قرار جديد بالسماح للعراقيين بالاردن بالعمل!!!

[SARA CALIFORNIA]

اخواني البارحة كان عندي مقابله باليو ان و بالصدفة سالت الموظفة اذا كان بالامكان ان اعمل لاني سامعة انه اللاجي و اللي ما عنده اقامة لا يحق له العمل,,,كالتلي الموظفة انه اكو قرار جديد يسمح للعراقيين اللاجئين في عمان بالعمل بعد ان يحصلو على تصريح عمل,,,ما ادري هذا الخبر جديد لو قديم,,,اتمنى ان يكون جديد فعلا حته الناس تكدر تشتغل اثناء فترة انتظار اجراءات اللجوء...

[rafid82]

والله هو خبر جديد بس ينراد معلومات  هواي

ما هي الجهة اللي اتصدر تصريح العمل

ماهي نوع الاعمال يعني شركات أعمال حرة  عمال  الخ

هل يجب دفع الغرامات و بعدين يعطون تصريح العمل ؟

هل للامم المتحدة علاقة بذلك يعني راح نشتغل بموافقة الامم المتحدة و الحكومة معا

اعرف انه لاتملكين الجواب بس ياريت لو احد الاخوان هم عنده معلومات

[سفير الوطن]

مااعتقد بس ياريت

[كاتلوني الى الابد]

ليش اللي ايحصل تصريح عمل ميحتاج لليو ان اصلا والتصريح هذا يصدر من وزارة العمل يعني اي جهة عمل رايدتك تشتغل ويايا هي تسعالك بالتصريح واذا حصل الباقي امور روتينيه

[ــــ{{{ABADY}}}ـــــ]

للاسف ما اعتقد بس ان شاء الله يكون صحيح

[SARA CALIFORNIA]

اعزائي تره الخبر اكيد جدا جدا بس هستوة صادر بالجديدالموظفة كالتلي و هيه بقسم الحماية...سالتهه كلتلهه اني عندي كرين كارد هل مسموحلي اشتغل هنا؟؟؟كالت ميحتاج كرين كارد لان هسه صدر قرار يسمح بالعراقيين اللاجئين بالعمل كلتلهه اني سامعة ميصير كالت صحيح بس هاذه القرار جديد يعني بعده بالباكيت

[كاتلوني الى الابد]

يلا كل واحد ايحضر 350 دينار فلوس التصريح

[SARA CALIFORNIA]

اني اقترح الاتصال باليو ان للي يهمه الامر حته ياخذ التفاصيل...

[hayder93]

مساء الخير لكل الاخوان والاخوات بس حبيت اوضح الاتي اني بالنسبة الي من التسعينات موجود  اكثر الفترات اهنا بعمان واعرف عمان دربونة دربونة مثل منكول باللهجة العامية العراقية ومن التسعينات موجود تصريح العمل بالنسبة للعراقي واذكر اول تصريح اني مشيت بالمعاملة مالتة لاحد الاخوان الموجود الان في اميركا بس هو وين العمل هي هاي المشكلة هو اصلا الاردن هي اتعاني من قلة فرص العمل ووجود عدد كبير من الخريجين ولكل سنة اصلا همة ملاكين شغل فهي يااخوان الموضوع موموضوع تصريح يعني مثلا اذا انت تشتغل بشركة مالت احد اقاربك وتريد اطلع تصريح فهذا عادي وحسب تسجيل الشركة هل هي اردنية هل المكتب او الشركةمكتب اقليمي الاردن بيهة قانون اينظم كل شي يعني مو فالتون بصراح وبالعكس اذا اوراقك كاملة فراح تلكي كل مساعدة وين متروح بالدوائر الرسمية وطبعا من تسوي تصريح العمل اكو رسوم تدفعهة مثل ميدفع اي واحد موبس العراقي وبعدهة اتودي  التصريح للداخلية حتى اتصدر كتاب الاقامة ومن ثم اذا عندك غرامات تدفعهة وتطلع كارت الاقامة وذا ماعندك فعادي اتطلع كارت الاقامة من مركز الشرطة الي راجعة منطقة سكنك الهة واتصور الامور واضحة لاخواني

[كاتلوني الى الابد]

الاخ حيدر اني يمكن اقدم منك شويه واحب اكلك كلامك صح 100% وهسا صارت بعد اصعب لانه مثل متفضلت ابن البلد كاعد واكو حجاية غير معلنة انه ابن البلد اولى واني مالومهم عليه وهذا الطبيعي مو مثلنا طول عمرنا خيرنا لغيرنا

[ــــ{{{ABADY}}}ـــــ]

اخوانى انا مو اقدم منكم صارلى 10 سنوات هنا سحبه وحده وعمرى ما سمعت هذا الكلام ما احترامى لكم طبعا.....وعندى تطلعات وامور بهذه الشغله,,,,,علما انى اشتغل بمكان له علاقات مع العمل والداخليه وما سمعت ان العراقى له تصريح عمل!!


على العموم انا راح ابحث بهذا الموضوع وعند وزاره العمل الخبر اليقين


وان شاء الله الكلام صحيح....تقبلو مرورى

[عبد العولمه]

تحياتي للزملاء...
  لو صح هذا الكلام في بلد مثل الاردن يعاني من البطالة العالية بين سكانه... فيرافقه قرار بضرورة دفع تامينات للحصول على التاشيرة اعتقد المقترح كان 5000 دينار اردني..و ستطالب الحكومة العراقية بنفط مجاني والدول المانحة بمساعدات بسبب ضغط اللاجئين العراقيين وزيادة غرامات التأخير وبعد الحصول على كل هذا يلغى قرار السماح بالعمل وتبقى القرارات الاخرى ..هذه الاردن لاشيء اعتباطي او مجانا..

[SARA CALIFORNIA]

يا ريت الاخ عبادي 75 يسال و يرجعلنه خبر,,اتمنى يكون الخبر صحيح حته بعض الناس اللي عدهم حرف او امكانيات او شهادات عالية يكدرون يشتغلون...يجوز في عراقيين يمتلكون مواهب وامكانيات حرفية ميملكهه اصحاب البلد نفسهم ليش لا؟؟؟

[يا صبر ايوب]

نعم اخوان هذا الخبر صحيح يستطيع اي عراقي العمل وهذا الشيء اوكد من خلال الندوه اللتي اقامها العون القانوني (وهي المنضمة المسؤوله عن مساعدة الاجئين اللذين يتعرضون الى مشاكل قانونيه ) قبل اشهر شرط ان يقوم صاحب الشركه او العمل بمفاتحة
الدوائر ذات العلاقه ,, وان المنضمة المذكورة ابدت الاستعداد لتوكيل محامي يقوم باستكمال الاجراءات الخاصة بالمعامله مجانا
ولكن السؤال من يبدي لك الاستعداد وينتضرك كل هذه المدة الا اذا كان من اقاربك او اصدقائك !!
الكم الله يل العراقيين

ابو صابر

[SIRAQS]

يعني هسه شنو المطلوب اذا واحد ايريد يشتغل بدون زحمه عليكم ممكن اتفهموني اذا بيه مجال ؟؟؟؟؟؟؟؟؟؟؟


 

[SIRAQS]

شنو هسه شباب شنو الحل ؟؟؟؟؟؟؟؟؟؟؟؟؟؟


 

[الرسام1973]

اختي العزيزة هذا القرار قديم جدا لكن للاسف الحكومة العراقيه السابقه في زمن صدام حسين كان لديها اتفاق مع الحكومة الاردنيه بعدم اعطاء العراقي تصريح عمل وهذا القرار يسري على كافة الجنسيات العربيه بستثناء العراقي

[الفراتي]

اخوان والله العظيم هذا الكلام غير صحيح يجوز حبر علىورق حتى لاتدخل منظمات حقوق الانسان والمجتمع المدني ممكن كقرار على الورق بس انه بالواقع العملي فهو غير صحيح جدا ولو تنبت نخله براس العراقي ماينطوه تصريح عمل وهذا عن خبرة ومعرفة صدقوني ما اريد اتدخل بامور اخرى بس حاولنا بكل طريقة ممكنه واللبيب بالاشارة يفهم ماتصير هاي الشغلة ابدا ..............لكن بهاي الدنيا وبهالزمن كلشي يصير والله اعلم

[SIRAQS]

شكر اصدقائي على الرد بس بصراحه اخ  الرسام ما فهمت من كلامك شي ؟؟؟؟؟؟؟؟؟؟

[SARA CALIFORNIA]

اخواني الاحباء,هذا الحجي كالتلياه موظفة باليو ان بعد ان اني سالتهه,,,و البنية كانت دتحجي بثقة و جدية و كالت انه القرار جديد,حته نقطع الشك باليقين نكدر نتصل باليو ان حته نعرف الجواب,,,منو عنده خلك يتصل بيهم؟؟؟منو صحته زينه؟؟؟

[يا صبر ايوب]

عيني siraqs اتصلوا بالعون القانوني او همه يفهموك او هذ تلفونهم 064617277 هذا الرقم من الموبايل للارضي
واذا من الارضي بدون 06 تحياتي

ابو صابر