوان الطيبين العزيزين للاخ مهاجرين بلا حدود الطيب,والاخ bobon العزيز,والاخ Rafid 82الوردة.

واني عندي اقامه بالحقيقه ام الكارت مال مدارس لان اطفالي الثلاثه بالمدارس,وناوي ان شاء الله وبقدرته ان ازور اهلي لان جايين من الامارات ونرمض سويه هناك ان شاء الله,ومرة اخرى الف الف شكرا ياغالين ياطيبين.

اخوكم
ابو رافد