السلام عليكم ورحمة الله وبركاته
اللي حجيتة بالجزء الاول يخص اللاجئين عموما في عموم امريكا وهسة راح احجي على اللاجئين بمنظمتة اللي هية بولاية تكساس دلاس فورت وورث بس لعلمكم جميعا انو باقي المنظمات متختلف هذاك الاختلاف الكبير
بعد ما نكمل اوراق اللاجئ راح اعملة اورينتيشن يعني توجيهات وتفهيمات وعموما نتحدث على البيئة الامريكية والنظافة العامة والشخصية والقرض وتغيير العنوان والعمل واشرحلهم عن البرامج اللي تتعامل بيهة المنظمة مالتنة تحديدا والتي هي كالاتي:
عدنة برنامجين الاول ماج كرانت واللي نخلي بيه العوائل الي عندهم اطفال واللي هم قادرين على العمل وهذا البرنامج راح ينطي كاش لمدة ثلاث اشهر لكل بالغ 200دولار ولكل طفل تحت 18 سنة 40دولار بالشهر بس الايجار والكهرباء والماء مدفوعات لمدة 6 اشهرحتى اذا صار عدة اي مصاريف زيادة راح نتفعلهياه مثلا يشتري ملابس مدرسة او يطلع اجازة سوق او حتى يسوي هوية ولاية ندفعلة هاي المصاريف اما فقرت الخدمات ففيه كيس منجمت لمدة 6 اشهر ايضا يعني مثلا راد يطلع اجازة سوق احنة ناخذة راد يروح للسوق احنة ناخذة المستشفى اقصد زيارات متكررة هم احنة ناخذة الفود ستامب اذا صار بيه اشكال احنة نساعدة والتبرعات اللي تجي للمنظمة يكون صاحب الاولوية وحصة الاسد وعدنة ناس نصيحلهم المنتور او بالعربي الموجه او المعلم وهذي عبارة عن عائلات امريكية يتبنون هاي العوائل العراقية بكلشي يساعدوهم ويشرحولهم ويطلعوهم ويحاولون يعلموهم الاندماج بالمجتمع الامريكي مثلا عندي عائلة بنت رب العائلة طفلة عمرها ثمان سنوات تحب الخيل المنتور اخذهم الى مزرعة خيل وركبهم على الخيل يعني اخذهم سفرة وطبعا احنة ملزمين بنهاية 120 يوم من وصول اللاجى اللي على الماج كرانت انو يكون مشتغل بدوام كامل وباجر يكفيه سد احتياج عائلتة وبالمناسبة اللي على الماج كرانت يكون دائما الفود ستامب مالتة اعلى جدا من اللي على البرنامج الثاني.
اما البرمنامج الثاني اسمة ار سي اي الي هوة رفيوجي كاش اسستنس المساعدة المالية للاجئين هذا البرنامج مدة ثمان اشهر ينقسم قسمين الاربع اشهر بمبلغ كامل والاربع اشهر الاخرى بربع المبلغ الاول مثلا
شخص عازب فوق سن 18 سنة راح يستلم لمدة اربع اشهر 445 دولار والاربع اشهر المتبقية راح ياخذ 187.50 دولار
عائلة اربع اشخاص اب وام واطفال اثنين راح يستلمون 909 دولار لمدة اربع اشهر وراح يستلمون 359.75 دورلار للاربع اشهر المتبقية
وعائلة عددها ست اشخاص اب وام واربع اولاد احد الاولاد فوق 18 سنة راح يستلم الاب والام والثلاث اطفال 1002 دولار لمدة اربع اشهر والاربع اشهر الاخيرة راح يستلمون 459.75 والولد فوق 18 سنة راح يستلم 445دولار لاربع اشهر اولى والاربع اشهر الثانية راح يستلم 187.50
طبعا هذا كلة حسب نسبة همة يعرفوهة اللي حطو هذا البرنامج اني لحد الان مفاهمتهة
اما الكيس منجمت فراح تكون لمدة ثلاثة اشهر فقط واحنة غير ملزمين بعملهم بس نحولهم اول ما يجون على منظمة اخرى تساعدهم بالبحث عن شغل وبعد الثلاث اشهر تكون علاقتنة بيهم كمنظمة مجرد صك ننطيهمياه وخلص وما علينة باي شي بيهم.
لكن بعد الست اشهر للبرنامج الاول الماج كرانت والثلاث اشهر للبرنامج الثاني ار سي اي راح احول اوراقهم على منظمة اخرى حتى اتسويلهم اكتندد كيس منجمت يعني تباشر امورهم هاي المنظمة مختصة خدمات فقط بدون مساعدات مالية هاي المنظمة تظل وياهم على مدى تقريبا خمس سنوات الى ان ياخذون الجنسية انشاء الله
وعدنة بالمكتب برنامج هجرة وعدنة كيس منجر اختصاص هجرة ومخولة من دائرت الهجرة بالاضافة الى محامية يعني الكرين كارت هم يكدرون يسووه من يمنة ويتقاضون 75 للنفر و 150 للعائلة مهما كان عددها ويساعدون بكل امور الهجرة مثل استمارة اهتمام اللاجئ اللي هية مثلا عندك صديق تريد تريدة يجي تجي يمنة وتنطينة معلوماتة واحنة نسويلة هاي الاستمارة انو انتة مهتم بجية هذا الشخص وهاي الفقرة اشوية تخض المعاملة يعني تنفض التراب من عليهة ههههههههههههه بس اذا سويتهة يمنا يعني صديقك راح يجي يمنة.
وايضا لم الشمل والجنسية انشاء الله ووثائق السفر هم تكلف 75دولار لكل وثيقة والهجرة تاخذ 220 دولار واني سويتها الزوجي ابو مصطفى بس لحد الان مراح بيهة الاي مكان ماكو فلوس ههههههههههههههه كلشي كلشي يتعلق بالهجرة همة يشتغلوه واذا فد شي ميكدرون يسووه راح يسوولك تحويل على منظمة اخرى.
طبعا تكاليف التقديم على الجنسية راح تكول بالزايد 700 دولار لكل نفر اقصد الاب والام لان ما حاجة اتسوون الاطفالكم لان همة راح يكتسبوهة منكمز
بمناسبة اكتساب الجنسية فقط الام والاب يمنحون الجنسية فقط الابنائهم لا الزوج يمنحهة للزوجة او العكس ولا الولد يمنحهة الاهلة واني صار عندي طفل بامريكا اسمة ياسين بس هوة اخذهة ابو الشباب بالعافية عليه ههههههههههههه هسة احنة حاطيلنة عميل بالبيت هههههههههههههه( هسة انشاء الله فد يوم اسولفلكم على ولادتي امر مو طبيعي)صدك امريكا ههههههه.
يالة كافي كلش تعبت اروح انام باجر عندي دوام ملتقانا غدا باذن الله وترقبو جديدي واني مستعدة للاسئلة اخواني واخواني الكرام.
تحياتي الكم بالموفقية والسفر القريب باذن الله
