الفحص الطبي والمقابلة SIV موضوع للنقاش

[echo 9]

السلام عليكم
اخوان بودي ان نتناقش بموضوع الفحص الطبي والمقابلة لل SIV وخصوصا انني باذن الله عبرت مرحلة بحر الظلمات زانتظر موعد المقابلة والفحص الطبي .
1- هذا الموضوع لاخواننا الذين مروا بتلك المرحلة عن تجاربهم والامور التي جرت معهم بالمقابلة والاسئلة اللي انطرحت عليهم وخصوصا اصحاب العوائل ايضا الاوراق اللي طلبوها منهم بالمقابلة والوثائق الاخرى ؟
2- الفحص الطبي وما جرى خلاله والاجور وانسب العيادات المذكورة بالرسالة وهي اي او ام و وامار وطريقة الفحوصات
3- الظرف مال ال دي اتش ال اللي المفروض الواحد يحضره بالمقابلة
وكل ما يتعلق بهاي المرحلة اخواننا واخواتنا المروا بيها لا يقصرون بالمشاركة وبارك الله بالجميع
تقبلوا حبي واحترامي
Echo 9

[blood_brothers8]

والله الموضوع كلش مهم ...وارجو من اصحاب الخبرة المساعدة ....ولو اني بعدني ماواصل لهاي المرحلة بس اكيد اخوتنا الاخرين محتاجيها او راح يحتاجوها...عاشت ايدك عمنا ايكو ع هذا الموضوع المفيد....وكما اريد اسال لازم ويا شركة dhl ميصير غير شركات مثل feedEx...وشكرااا

[ســـرى]

ظروف الدي اتش ال هاي تاخذوها من احد مكاتب الدي اتش ال اللي راح توصلكم بإيميل المقابلة وعلى عدد افراد العائلة المشمولين بالكيس احنا بوقتنا كان الظرف ب11 دولار تقريبا ما ادري هسه بيش.

الفحص ما بيه اي شي احنا بوقتها كانت عيادة الشفاء ويكون الفحص للكبار قياس ضغط وتحليل دم وبعدين اشعة صدر (الحامل غير مشمولة بالاشعة بس لازم هي تنبههم اخاف ما منتبهين)

بعدين كل فرد يتم اخذ تاريخه الطبي من قبل الطبيب (النساء والبنات حتى لو كانوا صغار تفحصهم وتسألهم طبيبة والرجال والاولاد الصغار يسألون ويفحصون من قبل طبيب) والمسألة عادة ما تاخذ وقت للفرد الواحد بس العائلة اكيد لازم واحد ينتظر الثاني تاخذلها فد كم ساعة من الدخول للخضراء والفحص والخروج.

المقابلة ايضا سهلة ما اعرف بالعوائل اللي افرادهم هواية بس عادة يسالون الزوج والزوجة ورة ما ياخذون بصمات الاصابع اليكترونيا تكون المقابلة بنفس القاعة مال الانتظار يعني مو غرفة وحدكم اللي يقابل هو مو القنصل هذولة موظفين هم نفس شغلة المحلفين لانه يحلفوكم ويسألوكم كم سؤال اول مرة الزوج والزوجة وبعدين كل واخد وحد من خلال حاجز زجاجي واكو مايكرفون يعني سماعة علمود تسمعوهم طبعا اللي يحجي انكليزي شغلته سهلة واللي ما يحجي انكليزي يكون اكو مترجم

اغلب الاسلة تتركز عالتاريخ البعثي يعني منتمين لو لا وشنو درجتكم البعثية واذا ما منتمين راح يسألوكم شلون فلتوا ؟؟؟؟ هههههههههههههههههه اي والله مو شقة

شراح تشتغلون من تروحون لامريكا او شنو مشاريعكم بامريكا؟

الرجال يسألوهم عن العسكرية اكـــــــــــــــــيد

شمخلصين كلية؟

عدكم احد بأمريكا؟

على اي ولاية رايحين؟وليش؟

وخلوا في بالكم انه تنسألون عن اي معلومة انتو ذاكريها بالفورمات فلاتخربطون بالمعلومات ولاتغيرون بيها

عادة محد يسأل عن التهديد بس هم خلوا في بالكم تنسألون

ومن اتذكر بعد شي اخليه هنا

يبقى رد الاخوة اللي فاحصين بوامار ولو اكو موضوعين للاخوة ناشينال والاخ النسر الذهبي شارحين بيه الفحص والمقابلة.

تقبلوا تحياتي

[لا اسم]

شلونك اخوية ابو خالد

هذا الموضوع صدك بوقتة ولو انت ماداعينا اله لان محدد بس للاخوان الي مروا بي بس راح اكون فضولي و ادخل اقرا الردود اذا تسمح
و ياريت انت هم تغني لهذا الموضوع حتى بعد اجراء مقابلتك ان شاء الله

تحياتي عزيزي

[hesham11]

السلام عليكم شباب بارك الله بيكم على هذا الموضوع الرائع والامهم تحية للجميع
بس عندي سؤال اذا امكن الى الاخ لااسم وجميع الاخوة احنا كنا نعرف بأنو احنا كنا طلاب مدارس يعني الحزب مخصوبين علية زين هم يجي رفض بسبب الأنتماء الى الحزب وطبعا" كان التدريب في جيش القدس اجباري هم بي تدقيق

[ســـرى]

اخي الكريم لامايجي رفض لانهم يعرفون انه الانتماء كان اجباري بالعكس هم مرات يسالوم اللي ما منتمين شلون كدروا انه ما ينتمون فلاتقلق.

[hesham11]

                                           السلام عليكم ورحمته الله وبركاته

              بارك الله بيج اختي سرى على الرد ومواصلة و أتمنى الموفقية للجميع  مع الشكر

 
أخوكم hesham11

[echo 9]

السلام عليكم
عاشت ايدج بنيتي الغالية سرى على هالشرح والتوضيح والشكر ايضا لبقية الاخوان الشاركوا بالموضوع بالشرح او طرح الاسئلة وانا ايضا عندي سؤال :
بالنسبة للي عنده حالة مرضية لاحد افلراد عائلته وذاكرها لل ان في سي لازم يجيب وياه تقارير طبية تثبت الحالة واذا كان ماعنده تقرير بس الحالة واضحة للعيان من غير فحوصات شيسوي ؟

[ســـرى]

عمي العزيز الحالات المرضية يريدون بس تقارير طبية عادية وبالشفاء ماكانوا يطلبوها بس بوامار ما اعرف لانه يجوز اطباء امريكان

بس شغلة مهمة للاطفال اخذوا وياكم دفاتر اللقاحات للي متوفرة عدهم.

[ســـرى]

واذا تحب تراسلني عالخاص اني بالخدمة.

[echo 9]

السلام عليكم
- اخوي الغالي لا اسم تعذرني ما شفت ردك والله بس يا عمي الموضوع مفتوح للجميع بدون استثناء ولفائدة الجميع وطلبنا من اخواننا واخواتنا اللي نعدوا هاي المرحلة يفيدونا واذا احد عنده سؤال ايضا يطرحه للفائدة وان شاء الله هذا الموضوع يضاف للمواضيع القيمة بالمنتدى وانتم اصحاب الموشوع وانا خطاركم عمي
- بنيتي الغالية سرى الف شكر عمي بالمنسبة لي محضر التقارير الطبية الخاصة بزوجتي وايضا دفاتر اللقاحات مال الجهال وانما طرحت هالسؤال لفائدة الجميع وانتي ما تقصرين تثرين الموضوع باجاباتج
يا ليت الاخوان الباقين يساعدونج بالاجابة ومنهم من وصل هسه بامريكا ومنهم من ينتظر السفر اخوما مضروب ليزر معذور طبعا لانه مخبوص بتحضير نفسه للسفر وكلنا نعرف الهوسة مال التحضير للسفر واحدنا ينخبص من تصير له سفرة لبغداد مو لامريكا الله يكون بعون مضروب ليزر ويسهل امره

[echo 9]

السلام عليكم
سؤال اخر لو تفضلتم
- نثل ما بعضكم يعرف انه انا مقدم ايضا اي او ام وعدد عائلتي بال اي او ام 31 نفر ب اربع كيسات ومن استلمت الكوم بروفل عال اس اي في ابلغت الاي او ام بذلك واللي بدورهم ابلغوني بايقاف العمل بالكيس مالتي فقط وبقية الكيسات ماشية اي او ام
بس من ذاك الوكت اللي بلغتهم بيه لهسه ما راسلوني بعد ليش ؟ ووين صفى الدهر والضيم بكيسات الناس الكانت معاي ومنهم بنتي وزوجها ؟
اصحاب الراي والخبرة منكم الاجابة واكون ممنون ؟

[ســـرى]

اكو مواضيع اخرى لاخونا ابو محمود واخوتنا ناشنال والنسر الذهبي ان شاء الله تفيدكم واذا تحبون اشوف اللنكات مالتها.

[echo 9]

ياليت والله سرى تخللين اللنكات بالموضوع

[ســـرى]

http://www.ankawa.com/forum/index.php/topic,414304.0.html


http://www.ankawa.com/forum/index.php/topic,419194.new.html#new

[echo 9]

السلام عليكم
عاشت ايدج سرى وبارك الله بيج

[لا اسم]

حبيبي ابو خالد هاي غير دا نداهر وياك لا تاخذ كلشي على محمل جد

اخوان ممكن يفيدنا بتجربتة و نكون ممنونين منكم

[nen000]

 رحم الله والديكم اخوان هذا خووووش موضوع

الاخوان الي قابلوا بالفترة الاخيرة فيدونا بالمعلومات عن اخر اشياء المقابلة والفحص



تحياتي للجميع

[echo 9]

السلام عليكم
اخوان بلكي واحد يجاوبني على هالسؤالين بلا زحمة اكون ممنون منه :
1- موعد المقابلة ان شاء الله بشهر ال 12 بالنسبة للفحص الطبي متى اكدر اخابرهم واروح اسويه ؟ باي وقت اريد لو لازم من هسه اسوي الفحص بارك الله بيكم ؟
2- انا مقدم ايضا اي او ام وعدد عائلتي بال اي او ام 31 نفر ب اربع كيسات ومن استلمت الكوم بروفل عال اس اي في ابلغت الاي او ام بذلك واللي بدورهم ابلغوني بايقاف العمل بالكيس مالتي فقط وبقية الكيسات ماشية اي او ام
بس من ذاك الوكت اللي بلغتهم بيه لهسه ما راسلوني بعد ليش ؟ ووين صفى الدهر والضيم بكيسات الناس الكانت معاي ومنهم بنتي وزوجها ؟
اصحاب الراي والخبرة منكم الاجابة واكون ممنون ؟

[ســـرى]

((موعد المقابلة ان شاء الله بشهر ال 12 بالنسبة للفحص الطبي متى اكدر اخابرهم واروح اسويه ؟ باي وقت اريد لو لازم من هسه اسوي الفحص بارك الله بيكم ؟))

عمنا العزيز شوكت ماتريد من هسه الى قبل اسبوع من المقابلة بس سويه من وكت علمود واحد ماضامن نفسه وظروفه كمله من وكت.موفقين ان شاء الله

[echo 9]

السلام عليكم
عمي بارك الله بيج بنيتي الغالية سرى دائما سباقة بالاجابة الكافية والوافية ...
بس سؤالي حول ال IOM محد جاوبني عليه لهسه وينهم جماعة الاي او ام او احد الاخوان من جماعة الاس اي في ومر بهيج حالة ؟

[اسالك ياعراق]

حبيبي قلبي لويش مستعجل خلي الجو يبرد شوية وتخف اللصقاء الله يجفيك شرها ويحفظ العراقيين منها وانشاء الله اكو وقت بشهر 11  احسن بالتوفقيق انشاء الله