اخواني الاعزاء السلام عليكم
اليوم حبيت ان ادخل الراحة والثقة لقلوب بعض الي دينتظرو اميركا مثلي بس خايفيين او مترددين من الي ديسمعوا داخل وخارج عينكاوا الي حقيقة اكو اعضاء من الموجودين بالخارج ديذكرون بعض الاشياء السيئة الي تعرضولها بدون التفكير بالتأثير النفسي الكبير الي يتركه على الي دينتظرون السفر وهمة بلة شي خايفيين بدون اي مساعدة
........... اني راح اكتب حقائق اعرفه وعايشها وقسم سامعها عسى ولعل تفيد قسم من الي ديمرون بحالتي:
1- التوكل على الله وصلاة الاستخارة (للاخوان المسلمين) في الخطوات المقبلة... رب العالمين بالقران يكول (هُوَ الَّذِي جَعَلَ لَكُمْ الأَرْضَ ذَلُولاً فَامْشُوا فِي مَنَاكِبِهَا وَكُلُوا مِنْ رِزْقِهِ وَإِلَيْهِ النُّشُورُ) الكرة الارضية كلها ارض رب العالمين مو بس العراق ( مع حبي واعتزاي ببلدي .....ولكن حسبي الله ونعم الوكيل على كل من له يد بالي ديصير) والرزق بالعراق وبغير العراق من رب العالمين.
2- اخواني اني عندي شغل زين وعايش زين ولله الحمد بس العيشة مو اكل ونوم........الانسان لازم يحس انهو من يقدم الواجبات الي علي لازم يحصل حقوقة مو نمشي بمذلة نخاف من خيالنة نروح دائرة نبتلي على عمرنة اذ عدنة معاملة ننذل الى حد ما معقول ولا مقبول .
3-على المستوى المادي اني اخوان مهجر وعفت بيتين مالتي ومال اهلي ومأجر هسة بما يعادل 780 دولار يعني بامريكا يجوز احصل اقل او نفس السعر و وكهرباء والله لان اكو اطفال 250000 دينار يعين اكثر من 200 دولار يعين قائمة الكهرباء بامريكا اكيد متوصل 200 دولار وغير مصاريف وبغداد صارت اغلة حتى من عمان يعني شي عجيب غريب والله كيلو اللحم ب 14 دولار؟؟؟؟؟؟؟
4- اذا احنة جيل ستينات وسبعينات وثمانينات شفنة شوية تعليم مقبول وعيشة مقارنة بهسة مقبولة بس اطفال هسة شراح يتعلمون وشراح يتثقفون بهيج مجتمع زين الله يرضه تشيل ابنك هسة تودي بمستشفى من مستشفيات العراق والله كفر تهدة بيد واحد من اطباء هسة والله دا اسمع عن حوادث واخطاء اطباء تصفن والله على مأساة المستشفيات الله لاعوزكم على دخلتها.
5-القانون ما اعتقد اكو انسان ميحب يكونلة ظهر وماكو احلة من القانون ظهر للانسان......احنة هنا اذا حرامي طب بيتك تلزمة يجوك عشيرتة يريدوك تتنازل وفصل ياخذون لو يقتلوك والمن تشتكي؟؟؟ اذا الشرطة والجيش همة ما شاء الله ....ماكو تمسح ايدك بالحايط احسن.
6-والله اخواني اقاربي دينتظرون يحصلون الجنسية الالمانية علمود يجون لاميركا تدرون ليش ؟؟؟؟لان يسموها ارض الفرص تدرون ليش يسموها ارض الفرص؟؟؟؟ مو لان مساعداتها مثل كندا او اوربا ولا لان اول ما توصل راح ينطوك شغل وبيت وسيارة والحياة وردي بس امريكا قارة ودولة عظمى والنسان هناك ممكن يتحول من لاجئ فقير الى مواطن امريكي متمكن مادياً يعني الي يفتح اسواق ويتعب عليها ممكن تصير عدة محلات او سوبر ماركتات والي يفتح فيتر ممكن يصير صاحب محطة وقود وسوبر ماركت وصيانة جبيرة لان الموضوع هناك يعتمد على تعبك مو على الواسطة والقرايب والرشوة والقانـــــــــــــــــــــــــــــــــــــــــــــــــون يحميـــــــــــــــــــــــــــــــــــــــــــــــــــــــــــــــــــــك واعيد واكول هاي اهم نقطة.
7-حادثة احب احجيها....صديقي يشتغل بانترنت كوفي كاشير ...... دخل علي واحد شاب خليجي يدرس هناك( مراح اذكر الدولة حرصا على مشاعر اخوتنة العرب وموكل اصابعك سوة) هو وسيارتة والذهب والمناضر والترتيبات.... المهم كعد على حاسبةحط رجل على رجل وكلة لصديقي ( انتة صديقي جيبلي كوكا ) راحلة صديقي طيح حظة كلة ترة هسة اخابر الشرطة واكلهم هذا عنصري ويدور عبودية وتفرقة اول شي هنا تخدم نفسك بنفسك واذا رحت مكان ثاني اطلب بأدب ترة اذا اني سامحتك غيري ما يسامحك ( ولا تعليق )
8- اذا حصلت جنسية امريكة وعندك رغبة ترجع تشتغل في دول قريبة على العراق او قسم يريدون يربون ولدهم بدول اسلامية
فماكو داعي احجيلككم على فرق التعامل بدول الخليج ومصر وغيرهاو فرق الرواتــــــــــــــــــــــــــــــــــــــــــــــــــــــــــــــب والي ضيع من عمرة 8 سنين ورة 2003 بضيم العراق اعتقد يتحمل 5 سنين ((((ضيم)))) اميركا علمود يصير عندة جواز.
9-اطفالكم تريدوهم يكبرون ويتعلمون بالعراق (((الحالي)))؟؟؟؟ من يتمرضون لاسامح الله تودوهم لليرموك؟؟؟؟؟؟؟
10- جم واحد فكر بالفرصة هاي شكد قيمتها.....تدرون موظفي ال IOM العرب بمصر والاردن (عدا الطيبين) يتخبلون من يشوفون عدنة هاي الفرصة وهمة لا وحتى قسم يسون مشلكل الى درجة ما.
اخواني الحجي هواية بس الي مرعوب من الروحة خلي يفكر وترة انتة مرايح للسجن روح شهرين 3 معجبك الوضع جوازك بجيبك ارجع للعراق وحتى فلوس الروحة لاتنطيها والعراق موجود بس فرصة الروحة لاميركا ما موجودة وتحصل لاي انسا واكو ناس مستعدين يدفعون عشرات الالوف علمودها
مع شكري وتمنياتي للكل بان يجدوا هدفهم ويحققوه ويريحوا انفسهم ويشعروا بالرضا
.
