اخواني اللي بلبنان

[mahmod87]

السلام عليكم اخواني الاعزاء
اني هذا الاسبوع قررت اسافر الى لبنان بصحبة اخي و صديق يعني راح نصير 3 اشخاص و ناوين نطلب اللجوء هناك و بعد ان اتصلت باحد الاصدقاء هناك كال المفوضية مال اللاجئين حاليا مقفلة و لا تستقبل اي طلبات اللجوء , هل هذا الخبر صحيح ام لا , و الاستفسار الثاني كيف هي حال اللاجئين و المعيشة و الاسعار في لبنان , اعرف ان الحياة غالية هناك بس الي اريد افتهما شلون مدبريها جماعتنا هناك
يا ريت لو تفيدوني بخبرتكم و شكرا مقدما

[شالان العراقي]

اخوية ماكو هيجي شي موجودة الامم واكو تسجيل بس راح يعطلون من 23 بالشهر الى 2 بالشهر من السنة الجديدة يعني عادي ماكو شي

والله بالنسبة للحال فالشغل اكو اذا تدور والرواتب من 200 دولار الى 500 دولار بالشهر  تكدرون انتو ال 3 تاجرون غرفة او شقة ايجارها 200 دولار الى 300 وتقسمنوها بيناتكم وانتو ماعدكم عوائل زكردية يعني مصرفكم وايجاركم يكلف بالشهر من 600 الى 700 دولار
تحياتي الك

[mahmod87]

زين بالنسبة للمنطقة المناسبة النا و بالنسبة لشرعية الاقامة شلون يعني نكدر ندور على شغل و المخاطر بدون اقامة شنو

[** يدكو **]

اخي هما بالمطار راح ينطوك شهر واذا تكدر تحصل ابو 3 اشهر من بغداد بعد احسن اسال اذا اكو او لا بعد ماتسجل بالامم

ينطوك موعد للمقابله الاولى بس تخلص مقابله اولى ينطوك ورقه اللاجوء كلتنا حالينا نمشي بيها اي بدون اقامه ومحد تعرضلنا

من الشرطه الى اذا واحد يسوي مشكله اكيد يلزمو الشرطه ..اكو هوايا مناطق رخيصه واني شارحها كلها بهذا الرابط
http://www.ankawa.com/forum/index.php?topic=415529.0

[mahmod87]

الف شكر اخواني الغالين شالان العراقي ويدكو وتسلمون ع الرد الشافي وهسه يلا اطمنت واكدر احجز باجر باذن الله
بس سؤال ثاني ياريت متقصرون بالرد : اني واخوي خريجين متوسطة تفيدنا اذا ناخذ تأييد لشهادة المتوسطة ؟ وشلون طريقة مصادقتها من التربية وهل راح تفيدنا في حال ردنا نكمل دراسة اعدادية في بيروت ؟

تحياتي وتقديري للجميع

[** يدكو **]

اخي بالنسبه للشهاده مايعترفون بيها هنانا اذا ردت تكمل هما راح يختبروك وحسب كفائتك يخلوك بالصف الي تستحقه

اذا تكدر تطلعها طلعها احتمال تستفاد منها يوم من الايام

[mahmod87]

اخواني اعضاء منتدى عنكاوا الطيبين
راح اسولف الكم بالتفصيل عن بداية رحلتي اني واخوي
وصلنا لبيروت اول امس 21\21\2010 من مطار البصرة لمطار رفيق  الحريري في بيروت والاجراءات سهله وبسيطة اخذنا تكسي من باب المطار لفندق بشارع الحمرا
واليوم الخميس الساعه بالعشرة ونص الصبح اخذنا تكسي وانطيناه عنوان اليو ان وضل يفتر بينا ويسأل منا لما وصلنا لباب مفوضية اللاجئين نزلنا وسألنا الموظفين اللي بالباب كالوا شوية ويجي الموظف
اجا الموظف ودخلنا واخذوا الموبايلات وخلوهم بالامانات وانطونا كارت اصفر ومكتوب بي رقم ضلينا ننتظر شوية وصاحوا رقمنا رحنا للموظفة انطتنا اوراق نكتب بيها معلومات مثل الاسم والمواليد ورقم التلفون والعنوان ملينا الاوراق وانطيناها الها كالت انتظروا شوية من تسمعون رقمكم تجون بعدين نادوا برقمنا وسألتنا شوكت وصلنا لبنان وشنو سبب مغادرة العراق وعن الخدمة العسكرية ومتزوج او لا وكم واحد جايين وشنو تقربون لبعض المهم كملنا وانطتنا موعد مقابلة اولى ع السنة الجديدة 16\2\2011 وكالت تجون وتجيبون وياكم الجوازات واي وثائق ثانية او صور تفيد حتى لو كانت مستنسخة اخذنا ورقة الموعد وكتيبات بيها تعليمات للاجئين اخذناها ورجعنا للفندق اللي اجرنا مسبقا من نفس المكتب اللي حجز النا التذكرة اول ليلتين بـ95 دولار والشقة لشخصين بسريرين نوم وحمام ويقدمون وجبة فطور ضمن خدمات الفندق.

طيب لحد الان كلشي حلو وتمام

وهسه اني بالفندق وخلصت مدة الحجز الليلتين وجددنا لليلة ثانية اخذت ارقام الدلالين من مشاركة كاتبها الاخ العزيز يدكو  بموضوع اللاجئين العراقيين في لبنان المهم اتصلت بيهم وكالوا ماتلكا شقة مؤثثة بسعر مناسب وواحد منهم كال انتظرني يومين وانتو تعرفون بيروت ماشاء الله رخيصة كلش خاصة بفترة الاعياد يعني الـ100 دولار تشمرها وانته ماشي المهم ضليت ادور لوحدي لان اخوي صار عنده مغص كلوي ورحت اشتريتله دواء من الصيدلية القريبة علينا وضل كاعد بالفندق مايقبل يطلع لان بس يمشي تضل توجعه خاصرته صار يومين واحنا معتمدين على الله وعافيتنا  والمبلغ اللي عدنا وضليت هسه محتار ابقى يمه لو اروح ادورلي على مكان نبقى بي لحد ما الله يفرجها ونحصل على شقة مناسبة بمنطقة اسعارها معقولة واذا شخص يقترح علينا نشاركه بالسكن فـنكون ممنونين جدا اله لان المبلغ اللي عدنا قليل جدا يعني كل واحد الفين دولار ماعدا المبلغ اللي دفعناه لحجز ليلتين الفندق حجز التذكرة ؛
اللي عنده اي اقتراح ممكن يفيدنا لا يتردد بطرحه ونكون ممنونين الكم لان الاسعار هنا بدت تاكل بينا مثل النار من تاكل الحطب

تحياتي الكم ويارب سهل امر الجميع

[** يدكو **]

اخي العزيز راح انطيك ايميلي لان دزيتلي على الخاص ايميلك بس مضاف عندي ايميلي هو ro.ka93@yahoo.com واذا ماتلكاني
على الايميل دزلي الوقت الي تتواجد فيه انت على النت على كلن ..

الحمد لله على سلامتكم اولا ..

اخي اكو دلالين 2 في منطقه الزعيتريه واحد اسمه هاني عنده حلاقه والدلال الثاني هو مكتب بي اتصالات وهم دلال فوق مكتب الكاريتاس بالزعتريه اذا تروحلهم اكيد تلكى شقق وعلى الاكثر تدفه 300$ بالشهر ولكن ياخذون على الدلاليه هوايا
ضيفني على ايميلك حتى افهمك اكثر

تحياتي لك

[abosi]

حمد الله على السلامة اخوية

اني اخوك صارلي 12 سنة في لبنان
انصحك نصيحة ان تطلع من الفندق و لا تدور في شارع الحمرا على هاي الاسعار لآن مستحيل
دور في الاشرفية مثلا او السبتيه او الضاحية

و اني اقترح الضاحية لآن هناك ماكو حواجز للدولة و تكدر تفتر براحتك و خاصة بأنك مو مقيم

بالنسبة للشهادات فا اذا مخلصين سادس تتعادل في حال بعدهم ينرادلها امتحان دخول و اني انصحك بالمدارس الحكومية
لآن رخيصة

تحياتي