سوالف عراقية
يكتبها / مام خوشابا
فجأة خرج عزت الدوري ليعلن لصحيفة امريكية انه (الرفيق المسعول) عن 95% من عمليات (المقاومة)
والله يابه بطل عزت ... هسه قابل هي جديدة عليك فانت ماشاءالله محنك ومخضرم في صفوف الجيش
وهاي طبعا محد يكدر ينكرها (فحضرتكم) مهيب ركن !! وحاصل على ستة الالاف نوط الشجاعة من سيادة
الريس الله يحفظه وخبير في شؤون العمليات العسكرية يعني خمسين عبدالجبار شنشل تخليهم بجيبك (الصغير)!!
بالمناسبة هذا شنشل شأخباره ... اشو ماكو ..ضاع ضيعة وحدة .. على كل انسو موضوع شنشل فالرجال جان
منتهي لايحل ولا يربط بس ياخذ تحيات لصدام وبعدين (اقوى شي) كام ياخذ تحيات لعزت الدوري ... طبعا واحلى
شيء من جان عزت الدوري يطلع بالتلفزيون ولابس ملابس عسكرية .. ماشاءالله شكت جانت تلوكلا البدلة العسكرية
يعني جان يخبل من يلبسها عبالك تفصال !!!... وهاي نجماته تضوي (ولو جانت قماش) تدرون احنا بحالة حرب !!
العفو هو احنا يمتى ما جنا بحرب ... فمشاءالله حياتنا كلها حروب وبطولات وانتصارات والشعب يوميه محتفل
بايام النصر
هسه خل نرجع لموضوعنا هذا عزت الدوري مره كالو مات ومره كالو بسورية ومره كالو باليمن .. والله شغله
غريبة شنو هذا يطلع ويختفي !! ، خفاش الليل خوما خفاش الليل بس هالمره شغلته قوية كايم ديصرح لصحيفة
امريكية يعني اموره صارت عدله وكام يهدد بوش بس نسيت اسأل هذا عزت الدوري جان مهيب ركن بس لو
مهيب ركن طيار .. والله الرجل يستاهل طيار لان ما معقوله هو الثلج جان يطيرا (بالكطع) شلون ما يستاهل
يطير طيارة .. اي راح يطيرها بس من زيزي ؟!!![/b]
الكاتب
