السلام عليكم
آسف لكون الموضوع كلش طويل و هذا بعد الإختصار ... لكن المعلومات هواية و مو مال أختصرهه أكثر.يوجد سببين لطرحي لهذا الموضوع ... السبب الأول و الأهم هو لفائدة اللاجئين العراقيين الواصلين لأمريكا و اللي ما سمحتلهم الفرصة أن يعرفون بمثل هاي المواضيع اللي يتم و (للأسف) التعامل بيهه بصورة سرية بين أبناء الجالية و أعرف هواية ناس صارلهم بأمريكا سنة أو سنتين أو حتى أكثر و مسامعين بهاي الشغلات .. و السبب الثاني هو لأني لاحظت أكو بعض الناس بسبب جهلهم باللي يدور حولهم بأمريكا يخلطون بين مجمعات الـ Low Income و المجمعات العادية اللي تكون أسعار الإيجار بيهه رخيصة مقارنة بأسعار باقي المجمعات ... و المشكلة أنه هذوله الناس اللي يجهلون هاي المعلومات هم بالأصل سامعين راس حجاية و مسامعين باقي تفاصيلهه و لهذا تشوفوهم خابصين روحهم و يسوون نفسهم علماء بالقوانين الأمريكية و هم كلشي ممفتهمين من الموضوع.
أولا: مجمعات الـ Low Income
هي مجمعات حالهه حال كل باقي المجمعات السكنية و تحتوي على كل ما تحتويه باقي المجمعات من خدمات ... يعني لا تتصورون بأنه كون هذه المجمعات هي لذوي الدخل المحدود معناها رح تكون تعبانه لو ما بيهه خدمات أو خطرة !!!!! بالعكس فإن أكثر هاي المجمعات هي مجمعات جديدة الإنشاء و نظيفة كلش. و شوفوا هذا الرابط اللي يحتوي على صور من بعض هاي المجمعات:
http://www.hud.gov/local/ca/community/slideshowsandiego.cfm?slidenum=1و طبعاً الصور على شكل سلايد شو فكل اللي عليكم هو أن تدوسون السهم حتى تشوفون باقي الصور .. و بالنسبة لهاي الصور فهي للمجمعات الموجودة في سان دييغو - كاليفورنيا.
ممكن التقديم للسكن بهاي المجمعات أونلاين أو عن طريق البريد من أي شخص شرط أن تتوفر عنده الشروط المطلوبة و أهم هاي الشروط هي:
1- أن يكون من ذوي الدخل المحدود ... يعني الدخل السنوي اللي يدخل له أقل من الحد الأدنى لمتوسط الدخل السنوي لباقي الناس اللي يسكنون بنفس منطقته أو لا يتعدى 80% من نسبة الحد الأدنى لمتوسط الدخل.
2- مصاب بعوق يمنعه من العمل.
3- عمره أكثر من 62 سنة و دخله السنوي أقل من 50% من الحد الأدني لمتوسط الدخل السنوي.
طبعاً مو شرط تتوفر كل هاي الشروط ... و يكفي أن يتوفر شرط واحد منها للتقديم.
هذا البرنامج يسموه HUD's Public Housing Program و معناه: برنامج التسكين العام (الحكومي) لوزارة الإسكان و التطوير الحضري الأمريكي. و من مساويء هذا البرنامج هو كثرة اللي مقدمين عليه ... يعني الواحد من يقدم عالبرنامج رح يخلوه بقوائم إنتظار الى أن يتوفر السكن المناسب حسب متطلبات المتقدم (يعني السكن لازم يكون مناسب لعدد الأفراد الساكنين أو إذا كان المستفيد معوق على كرسي متحرك يخلوه بسكن ما بيه عوائق بالباب أو بالشقة و اللي نسميهه بالعامية "دجّة").
و هذا رابط موقع الوزارة و البرنامج:
http://portal.hud.gov/portal/page/portal/HUD/topics/rental_assistance/phprogبعد حصول الموافقة و السكن بأحد هذه المجمعات رح يكون الترتيب أن يدفع المستفيد مبلغ بسيط جداً ما يتعدى 300$ لشقة من غرفتين و صاله و منافعها .. علماً أن السعر الحقيقي لهذه الشقة مو أقل من 1200$. و يقوم موظفي البرنامج بالتجييك السنوي على الوضع المالي للمستفيدين حتى يقررون مدى أهلية المستفيدين بالبقاء بهذي المجمعات أو لا.
2- المجمعات العادية و اللي أسعارهه رخيصة.
المجمع اللي أسكن بيه حالياً هو خير مثال على هاي المجمعات و هو ليس مجمع Low Income لأن حسب ما ذكرت بالنقطة السابقة بأن مجمعات ذوي الدخل المحدود ميصير واحد توه جاي لأمريكا يسكن بيهه لأن لازم يقدم و ينتظر بقوائم الإنتظار الى أن يوافقون عليه. بالنسبة للمجمع اللي أسكن بيه و المجمعات المماثلة له هو حاله حال أي مجمع ثاني و لكن أسعار الإيجار تكون منخفضة قياساً بباقي المجمعات و السبب هو فرق الخدمات ... و كل ما قلّت الخدمات قل سعر الإيجار .. و طبعاً الخدمات الأساسية موجودة بالكامل لكن الخدمات الكمالية هي اللي تنقص المجمع ... الخدمات الأساسية المتوفرة تشمل:
ا- مكتب إدارة للمجمع
ب- بارك للسيارات
ج- بوابة خارجية تفتح و تقفل بالريموت (عاطلة حالياً هههههه)
د- غرفة لغسيل الملابس
ه- رفع النفايات بصورة دورية مرتين بالإسبوع
و- صناديق بريد لكل شقة
ز- صيانة يومية ... و بالنسبة للحالات الطارئة (مثل عطل كهربائي أو نضوح ماء ... الخ متوفرة 24 ساعة)
ح- تنظيف و عناية بالمزروعات مرتين بالإسبوع مع إبادة دورية موسمية للحشرات اللي تعيش بين النباتات
ط- تدفئة مركزية
ي- ماء حار و بارد 24 ساعة
الخدمات الكمالية الغير متوفرة و تشمل:
ا- التبريد المركزي (لكن بإمكان الشخص شراء مكيف و نصبه على أن ميكون ظاهري .. أي ربطه بالجزء الخلفي من الشقة)
ب- مسبح
ج- ساحة مخصصة للعب الأطفال (مراجيح و غيرهه)
د- صحون الستلايت (يمنع تركيبها)
ه- كراج مع سقيفة للسيارات.
و- مكتبه خاصة بالمجمع أو مركز إنترنت
هاي المجمعات يخصصوهه أكثر شي للاجئين اللي تخصيصاتهم المالية من دائرة الولفير غير كافية لتغطية نفقات الإيجار و باقي الخدمات .. و لازم تكون المنظمة هي اللي تكفل اللاجئين حتى يسكنون بهاي المجمعات و لهذا فاللي عنده كفيل ميسكنوه بيهه.
مساويء هاي المجمعات ... هو وقوعهه بمنطقة غير آمنة نسبياً .. لكن لا تتصورون بأن المنطقة موبوءة أو خطرة كلش ... فهي أأمن من أأمن منطقة بالعراق .. و أي شي يصير متشوف إلا و الشرطة تكوموا يمك ... و هاي صارلي سنة ساكن هنا و مشفت أي مشكلة صارت.
محاسن هاي المجمعات ... فرق الإيجار ... و اللي يكون مو أقل من 400$ - 600$ و أكيد تفيد الواصلين الجدد الى أن يستقرون بعمل دائمي و راتب زين و ذاك الوكت ينتقلون للسكن بأي منطقة تعجبهم. يعني هو نقطة بداية و ميفيد للسكن الدائمي.
3- برنامج الـ Section 8
و هو برنامج حكومي شبيه ببرنامج التسكين العام و يتم التقديم عليه أونلاين أو عن طريق زيارة الدائرة شخصياً و مليء إستمارة التقديم ... الطريقة الأفضل هي أونلاين ... و خلال 30 يوم من التقديم يوصللكم كارت من دائرة الإسكان و لازم تحتفظون بهذا الكارت لأن هو الدليل على إنكم بقائمة الإنتظار. اللي إفتهمته عن هذا البرنامج هو أنه بعد صدور الموافقة ممكن الشخص يستأجر أي بيت أو شقة تعجبه و بأي منطقة يريدهه و يكون توقيع العقد ثلاثي بين المؤجر و المستأجر و دائرة التسكين ... رح يدفع المستأجر ثلث مبلغ الإيجار و تدفع دائرة التسكين باقي مبلغ الثلثين ... و طبعاً إذا أراد المستأجر بعد فترة أن ينتقل الى سكن ثاني لعدة اسباب على سبيل المثل لا الحصر "زيادة عدد أفراد الأسرة" فممكن أن ينتقل الى سكن ثاني بشرط تبليغ دائرة التسكين لغرض إستمرار البرنامج في سكنه الجديد.
مساويء هذا البرنامج هو فترة الإنتظار الطويلة بعد التقديم و اللي تكون ما بين 4 - 8 سنوات. بس أكو بعض الحالات طلعتلهم موافقة خلال سنتين.
هذا موقع يغطي الأجوبة على كل الأسئلة اللي تخص برنامج Section 8
http://portal.hud.gov/portal/page/portal/HUD/topics/housing_choice_voucher_program_section_8المواقع كلهه باللغة الإنكليزية و مو مال أترجمهه لأن يحتاجلها وقت طويل لكثرة المعلومات اللي تحتويهه.
تحياتي
