تاجيل موعد الرحلة من قبل الاي او ام ثلاث مرات

[حبيبي بحار]

الاخوان الاعزاء

حبيت انقل الكم حالة صارت لاحد اخواني الي مقدمين على الاي او ام مباشرة، تحددله موعد سفر بنصف الثامن، ثم اتصلوا بيه وكالولة تأجل موعد سفرك الى نهاية الثامن، ثم اتصلو بيه كالولة راح نسويلك تجييك امني مرة ثانية علماً انه التجييك الامني مالته صايرله 3 اشهر يعني ملحك يصير اكسباير، راجع الاي او ام وكاللهم اني صفيت والبيت سلمته على الموعد، ردوا بعد صعود ونزول رجعوا  موعد السفر على نهاية الثامن، خابرته قبل يومين وهوة فرحان وديلم الجنط مالته.

اليوم اتصل بيه ويكولي الاي او ام اجلوني مرة ثانية الى اشعار اخر.

اني هاي الحالة كلش قهرتني لان الواحد ترتفع معنوياته بقرب موعد السفر ثم المعاناة بعد التأجيل، وخصوصاً للناس الى باعت غراضها وصفت امورها وبعديين يجيهم تجييك امني.

الله يساعده واندعوله بكلي الله يفرجها عليه

اختكم حبيبي بحار

[داليا الوردة الوردة]

الله يساعدكم على لعب الاعصاب هذا

اختي خلي يتصل بيهم مرة لخ شنو لعبة هية خوما لعبة هاروح هاتعال

[حبيبي بحار]

والله يا اختي العزيزة

الولد يقهر كام يبجي، اهلة هناك، صايرله 8 سنين مشايف والدته وبنفسه يروح هناك ويبدي حياة جديدة.

الله يصبره ويصبرني ويصبر كل المنتضرين

اختك حبيبي بحار

[angie-dawood]

الله يكون بعونه وبعون الجميع ربي يفرجها عليكم جميعااااااااا

[Mory]

طبعا اني يمكن نزلت 5 كيلوات على هالخبر وبديت اضرب اخماس باسداس ويمكن منا ليوم السفر الى ان يجي.

ما عندي غير بس اكول

حسبي الله ونعم الوكيل

Mory

[لورنس السفاح]

انت من كلامك اختي انه هو لوحده
طيب كيف الحال لوكان وياه عائلة واطفال وباع الاغراض والبيت
شبيهم ذولي ال اي او ام صدك اتخبلوا
وامكن راح يخبلونا وياهم
الله يكون بعونه

[Hanar]

اختي العزيزة الاخ هذا من وين مقدم؟ بالعراق لو خارج العراق

[حبيبي بحار]

الاخوان الاعزاء

اشكركم على ردودكم، الاخ مقدم من عمان،.

اختكم حبيبي بحار

[مينا]

الله يكون بعونه وان شاء السفر عن قريب

اختي المحترمه داليا الورده الورده كولش عجبتني الصوره الي منزلتها ربي يوفقج

سبحان الله

[احمد عباس]

والله يابه صح

اني همين اعرف ولد

صارلهم بالاردن يمكن 11 سنه

يعني تخيلو الاغراض الي عدهم

صفوها كلها وراحو كعدو بشقه مفروشه على اساس ديسافرون وهاي صار 5 اشهر يمكن او اكثر كاعدين بالمفروشه

وهمه ممتوقعين هلكد ينتضرون بحيث حتى البنكات باعوها وهسه بهل حر راحو شترو مره ثانيه




وهاي السالفه ولد ثاني ديسافر عرف بهل امور كال لا خلي قبل كم يوم من السفره ابيع غراضي

راح باع البيت كله مدري كم تلفزيون وثلاجه والمواعين والهوسه كوومه سوالف

يمكن ب700 باعها لان مستعجل



الواحد ميعرف شيسوي يبيع من وكت على كيفه حتى متنباع الغراض بسعر رخيص كلش بس اخاف اطول شغلته


زين يكول ابقيها لحد قبل كم يوم من السفر انوبه تنباع بفلس ونص

حييييييييييييييييييييييييييييييييييييييييره

[حبيبي بحار]

والله يا أخي حيرة والله لا يحير عبده . الله يفرجها على الجميع واني هم وياكم

اختك حبيبي بحار

[Aiham_]

الله يعينه ...  و الله شي محزن بس الله كريم كل تاخيرا و بيها خيرة

[Iraqi Christopher]

لا حول ولا قوة الا بالله، ولهذا انا لا اطمأن و ولا اثق بهم الا حين صعود الطائرة ان شاء الله،

طبعا الا اذا بعد الاقلاع يرجعونة ويكولون تغير موعد السفر!!! شتتوقعون ممكن هذا يحدث؟ كل شي جائز مع ال IOM !!!

[حبيبي بحار]

والله يا اخي البارحة اهلي يكولولي لا تطمئنين الا اذا وصلتي للشقة مالتج هناكة.

يا اخي تخيل القلق الى عايشين بيه.

الله يساعد الجميع

اختك حبيبي بحار

[silver_d]

هيه هاي امريكا ومنظماتها وبعدكم مشايفين شي
الله يصبره للي مصفي ودينظر يجي برجليه على شلعان القلب ...

الموفقيه للجميع
سلفر كالفورينيا ..العراق مستقبلا

[غــــــــزل]

الله يكون بعونة ويصبرة يارب وانشاء الله ينطونة موعد سفر عن قريب يارب

[بنت العراق 84]

لا حول ولا قوة الا بالله وحسبي الله ونعم الوكيل على الي ديصير بالعراقيين من بهذلة
الله يساعدة وربي يفرجها علية بحق هالشهر هذا وخلي يبقة يتصل بيهم ويكوللهم اني صفيت اموراتي كلها شنو متسفروني يعني ادري الواحد بعد حتى من يطلعلة موعد سفر يبقة خايف ليأجلوا لو يكولولة دنجيك عليك امنيا مرة لخ بعد الواحد الا يصعد بالطيارة وتطير بالجو يلة يفرح صدك خاف على اخر لحظة ويكولولة بطلنة والله اني دا اشوف جماعة عمان كلش صايرين مخربطين يعني صدكو مدا اسمع احد لو من الي اعرفهم كيساتهم ماشية عدل كل واحد مطلعيلة قصة شكل هذا بصماتك ممبينة عيدها وهذا محدديلة ولاية غير الي بي كفيلة وموقع اوراقة وهسة هالدورة هذا الاخ الي حجيتيلنة قصتة خيط وخرابيط

الله يكون بعونة وعونة جميعا على هالايام الي عايشيها بالقلق والله وية كل دكة تليفون ما ادري شيصير بينة لان منعرف شجايتنة اخبار وفيكات من المنظمة
يعني صدك من يمي انغثيت على هالمسكين

[profi]

السلام عليكم  اخي  جان اكو  عائلة عراقية  من الموصل  بتركية  بمدينة اماسيا  حددولة موعد سفر  راح  وصل على  المطار  الموظف مال اليو ان كله اسمك ما موجود  خطية  رجع  طبعا  هاي بعد  ما باع  كل  غراضة و صف  البيت   المهم رجع  و  بقى  تقريبا  8  اشهر  انوب هم  خابروه  قبل  لا  يروح  خابر الاي او ام  كاللهم  اني  قبل  هم  خابرتوني و  رجعتوني  كالوله  لا  اسمك  موجود  المهم  مرة ثانية  صف البيت ماله  و راح  لاسطنبول  بل المطار  الموظف  ما الاي او ام كاله  اخوبة انت  الكيس  مالتك  ما  موجود   خطية صيح  و  عيط  و ما  اعرف  ش سوى  المهم  ما  فاد  و مافاد  كام  رجع  للموصل --------------هاي  ما  صايرة  ها اشكد  تعب  ب تركية  و الحياة  بتركية  الله  لا  يراويه  لاحد كلش  صعبة  ما  النا  غير  نكول  الله  يصبرنا  على  الي  د  يصير  بينا

[Robin Hood]

السلام عليكم
اختي صاحبه الموضوع شغله جدا طبيعيه صارت بالاهل قبل مايسافرون ب 5 ايام اتصلو بينا وكلولنا السفر اتئجل وهذا الحجي مصفين احنه كلشي من شقه الخ....(والفيز ال الصليب الاحمر بيدنا )الافنديه طلعت البصمات صايره اكسباير وممنتبهين على الكيس حسبييييييييييييي الله وعم الوكيل بيهم بمنظمه مصر لعبو بينا طوووبه والله

ان مع العسر يسرا

robin - cairo

[طلعت روحي]

اخوان لتستغربون اني صارلي سنتين وثلاثة اشهر انتظر قبل اربع اشهر
كالولي اكتملت الامنيه مالتك وباقي اجراءات بصيطه ويتحول ملفك على
السفر وبعد فتره كالولي اعادة بصمات على ابنك وراه كلولي يوم الاحد
يجي ابنك يعيد البصمات وعاد ابني البصمات وثاني يوم خابروني كلولي
عندك دوره ودخلنا الدور بدون تحديد موعد سفر كتلهم شوكت سفري
كالو انت كلشي مكمل باقي بس نتيجة اعادة البصمه وراه كالو اجتي
نتيجة البصمه مال ابني وراه كالت انتهت صلاحية ملفك ونعادة عليك
الاجراءات وعادولي الفحص الطبي علمآ هاي ثالث مرة اعيد الفحص
الطبي وراه اخابرهم يكلولي بيشتغلو على الامنيه مالتك كتلهم مو خلصت
الامنيه كالو اي بس من انعادصلاحية ملفك راح يعيدون عليك الامنيه .
وماطوله عليكم سونا فلم يوميه سالفه جديده ويوميه لعبه شكل.

اني اكول الواحد ميصفي شي ويسافر  ومن يوصل هناك يخابر على
ربعه ويكللهم صفو 

[حبيبي بحار]

ا لاخوان الاعزاء

اشكركم جزيل الشكر على ردودكم الطيبة، يالله شكد عدنا مشاكل وشكد دنعاني، ياريت لو يخلون بالهم انه احنة لاجئين يعني اغلبنا مدبرين امورنا بالكوة، العيشة صعبة بالغربة وشغل ماكو ، يعني دنصرف من الي عدنا.
المفروض من الاي او ام ميحددون موعد سفر لاي احد اذا ممتأكدين الملف مالته كامل. ومرات حتى تأخير الاجراءات من يمهم ديخلي البصمات تصير اكسباير وتجييك امني من جديد.

والله ومثل ما كالت الاخت احنة وية كل تلفون ننشال وننحط ها بلكي المنظمة على الكيس مالتنا.

الله يفرجها على الجميع بجاه هذا الشهر الفضيل.

اختكم حبيبي بحار

[untr]

اني نفس الشغله ده يسونهه بيه والسبب العيد الاكشر هسه خلص العيد العذر الجديد شنو الله اعلم والله دمرنه والله متنه ونوب اني في تركيا هاي الضيم

[Robin Hood]

اني نفس الشغله ده يسونهه بيه والسبب العيد الكشر هسه خلص العيد العذر الجديد شنو الله اعلم والله دمرنه والله متنه ونوب اني في تركيا هاي الضيم

السلام عليكم
اخويه العزيز حضرتك تقصد العيد الاكشر!!!!ممكن التوضيح

ان مع العسر يسرا

robin - cairo

[foxsingluser]

 ارجع  اتصل بيهم  مر  اخرى   او  روحلهم

[untr]

اتصلت ما خليت مكان ما تصلت واحد يذبهه على الثاني والعلم يم الله

[عمر عراقي]

اني نفس الشغله ده يسونهه بيه والسبب العيد الاكشر هسه خلص العيد العذر الجديد شنو الله اعلم والله دمرنه والله متنه ونوب اني في تركيا هاي الضيم

اخي اذا العيــــد اكشــــر عندك ... فعندك علـــم بعد ميحتاج.


والله يا اخوان اتوقعوا كلشي يصير لان احنه لاحول ولاقوة غير بس انتظار
وصبـــر اذا سئلنه فماكو جواب مضبوط واذا خابرنه فماكو جواب منطقي
واذا سكتنه نبقى على الشحن واذا تخبلنه يلومونه ....
وبس الله يسهل امورنه ويعلم بحالنه.
حسبي الله ونعم الوكيــــــل