قصة الفحص الطبي

[Dr.Ameen]

السلام عليكم

اجاني موعد مقابلة ودزيت ايميل لعيادة وامار ودزيت لهم نسخ من الجواز وصور ورقم التلفون ومر اسبوع ولا حس ولا خبر
خابر عليهم كالي الاخ يالتلفون منظومة الانترنيت عاطلة مال العيادة  وانطيتة اسمي مع اسماء العائلة وحددلي موعد فحص يوم الخميس هذا المضى
اني ما ساكن في بغداد ورحت ولكيت اسماءنة موجودة وبالرغم من وصولي اول الناس الا ان فحص كان اخر شخص
كنا 3 عوائل اس اي في و4 تقريبا سنكل وبعض عوائل الاي او ام بلشنا من 8 صباحا وخلصنا 2 ظهرا
بعض الملاحظات ....لم يذكر لي احد ان اجلب الجوازات الاصلية وسوهة ظلمة علية ليش جايب نسخ فقط يعني يريدون الاصلي و3 نسخ لكل جواز و 3 نسخ موعد المقابلةو الجناسي الاصلية مع اربع صور ومبلغ 170 دولار للبالغ و85 للطفل واخوكم دفع 510 دولار وهو الممنون,العاملين بالعيادة لطفاء والعيادة ما تتيهة بس ما راح اذكر تفاصيل عن العنوان لان الوضع الامني خارط
جماعة اي او ام كلولهم نكمل يوم الاحد الله يعينهم وهذا الاجراء المتبع ان الاس اي في يوم واحد وغيرهم يومان مع العلم هو نفس الفحص الطبي
وشكرا

[Dr.Ameen]

نست اذكر ان الاطفال لا ياخذون اشعة او سحب دم او نظر  فقط وزن وطول وفد كم سؤال عن الحالة الصحية
ونعم يستقبل وامار الاي او ام ولكن لا اعرف كيف
وشكرا

[يوزارسيف]

دكتور امين ...الخمسمائة دولار فدوة الك اعتبرها لابتوب ووكع من فوق السطح...ههههه
عموما" انشاءالله يا رب تاخذ موعد سفر قريب وتفرحنا.

[Dr.Ameen]

والله لو النفر الف دولار ادفع
عمي هاي امريكا وكرين كارد ترة مو لعب هههههههههههههه
مشكور اخي يوزر سيف

[يوزارسيف]

العفو دكتور نسيت اسألك عن المراة الحامل .. ما صادفكم عائلة عدهم حامل وشلون كانت الاجراءات ؟..لأن الحقيقة زوجتي حامل وراح تدخل بشهرها الخامس ومنتظرين الفحص فأريد اعرف كيف تكون الاجراءات من ناحية تسريع المعاملة ،مع العلم المنظمة يعرفون انها حامل من يوم المقابلة ..وشكرا" على الموضوع الجميل.

[Dr.Ameen]

اخي العزيز
نعم كان هناك امرأة حامل ,نفس الاجرات عدا ماكو فحص الاشعة لان ممنوع للحامل وحسب معلوماتي تمنع الحامل من السفر بعد دخولها الشهر السابع بس انت حاول ان تسافر باسرع وقت لان المولود الجديد يستلم الجنسية الامريكية مباشرة حال ولادتة على الاراضي الامريكية اما اذا انولد بالعراق العظيم  فراح ياخرك قرن لان جنسية وشهادة جنسية وتموينية وجواز جديد وتعيد الفحص الطبي
يعني بعض الاخوان يكذبون كذبة بيضة عن موعد حمل زوجاتهم  حتى ما يتاخر السفر ويكولون انها بالشهر السادس وبالحقيقة هي بالسابع او حتى التاسع وتعبر بسهولة

[الوتار]

الاخ العزيز دكتور امين و أخواني أخواتي اعضاء المنتدى الاعزاء:
دار بيني وبين صديق لي حديث عن الفحص الطبي (SIV, IOM ) وذكر لي ان هناك بعض الامراض(وقاكم الله شرها) وان كانت ليست بالخطيره قد تؤدي الى رفض القضيه لا سمح الله مثل( لزوجة الدم, كثافة الدم, بعض انواع الحساسيه, ضغط الدم, الخ....) أرجو من الاخوه توضيح مدى صحة ادعاء صديقي مع ذكر الامراض التي قد تؤدي الى رفض القضيه (لا سمح الله). هذا من باب من باب اخر لدي سؤال عن الطفل حديث الولاده الذي يولد مع توقيت الفحص الطبي او بعده كيف سيكون وضعه في القضيه؟ وكم يجب ان يكون عمره حتى يتسنى له الخضوع للفحص؟ مع شكري الجزيل مقدما لاجوبتكم.

[يوزارسيف]

اها...يعني تقصد دكتور بيوم الفحص زوجتي تكوللهم انها في الشهر الثالث مثلا" ..بس هناك الاطباء اكيد راح يعرفون من خلال السونار او التحاليل ، على كل حال بلكت الفيزا تطلعنا قبل الولادة بس ينرادلها توفيق الهي وحظ كاعد.

[Dr.Ameen]

اخي الوتار
الاشعة للتاكد من خلو الاصابة بالسل وختى لو مصاب ينطوك علاج
وفحص الدم للتاكد من الاصابة بالسفلس وهو مرض زهري اي ينتقل عن طريق الجنس واكو الة علاج وسالونة اذا نريد انسوي فحص الايدز  اي انه كان اختياري وكلنه ما ردنا وطبعا نفس عينة الدم يفحصوهة للايدز اذا تريد .....يعني حسب معلوماتي والله اعلم ماكو اي رفض بس اذا الشخص عندة حالة مرضية مثل السكر او ضغط الدم او احد الامراض فيستعدون لعلاجة هناك وحتى لا ينشر السفلس او السل بامريكا
والله اعلم
اخوية يوز سيف حال اتسافر قبل الولادة بس اذا صارت شتسوي تتحمل وتمشي بالمعاملة

[ســـرى]

لا اخوية العزيز لاتقلق من شغلة الامراض واي واحد عنده مرض ما يمنعون عنه السفر واحب ازيدك معلومة انه حتى اللي بيهم ايدز هسه بيها وجهة نظر لانه قبل كانوا ممنوعين وهسه بيها غير اجراء فلاتقلق.

اخوية يوسف ما اعتقد اكو سونار بالفحص الطبي بس بفحص الطبيبة ممكن تقدر هي في حدود من كذا شهر الى كذا شهر بس انتو اعتقد تودون تقرير سونار يثبت هي بيا شهر.

[الوتار]

شكرا اخويه دكتور امين اشكرج اختي سرى بس بقى موضوع الطفل بأي عمر ممكن له السفر؟ وما هي اجراءات الفحص الطبي لي اذا كان عمره شهرين؟  ربي يوفقكم

[ســـرى]

الفحص لكل الاطفال نفس الشي مهما كان عمرهم لانه ما عدهم شي بس تاريخ مرضي وفحص سريري لا تحاليل ولا اشعة.

[Dr.Ameen]

كلام الاخت سرى مية بالمية صح لا يوجد مرض يمنع السفر واقترح الرئيس اوباما الغاء حظر السفر على المصابين بالايدز الى امريكا ولو شخصيا اني ما اتفق وياة ومن اوصل للكونكرس اناقش هاي المسالة كافي امريكا تبتلي بامراض العالم الثالث....هاي اني بعدني بالعراق وهيج,  من اتجنس شسوي الله الليستر

[الوتار]

الف لف الف مليون شكر اختي سرى ريحتي كلبي الله يفرحج على طووووووووووووول وبارك الله بيج. تدرين عندي صديق دعبلي كذبه خبلتني كلي انه لازم عمره 6 اشهر يلله يجرون أله الفحص الطبي شكول عليه الله يسامحه والله يوفقج اختنه العزيزه.