رضينا بIOM وال IOM مارضت بينا

[kunda]

مثل ماتعرفون ياشباب انه اخوكم كوندا ديحاول يشوف خلقة امريكا (او الخارج) من سنة97 والحمد لله من هذاك الوقت واسمي يلمع في رفوف اليو ان وما يتبعها ... وماكو شي ,, وبعد ان تحطمت الامنيات والاحلام بفضل توالي السنوات وبعد ان وصل جميع الاصدقاء والمعارف والاقرباء وحتى الغير راغبين بالسفر وحتى من لايعرف اين تقع امريكا على الخريطة 
والان وفي منتصف سنة 2011 وبعد ان تكرمت امريكا علينا بما يسمى برنامج siv ,iom عادت الاحلام لتلملم شتاتها وعاد الامل من جديد وبعد مقابلة طيبة مع المحلف الذي تعاطف معي ومع قضيتي بشكل كبير خاصة بعد ان عرف بأني اصبت اثناء عملي مع الامريكان اصابة بالغة أثرت على عملي وماتبقى من حياتي ...  
فوجئت البارحة بايميل(التأجيل) المقيت وهي نتيجة مقابلة المحلف ..بعد ان افرطت في التفاؤل المفرح ... جائني الرد مخيبا للامال مع الاسف .وهذا اخر ماكنت اتوقعه ان ارضى بالاي او ام وهي التي لاترضى بيا ....

[علي النعيمي]

الله يساعدك من 97 وانتة لحد هسة ممسافر اويلي جان صار بية جلطة كل ساعة الهة فرج

[abubakr]

الله يساعدك اخويه وان شاء الله تفرج عليك وعلى كل الطيبين واتمنى ان تجد طريقة لعمل استئناف او اي شيء بخصوص قضيتك
ودمتم للنضال .

[kunda]

حبي اوركاي   اني قابلت محلف بالشهر الثالث والبنية المصرية اللي فوتتنا من البوابة شرحتلنا الوضعية وكالت انتو بعد ماتقابلن اليوم تحسبون 60 يوم وتستلمون النتيجة مال المحلف واللي راح تكون واحدة من 3 احتمالات ..
1- قبول وكملت حجيها (ورا القبول نكوللكم مبروك وراح تدخلون في فترة انتظار اخرى لغرض اكمال اجرائات السفر)
2- رفض وعدكم مجال تسوون استئناف خلال 60 يوم فقط
3- تأجيل اتخاذ القرار وهنا والكلام للبنية المصرية وهنا لايمكننا التنبوء بانتهاء الفترة التي قد تصل سنوات  لذا عليكم الانتظاااااار

[المظطهد]

السلام عليكم

اخوية العزيز كوندا اني اخوك المظطهد حاليا بامريكا مريت بنفس ظروفك بس جنت بمصر وبقى قرار المحلف مجهول من تاريخ شهر اكتوبر سنة 2008 لغاية تقريباتموز 2009 وراها اجتة القرار موافق وراها الامنية تاخرت لا يظل بالك صدكني توصل توصل واني اول واحد اهنيك للمعلومات جنت ادخل باسم حسوسة من مصر بعدين صارت مشكلة بالحاسبة وغيرت اسم الدخول
اني حبيت اطمنك بس تقبل تحيات اخوك

[بغداد بقلبي]

السلام عليكم اخ كوندا اطمن انته مقبول ان شاء الله اني عندي اهواي اصدقاء متلك كانوا وحالياهمه في اميريكا والحمد لله التاجيل مجرد انه المحلف بعده ما منطي قراره بالموضوع يمكن ايريد ايراجع كم ورقه  او القضيه وطبعا اكيد من صالحك لان ايريد لمن ينطي قبول ايكون قراره مضبوط لان وراه متابعه ايضا واعتقد اخي الغالي انته قصتك كانت طويله وشيقه فلهذا الرجل اشويه داخ وفقط لااكتر ولا ااقل

بالموفقيه لك وان شاء الله يوم سفرك واستقرارك في ايميريكا

[kunda]

مشكورين شباب على الردود والتصبيرة ههههه
وهاي عود اني مسيطر على اساس منتظر الفيزا على برنامج siv اللي مانعرف شجالة هذا همينة مبنجر
...والله مااعرف هي ازمة سفر لو شأن داخلي امريكي لو اني فكر 

[ديفيد بغداد]

الناس كلة داخت واللة  بس سؤال اخي انت ما قدمت من 2008 ليش

[TROY]

اللة كريم اخوية kunda انشاء الله السفر عن قريب الله يصبرك

[لورنس السفاح]

اخوية كوندا
اللي اعرفة ع اي او ام بغداد ماكو موافقة صريحة
لو تاجيل بانتظار الامنية لو رفض
فهو هذه كليشة الموافقة اللي عدهم ماكو غيرها
لكن اذا متغيرة سياقاتهم بالجديد بعد ما اعرف
لكن قبل ماكو غير 2 تاجيل بانتظار الامنية (( موافقة ))  لووووووووو  رفض
تحياتي

[Jerry echo]

يردون جماعتك  كلهم يطلعون كدامك .... حتي يتلكوك بالمطار الجماعة خجلانين منك ...................................حبيت أتشاقى وياك
تقبل إحترامي

[bhabhan]

اخي كوندا متستاهل التاخير والله بس اصبر واللي يصبر ينول خير ان شالله الله احسن الكل عينه عليك ان شالله تمشي امورك وتسافر وتصير كله سوالف ترة متحتاج غير الصبر الله كريم ربنا يفرج عنك وعنا
اخوك بهبهان

[willpower]

اخوية كوندا
اللي اعرفة ع اي او ام بغداد ماكو موافقة صريحة
لو تاجيل بانتظار الامنية لو رفض
فهو هذه كليشة الموافقة اللي عدهم ماكو غيرها
لكن اذا متغيرة سياقاتهم بالجديد بعد ما اعرف
لكن قبل ماكو غير 2 تاجيل بانتظار الامنية (( موافقة ))  لووووووووو  رفض
تحياتي

كلام الاخ لورنس العرب2 صحيح.

اخي كوندا معاملات IOM بغداد ماكو 3 احتمالات . كلنا قابلنه و فهمونه اليه النظام الماشين عليه....هن احتمالين لو رفض لو تاجيل الى حين اكمال الامنيه وتشمل موافقة المحلف طبعا.

يعني هسه انت مراضي بموافقة المحلف لو شنو؟   خويه لا اتخاف من العين   تره ما نحسد.

تحياتي

[السفير80]

اخي كلنا منتظرين وميتين قهر ولكن الحمد لله ماكو حل ثاني غير الانتظار

[kunda]

أخوية ويلباور ..انت همينة قديم بالاي او ام وتعرف دوالغها ورموزها ,,الرسالة اللي اجتني هي deferral والرمز اللي بصفها AH  وهذا نص الرسالة
Dear Sir/Ma’am,

The International Organization for Migration writes to inform you that a final decision about your case has not yet been made. Your case has been deferred by U.S. Citizenship and Immigration Services (USCIS) for the reason indicated in the attached letter. 

Please understand that this deferral does not mean that your case has been denied. Decision deferrals indicate that further review of your eligibility for refugee resettlement in the United States is necessary.

Your case will continue to be processed.
واكو ملف PDF مرفق وياها فتحته بيه مربع مؤشر وكاتبين نفس الكليشة مال تأجيل القرار الى حين اكتمال المراجعة الاضافية

[azizaliraqi]

السلام عليكم

والله يا اخي العزيز كوندا من قريت موضوعك من صدك ضجت 

والله على حجايتك اكو ناس متسوه توصل لباب الشرجي وطلعو لامريكا راسا

وناس تستحق العيش بامريكا لهسه منتظره رحمة رب العالمين

بس نرجع ونكول الله كريم وكل تاخيره بيها خيره انشالله

وربي يصبرك ويوفقك بحياتك وانشالله نسمع منك كل الاخبار الحلوه عن قريب


تحياتي

[willpower]

أخوية ويلباور ..انت همينة قديم بالاي او ام وتعرف دوالغها ورموزها ,,الرسالة اللي اجتني هي deferral والرمز اللي بصفها AH  وهذا نص الرسالة
Dear Sir/Ma’am,

The International Organization for Migration writes to inform you that a final decision about your case has not yet been made. Your case has been deferred by U.S. Citizenship and Immigration Services (USCIS) for the reason indicated in the attached letter. 

Please understand that this deferral does not mean that your case has been denied. Decision deferrals indicate that further review of your eligibility for refugee resettlement in the United States is necessary.

Your case will continue to be processed.
واكو ملف PDF مرفق وياها فتحته بيه مربع مؤشر وكاتبين نفس الكليشة مال تأجيل القرار الى حين اكتمال المراجعة الاضافية

اي اخويه...مبروك موافقة المحلف المبدئي . وان شاء الله الامنيه ما اتطول واتسافر باسرع وقت؟

تحياتي

[tuna]

ما اكلك اخوية غير الله ايصبرك ويسهل امورك انشاء الله

[الناسك]

كان الله بالعون وان شاء الله الفرج القريب اخوية ... ما بقة شئ راح الكثير وما بقة الا القليل
تحياتي

[لورنس السفاح]

اي هاي هيه يااخوية ماكو غيرها
كل اللي سافروا من بغداد اي او ام اجاهم هذا الاتاج البي دي اف
هسه شغلتك يم الامنية
بعد بهاي انت وحضك  بالامنية  لو من جماعة الكم شهر لووووووووو
خخخخخخخخخخخ تصير مخضرم مثل اخوك
ان شاءالله متتاخر امنيتك

تحياتي

[s350thebest]

تفرج انشاء الله

[البابلي80]

اولا مبروك اخوية العزيز كوندا على الموافقة
اني هم اجتني نفس الرسالة بس اذا تريد تسرع بمعاملتك انصحك نصيحة ظل لح عليهم بالرسائل اني من ورة ما استلمت موافقة المحلف الي بيها تأجيل لحد هسة راسللهم 4 اميلات ,, واخر اميل جان بيه تطور انه case update  والي قبله جان الكلمة Inquiry  يعني تحقيق ومن خلال متابعتي معناها الملف ديمشي فانت لتظل تنتظرهم وظل لح وياهم شوية بس لتدوس زايد يعني يوم اسألهم على اسم الولاية او انه الوضع صار خطر اكثر من السابق او اي موضوع استفسر بيه وكللهم اكو ابديت لا وتحياتي الك

[عراقي كرادي]

أخي يعني ماعرفنا بالضبط شكاتبيلك  السبب بالاتاج فايل.
بس احنا كلنا تقريبا ماشرينا على الديفر هذا .............. وقاعدين ننتطر .

اعرف شخص جان مايندل اليو ان , دلوا جماعة مسجلين باليو ان, ومشت قضيته واجاه رفض وقدم استئناف واجاه قبول وسافر الله وياه, والجماعة الي دلوا على اليو ان بعدهم ينتظرون مع العلم مسجلين قبله همه بسنين وسافر قبلهم بسنين وهمه بعدهم .

كلشي قسمه ونصيب...........والله يفرجه على الكل.