اخواني اخواتي العينكاويين والعينكاويات محتاج مساعدتكم .. جديد

[عراقي دايخ]

السلام عليكم
حبايبي اني اليوم قررت ابدي مشوار الفلتان من العراق وراح اروح لسوريا خلال 10 ايام واريد ابدي بالتقديم للجوء لاي مكان بالعالم واعتقد هسه ماكو غير امريكا تلفينا فاريد منكم تشرحولي خطوة خطوة شنو الي لازم اسوي علما اني عندي طفلة عمرها سنه بس ما عندي ورقة تثبت اني تهددت او ريكومنديشن من الامريكان شنو الي لازم اسوي ؟ ولا تنسون بالتفصييييييل ومشكورين يا ورروود

[دايخ بن دايخ]

إبن عمي دايخ :

راح أنقل لك هاي الفقرات أدناه اللي أجملتها لأخ في سؤال له مشابه لسؤالك ، بفارق أنه كان يستفسر عن خطوات اللجوء بالإردن .
بالنسبة لسوريا لا أعتقد أكو فرق بالإجراءات عن الأردن :

ماراثون اللجوء ...
عد وراي أخي :
1 ـ تروح إلى مكتب مفوضية اللاجئين ( في الأردن بدير  غبار ، في سوريا بكفر سوسه ) وشايل وياك ثبوتياتك ( جواز ، جنسية .. إلخ ) .
2 ـ توكف بره سره ، بعد ما يجيك الدور راح يدخلوك علمود موعد .
3 ـ بيوم الموعد تروح ( وياك ثبوتياتك) وتدخل  جوه وتاخذ رقم وتكعد وتنتظر ويا الحشر ( حشرٌ مع الناس عيدُ ) .
4 ـ راح يقابلك واحد ( أو وحده ) وياخذون منك المعلومات الأولية عنك ويستنسخون ثبوتياتك بعد ما تملي إنت ورقة مطبوعة عليها فقرات تتضمن شرحك لأسباب خروجك من العراق .
5 ـ وراها راح تنتظر شوية قبل ما يصيحوك وينطوك وثيقة (( حماية)) عليها صورتك وبياناتك بصفتك طالب لجوء .وهاي الوثيقة مدتها 6 أشهر قابلة للتجديد .
6 ـ هسه تجي دوخة الإنتظار  ، وهاي تعتمد على حظك .
7 ـ بعد مدة ( في العادة تتجاوز الست شهور ) راح يطلبوك لمقابلة ( أو مقابلات) مع أحد موظفي (( التوطين )) اللي راح تسرد قصتك عليهم .
8 ـ بعد مدة ( هاي هم إنت وحظك ووياها قوة قصتك) راح يتصلون بيك ويكلولك : تحول ملفك لفلان دولة (( هسه أمريكا أولاً ! ) .
9 ـ هم بعد مدة يخابروك جماعة (IOM ، اي منظمة الهجرة الدولية) إذا كان نصيبك أمريكا ، وراح ينطوك موعد لسرد قصتك وأخذ بصماتك وطولك ووزنك ويكللولك روح الله وياك إحنا نخابرك على موعد المحلفين .
10 ـ إيضا بعد مدة( شهرين تلاثة أربعة) راح يتصلون بيك وينطوك موعد على مقابلة ( المحلف)
11ـ راح تقابل المحلف و هذا راح يقرر قبولك من عدمه ثم تنتظر فترة قصيرة حتى تستلم ( ظرف النتيجه مال المحلف) .
12ـ إذا خابروك عالفحص قبل إستلامك للظرف فهذا خوش مؤشر على قبولك .
13 ـ تروح يوم الموعد وتستلم الظرف ( إن شا الله قبول) .
15 ـ بعد إستلام الظرف ( بالقبول إنشا الله) هم  راح تنتظر ( كذلك إنت وحظك) حتى تجيك الموافقة الأمنية وتكتمل بقية الإجراءات الخاصة بسفرك .
16 ـ بالموفقيه

[angie-dawood]

اخي العزيز اولا شيصير منك اخونا دايخ ابن دايخ يمكن اقرباء   ماعلينا

اخي العزيز تروح لسوريا تقدم على اليوان تكون كاتب قصة ليش طلعت من العراق سوى عندك تهديد او ماعندك عادي قابل كلهم كان عدهم قصص تهديد اشو ابو القصص  الي بيها تهديد انرفضوا والي ماعدهم تهديد وامورهم عال العال اخذوا لجوء قدم اخي القصة مالتك وسبب تهجيرك وانتظر تحويل فايلك للتوطين وبعدها المقابلات وانشاءلله الله يوفقك

[عراقي دايخ]

اني جدا ممنون منكم على التفاعل وسرعة الاستجابة انجي خيتو هو اكو عراقي ما دايخ ؟ هع هع
المهم ان شاء الله استمر وياكم اول باول زين شغلة ثانية ممكن تنطوني شوية معلومات عن سوريا يعني احنه عائلة من 3 نفرات اني والام وبنية عمرها سنه وين اكدر أأجر مكان مناسب وزين وكمصرف شيكفيني ومن هالسوالف يعني ولو ضوجتكم بس ميخالف تحملوني تره بعدني جديد بالشغله وتحياتي يا غاليين

[angie-dawood]

اخي بصراحة اني اخواني من جانوا بسوريا جانوا كاعدين بمنطقة اسمها جرمانه وايجاراتها كانت غرفة وصالة 100 دولار حسب ماكالوا وهم اكو ب 200 دولار هاي اسعارها بمنطقة جرمانه يعني هي سوريا ارخص من باقي الدول وهم يمكن تكدر تقدم على مساعدة الصليب الاحمر  حسب ما كانوا ينطون للي عنده اولاد بالمدارس انتظر الاخوة الي بسوريا هما اكثر يوضحون الك اخي انشاءلله ما يقصرون بالرد

[alalgawy]

اخي عراقي دايخ

الايجار يبدأ من 170 دولار فما فوق بالشهر وكمصرف يعتمد على مصاريفك يعني تكدر تعيش ب 300 دولار  واكثر


تحياتي لك

[saif moon]

اخوية العزيز بالتوفيق ان شاء الله ........ ولو اني ما اريد احبط من معنوياتك بس ترة شغلة الهجرة اطول بس حط هاي ابالك علمود اتكون بالصورة و لتكول اني اتورطت .......ترة اخوك جان مترجم وعندي اثباتات و مقدم مباشر على ال IOM و ليهسة هاي صارلي 5 اشهر بعمان و محد عبرني ولو بمس كول عود اني هم اختاريت اجي للاردن عود على اساس هي الموقع الرئيسي وسريعين..




تحياتي الك...

[saif moon]

اخوية العزيز بالتوفيق ان شاء الله ........ ولو اني ما اريد احبط من معنوياتك بس ترة شغلة الهجرة اطول بس حط هاي ابالك علمود اتكون بالصورة و لتكول اني اتورطت .......ترة اخوك جان مترجم وعندي اثباتات و مقدم مباشر على ال IOM و ليهسة هاي صارلي 5 اشهر بعمان و محد عبرني ولو بمس كول عود اني هم اختاريت اجي للاردن عود على اساس هي الموقع الرئيسي وسريعين..




تحياتي الك...

[عراقي دايخ]

الف شكر الكم يا غوالي على الردود والمشاركات المفيدة وهم انتظر جماعة سوريا يوضحون اكثر والله يوفق الجميع