للمطران مار أفرام يوسف عبا / بمناسبة اختياره مطرانا على بغداد ومغادرته تورونتو - كندا


المحرر موضوع: للمطران مار أفرام يوسف عبا / بمناسبة اختياره مطرانا على بغداد ومغادرته تورونتو - كندا  (زيارة 3392 مرات)

0 الأعضاء و 1 ضيف يشاهدون هذا الموضوع.

غير متصل ماجد عزيزة

  • عضو فعال جدا
  • ***
  • مشاركة: 759
    • مشاهدة الملف الشخصي
    • البريد الالكتروني
للمطران مار أفرام يوسف عبا /
بمناسبة اختياره مطرانا على بغداد
ومغادرته تورونتو - كندا

ماجد عزيزة
 
شلون أدخل للكنيسة وإنت ما موجود
وشلون آخذ صور وانت ما بيها
وشلون الجريدة تطلع باسبوع
وصورتك الحلوة ما منشورة بيها
وشلون نكعد عالمصاطب بكل قداس
وما نسمع لموعضتك تحجي بيها
وشلون ندخل غرفتك دنسلم عليك
نلكة كرسي مكتبك وحده وانت ما بيها
 
صرت انت لحياة الناس فانوس
تضوي بكل طريق النمشي بيها
تعلمنا عليك بافراح واحزان
صرت للكنيسة انت حاديها
سيدنا الكنيسة كلها  خايفة عليك
حتى المبخرة حتى كراسيها
حتى اليوم ذولة أهل التراتيل
شوف أصواتهم تغيرت معانيها
وكل شماس من اللي يعِينوك
تلعثم بالرسالة وما قرا البيها
شوف سيدنا انظر لكل العيون
ماكو غير الدمعة تجري بيها
لأن الفراك صعب إعلى ليحبون
شلون نفاركك  ونعيش بيها
**
 
من جاني الخبر وكتلي صِرت مَطران
طرتْ من الفرحْ وأصبحت غير إنسان
ومن كتلي تعينت بالعاصمة بغداد
رجف كلبي عليك وانكلبت الألوان
لأن بغداد صعبة هسه يا ناس
وناس اللي بيها أشواك وزؤان
بس انت اللي وعظت : لوجاكم الصوت
بس كلمة نعم اتجاوب الكهان
ابد ما ينرفض صوت اللي جا من فوك
صوت من السما دعوه للرهبان
ولأن ربنا يسوع علمنا الفداء
إصرخت بنعم ، كللت هالإيمان
**
يبو قلب الجبير ويساعد الناس
تستاهل نحطك تاج للتيجان
لاتنسى ابونا ناسك الطيبين
واحدهم يعادل ميت الف انسان
هذوله الوكفوا وياك كومة سنين
وضووا بالكنيسة مثل الشمعدان
وكنت انت حادينا وعمود البيت
تعلمنا منك كل تضحية وغفران
يا قلب الجمع كل الطوايف بيه
آشور وأرمن أقباط وكلدان
لا تنسانا سيدنا أبد ما ننساك
صرت انت دمنا ويسري بالشريان
**
يباني البيت ويانه إيد بإيد
ابنينا الكنيسة وياك ( الزلم والنسوان)
وصارت كنيستنا علم بين هالناس
صخرة  وقوية وتتحدى كل بنيان
بغداد يا حلوة ويا زينة البلدان
والله زيّد من جمالج أحلى مطران
بغداد ازدهت من صرت راعيها
وسيدة النجاة حسّت بالأمان
بغداد أرجو منج أتحفظيه
وتسلميه من كل دساس وشيطان
بغداد يا بغداد انت اللي تحميه
وتبعدين عنه كل ألآم وأحزان
ويا عذراء ، عينج عليه كلساع
رفرفي فوك راسه وخليه بالأحضان
كل واحد من رعيتك إلجايين ديودعون
بسمة على الشفايف ، بس الكلب حزنان
لهذا أرجوك عدنا طلب وفيّه
وبهذا الطلب يتعدل الميزان
نريد صورة منك ، تبقى تذكار
تظل ببيوتنا وتزين الحيطان







غير متصل njmat_alba7r

  • اداري منتديات
  • عضو مميز متقدم
  • *
  • مشاركة: 39379
  • الجنس: أنثى
  • مااجمل ان تبتسم وانت في قمة الانهيار 。◕‿◕。
    • ياهو مسنجر - yahoo.com@◕‿◕
    • مشاهدة الملف الشخصي
: عًــــنًـدمـًا يتـًشـاـبًه آلكـًـــل أتمـًـيز أنـًـــــــــا :





غير متصل nasir yako

  • أداري دردشة
  • عضو مميز متقدم
  • *
  • مشاركة: 15896
  • الجنس: ذكر
  • حبيبي شلون حالتكم بعدنا..
    • مشاهدة الملف الشخصي
كلمات فعلا بمكانها نقشتها يمناك اخي العزيز ماجد عزيزه ......نتمنى لسيادة المطران الموفقيه فيمنصبه الجديد والرب يحفظه من كل مكروه ........


غير متصل نادر البغـــدادي

  • عضو مميز متقدم
  • *******
  • مشاركة: 12145
    • مشاهدة الملف الشخصي
    • البريد الالكتروني


                 الأخ جزيل الإحترام ماجد عزيـــز

                          احلى التّحايـــــا

      خاطرة روعــة لسيادة المطران مار افرام يوسف عبّــا

                       دامَ يراعكم الذّهبــي !

                   خالص تقديرنـا وآعتـزازنــــا ...