ارجو المساعدة طبيب اسنان اريد اسافر

[dentismart]

السلام عليكم
بالبداية اريد اشكر جميع القائمين على هذا المنتدى على كل المساعدات اللي يقدموها للجميع والله يبارك بيهم و بجهودهم الطيبة
اخواني الاعزاء انا طبيب اسنان عايش بالعراق متخرج قبل 3 سنوات متزوج
شنو افضل وسيلة اقدم بيها حتى اسافر امريكا
يعني اقدم من العراق على IOM
لو اروح لغير مكان اقدم
يعني اني في بداية حياتي وماعندي غير الراتب اللي يكفينا معيشة بالعراق عادية
يعني كالولي انه ال IOM يحتاجلها فلوس كومة يعني السفر والمعيشة كلها على حسابك وماكو اي مساعدات ينطوكياها من توصل امريكا لين اني اريد اطلع من العراق مو من غير مكان
يعني اللي ماعندة تكاليف سفر ومعيشة يبقى بهالظيم الى ان يجي اجلة على ايد ..............
 لين صدكوني اني بيتنا ببغداد بس حتى دوامي ما اكدر اخلي ببغداد يعني دا اداوم باحد محافضات الجنوب بمنطقة نائية حتى زوجتي اشوفها ايام معينة بالشهر
بس اريد خلاص
رجاااااااااااااااااااااااء من لديه اي معلومة يكوللي شنو اسوي و شلون ابدي

وشكرا لكم ثانية على كل شيئ

[اسامة الهاشمي]

دكتورنا العزيز ..

برنامج iom  مختص بالافراد الي كانو يشتغلون ويه القوات الامريكية او احدى الشركات التابعة الهم انته بالنسبة الك ما مشتغل ويه اي جهة من هاي الجهات اذاً ميحق الك اتقدم على هذا البرنامج .
الك حق اتقدم على الامم المتحدة اليو ان وهنا لازم اتسافر خارج العراق الى اي دولة موجود بيهه مقر للامم المتحدة مثل سوريا عمان مصر تركيا لبنان او اي دولة عربية موجودة بيهه الامم المتحدة حتى اتقدم على اللجؤ .
ومن اتقدم على اللجؤ راح يسألوك شنو اسباب هروبك من العراق وتقديمك على اللجؤ لازم اكو اسباب مقنعة اتخليهم يصدكون بقصتك ويحسون بيك انه انته مهدد ومتكدر ترجع للعراق اذا ماره بيك هيج اشياء اما اذا بس مجرد اتريد اتسافر وانته ما عندك اي شي معناهه لازم تخترع قصة خيالية صارت بيك (( اتألف )) وانته بكيفك بعد . واما بخصوص انه انته ضايج من الوضع والوضع بالعراق مو زين فهاي احوال واوضاع العراقيين كلهم يعني راح يكلولك منو بالعراق مرتاح حتى انته اتكول ما مرتاح يعني بصريح العبارة اله مار بمأساة ومخاطر كبيرة يله يقبلوك اليو ان واذا لا بس مجرد خوف من المستقبل يجوز يقبلوك كلاجئ بس سفرك الله اعلم متدري شوكت وبكل الحالات هم راح يتأخر السفر حتى اذا مار بتهديد ومخاطر يعني اكو ناس صار الهم سنتين وثلاثة واربعة وبعهم ما مسافرين فيرادلك دراسة جبيرة قبل لا تقدم على هذه الخطوة والرأي الاول والاخير الك لان انته صاحب الشأن

للعلم التقديم مو شرط راح يصير على امريكا لا اي دولة همه يختاروهه الك بكيفهم وفق ضوابط

واي سؤال ثاني بالخدمة

اخوك
ابو نور / سوريا

[dentismart]

السلام عليكم
شكرا جزيلا اخي ابو نور على ردك
ملخص الكلام انه اني لازم اولا اطلع من العراق يعني اجي لسوريا مثلا
بسوريا ممكن ادبر سكن بسعر مناسب من جماعة عرف
السؤال هو
اولا هل الاوضاع بسوريا هسه تسمح انه احد يجي
وثانيا ممكن الكي شغل بسوريا ( يعني شلون اعيش فترة انتظار المعاملة )
وشكد المدة تقريبا اللي تطول بيها المعاملة
ارجو الرد من اي شخص يعرف اي معلومة
وتسلمون على مجهوداتكم

[ريحـــانه]

اخي الكريم

الله يساعدك و يساعد كل العراقيين الي ديتحملون العذاب اليومي بالعراق و يا رب يفرجها عليهم

بالنسبه للتقديم على الاي او ام مثل متفضل اخي العزيز اسامه و ما قصر وياك لازم تكون مشتغل مع الاميركان او عندك اقارب درجه اولى مشتغلين مع الاميركان و اتصور انت ذكرت هذا الخيار محذوف اذن انت معناها متكدر تقدم

نجي على الجيار الثاني و هو التقديم عن طريق الامم المتحده تقدر تقدم من اي دوله مجاوره سوريا الاردن تركيا لبنان

بس لازم تدرس و تحسب الشغله زين لان حط ابالك الشغله ينرادلها فلوس و صبر
بالنسبه لسوريا ابدا ما انصحك لان سوريا من قبل جان الوضع بيها تعبان يعني قبل الاحداث الحاليه جانت المعاملات من سوريا تمشي كلش بطيء عاد هسه و متعرف باجر شنو ممكن يصير

الاردن نوعا ما احسن بس غاليه جدا يعني انت اذا على اليو ان حط ابالك سنتين الى سنتين و نص يله تصير شغلتك و ينرالك كمعدل عيشه تحت الوسط دفتر لكل سنه يعني بين دفترين الى دفترين و نص و الشغل بيها جدا صعب لان لازم تصريح عمل اله اذا عندك صديق ابن حلال او اقارب يشغلوك يعني لازم عرف

تركيا اسرع شي بالمعاملات و ارتب شي بس عامل اللغه مشكله و هم غاليه ما سوينا شي و الشغل ماكو

اخي العزيز اني اسفه اذا سببت لك نوع من الاحباط بس اني اريد اخليك بالصوره الواقعيه و اي سؤال اضافي احنا حاضرين اني و كل الاعضاء متاكده ما يقصرون

الله يسهل امورك انشاء الله

[اسامة الهاشمي]

السلام عليكم

اتفق ويه الاخت مهندسة من ناحية انه سوريا مو امان هسه ومنعرف الباجر شراح يصير والله الي يستر لان هسه احنه وضعنه بسوريا كلش مرتبك وباي لحظة العراقيين مستعدين يطفرون فما انصحك انه تبني حياتك وامالك بمكان متأمن بيه شراح يصير هل يومين والله يسترنه بالفعل الاردن احسن لكن بالنسبة للاسعر نفس الشي تقريباً اختي المهندسة ما كو فرق عن سوريلا غير القليل جداً .
وتركيا احسن واسرع باللجؤ بس المشكلة غالية كلش واللغة شغلتهه صعبة .
اما بالنسبة للشغل فشغلنه بسوريا كلش تعبان الى ابعد الحدود وفوك متصورون يعني اني رأيي انه اتفكر بعمان اذا اتحس نفسك لازم تخطي هاي الخطوة لان عمان اسرع وحالياً اأمن ونفس اسعار العراق بالضبط للعلم بسوريا الاسعار نفس العراق بالضبط
اخي الدكتور الكريم . اذا عزمت فتوكل .
واذا اتحس نفسك تكدر اتقاوم بالعراق وتعيش على هذا الوضع المزري ابقى .
لان هنا بدول الجوار لازم تتعب وتعاني فد سنه سنتين اذا مو اكثر وبالبداية راح اتحس انه انته حياتك اندمرت هذا اذا جان ظرفك المادي حسب متحجي يا دوب وما عندك الشي الي يعينك وتكول شورطني بهاي السالفة لو ميت بالعراق احسن اليه بس بعدين من اترتب امرك وتستقر اتكول الف الحمد لله والشكر خطيت هاي الخطوة اذا مو علمودك ف علمود اطفالك ومستقبلهم
اتوكل على الله واحنه حاضرين لاي مساعدة نكدر عليه اذا الله راد .


ابو نور / سوريا

[dr1985]

اخوية اني طبيب اسنان واعتقد يمكن انت لو دفعتي لو الدفعة الي قبلي بسنة وهسة اني بامريكا

راسلني عالخاص حتى انطيك ايميلي داسولفلك عالمعاناة

تحياتي

[dentismart]

السلام عليكم
dr1985
هذا ايميلي بس ضيفني وكوللي اي وقت يناسبك حتى نسولف
dentismart@yahoo.com

[جوكر مغترب]

اخوية وحبيبي الاسنان كلش صعبة معادلتها بكل دول العالم وخصوصا امريكا
وامريكا ينرادلها انتظار ف اذا عندك قابلة تنتظر ف امريكا خيار جيد واذا ماعندك قابلية تنتظر طلعلك فيزا ل فرنسا او فلندا قدم لجوء هناك وابلش حياتك
تحاتي