ماذا بعد سنة من مقابلة السفارة لجماعة SIV ؟

[عيني بغداد]

السلام عليكم

مرت سنة على مقابلة السفارة ولحد الان تحت المراجعة الادارية وانتظر والله كريم.

احد مر بالموضوع او عنده تفاصيل حول ما بعد السنة؟

تحياتي
عيني بغداد

[ARMY STRONG]

والله اخويه الله يساعدك ماتكولي شلون صابر  ???زين صاير مشكله وياك ؟ شوكت مقدم انته

[kunda]

مادام مقابل صارلك سنة لعد اكيد عليك متابعة امنية طويلة عريضة

[ابو هبه]

أخي العزيز
معقوله......هذه اول مره نسمع بيها ياريت لو تكولنا اكو تفاصيل مرت خلال هذه السنه؟؟
يمعود دمرتنا


اخوك ابو هبه

[ســـرى]

اخوية استفسرت منهم؟ لان اللي ادري بيه ورة سنة تكون المقابلة اكسباير ويحددولك موعد اخر دزلهم ايميل واستفسر.

[BaghdadGhost]

اختي سرى ,,,

المقابلة متصير اكسباير ورة سنه ,,,,, كل ما في الامر انه ايميل المقابلة اذا وصل للشخص و مرت سنه و هو ممجاوب عليهم يصير الكيس مالته اكسباير و لازم يعيد كلشي من جديد ,,,,

اخي العزيز صاحب الموضوع ,,,,, حاول تتصل بالعضو siv2007 ,,, خوش ولد ابن حمولة و بلكي يفيدك بفدشي لان خطية هو في وقتها طول هواي اكثر من سنه

ان شاء الله الفرج القريب

[ســـرى]

شكرا اخوية علي عالتوضيح واني قصدت المقابلة ممكن تنعاد مو الكيس كلها.عالعموم ارسال ايميل للاستفسار ضروري جدا بالوقت الحالي واكيد اخونا siv2007 مايقصر بالجواب ايضا.

[عيني بغداد]

السلام عليكم

أشكر الجميع على الردود.

الاخ ARMY STRONG
ما اتوقع اكو غير الصبر بالموضوع لان القرار مو بيدي, اما بخصوص المشكلة فما اتوقع عندي اي مشكلة وياهم بالعكس المراحل الاولى قبل المقابلة مرت بشكل سريع وما بيها مشاكل.


الاخ ابو هبه
خلال المقابلة رادوا اوراق معينة وقدمتها بعد كم يوم دز عليه القنصل حجى كم كلمة وكلي مراجعة ادارية وكل فترة افتح موقع السفارة وشوف رقم الكيس مالتك في حال اكو تغيير عليه.

الاخت سرى
اتصلت بيهم اني والمحامي وكل مرة نفس الجواب (المراجعة الادارية لم تنتهي وفي حال انتهائها سوف نقوم بالاتصال بك)
اخر ايميل دزيته كلتلهم اريد اعرف شنو وضع الكيس مالتي واريد اقابل القنصل وكان الجواب نفسه.

واحد من الاصدقاء اللي بأميركا نصحني بعدم الاتصال بهم لان ممكن ان يأخر الموضوع بالزايد بس ما اتوقع ها الشي صحيح.

الاخ KUNDA
والله يمكن بس اللي اعرفه اني ممسوي شي يستحق هلكد مراجعة أمنية

واي أستفسار اني حاضر


تحياتي
عيني بغداد

[ابو هبه]

اخويه العزيز ولو اثقلنه عليك هل مريت بالمراجعه الاداريه قبل المقابله ايضا؟
 بمعنى اخر ماهي المده بين اكتمال اوراقك بالان في سي وتحديد موعد المقابله لان اللي اعرفه انه المراجعه الاداريه تكون مره واحده فقط لو قبل او بعد المقابله

واكون ممنون منك
اخوك ابو هبه

[عيني بغداد]

الاخ ابو هبه
السلام عليكم

اكيد مريت بمراجعة ادارية قبل المقابلة واللي طولت 6 اسابيع.

تحياتي

عيني بغداد

[swah]

اني صارلي اكثر من 4 اشهر من قابلت ونفس الشي الكيس مالتي كان ماشي كلش طبيعي لحد المقابلة حتى المقابلة كانت كلش طبيعية وما بيهه اي نقص وكلي راح تجيك رسالة على الايميل وباي
اني مليت من الانتظار وقبل اسبوع دزيت على جوازاتي اخذتهن من عندهم كلتلهم عد من تكملون دزو علية جوازاتي يمي
احسن من تبقة يمهم اني من الضوجة يمكن راح اروح فد سفرة خارج العراق تغيير جو ويمكن من ارجع راح الغي موضوع امريكا لان بصراحة حيل تعبت من الانتظار