مقابلات التعيين في السفارة الامريكية

[اسعد العراقي]

اخواني واخواتي اصحاب الخبرة عندي صديق سالني يوم امس عن كيفية المقابلات في السفارة الامريكية بالنسبة للتعيين بصفة موظفين مدنيين اي انه متقدم قبل ستت اشهر بالضبط والان وصله ايميل فيه موعد مقابلة ولكن لايعرف اي شي عن المقابلة والمشكلة لايعرف اي احد قدم ةوقابل وماهي الاسئلة وخاصتا الاسئلة الخاصة باللغة الانكليزية يعني انكليزيتة موقوية فاذا اي واحد عندة اي معلومات  حتى وان كانت بسيطة ارجو ان يذكرها وبارك الله بالجميع.

[اسعد العراقي]

                                                          يعني معقولة ولا واحد يعرف بهلمقابلات

[Ali from baghdad]

السلام عليكم

بالبدايه مبروك لصديقك وانشالله رب العالمين يوفقه و يسهل امره

عزيزي ، المقابلات بالسفاره ، اتشيب الراس و اتعب و اتخليك تنتظر الى ابد الدهر ، و لو مو مال واحد يشرح كلشي بالعام بس انطيك الاشياء العامه وخطوط عريضه مراح اتاثر اذا انذكرت بالمنتدى العام

لما توصل الصبح حاول من وكت قبل الموعد المحدد ، لان تره ا ينتظرون احد واذا رادوا ينتظرون مو اكثر من 10 او 15 دقيقه بالزايد

الاختبار يكون كالاتي
اول شي امتحان انكليزي الي هو مقر من قبل احد اساتذه جامعه مشيغان الامريكيه ، وحسب ما افتهمت منهم هو احد الاجزاء الداخله في امتحان اللغه الانكليزيه هناك في جامعه مشيغان ، يعني اصلا مخصص للطلاب هناك.
الامتحان هذا تحريري يتكون من 100 سؤال

طبعا الامتحان من نوع اختيار الجواب الصحيح من اصل اربع اختيارات،  ف راح يكون عندك دفتر بيه الاسئله ، و ورقه بيها الاختيارات A/B/C/D وكدام كل اختيار دائره فارغه ، انت تختار الدائره المقابله للاختيار الصحيح وتلونها بالقلم الرصاص وتسويها دائره سوداء.

اول 20 سؤال ، ح تكون عن طريق CD صوت تسمعه وتجاوب على الاسئله ، يعني انتو شوفوا جكد كم نفر دا يمتحن 4/5/6 كاعدين بالغرفه سوه والمراقب يمكم كاعد او واكف او مرات يطلع ، الصوت من خلال ال CD راح يتكلم عن اول جمله ، وانت راح تجاوب السؤال مال اول جمله ، الوقت كافي لان تسمع الجمله و تفهما وتقرا الاختيارات و تختار الشي الصحيح ، بس مو اكثر من هذا ، لان الصوت ما يكرر الجمله و الوقت مو مال تقرا الاختيارات فد عشرين مره ، مره وحده او بالزايد مرتين ووراها تختار.
 اول عشرين عباره عن فهم الحجي ، يعني تستوعب الي تسمعه وتفهمه

ثاني 20 سؤال عن القواعدGrammar  ، ونفس المبدا ، اختيار الجواب الصحيح من اصل اربع اختيارات

ثالث 20 سؤال عن vocabulary  ونفس المبدا مال اختيار الجواب الصحيح من اصل اربع

رابع 20 سؤال عن #$%^&*#$%#$ ما اذكر عن شنو جانت

اخر 20 سؤال ، قطع تتكون من 10 او 15 سطر ، تقراها وتجاوب الاسئله الي جواها ، طبعا انته تقراها ، ووراها يجيك سؤال شنو انطباع الكاتب عن الموضوع ، بحيث تتفاجا انته ، لما يسالوك عن انطباع الكاتب ، طيب اسالوني عن انطباعي اني ، المهم ، هذني اخر كم قطعه والي هو لو 4 او 5 قطع او مقطوعات او اي شي تحب اتسميها ، على كل قطعه يجيك بحدود لو 4 لو 5 اسئله ، بحيث مجموع الاسئله عل القطع يكون 20.

طبعا هذا الامتحان مثل مال titan بس المستوى ربما يختلف ، الاثنين اني امتحنتهن ، مال تايتن بال 2007 وبالكوه كملت الامتحان بظروف صحيه قاهره (يعني جنت امتحن وعيني على الباب بس اريد اطلع من الامتحان)، بس الحمدلله نجحت بيه واخذت بالستينات .
وهذا الامتحان هم امتحنته واخذت بيه بنهايه الثمانينات ، يعني بصوره عامه اشوفه سهل وبسيط و ما بيه اي صعوبه ، بالعكس يمكن الكل تكدر تنجح بيه بس تبقى الدرجه حسب الكفاءه

طبعا وقت الامتحان كله 60 دقيقه / او 90 دقيقه ، صدك ما دا اكدر اذكر الوقت مال الامتحان لان صدك راسي صاير بيه شبه زهايمر وحتى اسمي صاير انساه من الحر ، بس يمكن كل سؤال دقيقه وحده فالوقت المفروض ساعه و ثلث ، اظن هيج شي ...

وره هذا الامتحان تاخذولكم كم دقيقه راحه ، الي يريد يشرب مي او يغسل او ايشي يسوي، وراها اختبار بسيط بالحاسبه ، بس يشوفوكم تعرفون ال Word  و ال Excel ينطوكم ورقه بيها حجي وانتو اتطبوقها بال Word  و وراها ورقه ثانيه  بيه حجي اتطبوقه بخصوص ال Excel ، هذا بسيط ولاتشيله اي هم و الوقت الخاص الهن اثنينهن هو 15 دقيقه لكل جزء يعني الكل نص ساعه.

بين ما همه يصلحون الاجوبه ، يمكن بحدود 15 دقيقه او اقل يكولولكم على النتيجه مال التحريري يعني الانكليزي ، الي ينجح  راح يبقى يسوي مقابله ...

بهل الاثناء هماتين تكدر انته تروح تشرب مي او تغسل او تهيا شكلك للمقابله في حاله ان كفشت شعرك باثناء التفكير مال الامتحان او ماشابه.
انصحك ان تقابل اخر واحد او ابقى للاخير ، وشوف كل واحد جكد يطول بالمقابله ، الي يطول شويه ، ربما ربما بما ، مراح يحصل شي ، الي يطول هوايه ، هذا محظوظ وراح يحصل الشغله.
هذا كل ما في مقابله السفاره ...

الانطباع و نزولا على لسان اشخاص (مو شخص واحد) قابلوا مره و مرتين وثلاثه ، وبخصوص اكثر من post واحد يعني (اكثر من منصب)  وحتى على لسان اشخاص من جوه ، هل التعين يعتمد على الكفاءه 100 %  ، الجواب هو : الكفاءه يمكن تشكل 60 % ، ورغبه ال supervisor الي يقابل 40% لان بديهياَ كل الي يقابلون عدهم كفاءه كافيه وخبره لاباس بيها ، بس يبقى تقبل ال supervisor  وراي الي يقابلك يشكل 40% وربما اكثر في بعض الحالات.

اذا عدك مقابله be cool لاتتنرفز او تنفعل ، تره شي عادي وما بيها شي مميز ، مجرد فشخره و هاله كبيره بجوهر شبه ملئ (ما كلت شبه فارغ علمود لحد يكول دا ابالغ – كلت شبه ملئ) ، يعني روح والهوه بظهرك وانشالله بالتوفيق

علي SIV مرحله بحر الظلمات

[اسعد العراقي]

الاخ على من بغداد اشكرك الشكر الجزيل وممنون منك جدا.