تم رفض الاهل اليوم الثلاثاء

[بغدادي20]

اخوان رحنا اليوم وية الاهل ومع الاسف استلموا المغلف رفض
طبعا اني اعرف انجليزي زين كاتبين سبب الرفض كالاتي
الواجبات في الخدمة العسكرية
المشاركة بحزب البعث
المشاركة باعمال اضطهاد او الانتماء الى حزب يشارك باعمال الاضطهاد

طيب اخوان اريد استانف الهم
اريد اعرف خطوات الاستئناف شلون راح تصير
والسؤال هو هل استطيع ان اتجرم لهم الاستئناف انا لان لغتي زينة لو لازم مكتب معتمد

ومن اخلص الاستئناف ادزة بالاميل لو ابعثا لهجرة بايدي لو شلون

ياريت الجواب باسرع وقت

بارك الله بيكم

[جنكي]

مع الأسف  أخي هاي الاخبار
بس الله كريم أنشاء الله تستأنف وينقبلون الأهل بس المهم لاتترك الموضوع
وخاصة انو الأهل اذا ماعدهم من الأسباب اللي ذكرتهه والله كريم
أما عن الطريقة فأفضل شي تتصل بيهم وهمه يفهموك شلون تودي الهم الأستئناف أو تدزه بالأيميل
وعلى الأغلب المفروض اليوم فهموكم شلون تسوون الأستئناف ويه ما أستلمتوا الظرف
على العموم أتصل والتسهيل من الله
وطمن الأهل أنشاء الله انتو تسافرون وهمه يلحكوكم



يارب

أختك جنكي

[جنكي]

سؤال بدون زحمه

جان أكو هوايه مرفوضين وياكم ؟

لو جان أكو ناس أستلمو غير الرفض يعني أقصد قيد الدراسه لو تعليق؟

وشكرا للأجابه مقدما

[Rosa2011]

أن شاء الله يارب تستأنف ويطلع القبول قريبا
أتمنى من أي أحد يعرف الطريقة يبلغك

بس أعتقد احسن شيء غير أنه تسمع رأي الاخوة خاصة الي عدهم تجارب او معرفة
الافضل للتأكيدأتصل بتلفون الارضي للـ (iom)
يطلعلك موظف يبلغك بالاجراءات
وأكتبهة بورقة وقلم
والي اعرفة الاستئناف مدتة خلال 90 يوم أبتداءا من اليوم
وساعة قبل احسن

ويارب الله يوفقك ويوفق عائلتك والجمعين أجمعين .... اختك روزة

[بغدادي20]

شكرا الج اخت جنكي وشكرا جزيلا للاخت العزيزة روزة

طبعا اليوم فقط 10 اشخاص استلموا رفض
طبعا حس الي شفناهم من الصبح ما اعرف بعد
بس اليوم على الاطلاق ماكو قيد الدراسة رفض فقط
ودخول الناس ليجوة
وشرحولهم الاستئناف شلون يصير
بس اني الي ردت اهمة منو الاحسن اودي الهم لو ابعثة بالاميل
وشلون يصير اطبعا طباعة لو اكتبة اميل

طبعا خطية ناس اتاذت كثير يعني الي شفتهم 6 عوائل
والباقين شباب عزابية

احنا كل الي ذكروا بسبب الرفض ما موجود عدنا يعني متعجبين منين جابت هذا الحجي
صحيح الوالد خادم عسكرية بس صنفه عادي جدا

[زرزور بغداد]

أخوية العزيز ألله يكون أبعونكم ..... بس اكيد أنه سبب الرفض جان يخص العسكرية بصورة رئيسية وبعدين حزب البعث
أذا مثل ماأتكول أنه صنف والدك عادي .. شنو صنفه
وبعدين شنو جانت درجتة الحزبية

[Rosa2011]

أحسن شيء لضيع وقت بين ما يجي احد ويجاوبك أتصل بالمنظمة هسة وأفتهم منهم التفاصيل  
وأذا على الرسالة دز وحدة بالاميل ووحدة عادي
ولا يهمك شيء حقك ودتطالب بيهة لو اني بمكانك هيجي أسوي
ماعرف هذا راي الخاص
بس اتمنى احد يجي ويجاوبك

[abu shahed]

اخي العزيز الله يكون بعونكم
اخويه الاستئناف طباعه ومن مكتب ترجمه معتمد وتسلمه باليد هذا عن تجربه شخصيه

                ابو شهد

[بغدادي20]

شكرا للجميع على الرد
الوالد كان صنفة تموين ونقل
والدرجة الحزبية رفيق

اما عن الترجمة ليش الا مكتب معتمد ميصير اني اترجمها وادزها

اما الاخت روزة صحيح الاحسن نرسل بالاميل وبالايد همين

[المهندس زياد]

اخي يعني شنو واجبات في الخدمة العسكرية؟؟؟؟يعني والدك كانت رتبته العسكرية جبيرة؟؟؟؟؟؟ لو شنو ؟؟؟وشنو يعني المشاركة بحزب البعث عضو فرقة فما فوق؟؟؟؟؟؟؟ ارجو التوضيح هذا كلام مبهم وغير واضح ليش هو اكو عراقي مو بعثي جان لو مخادم جيش شعبي؟؟؟؟؟

[زرزور بغداد]

حبيبي ... اتحرك أبسرعة ودز مثل ما كالو الاخوة .... أيمل وأفتهم منهم
بعدين لازم تكتب أستأناف .. قوي وأحجي كل شي عندك على وضعكم أنت والعائلة
ألله يوفقك

[البغدادي2011]

الله يكون بعونكم شريد اكولك وآني حالي من حالك
استلمت النتيجه يوم الاثنين وكانت رفض والاسباب كانت عالخدمه العسكريه
لان اني ما مقدم دفتر الخدمه واعتبروه نقص بالاثباتات وهالسوالف
وسويت موضوع بالمنتدى وراح افيدك من الاجابات الي جاوبوني بيها الاخوه والاخوات جزاهم الله الف خير ما قصروا والله
اخويه لازم اول شي تركز على اسباب الرفض الي حددوها الك وتخلي لكل سبب اجابه ومبرر مقنع تمامآ
وتراجع القصه والتواريخ من جديد بحيث ادرس الموضوع اكثر من مره ولمن تكمل ترتيب الامور وتوصل للاجابات الوافيه والكافيه
للرد على الاسباب توديها لمكتب من مكاتب المختصين بالاستئناف واتصور بوسط البلد أكو يم مطعم القدس
وهوه هذا الشخص عنده كليشة استئناف ويكتب اجاباتك بأسلوب يعزز موقفك هوه يعرف بي
ويسويها نسختين عربي انكليزي وتروح اتقدمها بأيدك
بالنسبه الي آني استفاديت من نصائح اصحاب التجربه والخبره وهذا الي نصحوني بي
وراح اسوي هيجي وحبيت افيدك لان يمكن آني أكثر واحد يحس بحالتك هسه
خل نتوكل على الله وبلكي خير

اتمنى اكون قدمت جواب يفيدك
تحياتي

[مروكو]

الله يساعدكم و يكون بعونكم اخويه ميصير هيج قسموا العائله نصين حرام عليهم
بس يمكن لان رتبة الوالد بالحزب رفيق هي سبب الرفض مو خدمته بالجيش

[بغدادي20]

اخوان الف شكر لكم على الردود
الوالد كان برتبة نقيب في الجيش
وبدرجة رفيق بالبعث

وراح اسوي مثل ما كال الاخ البغدادي جزاة الله الف خير

والله اليوم شفنه خطية مرة وزوجها منطيهم موافقة وابنهم دكتور منطي تعليق حتى اشعار اخر
واحد ثاني ابوة وامة قبول والابن رفض

وتعال شوف اشكال الوان لعبو بالناس طوبة هذه السنة

[saaara]

الله يكون بعونك اخويه البغدادي انشالله تفرج إستأنف وسوي الي عليك وانشالله الله يفرحكم بنتيجه زينة انت وكل الي دينتضرون ومضيگ الا تفرج 

[بغدادي20]

شكرا الج يا اختوي سارة وشكرا على مرورك العطر

[مشلوع كلبي]

اخى لا تياس قدم استئناف والله كريم

بس شغله العسكريه مهمه عدهم كلش لان انى كانت مقابلاتنا انى والعائله بدون زوجى وكانو الاسئله كلها على عسكريه زوجى وطول المقابله اكثر من 3 ساعات

والمهم اتكون العسكريه مو بالشمال ؟؟؟

هذا المهم وهذا الشى الى يركزون عليه

[nawary]

أخي الله يكون بعونك ويصبرك
نصيحتي انه تسوي استئناف مثل ماقالوا الاخوة وخلي املك برب العالمين كبير
تحياتي

[اريج الراوي]

اخي الله ايكون بعونكم وبعون الجميع الي استلم اليوم والبارحه واول البارحه وعون جميع الي انشلع كلبهم
اني اريد انبهكم على منظمه ميزان التابعه للامم المتحده بلكي اتفيدكم لان بيها استشاره قانونيه ومجانا النه للاجئين يمكن لو انصير مجاميع وانحاول انوصل موضوعنه الهم عسى ولعل ايصيرون وسيط ايفهمونه الي دسيصير واشون نتلافه الاخطاء واكيد همه كمحامين اعرف من عدنه بمواضيع الاستاناف .
وطبعا اني هسه دا اشوف بورقه من اوراق كير اكو جمعية (العون القانوني) ما اعرف هي نفسها( منظمة ميزان )سابقا لو هاي غيرها وعنوانها هو
جبل عمان .الدوار الثالث
 هاتف 064617277 (جمعيه العون القانوني)( مساعدة واستشارات قانونيه مجانيه)
اتصلو بيهم وافهمو منهم مخصرانين شي

[المسافرة]

اخي بغدادي كان الله معكم جربنا هذا الوضع من قبل ومدى صعوبته  اخي  قدم الاستئناف وتوكل على الله لكن وبصراحة شديدة لا تتأمل خير كثيرا لانه فرصة الموافقة قليلة جدا اذا لم تكن معدومة
بالتوفيق

[اليسا2]

مو خوش خبر والله شنو هاي الرفض هواية هالايام ليش ؟


الله يكون بعونكم ياربي وانشاء الله تستأنف ويتم القبووووووووووووووووول ياربي



تحياتي

[بغدادي20]

شكرا جزيلا لك اختي الغالية المسافر
شكرا لك اختي العزيزة اليسا2
الله موجود انشالله راح نستانف
بس المشكلة هم ضاربين الوالد رفض على اساس انه شارك باضطهاد واشترك بحزب يقمع الشعب يقصدون البعث

انما امره اذا اراد شيء ان يقول له كن فيكون


والله شاهد حزني ليش على اهلي فقط ولكن على الشباب الي اليوم شفتهم وهمة محتارين والحزن مبين بعيونهم

[اليسا2]

الله كريم انشاء الله

الله موجود

وانشاء الله تستأنف وتنقبل ياربي

ولا تيأس لان الله موجود

تحياتي

ولا شكر على واجب اخي العزيز

[بغدادي20]

الله يسمع منج ويتقبل دعائج بحق محمد وال محمد

[مشلوع كلبي]

اخى الله كريم

انت قدم الاستئناف والله كريم

الله يفرجها عليك وعلى كل العراقين

[بغدادي20]

مشكور اخي الكريم واني هم هيج راح اسوي
مشكور