صار يومين عدنا مطر مطر مطر وفتحنا الباب واحنا رايحين على ول مارت ووجدنا كلب صغير ضايع يدور على بيتهم ونور بنتي تحب الحيوانات وخصوصا الكلاب الصغيرة المهم توسلت بيا حتى نسمحله يدخل كلتلها لاء ممنووووع احنا ما ندخل حيوانات للبيت
المهم دا اتابع تحركاته على البيوت ومحاولته الدخول على اي شقة واذا بواحد ( أسود يضربه برجله من الباب ويطيره بالهوا للكلب الصغير ) اني شلون صرت يعني اعصابي فقدتها وكتله Why ? هو ما منتبه انو اني دا اشوفه .. التفتت على العائلة وكلتلهم لو وحدة امريكية الا كان اتصلت بالبوليس طبعا الجملة كلها عربي قلتها ما عدا كلمة بوليس هو الاسود سمع بيها دخل وقفل باب البيت وانقهرت كلش هواية على الكلب الي ركض على بيتنا بهالاثناء والا محاولة منه بالدخول .. بعد توسلات نور ووعود بعدم تركه ينزل من حضنها سمحت له بالدخول .. لفينا بغطاء صغير الكلب كان يرعش ومبين عليه انه مريض وقضى الليلة بالمطر .. حضرنا له الحليب وشرب شوية وضل بحضن نورة ( عمرها 11 سنة ) واتصلت بالشرطة وحطولي مترجم عربي وكلتلهم انطوني رقم يخص الكنترول على الحيوانات وقالوا اتصلي بيهم .. اتصلت بيهم وهم بمنطقتنا وقالوا رح نجي ناخذه .. بهالاثناء الكلب نايم اي واحد نسمع صوته نقوله ( بسسس بلا صوت الكلب نايم ) يعني حبيناه مع انه ما ضل غير ساعة ونص يمنا .والاولاد كاعدين يدعون يا رب مصلحة السيطرة على الحيوانات ما ييجون ويتوسلون بيا اسمحلهم يبقى يبمنا .. المهم اني كنت رح ارضى ان يبقى لان انقهرت عليه وحبيته بس حطيت امامي شغلتين مهمة :
الاولى : ان الكلب مريض ولازم يتعالج ومكانة للعلاج اكيد مو بالبيت يمنا .واخاف على الاولاد من عدوى لو لا سمح الله اكو شي مو زين .
الثانية : حطيت صاحبته بنظر الاعتبار وقلت يعني اكيد هسه هي دا دور عليه ورح تتصل بمصلحة السيطرة ع الحيوانات تسالهم عنه .
ومن المعروف تعلق الناس هنا بالحيوانات خصوصا الكلاب . المهم اجا الموضف وشافه وقال الكلب مريض ومحتاج علاج واخذه واخذناله صور لكل موقف وصار انقلاب عليا بالبيت والكل تبجي والدموع تنزل .
وودعنا الكلب وتمنيت ان يرجع لبيته باسرع وقت .
رح احط صورته . وطبعا السبب من كتابتي القصة بالضبط ما اعرفه ولكن تعلمنا هنا نتشارك بكل حدث يصير معانا وهاي هية قصة الكلب الضائع .. اني سميته على اسم الكلب الي كان عندي من كنت خمس سنوات كان كلب الماني ما يكبر ( فلفل )
