كلكم إتعرفون الحرب العالميه الثانيه تقريبا بالـ (1935).. اني جان بوكتها
عمري 16 سنه ...
المهم گاعد بالبيت دا العب بلي ستيشن 2 .. دك الموبايل مالتي ( اي لا تتعجبون اني من ذاك الوكت عندي موبايل )
اي اكمللكم .. دك الموبايل .. جنت حاط نغمة هيفاء ( بوس الواوا )
شلته .. طلع ( رئيس الجمهوريه مال روسيا ) .. كلي وليدي اسفين
على الازعاج بس الوضعيه حيل عاويه .. والجيش نصه راح بالزلك .. ومحتاجيك حيل
اني صفنت .. اتذكرت ايام الطفوله .. من جنت العب دعابل بروسيا ويه ابن الوزير .. كتله والله عمو ابطن عيني .. هسه بس افول المولده بانزين وجيكم .. والله ترست المولده .. جيكت الدهن .. وخذت الباسكل مالتي ذبيته ( D )
قبطت سكليتر .. وين ..؟؟ على الخط السريع مال ( حله - رمادي )
ومناك كلت اخذ يمنه على روسيا .. والله نص ساعه اني بنص موسكو ..
بس شحجيلكم ..!! حاره كلش من البرد .. شغلت التبريد صعدت الجامات ..
والله سئلت وين بيت رئيس الجمهوريه ..؟؟ كلولي بقطاع 20 يم مرطبات
( علاوي جرثومه ) وصلت .. دكيت الباب طلع ابو خوشكوف ..
( ابن الرئيس الروسي اسمه خوشكوف لان مرته اوكرانيا ) ..
خطيه الرجال حالته جانت زفت .. حضني .. وكلي الله جابك .. كتله خير عمو ؟؟ كال هيج وهيج السالفه .. والالمان طبوا بينه كوول .. كتله عمو
صدك جذب .. اني موجود وهيج يصير !!!!
كتله اني رايح منا اليومين .. انشاء الله تسمع خير
طلعت رحت على ولد اعرفه بروسيا اسمه ( قاسم ) هاذا شقاوه مال بغداد
وجان صديقي الروح بالروح .. كتله قسومي هيج وهيج الفلم اريد اسلحه ..
كلي ادلل شتريد ..؟؟ كتله اريد 56 صاروخ ( ارض ارض ) ... و 34 صاروخ ( ارض – مي ) اقصد ( ارض جو ) ...... و 89 بي كي سي ..
و فد ( 29934 ) رمانه يدويه .. و ( 3788493 ) لغم منوع بين مضاد للبشر ومضاد للدبابات .. والله ماقصر الولد حطلياهن بالعلاكه .. وعدل وكبل للجبهه .. وين ؟؟ بالخطوط الاماميه .. ما جذب عليكم الوضعيه صدك
جانت داجه ( يعني تعبانه ) .. بس اني اخوكم خوما خاف ..!!!!! لا يابه لا
كتلهم للجنود انتو لمو اجويلاتكم ورجعوا لبيوتكم .. مالكم علاقه .. السالفه
صارت يمي ..!!
باوعت يمنه .. يسره .. شحجيلكم بلــ ( 8765189709 جندي الماني ) ..
وكل واحد راكب دبابه منفيست حديث .. بس اني اخوكم نصبت الصواريخ على جتفي وصحت .. اني الكم .. طبا ما طبا .. طاخ طاخ .. الزكه .. جيبه .. ودي .. الله .. اصلخه .. الطمه .... والله صفيتهم بقوا بس 7 جنود ودبابتين .. واني باقيلي رمانه وعلج ابو السهم .... اسويت اني ؟؟ لزكت العلج ابو السهم بالرمانه وشمرتها .. على الدبابه الزكت بيها .. وجان تنفجر .. بقت دبابه وحده ركضت عليها وبيدي قلم ابو النبالات
( لحد يكلي منين جبته القلم هوه اجه ) .. والله وبالقلم كطعت السرفه مالتها .. وكفت الدبابه .. كمزت على القماره .. فتحت ( لسلايد روف ) .. نزلتلهم بيدي على بوكس منا جلاق منا وجم كله .. اخذتهم اسرى ..!!
طبعا وره ما هيجي سويت اجه الرئيس الروسي وباسني من راسي وكلي ..
وليدي انته اقوه من اكرندايزر والله كتله .. لا عمو ماسويت شي اني ..
جان ينطيني هديه سيارة لاده بعدها ماماشيه بالجيس .. وشترولي بنطرون كتان اصلي .. وبوتين اديداس ابو العلامة ....
وراها رجعت للبيت .. وشغلت المولدة .. وكعدت اتفرج ( عدنان ولينا )
