زوجتي ام سعدون ( اختكم ) سألتني سؤال وماعرف الجواب : جاوبوني

[ابو سعدون]

احبابي اليوم ويوميا نحجي انا وزوجتي بموضوع اللجوء والحمد لله كل ما يدور بذهنا من اسئلة لكيناله جواب شافي وكافي ,, ماعدا اهم سؤال اليوم سالتنياه قبل شوية ومكدرت الكاله جواب وكلتلها خلي انشوف الاخوة بلمنتدى اللي عايشين بمريكا هم اصحاب خبرة : السؤال :  اذا احنا طبينا لمريكا وبعد اسبوع شهر شهرين ما اعجبتني الحياة هناك مثلا , وردت منك نرجع للعراق ؟؟ شلون اذا ردنا نرجع وما عدنا فوس وتكاليف الرجعة الى الاردن او العراق منو راح ايرجعنا ,,,
    اخواني والله اريد جواب مضبوط 100 مية لنو بصراحة هذا سؤال كلش مصيري وحيوي ومهم ,,, جاوبونا الله ايخليكم قبل ما تقلب زوجتي وتعوفني اسافر لوحدي ههههههه .

[ابو عبد الله التكساسي]

اخي بهايه الحاله لا تفكر بفلوس الرجعه فقط\
فكر بقرض السفر الي راح توصل بيه لامريكا لان هذا دين عليك من الحكومه الامريكيه وهذا اهم من اي شي ثاني

يعني صعبه جدا اذ ما تسدد هذا الدين
وبعدين اكو منضمات انسانيه ممكن تساعدك بهاي القضيه ولكن بالرجعه فقط ويبقى دين او (( قرض السفر )) قائم بذمتك والي اذا رجعت للعراق وما سددته مراح تكدر تدخل امريكا مره ثانيه ابد

[ابو الحسن]

تاج راسي ابوسعدون
ابوسك من راسك
لاتخلي فكرةالرجوع والفشل ببالك واتكل على الله
خلي هدفك وان وي
اكون او اكون
مال لا اكون شيلها من قاموس عمي
وتوكل على الله
ابو الحسن

[angie-dawood]

http://www.iraqiembassy.us/consulate-Arabic.htm  

اخي هاي الرابطة بيها المعلومات للمكان الي يساعدون الناس الي مايريدون يبقون بامريكا  رغم هما ذاكرين هنا فقط من دول الجوار لكن اذا تتصل بيهم راح يساعدوكم بدفع تكاليف التذاكر لانه اعرف ناس هنا رادو يرجعون اتصلوا بيهم ورجعوهم للعراق على حساب السفارة العراقية ....  بس  انشاءلله محد يحتاجها لكن اخزنها يمك خاف يوم شخص احتاجها اكو ناس ماتتحمل الغربة مو شرط لاجل المعيشة ماكدروا يتحملون اكو هواية حالات تحصل ويفضلون الرجوع المهم انشاءلله محد يحتاجهم وانت هم اخي بعون الله ماراح تشوف بامريكا الا كل الخير
بالتوفيق

[احمد الرحال]

يرحم والديك ابو سعون انت خلي توصل والله كريم لان رب العالمين ماينسة عبادو وانشاء الله تصل وتتوفق وتلكة شغل وتستقر وتنسة الرجعة للعراق

[Robin Hood]

السلام عليكم
اغاتي ابو سعدون الحكومة العراقية ملتزمة فقط بالعراقيين الي بدول الجوار مثل متفضلت الاخت انجي ولكن تبقى حالة واحدة فقط بان ترسل ايمل او تتصل بالسافرة العراقية بواشنطن واتككللهم على وضعك وهمه راج يرفعون كتاب للمركز(بغداد)وعلى اثر هذا الشي اما اتوافق الحكومة العراقية او لاء ولكن لحد هل اللحظة مسمعت بان الحكومة العراقية مرجعة اي شخص على حسابها عدى دول الجوار فققققط وانتة من هسه شايل هم للرجعة لعد اشعندك رايج ياخوية خلي انكون واقعيين !!!!!وجار وراك العائلة الكريمة قرر قبل متخطو اي خطوة وان شاءالله رب العالمين يقدملك مابية الخير بجاه هل الشهر الفضيل

ان مع العسر يسرا

robin - cairo

[adnan nsr]

يالحبيب ابو سعدون اذا انت من هسه تفكر ترجع لعد اشلون راح تستقر والله احس انك راح تبهذل نفس انته والعائله واذا تريد راي اذا محد مهددك ظل بالعراق واستقر وافضل الك وداعتك لو انا حياتي مستقر والله ما اعوف العراق بس شبيدي واكول الله كريم صفي النيه حبيبي ابو سعدون واتوكل ولا اتفكر بالرجع هو انت هسه اوصل

[مــــان]

ابو سعدون اذا حتحط بالك الفشل والرجعة لعد من هسه اكعد بالعراق احسن الك

لان اني اكلك حتوصل مراح راسا ترتاح وتلكة الشغل كدامك انت حتروح لازم تتعب ودور وتاخذلك مدة سنة ونص علمود تستقر

وعلى حجيك لتزعل مني ماعتقد حتكدر تقاوم هناك

مع احترامي وتقدير

yasir - cairo

[موفق الو منار]

عاش حلكك اخوية ابو الحسن هذا الكلام المضبوط

[جوني جاك]

والله كلام الاخوان انو لتخلي الرجعة ببالك صحيحة
بس تدرون الواحد من كثر الانتضار التفكير ياكلة يكوم يفكر بالشيء مو بس بالرجوع
جوني جاك

[kunda]

شوف عزيزي هو اكو اكثر من طريقة علمود ترجع بلوشي بس لازم اتخلي ابالك انه باي باي امريكا الى الابد ورا هذا القرار

[ابو الحسن]

عمي جوني
الله يساعدهم
كلام الحبايب صحيح وكلامك احلى انه الانتظار مرات يخلي الواحد يفكر رونج سايد
بس تدري عمي خلي اسولفلك
كل واحد وظروفه
يعني اللي عايش حياة مستقرة والله مسهل عليه بالعراق( مع اختلاف الراي بتعريف وتحديد معني الحياة المستقرة)
مو مثل اللي ايدك والكاع
خلي شوية نضحك اسمع :
واحد هندي عنده تكرمون قرد
القرد شوية وكيح
الهندي يجي للقرد يكوله ولك يا قرد لو تصير عاقل لو ادعي ربي عليك يسخطك
القرد طكت روحه وكاله تعال بوية هندي
ماتدعي عليا وتخلصني
اكو انكس منها بعد انه قرد وانته هندي
والامثال تضرب ولا تقاس
واسف من تاج راسي ابو سعدون لان من خلال موضوعه كعدنا نسولف انه وياك بس بالتالي هي لفائدة الجميع
ابو الحسن

[kunda]

ها ونسيت اكولك انه اكو هوايا ناس راجعين للعراق بعد بقاءهم فترة بامريكا وهسه همه يعضون الاصابع ندما ويحاولون بكل الطرق والوسائل انه يرجعون مرة اخرى الى امريكا بعد ان اصطدموا بالواقع هنا وبعد ان ((اتقشمروا ))من العراقيين اقاربهم  هناك اللي وعدوهم بان يرجعون معاهم  لكن لبسوهم وبقوا ههههه

[جوني جاك]

ها ونسيت اكولك انه اكو هوايا ناس راجعين للعراق بعد بقاءهم فترة بامريكا وهسه همه يعضون الاصابع ندما ويحاولون بكل الطرق والوسائل انه يرجعون مرة اخرى الى امريكا بعد ان اصطدموا بالواقع هنا وبعد ان ((اتقشمروا ))من العراقيين اقاربهم  هناك اللي وعدوهم بان يرجعون معاهم  لكن لبسوهم وبقوا ههههه

عني هو هذا الحجي الذهب
اني اعرف اكو ناس رجعوا للعراق من دول اوربية
اول ايام ( كال الوطن وحجة الوطن وشوفتكم عمي بالدنيا )
نكلة احجيلنة يمعود شكو ماكو الحياة شلونهة
يكول لا ابد البلد ماكو احلة منة
واني متقصد ورة اكثر من اسبوع اروحلة
يعض اصابع الندم
ويحجي ويسولف على المكان اللي كان بي
المهم الواحد يحسبهة صح لان الرجعة للعراق بعد ما وراهة رجعة لامريكا ابد
وتقبل تحياتي اخوية كوندا
مع الاعتزاز لصاحب الموضوع
جوني جاك

[يقظان]

عيوني ابو سعدون انته وام سعدون مو علمود شي بس الخاطر سعدون ومستقبله لا تباوعون ليورة ترة الله موجود وهوة يرزق من يشاء وباي مكان فعيوني انته شيل هاي الفكرة من بالك وفكر شلون تاسس لوضعك الجديد ومرة ثانية اكلك الخاطر سعدون هذا الوردة شنو ذنبه خطية ..... تحياتي الك والى ام سعدون وسعدون الوردة الله يخلي الك .... اخوكم يقظان

[مشلوع كلبي]

اذا انت وام سعدون اتفكرون بمستقبل ابنكم لازم ماتفكرون بالرجعة ولازم اتخلون ببالكم انو تتحملون كل شى لاجل مستقبل الولد واحنا كلنا من نوصل بالبدايه نواجه صعوبات كثيرة بس اتغلبنا عليها ولازم انتو هم اتخلون ببالكم اذا وصلتو تكدرون على الصعوبات ومهما اتكون فهو انت بس اتحس بالامان هذا كافي

[ابو سعدون]

من اعامق قلبي اتقدم بكل الشكر والمحبة والاحترام لكل من شارك بالرد ع الموضوع وتسلمووووووووون ايها الاحباب الاوفياء ,,  وانشاء الله الى امريكا ,, والله موجود وسيكون شعاري الله موجود ,, الله مع الكل .

[مشلوع كلبي]

واخيرا ابو سعدون يعنى قررتو السفر بالتوفيق انشالله

[أصيل]

كلمة أقولها ولن أسحبها
كل من تعلق بالعراق....خسر

[ألمــــدرس]

كلمة أقولها ولن أسحبها
كل من تعلق بالعراق....خسر

صدك أصيل  !!!!

[ألمــــدرس]

أبو سعدون
بس سؤال بس تجاوب بداعة سعدون عليك
اذا الاخوان كالولك لا متفيدك ومتكدر ترجع بعدين للعراق يعني كان بطلت ومتجي لأمريكا؟؟؟؟
وبالمناسبه لحد الان ولا واحد من الاخوان نطاك كلمة مضبوطه على فلوس الرجعه مو لو مو مو.

[حبيبي بحار]

اخوية العزيز

اذا خليت امل بالعودة فصدكني مراح تنجح هناكة، من تطلع خلي ببالك بعد ماكو رجعة ، انته راح تتكيف وية الوضع، راح تتعب من البداية بس راح تتعود، اني بالنسبة اليه حاطة بالي ماكو بعد رجعة.

الله يوفقك انته واختي ام سعدون

اختك حبيبي بحار

[ابو سعدون]

احبابي ايها الاصحاب :   قرار صادر من وزارة الداخلية ( ام سعدون ) ,, قرار رئاسي  ابو سعدون وعائلته الى امريكا ع القليل الكهرب والماء والدواء متوفر ,, والشوارع مابيها طسات ولا مصدات ولا جدران كونكريتية ,
       احمد الله اننا قررنا وبشكل قطعي نهائي جازم بدون اي تردد ( ان نحيا ونموت في امريكا )  ,,,, اكرر حبي وامتناني لكل المشاركين بلموضوع وتحية لغسان الاشقر  و اختك حبيبي بحار وبقية الاخوة من اولهم الى اخرهم .

[hussam2010]

احبابي ايها الاصحاب :   قرار صادر من وزارة الداخلية ( ام سعدون ) ,, قرار رئاسي  ابو سعدون وعائلته الى امريكا ع القليل الكهرب والماء والدواء متوفر ,, والشوارع مابيها طسات ولا مصدات ولا جدران كونكريتية ,
       احمد الله اننا قررنا وبشكل قطعي نهائي جازم بدون اي تردد ( ان نحيا ونموت في امريكا )  ,,,, اكرر حبي وامتناني لكل المشاركين بلموضوع وتحية لغسان الاشقر  و اختك حبيبي بحار وبقية الاخوة من اولهم الى اخرهم .

عيوني ابو سعدون هوة هذا القرار والحجي المضبوط

[ألمــــدرس]

احبابي ايها الاصحاب :   قرار صادر من وزارة الداخلية ( ام سعدون ) ,, قرار رئاسي  ابو سعدون وعائلته الى امريكا ع القليل الكهرب والماء والدواء متوفر ,, والشوارع مابيها طسات ولا مصدات ولا جدران كونكريتية ,
       احمد الله اننا قررنا وبشكل قطعي نهائي جازم بدون اي تردد ( ان نحيا ونموت في امريكا )  ,,,, اكرر حبي وامتناني لكل المشاركين بلموضوع وتحية لغسان الاشقر  و اختك حبيبي بحار وبقية الاخوة من اولهم الى اخرهم .

اي هيجي الحجي

والله من تنوي على خير الله يساعدك لكن من تضل كلساع برأي متحصل شئ.

وإن شاء الله تتسهل اموركم ويارب كل مره متفقين وتعرفون مصلحتكم وين والباقي على الله.

أخوك
غسان

[جوني جاك]

احبابي ايها الاصحاب :   قرار صادر من وزارة الداخلية ( ام سعدون ) ,, قرار رئاسي  ابو سعدون وعائلته الى امريكا ع القليل الكهرب والماء والدواء متوفر ,, والشوارع مابيها طسات ولا مصدات ولا جدران كونكريتية ,
       احمد الله اننا قررنا وبشكل قطعي نهائي جازم بدون اي تردد ( ان نحيا ونموت في امريكا )  ,,,, اكرر حبي وامتناني لكل المشاركين بلموضوع وتحية لغسان الاشقر  و اختك حبيبي بحار وبقية الاخوة من اولهم الى اخرهم .

يعني انت كتبت الموضوع يوم 6 وقررت يوم تسعة
يعني باربعة ايام خصمتهة للشغلة
عمي لو ترشح انت للحكومة العراق بعد محد ميكدر يوصلة لان قراراتك سريعة وعن دراسة
اتمنالك التوفيق من كل قلبي حال الوصول الى امريكا
جوني جاك