كل واحد يحجي شكل ولله دخت وماادري شسوي مساعدة انسانية ((اوربا))

[عمر الدهان]

السلام عليكم
شباب كل واحد يحجيلي شكل حول موضوع لجوء بلجيكا اليوم اجى واحد من هولندا الى عمان ف سألته كتله اكولك بلجيكا  وبعدها فاتحة لجوء للعراقيين جان ايكولي لا سدوها و اوربا كلها ما بيها لجوء و ما اتفيدك ترة نصيحة ابقى اب عمان احسلك
شكولة ..؟  الخ ايكولي لا اكو فاتحين بي مو كل واحد ...؟
اخوان اني صفيت اموري اريد اطلع بي اخاف اطلع و اتورط و كل واحد يحجي شكل اتمنى الاجابة و ادري بيكم شرفاء وما راح اتقصرون و اهواية ساعدتوا ناس و كدام عيني وناس وصلوا الى حد الان يترمولكم و يدعولكم هذا سبب نجاح المنتدى

اتمنى الكم الخير  و ترشدوني الى الكلام الصحيح لان شباب يوم بعد يوم ديصير متغيرات

تحياتي ياشرفاء العراق

[Aiham_]

هسة يجيك ارمي سترونك و يفهمك

[ARMY STRONG]

ههههههههه

زبن بس جاوبني بله كولي هذا صاحبك الي جاي من هولندا

مقيم لو مرفوض و مطرود من هولندا

حته وراها اجاوبك و اريحك

[echo 9]

عمي الله يساعدك
الجواب الشافي لسؤالك عند ارمي سترونغ ومن يجاوبك لا تدوخ
هو العنده الخبر اليقين وبعد وراه لا تدور

[عمر الدهان]

حبي هذا صالة من 1999 بهولندا ايكولي بلجيكا انسدت كتلا اشمدريك ايكول اني صار يومين جاي من هولندا و سمعت هيج
و ايكولي اوربا شهر واحد و اطك روحه لا اتروح مثل مدا اكولك  خلاني اشرب بطل هههههههههههههههههههههههه
فدوة اروحلك جاوبني اريد واحد ينطيني جواب ايريح كلبي

[softer_softer]

الحجي المظبوط ماكو واربا لجوء جان قبل كم شهر لجوء بلجيكا سنة ويجددوه سنة وهسة مو انسد بس صار نادر لان العراقيين الي انطردو من هولندا والسويد وباقي الدول رجعو للعراق وبعد 3 اشهر راحو لبلجيكا اخذوا لجوء مؤقت وهولندا اصلا الي انطت الاقامة ام الخمسة سحبتها وادطرد بالعراقيين والسويد نادرا ذاك من ذاك الي تنطي مختصر مفيد انت وجنصك اكو ناس داتروح هسة وتاخذ واكو ناس صارها 10 سنين ماتاخذ بس  ينرادلها حظ يقرة 100 علمود ينطون لجوء

[ARMY STRONG]

عمي صاحبك  ده يكلك جاي من هولند اي قابل بلجيكا عاصمه هولندا
و الاخ سوفتر ماادري الاخت (وين الضبط الي 100% )
الاخوان

انطوكياها من الاخر سدوها يعني هم الادره
و هسه صارت 2 على واحد
و انته بكيفك بعد

و اني اكلك معليك بل حجي مع احترامي لهم

اهل مكه ادري بشعابها

و اني اكلك تعال و خطيتك بهل ركبه

[Affleck]

حضرة الميجر ارمي سترونك , و الله يابه  انته مو بس وردة و انما شدة ورد .فهسه عمر الدهان راح يدعيلك و يترحم للوالديك .اخي عمر الدهان , اخذ بنصيحة الميجر ارمي سترونك و اتوكل على الله. صديقي ارمي ,ممكن تفهمني الفلم,اشو انته مخلي العلمين البلجيكي و الامريكي؟بعدك حاب امريكا!تحياتي.......................

[اريج الراوي]

اخي ماكو شي انسد بس لازم تروح تحجيلهم قصه ادوخهم بيها واذا عندك اثباتات بالتهديد اما اتروح والقصه ممضبوطه فاصور تبقى احسن لان راح اتروح وتتعب بلا فايده(اهم شي قصه مؤثره جدا جدا ) لتنسى لان ترجع وهاي من تجربه تره

[زيد الصقر]

السلام عليكم  اولا اني احب اوضح انه اني احد المرفوضين العائدين من السويد وبقيت تقريبا 3 سنوات الى ان رجعت بعد انسدت كل الطرق بوجهي  بس يعجبني احجي باللي اعرفه مو باللي يحجولياه  الي شفته انه كل عشر سنوات تقريبا الدول اتطلع عفو على اللاجئين بشكل عام مثل مصار قبل حوالي اربع سنوات بالسويد كان عفو ملكي على اللاجئين فانشملو كلهم وظل مفتوح فتره بحيث العراقيين الي بباب الشرجي سمعو بي وفكرو يروحون للسويد  هذا الشي يصير بدول اخرى بس كل عشر سنوات او حتى اكثر  لكن سؤالي للقراء تعرفون شكد حجم بلجيكا وشكد عدد سكانهه فبرأيكم شكد رح اتظل تتحمل لاجئين  اخوان مساحتهه اقل من ستوكهولم وعدد سكانهه اكثر من السويد يعني هيجي خيرين وطيبين رح يظلون يقبلون العراقيين هذا السؤال اطرحه لكل من يريد يروح لبلجيكا او غير بلجيكا وشنو رأيكم اذا رحتوا لبلجيكا وانسدت بهيجي حاله رح تصير البصمه مالتك بكل الاتحاد الاوربي يعني ميصير اي جاره مثل مصار بينه  احنه مع تمنياتي بالتوفيق للجميع

[ARMY STRONG]

الفرصه تجي مره وحده بسسسسسسسسسسسسس

و السبع الي يعبي بل سكله ركي

[TOMMY735]

ههههههههههههههههههههههههههههههه حلو هذا المثل ارمي ................وكلامكم كلة صحيح مو ياهو اليجي ينطوا اللجوء ببلجيكا انتة وجنصك وعلى العموم انتة اذا متردد لتروح لان هم راح تمل من اوربا شكد قابل سنة سنتين خمسة وبيوم من الايام وبليلة ظلمة راح تقفل وتخابر شركة السفر على تذكرة بروكسل بغداد............

[عمر الدهان]

ARMY STRONG 
حببي و اخوية العزيز الك دين بركبتي مستحيل انسالك اياه و الله العظيم و اتمنى اتضيفني على الايميل مالتي او ادزلي ايميلك الشخص حصرا ايميلك الشخصي و ادعي من الله ايقدرني و اخدمك و الله ينور طريقك يا رب

[عمر الدهان]

ARMY STRONG 
حببي و اخوية العزيز الك دين بركبتي مستحيل انسالك اياه و الله العظيم و اتمنى اتضيفني على الايميل مالتي او ادزلي ايميلك الشخص حصرا ايميلك الشخصي و ادعي من الله ايقدرني و اخدمك و الله ينور طريقك يا رب

اتحمل الذل با الغربة ولا الذل في بلد لا يعرف معنى الانساني مع اعزازي و احترامي و انحناء رئسي الى العراق
بس يا اخي العالم ملت من الوضعيه و بعد ما تنحمل
االامام علي عليه السلام ايكول
 المال في الغربة وطن و الفقر في الوطن غربة لو كان الفقر رجلا لقتلته ؟؟
يا اخي هسه لا المال ولا الفقر انريد نعيش يعني انت توصل عمرك 40 سنة و مكظي عمرك بين الصبات الكونكريتية و السيطرات مال جيش و عبالك كاعد اب معسكر  حربي بس جبير شنو الفائدة الواحد على الاقل يشتم هوا نقي يتعلم لغه يتعلم النظام
ممكن اتكولي شنو الشي المفيد الي تكدر تتعلم منه با العراق كولي شنو المفيد با العراق نوكف با الركن او براس الشارع و انكرز حب و نحجي على الناس وكالت فلان و صار افلان و طفت الكهرباء و جتي الوطنية مو انذبحنا [/size]

[زيد الصقر]

اخي العزيز  المثل الي انضرب وعجبك هو السبع الي يعبي بالسكله ركي   بس اني ارد على هالمثل بمثلين
الاول    اواعدك بالوعد وازكيك ياكمون   والثاني  امشي وره الي يبجيك لتمشي وره الي يضحكك    فأنت بالسلامه اذا توصل لبلجيكا ان شاء الله يصير  كل الخير وتتوفق ويقبلوك        بس لتنسى اني  نبهتك وانت بكيفك وارجوك لتزعل لانه رأيي هو مجرد رأي يقبل الخطأ او الصواب  بس هيه المسألة مو مسألة سبع ومخنث هيه مسدوده  بقة جانب واحد وهو تتعرف بوحده انت منسق وياها مسبقا وتتزوجهه او تصادقهه وتسوي طفل على وجه السرعه قبل ميجيك رفض  فأذا عندك هيجي استعداد طلعتك رح تكون صحيحه

[مغترب بلا وطن]

السلام عليكم

كل دساتير الدول المتقدمة تفرض علا الدولة ان تقبل طلبات اللجوء للاشخاص الي عليهم خطر على حياتهم في بلدانهم او او او الى اخره , ف بالحقيقة القانونية ماكو شي اسمه انسد اللجوء في اوربا او غير اوربا بس في بعض الفترات يتم التضييق عليها وما يقبلون طلبات اللجوء للقضايا الركيكة.

يعني جذب فد جذب مسفط مضبوط وحوكها زين ويقبلون لجوءك غصبا عنهم اذا اقتنع القاضي انو اكو تهديد علا حياتك وماعندك مكان تلجأ اله وكدرت تقنعة انو هاي هية الموت من خلفك وبلجيكا امامك, ماعندك اي خيار ثاني.

من الاسئلة الستراتيجية الي يعتمد عليها القاضي بالقرار هو سبب اضطرارك للمغادرة بهذا الوقت بالتحديد وتقديمك طلب اللجوء , يعني مو تشرحلة تكلة اني عليا تهديد من سنة 2004 ولحد الان لاحكيني وعندك فد 400 الف تهديد , لازم اكو فد سبب كونكريتي الي خلاك تحرق السفن وراك وبهذا الوقت بالذات الي جابك الى بلجيكا, الشغل وية الامريكان جدا مفيد وممكن ان ينطيك اقامة في اي بلد بالعالم حاليا مهما تكون ضروف اللجوء صعبة بهذاك البلد مع توفر الاثباتات, اذا تكدر اخترعلك اخ وسويلة شهادة وفاه ورتبلة فد بلتيقة معينه. وبالتوفيق.


تحياتي

[ARMY STRONG]

اخي العزيز  المثل الي انضرب وعجبك هو السبع الي يعبي بالسكله ركي   بس اني ارد على هالمثل بمثلين
الاول    اواعدك بالوعد وازكيك ياكمون   والثاني  امشي وره الي يبجيك لتمشي وره الي يضحكك    فأنت بالسلامه اذا توصل لبلجيكا ان شاء الله يصير  كل الخير وتتوفق ويقبلوك        بس لتنسى اني  نبهتك وانت بكيفك وارجوك لتزعل لانه رأيي هو مجرد رأي يقبل الخطأ او الصواب  بس هيه المسألة مو مسألة سبع ومخنث هيه مسدوده  بقة جانب واحد وهو تتعرف بوحده انت منسق وياها مسبقا وتتزوجهه او تصادقهه وتسوي طفل على وجه السرعه قبل ميجيك رفض  فأذا عندك هيجي استعداد طلعتك رح تكون صحيحه

اغلب الي مضروبين دفره من السويد و هولندا و بريطانيا
و فرصت ضاعت  يحجون مثلك حجيك لاان مااعرفوا يلعبوها صح و اجيتوا بفتره انه خلاص العراقي من الباب يجلقوه بل سويد
هسه اغلب المرفوضين ده يحون لبلجيكا يسون اشكال و الوان حته بس بصمته ماتطلع و يقدم لجوء و اكو بيهم نحجوا
مو عاد الجديد الي هسه جاي فرش من العراق
الي عنده شي يفيد الناس بيه خلي يكوله و الي مايعرف شي و جاي بس يعمم تجربته الفاشله الي ماعرف شلون يتصرف خلي يسكت احسن

[زيد الصقر]

اشكرك اخ ارمي  بس عندي ملاحظه على كلامك انت كلت انه بريطانيا والسويد وهولندا ضربت جلاق العراقيين الي بيهه بس ياترى بلجيكا يعني رح يظلون يقبلون وبعده ما اجه وقت لضرب الجلاليق  بعدين اني من كلت انسدت المقصود انه النسبه الضئيله الى هيه تنقبل ومال اخ ما اخ مكامت تاكل لانه قرار سياسي صار    هذا شي  الشي الثاني انت نصحته للولد يروح استنادا الى نجاحك الى تجربتك واني نصحته بان ميروح استنادا الى فشلي بتجربتي فاللي اريده انه الاخرين خلي يشوفون الجانبين الي هو النجاح والفشل مو بس جانب واحد   بعدين اني نصحته بالزواج هم استنادا لتجربتي لاني الان بالسويد ومتزوج والحمد الله وحصلت على الاقامة بعد ان رجعت فاشلا بالتجربه الاولى   بعدين هذا منبر حر فماكو داعي هذا التجر يح بالكلام رجاءا ثنيناتنه اخوه وكلمن يبدي رأيه ومع هذا بالنسبه الي بعد ما اعقب على مواضعيك    علمود لتضوج   و شكري وتقديري الك

[ARMY STRONG]

حبي زيد الصقر اني حجيت بشكل عام
اريدك تكولي فد يوم سمعب انه بلجيكا بيها لجوء؟ قبل يعني؟

لا انته تدري هم جدييم على الشغله و اتورطو و فتحو اللجوء لاان ما كانوا يتوقعون بهل زخم راح يصير عليهم
هتحت اللجوء بنهايه 2007
و تعرف الي جان مقدم قبل 2007 جانت قضيته معلقه
و للعلم عراقيين لو تلكه 2 لو واحد ده يقدم يوميه لو اصلن تجي ايام ماكو عراقيين
الي مسوي الزخم هم الي يجون من شرق اوربا و تركيا
لحد الان اسرع القضيا الي ده تمشي هي العراقيين و الافغان
اصلن الي ماعنده قضه قويه ده يحصل لجوء انساني اقامه سنويه بمجرد انه هو من بغداد لو ديالى لو الموصل هاي المناطق الي بيها عنف عشوائي
انته تدري بل مقابله ما يركزون على قصتك بقدر ما يركزون على انه انته صدك من بغداد او لا؟
يطلعلك ورقه يكلك ارسملي الطريق من بيتكم لباب الشرجي و بيا مناطق تمر حته توصله

القصد بلجيكا الي ده اشوفه و اسمعه من القبلي ابد مارجعت واحد قصري
او مرفوض
اذا انرفضت مرتين وره الاستئناف يقلك تقدم مره لاخ و كانه هسه داي جديد
يعني مو مثل السويد لو هولندا راسن حجز و تسفير
كل دوله قوانينها و اجرائتها تختلف عن دول اخرى

[matrix iraq]

اوف اوف يلعراقين يدخل الكلام شبر للعراق يخرج ذراع 

صديقي عمر احنه جاوبناك على كل تسائلاتك و ARMY STRONG ما خله شي ما حجاه واني هم

 بس اريد اسال سؤال اريد كل الي كتب تعليق ايجاوبني علي لو كان صادق

  منوا بيكم موجود في بلجيكا ؟؟؟؟؟ الان

اني متاكد ولا واحد بيكم ساكن
احنه موجودين ونعرف كل صغيرة وجبيرة

انتوا الي تحجون جنتوا ها مو بعدكم  جنتوا بسويد وبهولندا وباقي الدول

اعتقد ميصير انتوا بالعراق او باي دوله كنت وتحجي على امور ببلجيكا وانته مشايف بلجيكا بحياتك بس سامع فلان كال هيج وفلان كال هيج

وعلى فكرة هذا الكلام موجه ل عمر الدهان

تعرف ليش لانه انته عفت الي ساكن في بلجيكا وعفت كلامه ورحت لواحد ساكن بهولندا

ترة اكو ناس صح ايكون باحدا الدول الاوربيا بس مطفي لا فهم ولا علم وتساله ايكلك ما اعرف

اعرف بنية عايشه بدنمارك واجتي للعراق واردت تزوج ولد واتفقوا وتتاجي كتله لحضه لحضه على فكرة صارله 10 بدنمارك
كتله القانون الزواج يمكم ايكول لازم الشخص يبلغ 26 سنه والولد 24 كالت صدك ورجعت سالته السفارة وكلوله اي وبطلوا

مالك دخل بليحجي وكاعد هوة بالعراق رجل على رجل لو بامريكا لو باي دوله

اذا اتريد تسال اسال شخص ساكن داخل بلجيكا

والبقاين اكللهم

من افتى بغير علمً فلا علم له


تحياتي