اخي اقراء هذه التفاصيل
السلام عليكم اخواني واخواتي
كنت ابحث عن موضوع الدراسة الاعداية في امريكا فلكيت هذه التفاصيل فحبيت انقلها يمكن
الموضوع قديم بس اتصور جديد للدراسة الاعدادية (الثانوية ) الموضوع منقول
اخوتي واخواتي ساشرح لكم بطريقة مبسطة جدا جدا كيفية الحصول على الشهادة الاعدادية في الولايات المتحدة بالنسبة للاجئين اذا رغبوا
اولا تعريف اولي للشهادة
بامريكا يسموها general education development ويختصروه بال GED وهي شهادة تخرج اعدادية حالك حال اي مواطن امريكي وكثير من الامريكان الي ما مخلصين اعدادية يؤدون هذا الامتحان حتى ياخذون الشهادة الاعدادية وهي قريبة الشبه بالامتحان الخارجي الي عدنا بس شويه اختلاف بالطريقة والاسلوب .. مو شوية ..هواية اختلاف .. مو هواية اختلاف اصلا مقارنة ماكو واثناء الشرح تعرفون ليش
2_ شروط الراغبين بالحصول عليها
كل شرط ماكو المهم يكون تجاوز السن القانونية لطالب الاعدادية يعني من عمرك 18 سنة الى ان يشاء الله عسى لو شايب وعمرك عبر التسعين وتريد الشهادة من حقك
3_فائدة الشهادة
اولا اسمك خريج اعدادية واكيد تكدر تكمل دراستك في كليات اخرى حسب رغبتك وطبعا موقفك يختلف لما تكول اثناء املاء الاستمارات الخاصة بالكليات والمعاهد انك خريج اعدادية في امريكا اضافة لفوائدها في ملئ استمارات العمل لان بامريكا كل ما عدك شهايد اكثر معترف بها من قبلهم تتقدم خطوة للامام نحو فرص ايجادك لعمل افضل من غيرك وبراتب افضل وهكذا تدريجيا وثالثا تفيد اللاجئ الي واصل جديد ولغته ضعيفة ومنظمات الهجرة حاطيه بمدارس مال اللغة المدرسين الي بيها يرادلهم تقوية بالانكليزي هسه تكولون شنو راح يمتحنونا اعدادية لو يدرسونا لغة وايضا بالشرح راح تعرفون ليش
مواقع هذه المراكز
موجودة بكل امريكا وبكل مدينة وهي مثل ما تكولون دوائر تابعة لوزارة التربية ( من باب التشبيه ) وغالبا ما تكون جزء من المدارس الاعدادية الي موجودة بكل مكان بامريكا او تكون ملاصقة الها (في اغلب الاحيان
4_ كيفية التقديم
اذا كنت لاجئ جديد فالافضل ان تخلي منظمة الهجرة الي انت تحت رعايتها ان تدزك مصحوبا برسالة انك لاجئ لاحدى هذه المراكز الي المنظمة تتعامل وياها على طول هاي طريقة تخلصك من ان الجماعة مال المركز الامتحاني يطالبوك باي هوية حتى يمتحنوك لانك جديد بامريكا ويجوز ما عدك ويكتفون بالجواز مالتك واذا عجبك تروح وحدك بله المنظمة عادي اكتب بالنت فقط الجي اي دي وسوي بحث وطلع مواقعها وروحلها
5_ كيفية اداء الامتحان الاولي
هسه تكولون شنو بدينا امتحان اولي وصارت سنه دراسية صبروا شوية وشوفوا العالم وين وصل وتطورت .. من توصل ويعرفون انك تريد تادي هذا الامتحان راح يسالك الموظف المختص على شغلتين يكولك تريد تمتحن الامتحان التجريبي اولا لو النهائي مباشرة لو تريد نعرضك على مستشار علمي ( هاي لهسه بلوشي انته ما دافع ولا فلس ) فالافضل انهو تطالبوه بالامتحان التجريبي راسا ينطيك فايل ويكولك توجه الى القاعة رقم كذا وروح امتحن .. هسه انته انصدمت تكول هستوني جيت كبل امتحن .. اي روح ولا تخاف حتى لو لغتك ضعيفة على الاقل راح تشوف الاسئلة ونوعها وتتعرف على طبيعة موادهم باعدادياتهم شنو فوائد هذا الامتحان عدا الاطلاع على موادهم اولا اذا لغتك قوية وشفت نفسك تكدر تخوض الامتحان الرئيسي الي تاخذ بيه الشهادة لان يكون على نفس المنوال بس اختلاف بالاسئلة فراح تنجح بالتجريبي والمصلح مال الاسئلة يكتب ملاحظة بالفايل مالتك انك موهل لخوض النهائيات ترجع على نفس الموظف الاولي راح يحددلك موعد امتحان جدا قريب شغلة ايام تروح تمتحن وينطوك الشهادة وتعلكها عل الحايط وتسوي حفلة تخرج ..واذا كانت لغتك ضعيفة وجاي جديد لامريكا وتريد تحتك بيهم اكثر وتقوي لغتك وما دبرتها بالامتحان التجريبي الي راح يصلحلك الورقة مالك ( بنهاية الموضوع راح اكتبلكم شوية عن نوعية المواد والاسئلة ) شخص يسموه همه المستشار counselor هاي لحد الان بلوشي ولا درهم ما تدفع راح يسالك شنو انته الي تريده وشفت نفسك بيه ضعيف مثلا راح تكوله اللغة مالتي مو زينة وكلشي ما افتهمت من الاسئلة راح يسالك انته تشتغل لو لا ( مو حتى يقفص عليك بجم فلس لا هاي امريكا مو عبالكم بريطانيا ) انما حتى يعرف الوقت المناسب الك حتى يدزك الى صفوف تقويه خاصة بالانكليزي ( ايضا بلوشي ولا درهم ) تكون دائما هاي الصفوف بالمدارس الاعدادية وطبعا راح يسالك وين بيتكم ( مو علمود يعرف انتو زناكين لو فقرة مثل ما يسوون بفرنسا وغيرها من دول اوربا ) بل من اجل ان يختارلك اقرب اعدادية على سكنك فاذا صفوف التقوية بيها مقبطة يختارلك وحدة شوية ابعد وهكذا شوية شوية
6_ وهكذا كل المواد الاخرى يعني انته يجوز قوي بالانكليزي بس مثلا بالرياضيات ما دبرتها نفس الحلة السابقة ايضا يدزوك على دروس تقوية خاصة بالرياضيات ( هم بلوشي ولا درهم ما تدفع ) ومثل ما شفتوه اخوان انك تكدر ترتب وقتك اول ايام وصولك لامريكا حتى تستفاد من هاي الشغلة فعلى اقل تقدير اذا ما عدك رغبة بشهادة الاعدادية فتكدر مثل ما شفتوا تقوون اللغة مالتكم هم ببلاش وهم احسن من مدارس اللغة مال المنظمات لان انته بكيفك بهاي الصفوف تكدر عندما تدعوا الحاجة ان تتركها ومحد يكولك على عينك حاجب وبالعكس اذا عندك رغبة بالحصول على الاعدادية فطبعا انته وبالاتفاق مع المدرس مالتك بالصف يكتب رسالة انك جاهز لتودي الامتحان النهائي ( واكثر المدرسين ينطوك هاي الرسالة شوكت ما انته تطالب بيها لان الامتحان النهائي للجي اي دي يكلفك من 50 الى 75 دولار في اغلب الولايات الامريكية ( وهاي الشغلة الوحيدة الي انته تدفع بيها فلوس وطبعا انته راح تخوضها من تكون واثق من نفسك على اجتيازها )
اخوان واخوات هسه خلصنا شلون تحصل شهادة اعدادية بامريكا والي هوايه من العراقيين يفضلوها على معادلة شهادتهم الاعدادية الي جايبيها وياهم او يحاولون يستحصلوها من العراق لان بالعراق كتابنا وكتابكم والنوبة اذا عرفوا ابو الانه مو بالعراق سلملي ما ينطوها الى بطلعان الروح عبالك جاي ينطون سر من اسرار الدولة
هسه على السريع اوصف لكم الاسئلة مالة شهادة الاعدادية الامريكية والي هي مستحصلة من موادهم الي يدرسوها باعدادياتهم ( من نفس كتب طالب الاعدادية شعراية اختلاف ماكو ) هي عبارة عن اسئلة وكل شرح او كتابة ما مطلوب منك كل المطلوب هو التاشير على الاجابة الصحيحة من ضمن خمسة اجابات همه ينطوها الك ما عدا امتحان اللغة الانكليزي الي بيه من ضمن الاسئلة كتابة مثل موضوع انشائي او قصة حسب الاسئلة اما باقي المواد فهي عبارة عن جغرافية وتارخ مجتمعتان معا يعني امتحان واحد وراح انطيكم مثل واحد على السوال فمثلا هو منطيك رسم لخريطة قارة خلي نكول اسيا مثلا وطبعا ملونة باشكال انواع الوان وكل لون هو منطيك الى شنو يرمز بعدين يسالك اشرح الوضع الجوي سنة كذا الي تعرضت اله القاره طبعا منطيك خمس اجوبه الفيكة الي بيها تقريبا كلها صح بس اكو واحد هو يوصف الحالة ادق وصف من البقية وهاي انته لازم ترجع للخريطة وتقرر بنفسك .. او مثلا سوال الرياضيات هاي الدائرة وبها فد ست خطوط وهو منطيك قياس بس مال خط واحد ويسالك الخط الاصفر شكد طوله وايضا منطيك خمس اجوبة فانته تستخدم حاسبة صغير هم ينطوك ياها بالامتحان (شلون دلال ) وتبدي تجمع وتطرح وتقسم ومدري شنو حتى تختار الجواب الصحيح واسئلة اخرى بالجبر والهندسة والتفاضل وبطرق مشابهة وبالنسبة لامتحان الانكليزي مثلا ينطيك كلمات ويكولك اختار معناها وينطيك خمس اجوبة طبعا كلها صحيحة بس اكو واحد هو الاقرب وهاي يرادلها واحد شوية الانكليزو ماله زين او مثلا ينطيك قطعة كان تكون خطاب للرئيس رزفلت ( ويكلك يا كلمة قصد بيها الرئيس مسالة التميز العنصري وطبعا انته لازم تكون فاهم للقطعة كلش زين وتعرف الجواب الصحيح .. طولت عليكم بس حتى انطي شرح يكون باذن الله تفصيلي على هاي المسالة المهمة مثل ما كلت الامتحان لا كولش صعب ( اقصد كمستوى طلاب اعدادية ) ولا هو سهل وايضا المسالة تفيد اللاجئ حتى يتقوى باللغة ويتعرف على الامريكان اكثر لان را تختلطون بيهم مباشرة اثناء الدراسة ومثل ما كلت ايضا ان اوقات الدراسة بصفوف التقوية حسب ما انته تكولهم يعني عدهم صفوف تبدي من الساعة التاسعة صباحا الى الساعة التاسعة مساءا فاحتمال يكون دوامك من الصبح لل12 الظهر او من ال12 الى الساعة 3 وهكذا صعودا وبالنسبة للدروس التقوية مال الانكليزي فهي افضل بكثير من مدارس الخاصة بالمنظمات وايضا هي مراحل يعني اذا كلش ضعيف ولا طكه يبدون وياك من الصفر وصعودا واذا كنت افضل طبعا يخلوك بمرحلة متقدمة وهكذا
