جماعة سوريا طمئنونا عليكم اولا وعلى شغلة اللجوء والسفر ثانيا

[kunda]

السلام عليكم مثل ماتعرفون اخواني انه اكثر جالية عراقية تنتظر رحمة الله هي اخواننا واهلنا اللي في سوريا (بصراحة اني ماعندي اقارب درجة اولى هناك)بس اعتبركم كلكم اخواني وأقاربي بس اريدكم اتطنمئنونا على الامور خاصة بعد ماسمعنا انه الاحداث في تفاقم مستمر وسريع ووصلت الامور الى دمشق العاصمة ... شنو الفلم شباب شلون الامور وشلون الحياة اليومية ؟وشنو الربط بين السفر والاوضاع الامنية يمكم؟؟؟
تحياتي وامنياتي لكم بالسلامة والاطمئنان أخوكم كوندا العنكاوي

[العزاوي 55]

الغالي كوندا السلام عليكم

والله احنه نسمع مثل ما انتو تسمعون من الفضائيات اما على ارض الواقع صاااااااااااااااافيه دافيه كلشي ماكو غير الخير

الناس ماليه الشوارع وسفرات والاسواق عامره وخير والحمد لله

طبعا احنه ساكنين بجرمانا والحمد لله ماكو شي

شغلة السفر احنه من المؤجلين الشهر الثاني وننتظر رحمة الله يكلون والعهد على القائل انه بداية الشهر الخامس سيكون السفر كثيف الله ارحم الراحمين

تحياتي

[kunda]

يعني ماكو تقليص بخدمات مكتب المفوضية مال يو ان؟؟؟ واخبار السفر؟؟؟

[العزاوي 55]

لا ابدا المقابلات مستمره والدورات وحتى السفر بس قليل جدا جدا

[القطيفيه]

مسية العافيه عليكم يااهلنا
ماكو شي بسوريا الحياة جدا طبيعيه هاي الاعلام يضحم الامور
واخبارنا احنا المؤجلين لاشي جديد بس منتظرين رحمة الله
بس اخويه العزاوي انت يا يوم تأجلت ممكن اعرف ؟
ويارب يفرج علينا

[ابو الزين]

والله يا اخي كلشي ماكو يعني نحنا بحلب الناس للصبح بالشارع الى حد الان ولا مظاهرة صارت انا كنت بالشام قبل يومين كان عندي مقابلة ب اي او ام هم كلشي ماكو يعني الحياة طبيعية وانشاء الله يستقر الوضع بكل سورية يعني وين انروح اذا صار شي بالنسبة للسفر والمقابلات ماشية بس ببطئ

[طه القيسي]

 والله ياكوندا الوضع كلش زين وماكو شي والحجي مال الاعلام كله كذب يعني انا في جرمانا وكلشي ماكو وحتي يوم الجمعه هم الناس برة موجودة على الرغم من انه يوم الجمعه عطله  يعني كله كلام اعلام لا اكثر ولا اقل ... ااما عن السفر او التوطين فكل شي ماشي طبيعي والحمد لله  اما السفر فأكو عوائل جاي تسافر يعني الوضع ماشي وانشالله يوم الي بي نسافر كلنه

[زيد الصقر]

عندي صديقين بسوريا اثنيناتهم طلبوا من عدهم الجوازات علمود دك الفيزه على الجواز الهم ولعوائلهم  واحد على كندا وواحد على امريكا ودينتظرون السفر عن قريب ان شاء الله   طبعا همه بسوريا ويارب يوم لأولادي وللجميع

[basma_mazen]

مرحبا  كوندا  الحمد لله  الوضع  زين  وطبيعي  وان  شاء الله راح  يصير  احسن باذنه  تعالى  وبالنسبه  للسفر  يكولون  شهر  الخامس  راح  نسمع  اخبار  زينه  عن  مواعيد  السفر  وعن المقابلات

[abo shams]

والله اخوان قناة الجزيرة و العربيه يعني كوه لازم اصير فتنه بسوريا ومشاكل يعني حقيقتا هذه القنوات تصرفاته مشبوهه

[saaara]

والله يااخي احنا بحمص وضعنا موكلش مستقر يعني على غفله وبدون سابق انذار اشتدت العصر طلقات وبدون سبب وحاصرو مركز الشرطة وتذكرت ايام الوطن قبل 6سنين من چنا ندور على غرفه مابيها شباك ونتخبى اليوم مرينا بنفس الموقف دعواتكم اخواني النا بلستر وعوده الهدوء لان والله مليييينا من البحث عن اوطان امنة وجديده النا - تحياتي

[abo shams]

ختي ساره هسه والله دا اشوف الاخبار على سوريا والمشاكل الي بحمص ادعو الله ان يحفضكم و ان شاء الله تستقر الامور و الله قلوبنه معكم ياريت ربي يسهل اموركم و تستقرون ببلد وتكولون هذا بلدنه وبعد منريد لا انحارب ولا مشاكل وربي ييسر اموركم ان شاء الله

[saaara]

شكرا اخويه العزيز ابوشمس الله يسمع منك انشالله وتعدي على خير الله يحفظكم وييسر امورنا كلنا يارب

[علي النعيمي]

الله يفرج عليكم امين

[sara 2011]

الله يعم السلام والامان على الاخوة الي بسوريا وعلى جميع العراقيين وتتسهل امور الجميع يارب
تحياتي

[العزاوي 55]

الاخت الغاليه القطيفه نحن كان موعد سفرنا 23/2/2011

تحياتي للجميع

[زرزور بغداد]

أنشاء الله كلشي ماكو ... الوضع جدا" طبيعي ... وكاعد نفتر ونتسوك ... ألله يحفظ كل العراقيين

تحياتي أخي العزاوي أنشاء الله تسمع خبر السفر عن قريب

[العزاوي 55]

للجميع ان شاء الله حبيبي زرزور بغداد ربي يبارك بيك

[طائر بلا جناح]

الاخوة الاعزاء وفقكم الله جميعا
سوريا الحبيبه تتعرض لمؤامرة خبيثة ومن نفس الجهات التي دمرت العراق
لكن الشعب السوري الحبيب قيادة وشعبا يتصدون بحكمة لهذه المؤامرة ونحن معهم بقلوبنا وهذا اضعف الايمان لان لسوريا دين باعناقنا وهي البلد الكريم الذي احتضن العراقيين ولازال
ادعوا من الله ان يحمي هذا البلد المضياف من الاعداء
الحياة طبيعية في معظم ارجاء البلد والحكومة تقوم على تقديم الاصلاحات المطلوبة ليتم الفرز بين من يريد الاصلاح ومن يريد الخراب
حماكم الله جميعا

[ملك بابل]

اعتقد اخوان اكو هوايه تعتيم من قبل السلطات السوريه على الموضوع لان الناس في سوريا ما ديعرفون شنو دا يصير بسورية لان كل فتره وطلع بشار على التلفزيون ودا يسوي تغير بالقانون السوري وهم اصلاحات اكيد من ورا المضاهرات الي صارت في مختلف محافظات سوريا وهسه هم طلع اليوم مفتي سوريا وكان ب محافظه درعا وايد ثوره الشعب في سوريا نحو الديمقراطية وهاي كلها الاخبار على قناه العربية والجزيره وباقي القنوات الفضائية مع التصوير  نتمنى ان يصير تغير سلمي للسلطه في سوريا والله يحفظ العراقيين هناك ويبعد عنهم كل سوء

[ابو الزين]

اعتقد اخوان اكو هوايه تعتيم من قبل السلطات السوريه على الموضوع لان الناس في سوريا ما ديعرفون شنو دا يصير بسورية لان كل فتره وطلع بشار على التلفزيون ودا يسوي تغير بالقانون السوري وهم اصلاحات اكيد من ورا المضاهرات الي صارت في مختلف محافظات سوريا وهسه هم طلع اليوم مفتي سوريا وكان ب محافظه درعا وايد ثوره الشعب في سوريا نحو الديمقراطية وهاي كلها الاخبار على قناه العربية والجزيره وباقي القنوات الفضائية مع التصوير  نتمنى ان يصير تغير سلمي للسلطه في سوريا والله يحفظ العراقيين هناك ويبعد عنهم كل سوء

والله يا اخي صحيح اكو مظاهرات بلبد لكن قليلة والاعلام ديزودها هواية يعني نحنا عايشين على ارض الواقع  والى حد الان مشفنا شي يعني اعطيك مثال قبل يومين صارت مظاهرة قدام عيوني بحلب قي مساكن هنانو وكانت مظاهرة مؤيدة للرئيس وتهتف له وتم نقلها عبر الجزيرة والعربية بانها مظاهرة معارضة يعني لو مصارت قدام عيوني كان صدقت الاخبار ما اكلك ماكو شي بس   
مو بالحجم الموجود بالاعلام يعني الحياة جدا طبيعية والله يحفظ سورية من كل شر كل عراقي صارله سنين عايش بسوريا وماحس الا هو بلده الثاني وما راح ننسه حسن الضيافة النا

[المهاجر الجديد]

       
اخي العزيز كوندا..........

الوضع كما ذكر بعض الاخوان بصوره عامه  لاباس به  بس القنوات الفضائيه تضخم الامور وتهو لها لاسباب ربما لاتخفى على الكثيريين

احنا نطلع ونفتر ونتسوق ونسهر ونتناخر باليل الى ال11  وال12 خارج البيت وماكو شي والله يستر على الجميع ويديم الامن والامان

اما بخصوص السفر  فالسفر ماشي  عادي  وماكو اي  شي ماثر عليه ..... والحمد لله اني  استلمت فيزه وتذاكر طيران

وان شاء الله  التوفيق للجميع

           
                                                                                                      ابوحارث