ܚܲܝܵܐ ܝ̄ـܠܹܗ ܥـܝܼܪܵܐܩ

،،، ܚܲܝܵܐ ܝ̄ـܠܹܗ ܥـܝܼܪܵܐܩ ،،،

ܚܲܝܵܐ ܝ̄ـܠܹܗ ܫܡܘܼܟܼ ܐܲܬܼܪܵܐ ܕܓܙܝܼܪܘܼܬܼܵܐ ܒܫܸܡ ܥܝܼܪܵܐܩܵܝܵܐ
ܡܐܲܝܟܼ ܗ̇ܘ ܙܲܗܪܝܼـܪܵܐ ܡܼܢ ܐܘܼܦـܩܵܐ ܙܪܸܩܠܘܼܟܼ ܟܘܼܟܼܒܼܵܐ ܨܲܦـܪܵܝܵـܐ
ܡܼܢ ܪܩܝܼܥܵـܐ ܕܢܸܚܠܘܼܟܼ ܥܲܠ ܥܲܡܲܢ ܛܠܝܼܡܵܐ ܒܲـܪܩܵܐ ܒܸܠܗܵܝܵܐ
ܠܥܲܝܒܼ̈ܐ ܥܲܡܛܵܢ̈ܐ ܡܘܼܢܗܸܪܘܼܟܼ ܩܘܼܫܬܵـܐ ܒܝܼ ܨܸܡܚܵܐ ܚܲܝܵܐ،،،
ܡܼܢ ܪܘܼܡܬܵـܐ ܫܪܹܐܠܘܼܟܼ ܥܲܠ ܡܵܐܦܵܐ ܕܐܲܪܥܵܐ ܢܨܝܼܒܼܠܘܼܟܼ ܐܝܼܬܘܼܬܵܐ
ܡܼܢ ܫܸܢ̈ܐ ܥـܒܼـܝܼـܪܹ̈ܐ ܗܲܠ ܐܸܕܝܘܼܡ ܝܵܘܡܵܐ ܦـܪܵܣܵܐ ܡܲܪܕܘܼܬܼܵܐ
ܩܵܐ ܟܠܲܝܗܝ ܬܸܓܼܡܹ̈ܐ ܩܵܐ ܟܠܲܝܗ̈ܝ ܥܲـܡܡܹ̈ܐ ܩܵܐ ܒܲـܪܢܵܫܘܼܬܼܵܐ
ܒܚܘܼܒܵܐ ܡܘܼܚܙܹܐܠܘܼܟܼ ܪܸ̈ܢܝܹܐ ܫܲܦܝܼـܪܹ̈ܐ ܕܗ̇ـܝ ܡܕܝܼܢܵܝܘܼܬܼܵܐ،،،
ܓܲܘ ܒܢܘܼܢܹ̈ـܐ ܕܐܲܬܼܪܘܼܟܼ ܒܝܼ ܣܲـܒܼـܪܵܐ ܪܲܒܵܐ ܙܪܝܼܥܠܘܼܟܼ ܐܵܓܼܘ̇ܢܵܐ
ܒܪܸܥـܝܵـܢܵܐ ܕܥܠܲܝܡܹ̈ܐ ܒܝܼ ܟܠ ܠܗܝܼܩܘܼܬܵܐ ܗܘܹܐܠܘܼܟܼ ܡܲܠܦܵܢܵܐ
ܠܐܝܼـܣـܘܼܪܵܐ ܒܥܲـܦـܪܵܐ ܝܵܐ ܐܵܓܼܘ̇ܢܸܣܛܵܐ ܗܘܹܐܠܘܼܟܼ ܡܗܲܕܝܵـܢܵܐ
ܠܦܘܼܬܼ ܚܘܼܒܵܐ ܕܐܲܬܼܪܵܐ ܒܝܼ ܗܲܝܡܵܢܘܼܬܼܟܼ ܗܘܹܐܠܘܼܟܼ ܢܲܛܪܵܢܵܐ،،،
ܒܝܲܕ ܫܲܝܢܵܐ ܘܫܠܵܡܵܐ ܦܫܝܼܛܵܐܠܘܼܟܼ ܐܝܕܘܼܟܼ ܒܝܼ ܟܠ ܛܲܝܒܘܼܬܼܵܐ
ܩܵܐ ܕܚܲܝܹܐ ܥܲܡܘܼܟܼ ܚܲܝܹ̈ܐ ܫܲܦـܝܼـܪܹ̈ܐ ܡܸܠܝܹ̈ܐ ܙܲܗܝܘܼܬܼܵܐ
ܩܲـܕ̄ܡܵܝܵܐ ܗܘܹܐܠܘܼܟܼ ܡܢ̄ ܟܠ ܐܲܬܼܪ̈ܵܘܵܬܼܵܐ ܕܒܼـܝܼܚܵܐ ܕܚܲܝܘܼܬܼܵܐ
ܫܡܘܼܟܼ ܝܵܐ ܥـܝܼܪܵܐܩ ܒـܩܲܢܝܵܐ ܚܲܪܝܼـܦܵـܐ ܢܩܝܼܪܵܐ ܒܬܲܫܥܝܼܬܵـܐ،،،
ܟܡܵܐ ܕܙܡܪ̈ܘܼܢ ܘܪܩܸـܕܠܗ̄ܘܼܢ ܕܬܵܠܚܝܼ ܠܝܵܨܝܼܠܘܼܟܼ ܒܢܘܼܢ̈ܐ ܕܒܝܼܫܘܼܬܵܐ
ܐܝܼܢܵܐ ܠܵܐ ܡܨܹܐܠܗ̄ܘܼܢ ܕܣܲܦـܩܝܼܠܹܗ ܠܒܘܼܟܼ ܡܼܢ ܗܲܝܡܵܢܘܼܬܵܐ
ܗܲܪ ܦـܣܸـܥܠܘܼܟܼ ܠܩܲܕ̄ܡܵܐ ܝܵܐ ܪܘܝܼܚܵܐ ܕܢܲܦ̮ܫܵܐ ܘܡܘܼܪܡܵܐܠܘܼܟܼ ܐܵܬܼܵܐ
ܚܙܹܐܠܵܗ̇ ܟܠ ܬܹܒܹܝܠ ܚܲܝܠܘܼܟܼ ܓܲܢܿܒܵـܪܵܐ ܒـܟܼܠ ܫܲܪܝܼܪܘܼܬܼܵܐ،،،
ܒܡܹܐܙܲܠܬܘܼܟܼ ܪܘܝܼܚܬܵܗ̇ ܒܟܼܠܲܝܗ̈ܝ ܡܲܫܛܵܚܹ̈ܐ ܒـܝܲـܕ ܡܛܲܘܪܵܢܘܼܬܼܵܐ
ܒܐܲܩܠܵܬܘܼܟܼ ܕܲܫܕܸܫ ܠܟܼܠ ܩܲـܪ̈ܩܲـܦـܝܵـܬܼܵـܐ ܒـܝܲـܕ ܣܛܘܼܢܹ̈ـܐ ܕܩܝܵܡܬܵـܐ
ܐܲܢܿܬܝܼـܘܸܬ ܪܸܡܙܵܐ ܠܟܼܠ ܚܲܕ̄ ܐܲܬܪܵܝܵܐ ܕܪܵܫܸܡ ܠܟܹܐܢܘܼܬܵܐ
ܒܟܼܠܲܝܗ̈ܝ ܥـܕܵܢܵܬܼܵـܐ ܠܥܲܡܘܼܟܼ ܦܘܼܫܸܩܠܘܼܟܼ ܐܵܓܼܘ̇ܢܵܐ ܕܩܘܼܫܬܵـܐ،،،
ܒܢܘܼܢܘܼܟܼ ܛܲܢܵܢܹ̈ܐ ܡܼܢ ܫܡܘܼܟܼ ܛܒܼـܝܼܒܼܵـܐ ܫܩܸܠܗ̄ܘܼܢ ܠܒܼܝܼܒܼܘܼܬܼܵܐ
ܒـܕܪ̈ܲܥـܢܵـܢܹܐ ܕܢܚܵܫܵܐ ܥܲܠ ܓܘܼܠܦܵܐ ܕܢܸܫܪܵܐ ܦـܪ̈ܚܠܗ̄ܘܼܢ ܒܚܹܐܪܘܼܬܼܵܐ
ܡܼܢ ܓܲܢܿܒܵـܪܘܼܬܼܘܼܟܼ ܡܫܘܼܡܗܵܐ ܝ̄ـܘܸܬ ܓܙܝܼـܪܵܐ ܒـܡܲܝܕܵܢ ܕܓܙܝܼܪܘܼܬܼܵܐ
ܩܵـܬܘܼܟܼ ܝܵܐ ܥܝܼܪܵܐܩ ܡܵܐ ܛܵܒܼ ܘܡܵܐ ܫܲܦܝܼܪ ܪ̈ܫܝܼܡܹܐ ܡܘܼܫܚܵܬܵـܐ،،،
ܒܚܲܝܠܵܐ ܕܚܘܼܝܵـܕܵܐ ܩـܪܹܐܠܘܼܟܼ ܩܵܐ ܐ̄ܚܘܼܢܘܼܟܼ ܠܟܼܠ ܥـܝܼܪܵܐܩܵܝܵܐ
ܡܐܲܝܟܼ ܒܵـܒـܵܐ ܟܹـܐܢܵـܐ ܕܩـܘܼܒܸܠܠܹܗ ܠܒـܪܘܼܢܹܗ ܕܝܼـܗ̄ܘܵܐ ܢܘܼܟܼـܪܵܝܵܐ
ܐܵܗܵܐ ܝ̄ـܠܹܗ ܫܒܼـܝܼܠܘܼܟܼ ܡܼܢ ܕܵܪܹ̈ܐ ܥـܒܼܝܼـܪܹ̈ܐ ܘܗܲܠ ܝܵܘܡܵܢ ܚܲܝܵܐ
ܐܝܼـܢܵܐ ܠܵܐ ܫܠܸܡܠܗ̄ܘܼܢ ܠܚܲܒـܪܘܼܟܼ ܫܲܪܝܼܪܵܐ ܥܲـܝܢܹ̈ܐ ܕܲܣ̈ܡܲܝܵܐ،،،
ܒܣܲܟܼܠܘܼܬܼܵܐ ܚܙܸܩܠܗ̄ܘܼܢ ܥܲܠ ܕܲܘܸܠܝܵܬܼܵـܐ ܕܫܵܩܠܝܼ ܦܘܼܣـܩܵـܢ̈ـܐ
ܒܝܼ ܠܵܚܘܼܫܘܼܬܼܵܐ ܗܲܠ ܐܸܕܝܘܼܡ ܝܲܘܡܵܐ ܠܐܲܬܼܪܵܐ ܡܙܲܒـܢܵـܢܹ̈ܐ
ܒܬܲܚܡܲܢܬܵـܐ ܥـܝܼܩܬܵܗ̇ ܣܵـܟܼ ܠܵܐ ܡܘܼܢܬܹܐܠܗ̄ܘܼܢ ܐܵܢ̈ـܝ̄ ܡܲܚܸܪ̈ܒܼܵـܢܹܐ
ܥܲܝܒܼ̈ܐ ܕܬܲܪܩܲܠܬܵـܐ ܒܝܼ ܙܪܵܩܬܵـܐ ܕܫܸܡܫܵܐ ܛܠܸܩܠܗ̄ܘܼܢ ܡܐܲܝܟܼ ܥܢܵـܢܹ̈ܐ،،،
ܪܵܒܵܐ ܗܘܼܡܙܸܡܠܗ̄ܘܼܢ ܒܝܼ ܐܵܢܵܐ ܐܵܢܵܐ ܒـܟܠܲܝܗ̈ܝ ܕܘܼܟܵـܢܹ̈ܐ
ܚܫܝܼܒܼـ̈ܐ ܩܵܐ ܢܲܦ̮ܫܲܝܗܝ ܪܹ̈ܫܵܢܹܐ ܕܐܲܬܼܪܵܐ ܐܲܦ ܡܲܡܬܸܠܵܢܹ̈ܐ
ܢܦܸܚܠܗ̄ܘܼܢ ܒܝܼ ܙܘܼܪܢܵܐ ܘܡܚܹܐܠܗ̄ܘܼܢ ܛܵܒܼܘܼܠܵܐ ܘܪܩܸܕܠܗ̄ܘܼܢ ܪ̈ܲܩـܕܵܢܹܐ
ܒܝܼ ܐ̄ܚܵܪܵܝܘܼܬܼܵܐ ܒܬܲܩܬܲܩܬܵـܐ ܕܢܟܼܝܼܦܹ̈ܐ ܡܚܹܐܠܗ̄ܘܼܢ ܠܬܲܪ̈ܥܵـܢܹܐ،،،
ܒـܡܲܫܦܲـܪܬܵـܐ ܕܦܵܬܼܵـܐ ܕܥܸܪ̈ܘܼܢ ܒܸـܓܚܵܟܵܐ ܐܵܢ̈ܝܼ ܡܙܲܒـܢܵـܢܹ̈ܐ
ܒܸـܕܪܵܝܵܐ ܫܠܵܡܵܐ ܡܼܢ ܬ̄ܚܘܼܬ ܡܲܪܛܘܼܛܵܐ ܒܠܒܼـܝܼܫܬܵـܐ ܕܣܵܛܵܢܹ̈ܐ
ܐܝܼܢܵܐ ܠܵܐ ܡܛܹܐܠܗ̄ܘܼܢ ܠܢܝܼܫܲܝܗ̈ܝ ܚܸܫܟܵـܢܵܐ ܢܘܝܼܠܹ̈ܐ ܦܲܢܕܵܢܹ̈ـܐ
ܒـܝܼ ܠܵܚܘܼܫܘܼܬܵ̇ܐ ܣܵـܟܼ ܠܵܐ ܡܘܼܢܬܹـܐ ܠܗ̄ܘܼܢ ܘܓܠܹܐܠܗ̄ܘܼܢ ܩܲـܕ̄ܡ ܥܲܝܢܹ̈ܐ،،،
ܗܲܕܟܼܵـܐ ܝ̄ـܠܵܗ̇ ܓܪܵܫܵܐ ܚܲܝܘܼܬܵܐ ܒܐܲܬܼܪܲܢ ܒܐܝܼـܕܵܐ ܕܬܲܓܵܪܹ̈ܐ
ܗܲܠ ܐܝܼܡܲܢ ܒܗܵܘܹܝܚ̈ ܕܡܝܼܟܼ̈ـܐ ܬ̄ܚܘܼܬ ܡܸܛܪܵܐ ܓܵܘ ܣܸܬܘܵܐ ܠܐ̄ܓܵܪܹܐ
ܡܕܝܼܢܵܬܲܢ ܬܠܝܼܚܹ̈ܐ ܘܥܲـܡܲܢ ܡܼܢ ܛܠܘܼܡܝܵܐ ܕܪܵܝܵܐ ܗܵܘܵܪܹ̈ܐ
ܘܝܲܬܒܼܵـܢܹ̈ـܐ ܕܟܘܼܪܣـܝܵܐ ܒܸܡܠܵܝܵܐ ܠܟܲـܪ̈̄ܣܲـܝܗ̈ܝ ܡܢ̄ ܠܲܚܡܵܐ ܕܦ̮ܲـܩـܝܼـܪܹ̈ܐ،،،
ܫܡܘܼܛܘܼܢ ܠܦܘܼܠܵܓܼܵܐ ܘܫܘܼܒܼـܗܵܪܵܐ ܣـܦܝܼܩܵܐ ܘܒܢܹܐܡܘܼܢ ܚܲܝܘܼܬܵܐ
ܒܲܣܵܐ ܡܼܢ ܩܸܛܠܵܐ ܘܡܼܢ ܪܕܲܝܬܵـܐ ܕܕܸܡܵܐ ܘܡܼܢ ܐܸܪܗܝܼـܒܼـܘܼܬܼܵܐ
ܫܲܒܼܪ̈ܲܝܢ ܩܘܼܛܩܛܹ̈ـܐ ܘܫܠܲܕܹ̈ܐ ܕܥܠܲܝܡܲܝ̈ܢ ܦـܪ̈ܝܼܣܹـܐ ܒܐܘܼܪ̈ܚܵܬܼܵـܐ
ܟܠܝܘܼܡ ܒܥܸـܣـܪ̈ܵܝܹـܐ ܘܒܐܸܡܐܵܐ ܘܒܐܲܠܦܵـܝܹ̈ـܐ ܡܼܢ ܥܲܡܲܢ ܡܝܵܬܼܵـܐ،،،
ܐܲܬܪܲܢ ܣܢܝܼܩܵܐ ܝ̄ܠܹܗ ܠܚܘܼܝܵـܕܵܐ ܕܩܵـܪܸܡ ܠܦܲـܪܨܘܼܦܵـܝܘܼܬܵܐ
ܪܸܚܩܵܐ ܡܢ̄ ܣـܝܼܣܲـܬܪܹ̈ܐ ܘܩܢܲܝܬܵܗ̇ ܓܲܒܲܝܬܵܗ̇ ܒܲܠܚܘܼܕܵܝܘܼܬܼܵܐ
ܕܗܵܘܹܝܚ̈ ܥܲܡ ܐ̄ܚܕܵܕܹܐ ܒܢܝܼܫܵܐ ܥܠܵܝܵܐ ܒـܪܸܢܝܵܐ ܕܚܹܐܪܘܼܬܼܵܐ
ܕܫܲܪܪ̈ܵܚ ܠܙܸܕܩܲܝ̈ܢ ܡܐܲܝـܟܼ ܟܠ ܐܸܡܘܵܬܼܵܐ ܒܚܘܼܒܵܐ ܘܐܲܘܝܘܼܬܼܵܐ ،،،
ܡܸܣـܟܹـܢ̈ܐ ܕܥܲܡܲܢ ܠܵܐ ܗܲܝܡܸܢܝܼܬܘܼܢ ܠܟܼܠ ܚܲܕ̄ ܦܵـܩܘܼܕܵܐ
ܕܡܲܫܦܸـܪܠܵܗ̇ ܢܲܦ̮ـܫܹܗ ܒܚܲܩܠܵܐ ܕܐܝܼܬܘܼܬܲܢ ܝܼܠܹܗ ܥܵـܒܼܘ̇ܕܵܐ
ܠܹܐ ܝ̄ـܠܵܗ̇ ܒܝܼ ܡܲܡܠܵܐ ܡܲܥـܡܲـܪܬܵܐ ܕܐܲܬܪܲܢ ܘܡܵܪܲܡܬܵـܐ ܕܓܘܼܕܵܐ
ܐܝܼܢܵܐ ܒܨܸܦـܝܘܼܬܵܐ ܡܫܵܪܹ̈ܝܚ ܦـܘܼܠܚܵܢܵܐ ܟܠܲܢ ܒܚܲܕ̄ ܐܝܼܕܵܐ،،،
ܟܠܲܢ ܥܲܡ ܐ̄ܚܕܵܕܹ̈ܐ ܦܲܫܛܲܚܠܵܗ̇ ܐܝܼܕܲܝ̈ܢ ܠܐܸܣ̈ـܐ ܕܒܸـܢܝܵـܢܵܐ
ܒܓܲܢܵـܢܲـܢ ܪ̈ܘܝܼـܚܹܐ ܦܲܝܫܵܚ̈ ܐܲܟܵـܪܹ̈ܐ ܘܡܲܫܬܹܝܚ̈ ܠܐܝܼܠܵܢܵܐ
ܕܢܲܬܼܪ̈ܝܼ ܛܥܘܼܢܝܵܬܼܵܗ̇ ܒܥܲـܦـܪ̈ܲܢ ܫܲܡܝܼܢܵܐ ܒܫܲܦܝܼܪ ܦܲܥـܘܵܢܵܗ̇
ܩܵܐ ܕܪܵܝܡܵܗ̇ ܐܵܬܼܵܐ ܓܵܘ ܐܘܼܦـܩ̈ܐ ܚܹܐܪܹ̈ܐ ܦܵـܪ̈ܣܝܼ ܓܘܼܠܦܵـܢܵܗ̇،،،

ܥܲـܒܼـܕܝܼـܫܘ̇ܥ ܣܵـܗ̄ܕܵܐ ܝܘܼܚܲܢܲܢ