تتذكر من جنه احباب..تتنطر توكف بالباب..بيني اوبينك ماكو اعتاب..وين اتروح اوتنساني
متامل عشرتنه ادوم..صارت حيره اوكوم هموم..فوك الحيره الناس اتلوم..وين اتروح اوتنساني
ليش العشره ابساع اتهون..ميخالف سوي شميكون..تدريني ابحبك مفتون..وين اتروح اوتنساني.افرح لو جيت اتعاتبني..من تسكت انت اتعذبني..شما احجيلك متصدكني..وين اتروح اوتنسا...ني
يمعود شعليهه الناس..حابس نفسك بالوسواس..عاملني اشويه ابحساس..وين اتروح اوتنساني.بس كلي اشبيك انت اوياي..دوم امشمت بي اعداي..خلينه انسولف بهداي.. وين اتروح اوتنساني.جم دوب انظل ابهل الحال..بعدك عني كلش طال.حبي ابكلبك يمكن شال..وين اتروح اوتنساني.مغرور امدلل ادريك..ما فديوم اتكلي اشبيك..من مثلي ماكو ايداريك..وين اتروح اوتنساني.
لتروح ابدرب المسدود..لتعاند احسلك عود..لو ظنك تعبر لحدود..وين اتروح اوتنساني
ملينه من القيل والقال..قصتنه اتشيب الاطفال..مدريت ابحبك زلزال..وين اتروح اوتنساني
مهجوره الديره ابلياك..لوضيعتك وين الكاك..ما اتصور يوم انساك..وين اتروح اوتنساني
داير بيتك ارفع سور..ليحسدونك حط ابخور..اوكفلك مثل الناطور..وين اتروح اوتنساني
