السلام عليكم ورحمة الله وبركاته
اخواني الجايين واللي انشاء الله راح يجون بعد ما قريت تجارب بعض الاعضاء مع المنظمات واللي قلقني واثار حفيظتي قررت انزل هذا الموضوع حتى تكونون على بينة وارجو ان تعرفون انو هذا الموضوع يخص جميع اللاجئين في امريكا. وهذا من ضمن اول تسعين يوم من الوصول
ابدأ بسم الله الرحمن الرحيم
[/color]
ان يستلمكم موضف من المنظمة في المطار اذا كان يحجي عربي كان بها اذا مكدر لازم يجيب وياه مترجم او على الاقل بالتلفون وان يستقبلكم بصورة باسمة ويرحب بيكم ويحسسكم بالالفة
ان تكون بانتظاركم وجبة اكل مطبوخة وجاهزة تاكلوها بالعافية اول ما تجون من السفر
ان يوجهوكم عن كيفية استخدام منافع الشقة مثل الكهرباء والطباخ والتبريد او التدفئة والشبايك والحمام
ان ياخذوكم يشوفوكم اللوندري واشلون تستعملوه
اشلون تطلبون المساعدة في حالة الطوارئ اذا احتجتوها وهذا راح يكون عن طريق اكو مكان مخصص مثل التلفون المباشر وهوة مثل الدكمة يكون دائما بجانب مكتب المجمع السكني مرتبط بصورة مباشرة بال 911وان يكون في البيت خضرة كافية ومواد طبخ كافية وخبز على الاقل لاربع ايام
ان ينطوكم البوكت مني او مصرف الجيب خلال اربع وعشرين ساعة وان توقعون على اوراق الفود ستامب وتخويل المعلومات
ان ياخذوكم للسوشيل خلال خمس ايام عمل من وصولكم
اذا كان شخص مريض فلونزة او بالنسبة الكبار السن يجب ان ياخذوكم خلال ثلاث ايام من الوصول الى الطوارئ في المستشفى
يزودوكم بالاكل او بالكاش تقريبا اسبوعيا الى ان يجي الفود ستامب وياخذوكم للسوك اذا السوك بعيد او متندلوه
ان يسوولكم باص اوينتيشن او درس توجيهي عن كيفية ركوب الباص ( هاي اذا اكو باصات تمر بمدينتكم) ويطلع وياكم شخص اما من المنظمة او شخص متطوع (حتى يترجم واذا اللاجئ يحجي انكليزي ماكو داعي) ويطلع ايضا شخص من دائرة النقل والمواصلات ياخذكم بجولة تنقلية يدليكم اشلون تركبون الباصات حتى توصلون للسوك والمستشفى اللقاحات والمستشفى العام او اي مكان اخر تحتاجوه
ان يسوولكم اورينتيشن او درس توجيهي وتفهيمي عن حقوقكم وواجباتكم في امريكا وايضا عن العمل والقرض الخ وهذا لازم يصير باقرب فرصة اول شهر ويشرحولكم عن البرامج وانتوا على يا برنامج راح تكونون
ياخذوكم الى مستشفى اللقاحات بالموعد الاول اللي يكون دائما فحوصات والموعد الثاني اللي راح تاخذون بيه اللقاحات
ياخذوكم الى اول موعد فحص في المستشفى العام
بعد استخراج السوشيل نمبر للكبار في السن والمرضى يجب التقديم لهم على التقاعد واخذهم الى جميع المواعيد الخاصة بهذا التقديم
للاطفال دون الخمس سنوات ان يقدمولهم على برنامج اسمة ويك وهذا ينطي حليب وخضرة وجبن وبيض وعصير وكورن فلكس وبقوليات للاطفال
التسجيل في المدارس لكل من دون 18 سنة وهاي يرادلهة قبل التسجيل لقاحات للاطفال لازم هم همة ياخذوهم وبعدين لازم يقدمولكم على الغداء المجاني للطلاب في المدارس
تسجيلكم في صفوف تعليم اللغة الانكليزية
تنصيب حساب الكهرباء باسمكم خلال ثلاثة ايام من الوصول طبعا بوجودكم
توقيع عقد الشقة خلال ثلاثة ايام من الوصول طبعا لازم انتوا وشخص من المنظمة ترحون سوية
اكو هواية ناس تعاني من الكأبة الشديدة بعد الوصول لازم المنظمة تتصل بالجهات الخاصة وتسويلكم موعد
للنساء اللي ميردون اطفال تحويلهم وعمل موعد واخذهم للعيادة لكي تعمل تحديد نسل
اما بالنسبة لجديد الفود ستامب هذا يعتمد على المنظمة بس اني اجدد الفود ستامب والحمد لله حاليا بلشت بعمل دورس تعليمية عن كيفية تجديد الفود ستامب وانطي لكل شخص نسخة بايدة حتى يعرف شلون يحافظ عليه
الكم حق طلب ملفكم وتدقيقة والسؤال عن اي نقطة متعرفولهة في اي وقت وايضا يمكنكم اخذ نسخة منة
الكم الحق بان يوفرولكم مترجم ليس في نطاق المنظمة فقط بل في كل مكان عدا مرات الامتحانات مثل اجازة السوق اكو يقبلون واكو ميقبلون واذا ما كو مترجم الكم حق ان تشتكون على مزود الخدمة لانه بند من بنود حقوق الانسان في الدستور الامريكي ويعتبر خرق لحقوق الانسان
وكافي بس اذا تذكرت شي ارجع اكتبة وانشاء الله اخوان تستفادون من هذا الموضوع
وطبعا ما اريد اكولكم لان انتوا اهلها عن الاسلوب الحلو لان يطلع الحية من الزاغور مثل منكول اخوان هذي حقوقكم واني بالخدمة[/size]
