بعد الكوم....!

[blood_brothers8]

شباب اتوقع اي واحد من يستلم الكوم راح يتربط ايديه وميعرف شيسوي بعد مجان استاذ قبل الكوم بس من يجي ميعرف شيسوي...فاحبيت اطرح هذا الموضوع..اني واحد من هاي الناس الي جنت اتوقع اعرف كلشي بس هسا دا احس روحي ضايع ع العموم في حالة اذا دزيت اوراقك عن طريق ال dhl اشكد راح اطول السالفة حتى يوصل لامريكا وشون تعرف انه وصل زين وشون راح يجاوبوك لان انت دزيت ميل مو ايميل فهل ياترى راح يدزون ايميل الك لو ميل(هارد ميل) زين اذا هارد ميل وين راح يدزونها...وهل من الشرط انه عندك كفيل بامريكا..؟ زين شيريدون من هذا الكفيل...واشكركم...

[ARMY STRONG]

يعني هم مغلس على قوطيه مال ربت و تريدني اجاوبك

ما شي تستاهل عمي اجاوب بس راح يصير بوكس ربت مو قوطيه

حبيبي اذا ادز اوراقك بل dhl توصل الى امريكا بل زايد 10 ايام بين ماجماعه يجيكوها و يشوفون ماكو نواقص هم تاخذلها اسبوع
و هاي مال شلون تعرف وصلت اكو تراك نمبر بل وصل مال dhl تابعها وين وصل بكج مالك

بعدها العنوان الي حاطه بل استمتره هذا مو مال كفيل هذا مجرد عنوان حته يدزون وصل استلام بكج مالتك يعني شوفلك عنوان اي عرف و حطه

بعدها راح يجيك ايميل منهم يكلك يابه هذا رقم الكيس مالتك الجديد و انتظر ايميل اخر بيه باقي الدعافيس الي يردوها منك

خصم الحجي الاوراق الي راح دزهن هسه هيه للحصول على كيس نمبر و موافقه nvc

[blood_brothers8]

هااااااا ايييييييييي خوش حجي طبعا اشكرك كلش هواية ارمي وبالنسبة لربت اني جبتلك جم قوطية بس مشفتك وشربتها.... ..زين هذا البكج شنو من شي يعني شنو هو وبيش يفيد وشراح المفروض يسوي بيها صاحبي الي راح يستلمها..يعني تبقى عنده لو يدزها لو يشمرها لو شنووووووووو...ومعقولة ميكدرون ايدزوها ع ال dhl>>>>وهاي جم قوطية ربت الك حتى لاتكول عنه بخيل....

[ARMY STRONG]

صديقي بكج انته دزه منا و الي هو بيه i360 وباقي الدعافيس الي طالبيها منك من استلمت الكووم

صاحبك الي بامريكا راح يستلم رسيت(وصل) واحد بتاكيد وصول الميل و الثاني حسب مااظن موافقه اذا موغلطان و هاهيه

يعني هاي سالفه كلها تطول بل زايد شهر او اقل وراها يجيك ايميل من nvc يردون منك دعافيس اخرى
شي اخر اذا تخلي عنوان dhl ماياخذوه بنظر الاعتبار و مايدزون عليه الوصولات بس اذا عنوان داخلي باامريكا و احتمال APO مامتاكد بس انته شوفلك عنوان واحد اذا انته بعدك تشتغل 


شكرا على ربت

[blood_brothers8]

حبي ارمي ممنون ومقصرت وان شالله تتوفق ونسمع عنك اخبار حلوا امين...

[المقاتل]

السلام عليكم
الاخ ARMY STRONG : ذكرت في جوابك انه يجيك ايميل من nvc يردون منك دعافيس اخرى, واني هم سمعت على هاي الدعافيس من باقي الاخوان, ماهي تقريبا هذه الدعافيس؟ ماهي التوقعات؟ لكي نستطيع تحضيرها من الان.


وشكرا

[ARMY STRONG]

المستمسكات المطلوبة:

1-صورة قيد مترجمة
2-صورة قيد ولادة مترجمة والغير مترجمة
3-عقد زواج مترجم والغير مترجم
4-نسخة من DS-230
5-نسخة من DS-234
6-BIOGRAPHICAL
7-نسخة من Refugee benefits
8-صورتين لكل شخص للفيزا بحجم 5*5 سم
9-تعهد خطي ان لا يوجد بالعراق تقرير شرطة
10-نسخ من أي باجات امريكية


اولا:صورة قيد مترجمة(ايضا تسمى 57  او   Family book )

1-   الذهاب الى دائرة جنسيتك وتطلب صورة قيد لغرض التصديق والترجمة و(شكلهه مستطيل مخطط خطوط حمر او زرق).
ملاحظة مهمة (يجب ان تؤكد على موظفة الجنسية ان تكتب لك رقم اخر بطاقة جنسية قبل جنسيتك الحالية يعني انت اذا جنسيتك الحالية رقمهه 50000 وقبل الزواج او الضايعة كان رقمهه 10000 فيجب كتابة الحالية بالوجه والقديمة بالخلف طبعا هذا يشمل جميع افراد العائلة.

2-الخطوة الثانية هي الذهاب الى دائرة جنسية السنك الواقعة في شارع الرشيد بين شارع الخيام وجسر السنك على الشط

ملاحظة مهمة: يجب احضار العائلة بالكامل لغرض البصم وتستطيع بعد ذلك ان ترجعهم بعد ان يراهم الضابط ويجب جلب المستمسكات الاصلية (سكن تموينية هوية احوال شهادة جنسية وجواز السفر لكل افراد العائلة وستة صور ملونة ويفضل بخلفية بيضاء واخذوا فلوس وياكم)


بعد اصعد وانزل واكثر من ضابط يدقق يدزوكم للترجمة الموجودة في نفس البناية الطابق الارضي
سوف يدقق الشخص معك ويطبع الكتاب وانتبهوا  مطابقة الاسماء وحسب جواز الجي.

3-الخطوة الثالثة هي الذهاب الى دائرة تصديقات الداخلية الواقعة في ملجأ في زيونة  شارع الربيعي قرب جامع اليقين ومن الافضل ان تروحون من وكت وتاخذون الجوازات والجناسي وبعد شتلة ساعتين ينطوكم الكتاب اللي يكون نسختين لكل شخص.

4- الخطوة الاخيرة هي الذهاب الى تصديقات الخارجية في العلاوي تاخذلهه فد 3 ساعات

هنا احنة كملنة صورة القيد وتكون نسختين لكل شخص

الوقت التقديري (4-5) ايام



ثانيا: صورة قيد الولادة

1-تذهب الى المستشفى التي ولدت فيها اوالى مركز الزوية في الكرادة قبل جامعة بغداد بالنسبة للرصافة ومركز الكرخ لتسجيل الولادات قرب مستشفى الكسور في العطيفية او اذا ولدت من قبل قابلة تذهب الى القابلة وتسألهه في أي مركز صحي تسجل الولادات واذا القابلة ميتة تروح لأقرب مركز صحي على بيتهه
طبعا اسهل شي للي يعرف بيا مستشفى انولد ويزودوا بصورة قيد ولادة للترجمة والتصديق  شكله يكون شوية اكبر من كف اليد

2-الذهاب الى دائرة صحة بغداد في ساحة عدن حصرا وتستنسخ الكتاب قبل متطب وراح اتقفص عليك ام الاستعلامات وتبيعلك طوابع المهم شغلتكم بين الطابق الرابع والخامس طبعا كل شخص بالعائلة اله صورة قيد منفصلة يعني اذا زوجتك ولادتهه بصرة او سليمانية لازم تروح وتجيب صورة قيد ولادة قبل متروح لصحة بغداد هااااي شلون شغلة تعبانة.

2-   الذهاب الى مكتب نادر للترجمة قبل المسرح الوطني واخذوا فلوس وياكم
3-   ثاني يوم تأخذ صورة القيد المترجمة والاصلية الى تصديقات الخارجية واخذوا فلوس وياكم

وهنا نكون خلصنة صورة قيد الولادة الوقت التقديري(4-6) ايام


ثالثا: عقد الزواج

1-   تاخذ نسخة من عقد الزواج وتذهب الى المحكمة التي عقدت فيها وتطلب اربع نسخ للترجمة والتصديق الارشيف راح يدزوك الى عرضحالجي في الباب وسوف يطبعلك اربع نسخ على جهتي الورقة
        تنطي 5 الاف وتدخل للمحكمة وهنا يجب التأكيد ان يتم الختم على جهتي الاوراق يعني وجه وكفة وهذا الشي جدا مهم طبعا اول شي القاضي يوقع على جميع الصفحات وبعدين المحقق القضائي يختم على جميع الاوراق لذا يرجى الانتباه.

2-تأخذ جميع الاوراق وتروح الى محكمة استئناف الرصافة في عمارة شذى في الوزيرية اذا كنت عاقد بمحكمة بالرصافة  او الذهاب الى محكمة استئناف الكرخ في حي العدل اذا كنت عاقد بالكرخ واذا بالمحافظات فكل شخص حسب محافظته.رح يشتلوكم 5 الى7 ايام

3-تاخذ الاوراق الى مكتب نادر للترجمة لغرض الترجمة
 
4-من تستلم النسخ الاربعة تعمل نسختين ملونة وتاخذ الاوراق كلهن الى كاتب عدل الصالحية في شارع حيفا ضمن بناية وزارة العدل وراح يملوهن اختام وتواقيع وراح يحتفظون بالنسختين المستنسخة.

5-في اليوم التالي الذهاب الى تصديقات الخارجية في العلاوي

الوقت التقديري (7-10) ايام

رابعا:
 DS-230

طبعا تتكون من 35 فقرة واربع صفحات رح اشرحهن وحدة وحدة
اولا يجب ان تحول البي دي اف الى وورد ثم  تطبع وتوقع  وتسوي سكنر وترجعة بي دي اف

1- الفقرة الاولى هية الاسم الكامل وحسب ما مكتوب بالجواز الجي وبدون غلط رجاء
2-الاسماء الاخرى تطبع           
N/A

3-الاسم حسب مامكتوب بالجواز ولكن بالعربي

4-تأريخ الولادة

  5- العمر
6- مكان الولادة (المدينة,المحافظة والبلد)

7-الجنسية طبعا عراقي

8-الجنس

9-الحالة الزوجية

10-اسم وعنوان وهاتف الصديق او القريب في امريكا واذا لايوجد تكتب
N/A
( أخوتي الاعزاء في هذه الخطوه لا تكتبون اي شئ او اكتب الولايه الي تريد ان تعيش فيها والمدينه وتحتها اكتب لا ان ناون )

11-هنا يترك فارغ يكلك اذا تريد الكرين كارد يوصلك الى مكان يختلف عن العنوان اللي انطيتة في الحقل العاشر يعني عوفوه فارغ.

(أخوتي الاعزاء في هذا المربع لا تتركه فارغا اكتب عنوان الصديق او القريب الذي تريده ان يستلم الكرين كارد عند صدوره ولا تتركوها فارغه لان بالمقابله راح يطلبون منك تحددلهم عنوان)

12-شنو شغلك يعني اذا مترجم تكتب
   ثم رقم تليفونك.Linguist

13-عنوانك الكامل محلة وزقاق ودار ومحافظة والبلد

14-اسم الزوجة وحسب ما مكتوب بالجواز ثم الحقل الذي يليه تاريخ ومكان الولادة والحقل الذي يليه عمل الزوجة واخيرا تاريخ الزواج يعني مو الحفلة عقد المحكمة.

15-اسم الاب الكامل

16-تاريخ ومكان ولادة الوالد وعنوانه الحالي واذا متوفي تكتب
في حقل العنوانDeceased
والحقل الاخير سنة وفاة الوالد اذا متوفي.واذا غير متوفي تكتب
N/A

17-اسم الام الكامل

18-تاريخ ولادة الام ومكان الولادة والعنوان الحالي ومتوفية لو لا يعني نفس شرح الفقرة 16

19-تكتب اسماء الابناء وتاريخ الولادة ومكان الولادة

20-تكتب جميع العناوين والاوقات  التي سكنتها لمدة ستة اشهر واكثر منذ ان اصبح عمرك 16 سنة

21- القسم الاول هنا تكتب الاسماء التي كتبتها بالفقرة 14 و19 يعني الزوجة والابناء
 والقسم الثاني
-هنا محد رح يلحكك لامريكا يعني تكتب
N/A

22-عملك في العشر سنوات الاخيرة الشركة,الموقع,عملك يعني طالب او مترجم او معلم وهكذا,اوقات العمل من والى.

23-المعاهد والكليات التي دخلتها مع الاوقات ثم اللغات التي تتحدثها ثم لاي نقابة انت تابع يعني المهندسين المحامين الاطباء واذا متابع لاي نقابة بس اكتب
N/A


24-الخدمة العسكرية اذا خادم تكتب الفرع يعني جيش نظامي حرس جمهوري حرس خاص والرتبة وتواريخ الخدمة واخيرا صنفك يعني مشاة مدفعية وهكذا واذا مخادم بعد احسن خلي اكس بمربع النو

25-هنا تطبع كلمة
Never
يعني انت بحياتك مرايح لامريكا على فرض انه كلكم مشايفين امريكا
ثم توقع وتكتب تاريخ تنظيم الاستمارة.

26-ترجع تكتب اسمك مثل الجواز

27-تكتب
N/A

28-اسمك الكامل بالعربي

29-اسمك وعنوانك ورقم تليفونك بالانكليزي

30- مربعات تزركهن كلهن
NO
يعني انت مو حشاش ولا مخبل ولا مجرم وهكذا

31-
NO

32-
NO

33-طبعا انت ما عندك سوشيال سيكيورتي فتخلي اكس بمربع الاول
تريد واحد طبعا تخلي اكس بمربع الاول يعني يس
الحقل الذي يليه نضع اكس في حقل الاول يعني انت توكل المنظمة باصدار سوشيال سيكيورتي

34-هل ساعدك احد بكتابة الفورمة تكتب لا لان اذا كتبت أي يعني تكتب اسمة وعنوانة ولغوة لذلك اكتب لا واخلص

35-لتلعب لان هذا الحقل مو الك
ملاحظة: يجب ملئ هذة الفورمة لكل شخص يعني للزوجة والاطفال يعني كل نفر فورمة وفي حالة ان لايوجد جواب مثل طفل عمرة سنتين ماهو عمله او اسم الزوجة وهكذا فقط تكتب
N/A





خامسا:
DS-234

تتكون من صفحتين و29 فقرة وايضا تكتب حسب عدد افراد العائلة

1-عدد الافراد في القضية يعني اذا 2 تكتب 2 واذا اربعة تكتب 4

2-اذا انت مفدم الطلب الرئيسي تكتب نعم والزوجة والاطفال تختار كلا

3-
N/A

4-الاسم الكامل وحسب الجواز وبالانكليزي

5-الجنس

6-الحالة الزوجية

7-تاريخ الولادة

8-مكان الولادة محافظة وبلد

9- الجنسية

10-القومية

11-الديانة

12-العنوان الكامل

13-رقم الهاتف

14-العنوان البريدي

15-اخر عمل

16- اعلى مستوى دراسي يعني بكلوريوس دبلوم ماجستير وهكذا

17-اللغة الام

18-اللغات الاخرى

19-درجة اتقان اللغة

20-مشاكل صحية تكتب
None

21-عندك احد من كرايبك مقدم على نفس البرنامج

22-اذا عندك كرايب مقدم وتريد تروح وياة بنفس الولاية اكتب اسم الولاية ورقم الكيس مال كرايبك

23-عندك كرايب بامريكا

24-اسم كرايبك

25-تاريخ ميلاد كرايبك

26-عنوان كرايبك بامريكا

27-رقم تليفون كرايبك بامريكا

28- صلة القرابة يعني عمك خالك

29-عنوانه البريدي


 ملاحظه مهمه :  أذا كان عندك صديق في الولايات المتحده وتريد تسكن بنفس مدينته أكتب الهم بالكومنت انا عندي صديق واحب اسكن بنفس مدينته وانطيهم عنوان صديقك مفصل كما في الخطوات ( 24و26و27و28و29)



  سادسا:
Biographical

لحد يدوخ ترة جدا سهلة تسوي سكنر للجوازات وتحت كل جواز تكتب
1-رقم الكيس
2-العمل الحالي
3-الشهادة الدراسية

سابعا:
Refugee benefits

بيهه مربعين تخلي اكس على الاول يعني انتة تريد فوائد والثاني متريد
تكتب رقم الكيس والاسم وتاريخ الولادة توقع وتاريخ التوقيع والاميل

ثامنا:

صورتين لكل شخص للفيزا بقياس 5*5 سم  وماكو داعي تخافون المصور بس كلله صور للفيزا وهو يعرف.

تاسعا:

هنا شوية انتبهوا مطلوب تقرير من الشرطة يؤيد انك ماعندك جرائم وبالعراق ماكو هيجي شي لذلك تكتب تعهد بالانكليزي وتوقع وصارت ويايه وقبلو بي ومشة.

أخوتي العراق ما مطلوب منه اي تقرير من الشرطه بس اذا انت سافرت الى اي بلد لمده اكثر من 6 اشهر بقيت هناك لازم تجيب الهم تقرير من الشرطه او كما معروف عدم محكوميه .

عاشرا:

سوي سكنر لاي باج امريكي عندك مثل باج تايتن او جي ال اس او أي زي باج وطبعا لتنسون الباج وجه وكفة


الان ماذا ترسل؟

1-ببداية الايميل تنسخ اسمك ورقم الكيس نمبر كما موجود في الايميل المرسل من قبلهم وعنوان الموضوع هو رقم الكيس نمبر
2-تقسم البي دي اف الى ايميلين لان الحجم كبير
3-تعمل اتاجمينت للملفات وترسل التالي:

1-عقد الزواج العربي والمترجم طبعا المصدق
2-صورة قيد الولادة العربي والمترجم لجميع الافراد
3-صورة قيد 57 لجميع الافراد
4-صورتين خلفية بيضاء والنظر مباشر على الكاميرا قياس 5*5 سم للفيزا
5-الباجات
6-
Biographic
7-التعهد الخطي حول تقرير الشرطة
8-
 DS-230

9-
DS-234

10-
Refugee benefits


ويجب ان لا تنسون تقسيم الملفات الى قسمين لان ايميل واحد ميوصل

ارجو ان الشرح وافي  ويجيب جميع الاستفسارات ولا تنسون ان  الكلام اعلاه مجرب وناجح بشكل


هذا من موضوع اخ فالكون1982

[kunda]

عاشوووووووووو

[blood_brothers8]

ولو احنا نعجبك عمي...بس هذا ارمي يعرف كل دربونة بهذا المنتدى شنو سالفتة....تكول امين ع الارشيف مالت المنتدى...ههههه

[على الشحن]

عمي ارمي ماقصرت بس رحمه لوالديك كملنه فضلك
  هاي المفردات لكل واحد بالعائله يعني مثلا صورة القيد 57 لكل واحد
  بيان الولاده اني سمعت انو الكبار شهادة الجنسيه تغني عن قيد الولاده لو شنو رايك
  عندي بجوازات الاولاد بفقرة اللقب واحد كاتبيله اسم الجد وواحد كاتبيله اسم العشيره خوما يكلبون عليه ويكولون ذوله مو اخوان



وتسلم يا ورده وانشاالله يجي الكوم باسرع وقت

[echo 9]

السلام عليكم
- عاشت ايدك اخوي ارمي سترونغ كفيت ووفيت بردك وبعد هالرد ماكو رد ..........
- احوي الغالي blood_brothers8 استعجل بارسال الدعافيس على كولت ارمي حتى تلحك بقطار اللي ينتظرون المقابلة .
- اخوي الغالي على الشحن وطبعا من رخصة ارمي سترونغ انا راح اجاوبك القيد 57 لكل واحد بالعائلة صغير او كبير
بيان الولادة للكل بس احيانا تكون هناك حالات استثنائية للكبار خصوصا الشياب مثلي ما عنده بيان ولادة لاي سبب هذا منين يجيب الهم يكولون الجماعة القدماء كلش حيل وخبراء بهالموضوع الجنسية والشهادة تعوض عنه وهذا الحصل وياي ما ارسلت البيان الخص بي لان ما عندي بيان ولادة اصلا ومستحيل اجيب الهم بيان بال ان في سي محد سالني عليه وبالمقابلة اذا سالوا راح اشرح الهم السبب .
بالنسبة للقب صارت وياي وحدة من البنات الصغيرونة كلش اللقب بالجواز مالتها مخللين الجماعة اسم الجد فانا مشيت الفورمات كلها من 157 لل 230و234 والبنيفتس مثل ما مكتوب بجوازها يعني الاسماء اللي راح تخلليها بالفورمات اكتبها مثل ما مكتوب بالجواز بالحرف وما عليك يمشون عالجواز ان شا الله

[على الشحن]

اخوي العزيز ايكو رحم الله والديك وما قصرت
  من ردت املي استماره 360 اشكد احتاجيتك وسبحان الله الرسائل بس وياك ما اشتغلت بس الاخوان كوندا وراين 84 ابد ماقصروا وممنون منكم يغاليين

[ARMY STRONG]

على الشحن عمنا ايكو9 كفه وفه ماقصر

blood_brothers8 شنو الفايد اعرف بس سبع صنايع و البخت ضايع