اخواني احلفكم برب العزه رايد مساعده

[عراقي الهوى قلبي]

اني صارلي 5 اشهر في امريكا و بالتحديد و لايه ميسورري في سانت لويس  و اجيت عن طريق الكنيسه الكاثوليكيه للاجئين و من اجيت لحد هسه كاعد بلا عمل و يوم من الايام اجت وحده من الكنيسه و كالتلي انو بعد همه ما عليهم بيه من ناحيه دفع الايجار و فواتير الكهرباء لان همه دفعولي مال 5 اشهر و بعد ما عليهم بيه و اني بلا عمل و لا اي شي و حجيت وياهم كالتلي احنه سوينه الي علينه ادفع  الايجار من جيبك  و روح دور شغل انته  و اني اعزب و شويه الظروف ما تساعد يعني بعدلي 10 ايام لازم ادفع ايجار و رايد الحل منكم بشرفكم الي عنده حل لمشكلتي لا يبخل عليه و اذا اكو منظمات للبحث عن عمل ارجو ان تكولولي اسمهن لان لازم ادفع الايجار بعد 10 ايام و الكنيسه تكول احنه مندفع و شكرررررررررررررررررررررررررررا

[عامر حمد]

اخي العزيز الله يكون بعونك والله لوبيدنه شي جان سوينالك يا بس ان كول بلكت واحد من اخوانه يشوفلك        شخل شي بس اخويه العزيز الحجي بيناتنه يعني شاب واعزب وصار خمس اشهر وما شايف شغل وين بامريكا  العد بعد وين يودوك وتحياتي

[doori]

مرحبا
اخويه الله يعينك ويساعدك على حالك صدكني محد يفيدك غير نفسك اخوتك ينطوك النصيحه اكثر من اي شي اخر اني اكول اطلع اتمشى وشوف بلكي لكيتلك شغل ولا تكول لاي شغل لا يعني لكولك شغل الكنيسه ويمكن ما يتماشى ويه طموحاتك وما بيها شي تره لكن الانسان لازم يتنازل شويه علموج المركب تمشي صح لو لا الله لا يحيرك شوف مطاعم الماكدونالدز البركر كنك بلكي تلكي شغل عدهم اكو هوايه سايتات من عمل روح للكنيسه مره لخ وكللهم شغلوني اي شي حتى لو عامل تنضيف عادي ومو عيب اخويه

تقبل مروري ولا تزعل

[zozk]

السلام عليكم
الى الاخوان الي ردو على الموضوع و الي راح ايردون .... مع فائق الاحترام
اخوان اسمع الكثير الكثير من الذين يبدون النصح او يقومون بتعليقات لا تمت الى الواقع في امريكا
شباب ايجاد العمل في امريكا ليس بالشيء السهل على سبيل المثال قدمت على ما يقارب ال 500 شغلة مختلفة و اكيد بديت من مكدونلد الى بركر كنك و الى تنظيف الحمامات و التواليتات في شركة تنظيف و غيرها من الامور و مؤهلاتي هي ماستر هندسة و الانكليزية بطلاقة
وصلت بي خيبة الامل انو كمت اروح كل يوم العصر افتر على المحلات و السوبرماركتات اسئل اذا اكو شغل و اوزع السي في مالتي
و السبب كلش بسيط انو الفلوس الي جايبة من العراق على وشك ان تخلص
طبعا اكيد انا لست من اصحاب الدفاتر اجيت على امريكا و عندي كم ورقة لا اكثر

الاخ العزيز صاحب الموضوع

لا تفقد الامل و ابدء بالبحث عن عمل مهما ان كان و حاول انو اتقدم على الولفير اذا اكو بولايتك و اقلم وضعك باي طريقة مهما ان كانت الامور في امريكا اكيد هي احسن من العراق
اسهل طريق للعمل روح على اي مكتب ركروتنك للجيش الامريكي و انتمي للجيش طبعا هذ اسهل حل

لكن خلي في بالك انو الحياة في امريكا هي افضل من العراق رغم كل شيء

[ســـرى]

اخواني المهم واحد يسوي اللي عليه ويدور اخوية اللي بميزوري اكو معارض عمل يسموها جوب فير job fair تتبع مواعيدها وتروح وتاخذ السيرة الذاتية مالتك او اي شهادة خبرة وهاي مثال عليها واكو عالشهر الجاي عدد منها ويجون بيها اصحاب العمل بنفسهم ويريدون موظفين

http://www.carouselexpo.com/missouri.htm

[woody3]

اخوية العزيز احنا لازم نالف جمعية نسميها جمعية العاطلين عن العمل بامريكا مثل الاخوة الي مسوين جمعيات قبل ميجون لامريكا اني مخليت لا موقع ولا ولاية ولا جوب فير ولا شركة مقدمت عليها يعني تقريبا ب 1000 مكان مقدم علي  بحيث لو تشوف الايميل مالتي بي 5000 اوتو ربلاي واعلانات ادزه هاي المواقع والي ردوا عليه مكان واحد فقط وسووا وياية مقابلة بالتلفون سالوني اشياء بسيطة جدا وبعدين دزولي ايميل كلولي انت ممقبول. رحت على المنظمة كلتلي وحده يصيحولها جوب ديفيلوبر كالت مثل متعرف هسة شوية الوضع الاقتصادي بامريكا صعب واني نفسي تعبت هواي يله لكيت هذا الشغل مع العلم انه اني عندي خبرة 15 سنة ومشتغلة في داخل وخارج امريكا وكالتلي انه هي قدمت على ما يقارب 2000 عمل وبلا نتيجة بعدين حصلت هذا العمل عن طريق صديق وكالتلي انه هي جان راتبها 150 بالسنة بينما هسة 30. فاخوية العزيز اذا ما عندك فلوس تكدر تبقة هنا لحد ما الله يفرجها تره صعبة البقاء هنا.

[ســـرى]

العلاقات ايضا تلعب دور بالشغل بس طبعا مو مثلنا بالعراق يعين العرف بدون ما يكون مؤهل لا مو هيج.يخابر صديقه ابو الشغل ويكوله عندي شخص راح يفيدك بالشغل ويمدح بيك مثلا ويكوللك روح عندك موعد مقابلة فإذا ثبتت جدارة تتعين واذا لا ما تتعين حتى لو موصين عليك.وهذا الكلام يمشي حتى عالوظائف الجامعية.

[مشلوع كلبي]

صحيح اخوان بميسورى ماكو شغل انى ابنى وبنتى طلاب هندسه والانكليزى فول وماخلو لاشركة ولامعمل ولااى ركن وعلى النت يملئون ابلكيشن ويرجعون لورا حتى اضحكم من كثر مايملئون كامو يتهيون يدخلون يملئون عامى شامى ويضرب الحظ انو يتصلون على بنتى يكولولها على مقابله على تعين بالكوردمن بس وين طلع هى من دوختها ماليه فورم على كوردمن بنورث داكورتا ............... ولما اتصلو بيها كالولها راح تجين  لهذه الولايه..................فكالت الهم نوووووووووووووووووووو...............بس مانياس هم يدورون راح يصير سنه وخطيه ابنى يشتغل خباز بمخبز عراقى وشغله مايكفيه حق الكاز والدخان بس الحمدلله الله مايكطع اذا ما لكو هسه بلكى على الفتره الجايه يلكون الكل يحجى على شهر العاشر بلكى الله يسهل ..........دور ابنى الله ماينسى عبده والله يسرلك
وانشالله تفرج عليك