موعد مقابلة اس اي في مع بيان ولادة وعدم محكومية

[repentant]

شباب اني كملت اوراقي يم الان في سي وماطلبوا مني بيان ولادة ولا عدم محكومية وحددولي موعد مقابلة اشو جماعة السفارة اجلوا وحددولي موعد مقابلة اخر وطالبين مني عدم محمومية وبيان ولادة وهاي امين اجيبها اني واكون ممنون هسة شسوي

[المهندس سيوفي]

اخوية العزيز --- انت وين مسافر قبل اذا طلبوا منك عدم محكومية ؟  اذا عدم محكومية من العراق رد عليهم وكوللهم العراق غير موجود باللستة اللي مشمولة بعدم المحكومية وهذا الشي مثبت بالموقع الرسمي مال السفارة --- وبالنسبة لبيان الولادة -- كوللهم انتو هم كاتبين بالموقع الرسمي انه الجنسية (البطاقة الشخصية) تغني عن بيان الولادة

اخوية العزيز --- شكد الفترة بين ارسال اوراقك للان في سي وتحديد اول موعد للمقابلة ؟

تحياتي

[repentant]

شكرا سيف
تقريبا شهرين او اكثر بقليل والي حجيته انته اني مسوي وي جماعة الان في سي

[ARMY STRONG]

صديقي سيوفي نصحيه سوي عدم محكوميه اني اليوم كنت هناك و شفت صديقي مقابل siv \ورايدين منه بل مقابله عدم محكوميه

اذا nvc ماطالبيها ف تره بل مقابله مطلوبه و هيه مايرادلها شي اسبوع و تطلع تروح لمركز شرطه العلويه وياك جواز و الاركان الاربعه للعراقي معروفات مو

ساعه او ساعتين تخلص و يكلك تعال بعد اسبوع

[المهندس سيوفي]

صديقي سيوفي نصحيه سوي عدم محكوميه اني اليوم كنت هناك و شفت صديقي مقابل siv \ورايدين منه بل مقابله عدم محكوميه

اذا nvc ماطالبيها ف تره بل مقابله مطلوبه و هيه مايرادلها شي اسبوع و تطلع تروح لمركز شرطه العلويه وياك جواز و الاركان الاربعه للعراقي معروفات مو

ساعه او ساعتين تخلص و يكلك تعال بعد اسبوع

صديقي ---- وين صاير بالضبط مركز شرطة العلوية ؟؟ زين هاي بالنسبة الى عدم المحكومية ---- بالنسبة لسالفة بيان الولادة هاي شتحطلها علمود اطيب ---- يعني منو عندة بيان ولادة ؟؟؟ بصراحة يعني هذولة راح يخبلوني --- يعني يناقضون نفسهم بنفسهم --- همة كاتبين بموقع السفارة انه الجنسية تغني عن بيان الولادة بعد شكو !!!!

[ARMY STRONG]

صديقي سيوفي مركز شرطه العلويه صاير يم مطعم كرسبي اذا مااعندك سياره كل الاتي من ساحه الطيران باب شرجي تصعد شارع صناعه و كوله ذبني يم مركز شرطه العلويه راح يذبك باب المركز لاان يفوت من يمه تاخذ وياك مستمسكات الاصليه و صور

اما لبيان الولاده انته وين مولود بيا مستشفى تروحلهم كلهم يابه اريد بيان ولاده اني مولود بيهاي المستشفى هسه هم يدزوك شوف وين الارشيف مالتهم و بعدين من تاخذه تروح لدائره صحه بغداد بساحه عدن يختموه الك وراها ترجمه و تصدقه من خارجيه

[echo 9]

السلام عليكم
اخوي الغالي ARMY STRONG الاخ العزيز المهندس سيوفي اخي الغالي repentant
اشلونكم يا طيبين
اخوان كلام الاخ ARMY STRONG مضبوط ضبط العكال بالنسبة لي سويت العدم محكومية لي ولعائلتي وعندي بنية عمرها 12 سنة هم سويت الها عدم محكومية عشان بالمقابلة ان شاء الله ما يظل يتحجج بحجة المهم امس صدقتهن من الخارجية .
بيانات الولادة همين سويتهن ورحت صدقتهن امس من الخارجية ولكن صدقوا بس النسخ العربي الانجليزي المترجمات ما صدقوهن كالوا يريدون ختم جمعية المترجمين وانا مترجمهن بمكتب بمحافظتنا مثل مكتب نادر اللي ببغداد بس ما صدقوهن كلت احسن بعد لان بصراحة اروح اسال عن جمعية المترجمين ببغداد وانا مو من بغداد اروح انعلس هاي صعبة فصدقت النسخ العربي وبس .
بالنسبة لعقد الزواج ايضا صدقت العربي والانجليزي لا لنفس الاسباب مال بيانات الولادة
السؤال مالتي يخص بيانات الولادة هو:
- 7 من اولادي الله يخللي جهالكم مولودين بالعراق وبمستشفى وجبت بياناتهم المشكلة عندي وزوجتي وبنتي الكبير مولودين خارج العراق منين اجيب بيان ولادة النا اشلون تنحل هاي هسه بالمقابلة لو تطلع براسهم خط ونخلة ووياهن الست فسفورة هم ما اكدر اجيب بيانات النا احنا الثلاثة اشلون حلها يا اهل الحل ؟ رايد رايكم
تقبلوا الجب والاحترام
Echo 9

[عراقي هواي]

ابو خالد والاخوان الباقين سلام عليكم ورحمه الله وبركاته
والله يا اخوان اني عندي نفس المشكله وبس اطفالي عدهم بينات ولادة
ومرة قريت موضوع بالمنتدى بس ما اذكر منو كاتبه صايرة عنده نفس المشكله واعتقد الاخ ذكر انه دز الهم شهادة الجنسيه وكال هي تغني عن بيان الولادة ياريت لو احد من الاخوان اذا عنده معلومه مؤكدة جزاه الله كل خير يفيد بيه اخوانه الحايرين واني منهم.
اخوي ابو خالد العزيز لو كايلي جاي البغداد او مخبرني جان ضيفتك على الاقل حبيبي ابو الوكفات الطيبه وجان وديتك بيدي لجمعيه المترجمين علمود تصديق البيانات.

[echo 9]

حبيبي انته ابو مريم الغالي
كدها وكدود يا طيب بس والله كنت مستعجل بالرجعة لاهلي لان عفتهم بوحدهك وتعرف ما صار يومين من درنا بالبيت الجديد والدنيا ما تعرف الها وبعدين كلت بيني وبين نفسي هسه من اكول لابو التكسي وديني لجمعية المترجمين ويطلع بي كبل للجماعة شاسوي المهم عفتهن من غير تصديق لان العربي كله صدقته واتذكر اخونا سلفر الله يحفظه ويذكره بالخير صار اتصال مرة انا وياه وسالته عن التصديقات كال هو نفسه ما صدق اوراقه ومشت شغلته وهسه يسمع صوتك بامريكا على العموم هذوله جماعة الاس اي في لو يردونا ننكتل لو يردون يظلموها علينا وارجع واكول اويلي طوفت فرصة استراليا وظليت مجلب بامريكا عبالي بيهم حظ .
المهم الخيرة بما يختاره الله
هسه موضوعنا عن بيانات الولادة شنو راي الجماعة اهل الخبرة اكو واحد مر بحالتي وحالة الاخ عراقي هواي وشنو نصيحته النا

[يوزارسيف]

اخوان السلام عليكم...اسمحولي اشارك بالموضوع...بالنسبة لبيان الولادة هل المقصود بيه نفسه صورة قيد النفوس ؟...اذا صورة القيد فالمسالة سهلة ..تروح على دائرة النفوس مالتك وين ..وتكولله اريد صورة قيد مترجمة للسفر وبعدين تطلع بيومين مع التصديقات.

[durar]

كلام الاخ يوزارسيف  صحيح  الي يردوه مو بيان ولادة منذ ان يولد الشخص وانما صورة قيد الولادة وخطوات
استخراجها مثل مكال يوزارسيف  وهي سهلة
 كثير ناس ولدوا بالبيت وبالخمسينات  وين اكو بيان ولادة يبقى ... على غرار ولادتك بالجنسية وين بيا مكان يطلعولك بيان قيد ولادة
اذن المطلوب هو صورة قيد ولادة الي نوه عنها يوزارسيف
تحياتي للجميع

[repentant]

لا اخوان هسة النظام اتغير من ادزيميل على ايميل السفارة راح ايدزولك ايميل بي لنك اسجل بي معلومات واي شي ايصير جديد ادزة على نفس اللنك وهسة من يجيك ايمل بالمقابلة موضحلك بشكل تفصيلي عربي وانكليزي كل شي مطلوب منك فطالب منك عدم محكومية ومفصل شنو الفرق بين بيان الولادو وصرة قيد النفوس

[داليا الوردة الوردة]

السلام عليكم اخوان

هل صورة القيد المترجمة مطلوبة لجماعة الاي او ام ايضا اللي سامعتة ميردوهم من عدنة ويوزار سيف اللي اعرفة انت من جماعة الاي او ام

افيدونا اخوان حتى اذا مطلوبة واحد يلحق يسويهة

وهل مطلوب نترجمالهويات وشهادة الجنسية ايضا

تحياتي لكم

[مضروب ليزر]

اخي العزيز

اني قابلت قبل كم يوم و ما طلبوا مني لا بيان ولادة و لا عدم محكومية و هاي خساير فلوس بالخالي بلاش الله وكيلك و اني الحمد لله ما سويتهن ومشت و ما سالوني ابد عنهن .

بس شهادة الجنسية اترجمه و هي تعوض عن بيان الولادة بس انت اذا طالع خارج العراق فما ادري عن عدم المحكومية و الله يسهل للجميع.

[ســـرى]

اخونا يوزرسيف بيان الولادة مو مقصود بيه قيد النفوس كل واحد وثيقة تختلف عن الثانية.

[repentant]

شباب ضروري احصل البوليس سيرتفكيت لان هسة دزولي ايميل ايكولولي مطلوب رغم انه جماعة الان في سي ما طلبوا

[ARMY STRONG]

انته شمنتظر روح طلعها مو دليتك باحبيبي معليك بل ايكولك مامطلوبه

[repentant]

اي ان شاء الله قريبا وراح اطلعها قريبا

[echo 9]

السلام عليكم
اخوان كلام سرى مضبوط بيان الولادة يختلف عن القيد 57 بمرحلة ال ان في سي ما ارسلت لهم بيانات الولادة لان اخت براي الجماعة اللي يكولون الجنسية والشهادة تعوض واللي حصل انه ال ان في سي ارسلوا لي رسالة يكولون بيها نريد ترسل بيانات الولادة بس المفارقة العجيبة انه انا ما داز بيانات العائلة كلها والجماعة طلبوا ارسل لهم بينات ل 3 من جهالي المهم انا دزيتهن وبتاريخ 1-9 ارسلوا لي رسالة يكولون اوراقك كاملة هسه وبالمراجعة الادارية .
على العموم بيانات الولادة يريدوها اذا مو بال ان في سي فبالمقابلة يسالون عنها وايضا عدم المحكومية والشغلة والله سهلة جدا وغير مكلفة
1- بيانات الولادة تروح للمستشفى اللي انولدت بيه وتطلب تزويدك ببيان ولادة لغرض الترجمة والتصديق وهاي هي
2- عدم المحكومية بمركز شرطة العلوية وشغلتها مو اكثر من ساعو زمان وبعدها ينطوك موعد 10 ايام تستلمها وتصدقها من الخارجية
ليش الواحد علمود شغلة بسيطة مثل هاي ينطيهم السبب بتاخير معاملته او التحجج بحجة من هاي الحجج للتاخير والا احنا كلنا نعرف انه متكو اي داعي لطلباتهم هاي بس شنسوي ما باليد حيلة
تقبلوا تحياتي والموفقية للجميع

[ســـرى]

بالضبط والافضل الواحد دائما ياخذ احتياطه اكو ناس بالصدفة ويجوز عددهم هواية ما طلبوا منهم بس الاحتياط واجب وهي ما ناقصة تأخير.