من نفس الموضوع ((ابو قمر
خي العزيز هذا كل ما قدمه الاخ العزيز ابو قمر عن المدينة فورت ورث في ولاية تكساس
مساء الورد ...
طبعا مثل وعدتكم راح اكمللكم تفاصيل السفر وما بعد السفر ..
اليوم راح اكمللكم الرحلة اضافة راح احجيلكم على الاستقبال والمنزل الجديد ... وانشاء الله الموضوع القادم راح اكتبلكم عن تفاصيل الخدمات والمساعدات الي بولايتنا ...
طبعا اخر شي وصلنا للانطلاق من مطار بودابست .. طبعا كان هناك ترانزيت 6 ساعات وزاد ساعتين اضافيتين .. يعني 8 ساعات ترانزيت .. حالة صارت بالمطار من المفيد ان نذكرها .. كان في بنت صغيرة بعمر قمر لعائلة عراقية ويانه وكانت درجة حرارتها مرتفعة .. فطلبنا من موظف الاي او ام دكتور وبالفعل خلال دقائق كان اكو دكتور وممرضة فحصوا الطفلة ... يعني من هذا نستنتج ان اي حالة مرضية تصير وياكم ممكن استدعاء الدكتور بالمطار ويقوم باللازم ..
رحلتنا لنيويورك كانت على شركة دلتا .. طبعا الجنط الكبار متشوفوهم الى بالنقطة الاخيرة من السفر أو اذا كان اكو مبيت فراح تستلمون جنطكم .. طلعنا لطيارة الدلتا كانت طيارة كبيرة جدا واغلب الركاب امريكان .. وطبعا الابتسامة والوجوه المبتسمة بكل مكان .. حتى كان ويانا فريق تزلج امريكي بنات وكانوا وياهم ميدالياتهم وفرحانين والكل يباركلهم وفرحان بيهم حتى الطيار القة تحية الهم ( ذكروني بأغنية جيب الكاس جيبه , طبعا هسه هما منتخبنا الوطني ) ، المهم الرحلة جدا طويلة 9 ساعات بالجو .. يتخللها وجبتين اكل وبصراحة الاكل جيد وطيب .. والمشروبات مفتوحة شتريد تشرب اشرب .. المهم نمنا وكعدنا ونمنا وكعدنا واكلنا وشربنا وبعدها الطيارة بالجو .. المهم اخر شي وصلنا لمطار
نيو يورك الساعة خمسة العصر .. نزلنا بمطار جون كندي وكان اكو 3 موظفين اي او ام اثنين منهم عرب ( تونسي ومصري ) ، طبعا هنا راح تبدي مرحلة جديدة وراح تشوف الحياة السريعة على اصلها .. بمجرد وصولنا اخذونا لمكتب وصيحوا اسمائنا واخذوا الكياس وكلشي عالسريع حتى من تسألهم ميجاوبوك .. سريع سريع .. بعدين بصمنا بصمة على ورقة وراها بدقائق انطونا وثيقة مهمة جدا والي هيا I-94 والي تسمى عدنا الوايت كارت والي هيا سند وجودك بالولايات المتحدة الامريكية وكل واحد سلموا اياها بيده وانطونا اجياسنا واخذونا لكاونتر بيه شرطة وكمبيوتر واخذنا بصمات لكل الاصابع على نفس الجهاز الي اخذنا بيه بيوم مثابلة المحلفين .. وبعدها انفصلوا عنا ثلاث عوائل الي كانت وجهتهم الى مشكن ( شيكاغو ) لين طيارتهم جاهزة .. واحنا اخذونا استلمنا الجنط وبحركة سريعة الى باب المطار وعافونا كلولنا انتظروا الباص الي راح يجي يا خذكم .. وبالفعل ورا 10 دقايق اجه الباص وبيه واحد صيني جنه جيت لي .. حملنا الجنط بالباص واتجهنا للفندق .. طبعا الجو بنيورك جمااااااااااااااد مو طبيعي .. وصلنا الفندق ابو السيارة شمرلنا جنطنا بالشارع وكللنا هذا الفندق ونزلوا جنطكم للمستودع .. طبعا اتعاونا عليها ونزلناها للمستودع طبعا اكو سكة متحركة مجرد تحط الجنطة هيا تنزل .. بعدها دخلنا للفندق .. انطونا كل واحد وجبة اكل وعلبة كولا .. ومفتاح غرفته . وطبعا المفتاح على شكل بطاقة ذكية يعني ماكو مفتاح حديد . الفندق كان لا بأس بيه .. دافي جدا مي حار وبارد وتلفزيون .. الاكل مكان طيب رغم ان الغلاف الي عليه مرتب ومبين المطعم مشهور بس مكان طيب .. المهم اخذنا حمام وعلى وجهنا نمنا من التعب .. المهم كعدت الساعة خمسة الصبح اتصلت بالوفس جوه وسئلته يمتا نطلع كلي الموظف يتصل بيك كتله اوكي .. فتحت الابتوب كل بلكي اكو انترنت وبالفعل كان اكو انترنت .. وكتبتلكم من الفندق واني دا اكتبلكم اندك الباب بقوة وبسرعة شلون الشرطة من يجون على واحد فراري .. فتحت الباب لكيت الموظف يكلي شدتسوي هنا يله انزل السيارة راح تعوفك اتاخرت عالطيارة .. كتله شنو هالحجي غير تخابرنا قبله بوكت اني عندي طفلة ميصير هذا الاسلوب .. المهم بدلت ونزلت عالسريع وحملنا الجنط بالسيارة والسايق هم صيني ومستعجل .. طبعا انفصلنا العوائل كلها بس احنا بقينا والصوماليين .. المهم اخذنا وشمر جنطنا اباب المطار وعافنا ومشى .. طبعا الي ميعرف انكليزي شغلته تعبانة .. لين من نيورك وصاعد لازم تخدم نفسك بنفسك .. موظف الاي او ام مموجود دخلت الجنط للمطار وكعدت عائلتي وكعدت الصوماليين ليرحون يضيعون ودورت على الموظف ملكيته لكيت موظف شركة دلتا انطيته اسمي ورقم الرحلة سحبلي تذاكري وكلي ودي الجنط عالوزن .. طبعا جان اكو اكثر من عائلة ايرانيين وروس وهم عراقيين .. اخذت الجنط ورحت للوزن طبعا موظفيهم بغاية الروعة .. البنية استلمتهم مني ورحبت بينا وانطتني ارقام الجنط وكلتلي اتوجه لقسم التفتيش .. وهذا هو التفتيش الوحيد الي تفتشناه .. طبعا كل جنط الهاند باك والجاكيت والحذاء توضع بصندوق بلاستيك وتدخل السونار واني وزوجتي ندخل من على بوابة التفتيش طبعا اني مرنت البوابة فرجعني مرة ثانية وهم مرنت فتشني تفتيش عادي وكلي اوكف على جنب طبعا بعد مطلعت الاغراض من السونار فتشوها يدويا الابتوب فحصها على جهاز من غير ميشغلها .. الجنط الهاند باك مسحوها بقطعة قماش وفحصوها .. وزوجتي فتشتها شرطية وتفتيش جدا عادي .. بعدها كلولي استلم جنطك كلشي تمام ومبتسمين بوجهك وكله سير .. مو تعال لك ..
بعدها قرينا رقم الرحلة على الشاشة ورحنا بعدها للبوابة الخاصة برحلتنا .. طبعا موظف الاي او ام ماكو .. وراها بنص ساعة اجه الموظف ولكانه كل واحد بمكانه .. المهم طلعنا للطيارة .. مدة الرحلة ساعتين من نيويورك الى اتلانتا .. الرحلة يتخللها بسكوت ومشروب فقط .. وصلنا اتلانتا وكانت اله طيارة ثانية .. انتقلنا من بوابتنا الى بوابة رحلتنا الثانية عن طريق قطار وصلنا للبوابة قبل موعد الاقلاع ب 45 دقيقة .. دخلنا الطيارة والرحلة ايضا كانت حدود الساعتين الا عشر دقايق من مطار اتلانتا الى مطار دالاس فورت وورث وايضا الرحلة تتضمن بسكوت + مشروب ..
المهم وصلنا مطار دالاس فورت وورث نزلنا وحدنا .. ادور على موظف دائرة التوطين ماكو .. سئلت الشرطي منين اكدر اخذ جنطي .. دلاني الرجال وصلت يم الجنط .. وراها بشوية اجت بنية كلتلي حضرتك ابو قمر كلها نعم عرفت عن نفسها وكالت اني جايه اخذك لبيتك الجديد .. استلمنا الجنط واخذناها لسيارتها وطبعا كوه يله وسعت لين عدنا 6 جنط .. واختنا للبيت بالطريق ظلينا نسولف عن الشغل وعن الخدمات وهالسوالف .. وصلنا البيت ..
مواصفات المنزل ..
البيت يتكون من غرفة وصالون وحمام مع غرفة ملابس .. البيت طابق ارضي .. المنطقة جدا حلوة ومرتبة بس بيها اغلبية سود بس لي هسه مشفت اي مشكلة كل واحد بحالة .. ايجار البيت 345 دولار بالشهر عدا المي والكهرباء .
الاثاث : سرير نفرين مع فراش وجراجف نظيفة .. سرير طفلة مع جراجف ( طبعا هذا الي لين قمر ممتعودة تنام على سرير محصور ) ، ميز وثلاث كراسي من ضمنهم كرسي مال اطفال ، قنفة وميز صغير عدد 2 ، المطبخ بيه ثلاجة طباخ كهربائي مع فرن ، غسالة صحون .. ادوات مطبخ صحون كووومة , 5 ملاعض ..3 شوكات ، سكينة وحدة ، جدرية تيفال + طاوة تيفال ..
الاكل : مسواك يكفي لمدة عشر ايام .. تمن .. دجاج .. لحم مثروم .. 16 بيضة .. جيلكان حليب + جيلكان عصير .. بطل زيت ، علبة شاي 110 ظرف ، كيلو سكر ، اسبكتي ومعكرونه .. ست طماطات ، خيارتين صغار ، وخيارتين كبار .. اربع بصلات كبار .. 3 روس ثوم .. جيس بتيته جبير .. كيلو فاصوليا خضرا .. كيلو كرع .. راس خس .. كيلو جزر .. علبة زبد وعلبة جبن .. ويمكن اكو كم شغلة نسيتها .. بس الاكل زين بس المخضر قليل اضطريت انه اشتري .
بعدها الموظفة عافتنا ودلتنا على كم بيت عراقيين وكالت باجر الصبح يجي ياخذكم واحد من منظمتنا حتى تسوون معاملة السوشيل سكيورتي ...
طبعا الموضوع الجاي راح اكملكم شصار ويانه .. شنو حجي العراقيين .. ماهي الفائدة من وجود عراقي قريب منك .. تفاصيل المساعدات الي افتهمناها من المنظمة ..
تحياتي
اخوكم ابو قمر
صباح الورد ...
طبعا هنا الصباح بامريكا يختلف بين لاجىء ولاجىء .. يعني اكو جماعة صبحهم الساعة 12 الظهر واكو جماعة صبحهم الساعة سبعة الصبح ....
اليوم راح اكمللكم النظرة الاولى للبيت الجديد المجتمع الجديد ... اخر شي وصلنا لمن وصلتنا موظفة وكالة التوطين للبيت .. طبعا اول مدخلنا للبيت بدت الموظفة تشرحلنا شلون نستخدم المي الحار وشلون نشغل الاير كوندشن كانه احنا جايين من الصومال .. بعد الارشادات المهمة من قبل الموظفة .. كالت اكو هوايا عوائل عراقية قريبة منكم بنفس المجمع واتصلت باحد الاخوان العراقيين وبالفعل خلال دقيقتين كان عدنا .. بعدها كالت اني راح اروح واعوفكم هسه لين انتم تعبانين وبكرا الصبح يجيكم موظف ثاني ياخذكم حتى تقدمون معاملة السوشيل سكيورتي .. الموظفة راحت .. وبلشنا احنا اسئلة باخونا العراقي .. الرجل كان اله وجهة نضره الخاصة الي هبطت معنوياتنا .. المنطقة مو زينة والناس تشرب بالشارع والمنظمة كلاوجية وجذابين وووو ... استقبال حافل واحنا جسمنا منعنع من الطيارات .. المهم اخذني الرجل بجولة فرجني السوبر ماركتات القريبة والطرق طبعا بسيارته الخاصة ..
طبعا ام قمر حيل انقهرت وضاجت واني بديت اشتغل
طبعا ام قمر حيل انقهرت وضاجت واني بديت اشتغل مشجع كل شوية اكللها يمعودة هذا حلمنا واتحقق والي يريد يوصل لازم يتعب ويصبر وكلها كم شهر ونغير البيت ونشتغل ومن هالسوالف ...
هنا اريد انطيكم نصيحة جدا مهمة .. العراقيين بالغربة وجودهم جدا ايجابي بنواحي وسلبي ببعض النواحي .. واهم شي لا تعتمدون على كلام شخص واحد لين كل انسان واله تفكيرة ووجهة نضره وراح احجيلكم مفصلا عن وضع العراقيين وشنو الي ممكن نستفاده من وجود عراقيين او عرب جنبنا ...
طبعا الاخ الي حجيتلكم عنه ابد مقصر ويانه ثاني يوم اخذنا للاسواق وودانا للمحلات الي بيها ذبح اسلامي وعلمنا شلون نوصللها والرجل كلي اي شي تحتاجه السيارة موجودة بس كلي واحنا حاضرين .. ايضا حجالي على التفاصيل الي صارت وياه من قبل المنظمة وعلى الفود ستامب شلون تستخدمه وعلى الويك مال الاطفال وعلى التلقيحات .. وعلى هواية اشياء خدمنا بيها هوايا الله يجزيه كل الخير .. طبعا مو هو بس هوايا عوائل عراقية اجت زارتنا وعرضت خدماتها بكل روح محبة واخوة ...
طبعا راح تلاحظون اختلاف الاراء والافكار من شخص الا اخر .. يعني اني ثاني يوم سئلت عائلتين عراقيتين كالوا المنطقة عادية ومشفنا شي بيها تروح بطريقك وترجع بطريقك اتسلم عليهم ويسلمون عليك لا تسوي وياهم علاقات ولا تئذيهم راح تعيش مرتاح .. طبعا الي سئلتهم ايضا صارلهم 3 اشهر واكو 6 اشهر .. واني صارلي لي اليوم حوالي 10 ايام مشفت اي شي سلبي بالمنطقة لحد الان بالعكس جدا هادئة وبشكل عام بالليل محد يطلع لين الشعب الامريكي كله عنده سيارات والي يطلع يطلع بسيارته لين المولات والسوبر ماركتات الضخمة تبعد شي اربعة او خمسة كيلو عن المجمعات السكنية .. اذن نستنتج من الكلام الي فات ما ياتي :
1- وجود عوائل عراقية او عربية بمنطقتك مفيد جدا للاستفادة منهم بالطرق بالتسوق بالقوانين باستخدام المواصلات .. وقد يكون مضر اذا تقتنع بوجهة نضر اي انسان دون دراسة لوجهة النظر المعينة . يعني بالمختصر المفيد اخذ الي يفيد وعوفك من اليم يفيدك .
2- قد تستفاد من امتلاكهم لسيارات وللعلم كل العوائل العراقية السبعة تملك سيارات !!!! .. فممكن يوصلوك بيها لمكانات معينة للضرورة طبعا هما الي يعرضون عليك هذا الشيء .. ومن الافضل ان تطلب مساعدتهم في الضرورة فقط .
3- العلاقات القوية او المفرطة مع العوائل العربية او العراقية تكون سلبية جدا عليك كمواطن جديد في بلد جديد .. يعني مراح تتعلم لغة بسرعة لين راح تتعامل وياهم بلغتك العربية وكانك بعدك بالعراق او بدول الجوار .. واني اعرف اشخاص صارلهم اكثر من 3 اشهر وميعرفون كلمة انكليزي .. لين كل تعاملهم ومشاويرهم مع عراقيين او عرب .. وهذا الشيء جدا سلبي .. عدا انه التوسع بالعلاقات راح يجيبلك مشاكل انت في غنى عنها وانتوا تعرفون راح تبلش الكالات وفلانة كالت وفلان حجة وفلانة هيج لبست .. الافضل ان تكون علاقة طيبة علاقة تعاون ومحبة ضمن حدود .. وحاول ان يكون اغلب الوقت الي تستهلكه في يومك هو للاندماج بالمجتمع الجديد .
نجي لموضوع جدا جدا مهم وهو فرص العمل والعراقيين الموجودين هل اشتغلوا او لا .. واني متاكد هسه كلكم بانتظار معلومات عن هذا الشي وبالخصوص حمودي ابن زيونه ..
من خلال الفترة الي قضيتها في ولاية تكساس ودا اتكلم عن ولايتي ومن خلال كلامي واستفساري من الكثيرين عرب وامريكان ومهاجرين ومنظمة توصلت الى النتائج التالي :
1- الشغل موجود وبكثرة واغلب الناس هنا دتشتغل اكثر من شفت .. بس للي يريد يشتغل ..
2- هناك ازمة اقتصادية موجودة صحيح بس مو بالشكل الي وصللنا عن طريق الاعلام .. وراح انطيكم بعض الامثلة على توفر العمل .. بالنسبة للعراقيين الموجودين هنا الي اتعرفت عليهم لحد الان 3 عوائل .. طبعا كلهم متجاوزت فترة وجودهم 6 اشهر .. بالنسبة لولايتنا السوشيل والفود ستامب وهوية العمل تاخذ من شهر الا شهر ونص حتى تكمل ولهذا انت شهر او شهر ونص راح تكعد متكدر اتسوي شي .. نرجع لموضوعنا هاي العوائل الثلاثة بيها عائلة وحدة يعمل رب الاسرة بوظيفة واليوم بلش بوظيفة ثانية .. طبعا البارحة سويت وياه حوار واحنا ناخذ التلقيحات لين هو كان ويانا .. الرجل بلش يدور على شغل في اسبوعين !! اسبوعين فقط وجد عمل بشركة اتصالات تي ان تي وب 9 دولارات بالساعة مع فرصة الاوفر تايم والعمل يوم السبت هو بلش بالشل من قبل اسبوع ومثل محجالي انه فترة بحثه عن العمل مطولتا كثر من اسبوعين .. وبنفس الوقت حاليا وجد عمل ثاني بارت تايم كدلفري بين مدينة دالاس وفورت وورث 3 ساعات من الساعة 9 الصبح لحد الساعة 12 الظهر .. ودوامه الاساسي من الساعة اربعة العصر للساعة 12 بالليل .. فمثل محجى وياي الرجل كال انه اني دورت شغل باسبوعين وجدت وظيفتين وانه الشغل موجود للي يريد يشتغل .. بس ضروري ان تكون انكليزيتك مقبولة .. مقبولة يعني مو بالضروري تكون ممتازة المهم انك تفتهم وتفهم المقابيلك .. بالنسبة للعائلتين الباقيتين فهما بلشوا يدورون شغل من شي شهر بجدية .. واحد من هذولا الاثنين ولا طقة بالانكليزي .. والمصيبة يكول ديخابروني على تلفوني وما اعرف احجي وياهم ... اتخيلو المأسات .. والشخص الاخر بدا يقدم باكثر من مكتب بس الرجل من النوع الي ( العراقي ميشتغل شما كان ) هاي عبارة منقولة من على لسانه .. بالنسبة للي ميعرف انكليزي صارله اسبوعين معروض عليه العمل كفيتر بمحل صيانة سيارات لشخص عربي ودازله حوالي 6 مسجات ومخابره اكثر من اربع مرات طبعا راواني المسجات والبارحة انعرض العمل عليه بمحل فيتر اخر .. وبعد حوار بيني وبينه تقريبا اقتنع ان يشتغل حاليا .. لي حد ميقوي انكلزيته او تجيه فرصة احسن .. الشخصين قدموا على عمل بشركة لحوم وهاي القبول بيها مقبول مئة بالمئة وانشاء الله الاسبوع هاذ ا والي جاي راح اسمعكم اخبار حلوة عنهم ... ايضا من الاعمال الي انعرضت على احدهم العمل بمطار دالاس تحميل حقائب او صناديق الساعة ب 9 دولارات .. طبعا لحد الان لم اسمع باجر اقل من تسع دولارات ..
3- طبعا بالنسبة لغير العرب فالي اتعرفت عليهم بالمنظمة كلهم مهاجرين ومصارلهم اربع سنين او خمسة هنا بامريكا .. وحاليا عدهم بيوت وسيارات ووظائف جيدة .. على الرغم من ان نسبة الذكاء لديهم جدا ضعيفة .
طولت عليكم اليوم طبعا كان المفروض احجيلكم عالمساعدات المقدمة من المنظمة .. بس شفت موضوع العمل اهم وبالموضوع القادم راح احجيلكم عن المنظمة والمساعدات ...
طبعا ارفقتلكم صور من فيزة امريكا ... وثيقة الوايت كارت او I94 ..وصور المسكن
مساء الورد ...
طبعا اني اسف اتاخرت عليكم يوم اضافي لين البارحة عطلة بالايبري .. طبعا مثل محجيتلكم بالموضوع السابق راح احجيلكم اليوم عن المساعدات الي راح ناخذها شكد وشنو السكجول مالتها ... وطبعا المساعدات بولاية تكساس متشابهة بالكمية لكن تحتلف بالالية او السكجول ..
اني المنظمة مالتي اسمها REFUGEE SERVICES OF TEXAS طبعا هيا الها ثلاث افرع في دالاس وفي العاصمة اوستن وفي فورت وورث .. طبعا هاي المنظمة تنطوي تحت منظمات اكبر الي هيا (CHURCH WHORLD SERVICE CWS و EPISCOPAL MIGRATION MINISTRIES EMM و LUTERAN IMMIGRATION AND REFUGEE SERVICES LIRS ) طبعا هذولا المؤسسات الثلاثة موجودة بأوستن ومنظتنا تقوم برفع التقارير وتنطيهم احداثياتنا يعني بمعنى اخر هم المسئولين عنه بس منظمتنا تقوم بعمل الوسيط .
طبعا المنظمة تكون مسئولة عن عدة اشياء منها :
1- أستقبالك من المطار وتوصيلك الى السكن وتوفير السكن والاثاث المناسب والاكل في المنزل طبعا هذا في حالة عدم وجود كفيل الك .
2- التسجيل في السوشيل سكيورتي نمبر لكل افراد العائلة بعد بيوم من وصولك الى الولايات المتحدة من خلال اخذك للدائرة المسئولة عن الموضوع ومساعدتك في التقديم ( دائما اذكر كلمة مساعدة ليش ؟؟؟ لأن المنظمة مراح تبقة وياك للأبد ولهذا انت حاول من تروح وياهم تفهم كلشي الاسلوب اسم المكتب مكان المكتب .. لان بعد اشهر انت راح تسوي كلشي بيدك يعني موت كعد مثل الاطرش بالزفة ظل أسئل واستفسر واتعلم )
3- تسجيل كافة افراد العائلة في دائرة الفود ستامب واستخراج الفود ستامب لك ( طبعا أكو مفهوم خاطىء عن الفود ستامب الاكثرية يتخيلون ان المنظمة هي الي تنطيك الفوت ستامب طبعا هذا شي غير صحيح دائرة الفوت ستامب منفصلة كليا عن منظمات التوطين وما الها علاقة بالكاش مني او الايجار او المساعدات الي تاخذها من المنظمة .. وممكن انت بنفسك تروح تقدم عالفوت ستامب .. وكل 3 اشهر انت تروح تسوي مقابلة بدائرة الفوت ستامب حتى يعرفون دتكفيك لو لا او انت اشتغلت لو لا طبعا الفوت ستامب يظل مستمر الى ان تجد عمل براتب معين اتصور هنا بتكساس يتجاوز 2400 دولار )
4- اخذك الى المركز الصحي او المستشفى لتسجيلك وعمل القاحات الضرورية جدا في وجودك في الولايات المتحدة وفي استخراج الكرين كارت فيما بعد ( طبعا اليم عنده دفتر لقاحات ومعامل اللقاحات مو من حقه يقدم عالكرين كارت .. لمنظمة تاخذك للمستشفى زيارتين وبعدها انت لازم تعلم نفسك شلون توصل وشلون تتعامل هناك بالمستشفى ولهذا لازم تتعلم من الزيارتين الاولتين )
5- المنظمة تقوم بتوفير دروس تعليم اللغة الانكليزية لك .. طبعا الدروس مهما جدا للي انكليزيتهم ضعيفة . اهم اهم اهم شي في امريكا هو اللغة .. يعني اذا تغلبت على اللغة ففرصك تكون مساوية لفرص الامريكي .. وللعلم اني كنت ماخذ نظرة كبيرة عن الولايات المتحدة .. بس من وصلت ومن خلال هاي الاسبوعين اكتشفت من خلال الناس الي التقيت فيهم ان امريكا معتمدة اعتماد كلي على الكفاءات وان الفئة الاغلب من الشعب فارغة من الناحية العلمية او حتى الثقافية محتارين بالراب والركص والفوت بول الامريكي وقسم منهم اذا تسأله عن اوباما فمراح يعرفه او اذا تسئله منو انشتاين يكلك لاعب كرة سله بفريق ميامي .. طبعا هذا مو معناه انه امريكا مبيعا ناس مثقفة ومتعلمة لا فيها ناس جدا مثقفة ومتعلمة وبيها علماء ايضا وبيها اطفال معلوماتهم اكبر من عدنا احنا الدارسين بس انا دا احجي عن الاغلبية من الي شفتهم خلال هاي الاسبوعين .. وللعلم هوايا منهم موظفين بمكانات جيدة جدا لكن ما يتسمون بالذكاء او ميكونون لماحين فقط مهنيين وهذا شفته بموظفين التوطين نفسهم .. يعني اني لو لغتي قوية مثلهم كان اني بايام اكون البص مالتهم وهوايا اخطاء صارت وياي من قبلهم بالابلكيشن والتقديم كنت اصلحها الهم .
6- المنظمة تكون مسئولة عن تعليمك كيفيه استخدام الباصات الخاصة بالنقل ومعرفة الطرق وكلشي يسهل عليك التنقل .
7- المنظمة تكون مسئولة في وضعك باحد برامج التوطين ... وهيا الي راح توصلك الشيكات .. كما تساعدك المنظمة بتسجيل اسمك بدائرة لكهرباء وفي توقيع وفهم عقد الاجار والحقوق الي عليك والي الك وطبعا كلها تكون مكتوبة في العقد وضروري جدا ان تقرا العقد بنفسك وتفهمه ... كما تساعدك المنظمة في الاجابة عن كل الاسئلة الي ادور ابالك حول البلد الجديد
8- المنظمة تساعدك في تقديم اسمك لدوائر خاصة لايجاد عمل لك ( مو معناتها انك تكعد تنتظرهم لازم انت ادور
على عمل لين فعاليتهم جدا قليلة ولحد الان ملكو شغل لاحد كل الي اشتغلوا هما الي قدموا بنفسهم )
طبعا هاي تقريبا الاشياء الرئيسية الي تتقدملك من المنظمة ... يعني باختصار المنظمة تساعدك حتى تعتمد على نفسك .. يعني بمثال ابسط هيا متسوق السيارة عنك لا هيا تكعد يمك وادليك وانت لازم تسوق وتتعب .. يعني هما مراح يسوون شي عنك هما راح يساعدوك فقط ..
نجي للمساعدات ... بالنسبة لمنظمتنا فالمساعدات المادية الي ناخذها من خلالها 8 أشهر .. وبالنسبة للمساعدات المعنوية هي 6 اشهر ... شلون .. يعني علاقتي بالمنظمة تستمر لمدة 6 اشهر بعدها تنقطع علاقتي بيهم .. فقط استلم الشيكات من عدهم .. بس يبقى ملفي يمهم لغاية ما اخذ الجنسية واي تغيير بعنواني او رقم تلفوني لازم اخبرهم عنه ..
اني بالنسبة الي حطوني في برنامج RCA والي هو اتصور ريفيوج كاش اسيستنس ... طبعا هنا بتكساس اكو برنامجين اساسيين الي هما ال RCA و الماجك كراند .. والماجك كراند يكون اغلبه للعوائل بس اني الماجك كراند متوقف عدهم هسه فحولوني لل RCA والي هو خاص بالسينكل .... شنو هي الية البرنامج .. بالنسبة النا احنا 3 افراد تكون كالتالي :
البرنامج ينقسم الى مرحلتين 4 أشهر و 4 أشهر ثانية ...
1 – اول اربع اشهر راح نستلم بالشهر الواحد ثلاث شيكات الاول 300$ الثاني 300$ والثالث 156 $ يعني بالشهر 756 دولار طبعا لازم ادفع منهم الايجار وفاتورة الكهرباء والمي والتراش .
2 – ثاني اربعة اشهر في حالة عدم حصولي على عمل يتجاز راتبه 2400 $ راح استلم بكل شهر 319.25 $ يعني ثلاثمية وتسعة عشر دولار وخمسة وعشرين سنت لمدة اربعة اشهر ..
طبعا بعد متخلص الثماني اشهر واذا ملكيت شغل او راتبك كان ضعيف فانت تكدر تقدم على الولفر او التنف طبعا انت تقدم المنظمة تعلمكم المكان وكيفية التقديم وانت تروح ...
يعني بمثل حالتي اول اربعة اشهر راح يزيد عندي حوالي 256 دولار بالشهر وثاني اربعة اشهر لازم اكمل حوالي
150 $ يعني تطلع يك حساب ... بس بكل الاحوال انت راح تضمن انه ايجارك واكلك ومصرف جيبك 8 اشهر مؤمن مية بالمية .. راح تكولون شلون مصرف جيبك ؟؟؟؟؟ راح اكللكم اكو فقرة مهمة نسيناها الي هيا هدية الترحيب من الحكومة الفدرالية اول متوصل والي هيا كالتالي ..
كل شخص ياخذ 450 دولار لمرة واحدة هدية من الحكومة الفدرالية هاي فور وصولك بس مينطوك اياها ينطوها للمنظمة وهي الي تقسمها وتنطيك الباقي .. بالنسبة الي كانت كالتالي :
طبعا اني كعدت وياهم وحاسبتهم حسبة مصلاوي عالسنت شصؤفتوا وشكد بقى والحلو البيهم هما ميضوجون او ينزعجون من اسئلتك المهم :
اني 3 افراد يعني 450 * 3 = 1350 ... هما انطوني منهم 25 $ لكل شخص بوكت مني المجموع 75 دولار وانطوني ايضا شيك ب 950 دولار وكلولي تسوي منه شيكين للايجار للشهر الثالث والرابع افضل واضمن الك وانت استلم شيكات البرنامج مالتك وضمهم .. المهم الي استلمته منهم 1025 $ يبقى 325 $ طبعا خوما يثولوها عليه !! المهم الموظفة كالت احنا اشترينالك اثاث واكل وشامبو ومكيف مال شعر .. كتلها قنفة مستعملة وكراسي وميز وسرير طفل وسرير كبير ب 325 $ وهاي مستعملة ( طبعا غراض البيت مستعملة بس السرير الكبير يجيبوه جديد بنايلونه ) كتلها هذولا مستعملين الناس تشمرهم وحتى الي يشتريهم يشتريهم من البزار بكم دولار بس .. كلتلي بابا انت فاهم غلط .. احنا مشترينالك هاي الاشياء هاي الاشياء تجينا تبرعات وهيا فري الي اشتريناه السرير والفراش مالته وهذا حدود ال 100 $ والاكل وادوات المطبخ والشامبو والصابون وذولا همين تقريبا يطلعون بال100$ وكله مسجل يمنى واي شي يبقى من فلوسك بنهاية الشهر الثالث نتحاسب وتاخذه .. يعني ماكو شي اسمه بوووك او تغليس كلشي مسجل .. بس انت كون مفتح وطلب بحقوقك .. يعني صير امريكي مو عراقي ...
طولتها عليكم بس هاي تقريبا كل تفاصيل المساعدات ... بالنسبة لرتات الباص فحسب مفتهمت منهم هاي مجانيا كل فترة اخذ منهم وجدا عادي ..
اكو ملا حظة مهمة صارت وياي ( صار موقف من المنظمة خلاني عصبت عليهم ولمن اجه الموظف الصبح للبيت هجيته وكتله اني اريد اغير المنظمة لين انتم هامليني ومن هالسوالف المهم هو راح ووراه بساعه اجتي مديرة المنظمة نفسها للبيت ... طبعا طبت وسلمت عليها ونزلت طلعت كل الي بكلبي ... بس طبعا بموضوعية .. كتلها انتوا تعاملون العراقيين بشكل اخر .. كلتلي انت شفت لعراقيين الي وياك كلهم عدهم سيارة او سيارتين وكلهم عدهم موبايلات واكثر من موبايل والي عنده خط ارضي وانترنت وبلي ستيشن ... يعني شكل غريب للاجئين .. ومع هذا احنا نحاول انساعدهم بقدر المستطاع واذا صار تقصير من عدنه فلان العدد كبير ودنحاول انسق الاوقات .. وبعدين انت افضللا هواية من غيرك من الاجئين انت لغتك الانكليزية جيدة واحسن بهواية من الي يجون ميعرفون ولا كلمة بالانكليزي ولا حتى يعرفون يستخدمون التواليت ..( طبعا دتحجي عالاجئين الي يجون من شرق اسيا ومن افريقيا ) .. المهم حبيتا وصلكم فكرة انه المنظمة مراح تساعدك بكلشي لازم انت تبلش من اول يوم تعتمد على نفسك وهو افضل الك ولمستقبلك .. وخليك دائما اطالب بحقك ولتستحي لين هاي حقوقك واستفسر عن اي شي يخطر ابالك منهم فهذا هو شغلهم ويستلمون رواتب على اساسه ..
تحياتي ومستعد لاي سؤال او استفسار من قبلكم ...
اخوكم ابو قمر
مساء الورد ...
طبعا أول متوصل للولايات المتحدة .. تبلش بكثير من الاجراءات وكان هانت مولود جديد .. طبعا انت بمجرد وصولك الى اول مطار أمريكي راح تبدي أول معاملة وهي أستخراج أهم وثيقة الك وهي الوثيقة الي تثبت وجودك بالولايات المتحدة والي من حلالها تكدر تتنقل براحتك يعني نكدر نحجي عليها انها اقامتك وهويتك والي هيا وثيقة I-94 أو مثل ميسميها بعض الاخوة الوايت كارت .. هاي الاجراءات تتم بأول مطار امريكي وراح تستغرق حدود النصف ساعة الى ساعة طبعا انتم مراح تسوون شي الموظفين هما الي راح يشتغلون بالاجراءات راح يطلبون بصمة اصبعك انت وافراد عائلتك .. وبعدها تستلم ال I-94 .. ومباشرة بعد استلامها تروح تسوي دخول وبصمات جميع الاصابع بكاونترات الشرطة الي بالمطار .. هذا الاجراء يعتبر أول اجراء الك بالولايات المتحدة ..
بعد وصولك الى منزلك الجديد بولايتك المحددة الك .. اكيد راح ترتاح يوم او يومين بعدها لازم تسوي معاملة جديدة ومهمة وهي معاملة السوشيل سكيورتي نمبر .. طبعا هواية حجوا عنه اخوتي واني اكتفي بان اقو لان بدون هذا الرقم متكدر تشتغل او تعمل اي معاملة او اي شي بامريكا .. يعني فترة استخراج هذا الرقم انت بس كاعد تنتظر متكدر تسوي اي شي .. هذا الرقم جدا جدا مهم وبصورة اوضح الاشخاص بامريكا عبارة عن ارقام سوشيل .. يعني هذا الرقم اهم من اسمك لان انت ممكن تغير اسمك باي وقت تريد بس السوشيل يبقى وياك للابد .. طبعا اجراءات التقديم جدا سهلة لأن راح يكون وياك موظف من وكالة التوطين الخاصة بك .. راح يسئلك الموظف عن اسمك ومواليدك وراح يطلب منك بطاقة I-94 وبدها بدقائق راح يطلب منك التوقيع انت واهل بيتك وينطيق ورقة ان انت مقدم على السوشيل .. وراح يجيك السوشيل من خلال دائرة التوطين الخاصة بك .. وهاي الاجراءات تختلف بالوقت من شخص الى اخر يعني اكو ناس استلموا السوشيل ب 20 يوم واكو 40 يوم وهاي الفروقات بالوقت تشمل افراد العائلة نفسها يعني ممكن ابنك يستلم الرقم قبلك وزوجتك بعدك وهكذااا .
المعاملة الثالثة او الجراء الثالث المهم ايضا وهو استخراج الفوت ستامب والمديكير الخاص بك وبافراد العائلة .. طبعا هذا الجراء ايضا يتم بثاني يوم من وصولك .. طبعا انت مراح تروح لمكتب استخراج الفوت ستامب انت مجرد توقع على اوراق التقديم للمدي كير والفود ستامب والمنظمة هيا الي راخ تقدمها وبعد وصولها راح تسلمك اياها .. ممكن بعض الولايات البطاقة والمدي كير وحتى السوشيل يجيك بالبريد على عنوانك البريدي ..طبعا وقت استخراج الفوت ستامب أيضا يختلف من عائلة لعائلة يعني هنا اكو ناس استلمت الفود ستامب ب 20 يوم واكو بشهر واكو بشهرين .. هذا الحجي خاص بولاية تكساس وبمدينة فورت وورث ودالاس .. ممكن الولايات الاخرة تختلف بالزمن .. بس بجميع الاحوال من راح توصل البطاقة راح تنشحن بمبلغ مالي يقيم بال يوم وصولك للولايات المتحدة يعني الي يتاخر شهرين يجيه بالفوت ستامب مبلغ لشهرين .. يعني ميضيع شي عليك .. بس المصرف بالبداية انت لازم تقتصد بالاكل لين الفلوس الي تنصرف مترجع لحد متشتغل .. فالاقتصاد اول الايام وبالذات بالاكل لين انت كلها كم يوم راح تستلم الفود ستامب وتشتري كل الي بنفسك فمو صعب انه تقتصد كم يوم وتحافظ على فلوسك وانت ببلد غريب عليك ..
المعاملة او الاجراء الرابع وهو مهم ايضا جدا الك ولأولادك ولأستخراج الكرين كارت بالمستقبل .. وهيا الفحوصات الطبية واللقاحات .. واتذكر استاذنا الرائع سلاما للعراق قد شرح هذا الموضوع منذ زمن ليس بالعيد ومع هذا نرجع نذكر بيه .. طبعا بعد ايام من وصولك راح ياخذك موظف التوطين الى المستشفى الخاصة بعمل الفحوصات والقاحات الخاصة بك .. طبعا اكو ناس اخذوها ورا شهر من وصولها .. واكو ورا شهرين او ثلاثة .. واكو ورا اسبوع مثل مصار ويانه طبعا راح تروح للمستشفى ويطلبون منك استمارة موجودة بحقيبة الاي او ام الخاصة بك ( طبعا اني اول يوم بدلت الحقيبة بحقيبة اخرة يعني ماكو داعي ياهو الي يشوفني يعرف اني مهاجر او لاجىء جديد ) بعد مياخذ الاستمارة وياخذ طبعا I-94 راح يسويلك ملف يمهم وراح يسويلك كارت طبعا راح ارفقلكم صورته بالموضوع .. هذا الكارت بيه جدول اللقاحات .. طبعا اول لقاح او اول اجراء صحي تسوي هو فحص ال TP يعني فحص السل .. طبعا راح يحقنوك بجرثومة سل مضعفة حتى يشوفون استجابة جسم ومقدرته على التصدي للفايروس .. طبعا الكل ياخذ هذا المصل تحت الجلد باليد وغالبا متكون اليد اليسرى .. ويطلبون حضورك بعد ثلاثة الى اربعة ايام .. طبعا ياخذون منك ثلاث عينات دم طبعا لكل افراد الاسرة صغير او كبير .. وايضا بالنسبة للزوجة او المرأة المتزوجة ياخذون عينة ادرار للتاكد من انها غير حامل .. وراح يطلبون منك بالمرة القادمة ان تجيب وياك عينة من الخروج طبعا راح ينطوك الاشياء الخاصة بهذا الموضوع .. كل هاي الاجراءات تصير باول زيارة الك للمستشفى اضافة الى كشف سريري نبضات قلب ، ضغط دم وفحوصات اخرى .. وراح ينطوك موعد للقدوم وغالبا ميكون اربع ايام او ثلاثة ايام .. طبعا بزيارتك الثانية أول شي يسووه هو فحص ايدك والتاكد من خلوك من Tp .. طبعا هذا يبين من خلال وجود ورم بمنطقة زرع العينة اذا كان اكو ورم معناتها عندك هذا الفيروس واذا كانت ايدك سليمة معناتها ماكو شي .. طبعا اريد اوضح شغلة مهمة افتهمتها من الدكتور الامريكي نفسه طبعا دردشت وياه بالانكليزي طبعا اخوكم مكان متصور عنده هاي الامكانيات بس شو صرت احجي مثلهم مع خربطة احيانا .. المهم كثير من الناس يطلع عدهم هذا الفيروس ا والي يسموه TP الغير فعال .. يمنا بالعراق يسموه السل الناعم .. او السل النائم .. وهذا مو فد شي خطر بالعكس جدا طبيعي .. وبالذات بالاطفال اغلب اطفالنا العراقيين يطلع عدهم هذا الشي لأم ملقحين القاح الثلاثي PCG والي غالبا ميسبب وجود فيروس السل النائم او الغير فعال يعني الحالة الموجودة بيه هيا حالة طبيعية مرتقت لأن تصبح مرض .. ولهذا بمجرد اكتشاف هذا الشي راح يحولوك لمستشفى حتى ياخذون اشاعة لصدرك ويوقعوك على عدة اوراق الي تتضمن معالجتك بالمجان .. وطبعا ورا متاخذ الاشعة بأسبوعين راح هما يجوك للبيت وياخذوك للمستشفى ويشوفك الدكتور فإذا كانت الحالة غير مرضية وهيا نسبة كبيرة توصل 99 % وحتى لو كانت الحالة مرضية لا سامح الله وهي حالة نادرة جدا راح يتم معالجتك .. واتصور العلاج هيا حبوب تاخذها لمدة 9 اشهر او اقل ما اعرف بالضبط .. عموما انا بنتي قمر طلع عدها الTp الغير فعال ولهذا اني هوايا لحيت عالطبيب وطمني الرجل بانه غالبية الاطفال تصير عدهم هاي الحالة بسبب اللقاح الثلاثي الي ماخذيه بسوريا او بالعراق .. وعموما اني يوم 19 راح يكون الي موعد يم الدكتور وانشاء الله الموضوع جدا طبيعي وراح ابلغكم بالتفاصيل ..
نجي للاجراءات الاخرى الي انت تقوم بيها وهيا ضرورية جدا بحياتك بامريكا .. ومنها واهمها شهادة السوق او مثل ميسموها هنا Driver license وطبعا هذا الاجراء راح احجيلكم عنه بالتفصيل الممل وحتى راح اجيبلكم صور من مركز التقديم ومركز الاختبار النظري وحتى من ساحة اختبار العملي .. لين اخوكم ديدرس بالكتاب الخاص باستخراج شهادة السوق وللعلم اني من سوريا نزلت الكتب بمساعدت اخوية الرائع زاك .. وقريت بيه قبل لا اوصل لامريكا شوفوا شلون خلك .. المهم هذا الموضوع راح احجيلكم عنه بالتفصيل .. بس ازيدكم بكم معلومة والي هيا كالعادة راح يكون امتحان نظري وعملي وبالانكليزي يعني مو مثل كالفورنيا او مشيكان ماكو لغة عربية .. بس الشي الحلو لجماعة تكساس هنا رسوم الاجازة فقط 24 دولار حسب ما افتهمته من اخوانه هنا الي استخرجوا الاجازة ... يعني مثل اورغين اسعارنا رخيصة ...
تحياتي للجميع .. ومستعد لاي سؤال يدور بافكاركم ....
اخوكم ابو قمر
تكســــــــــــــــــــــاس
تحية حب ...
شكرا لك كلماتكم الطيبة شكرا صديقي واخي الغالي تايكر على كلماتك ... وشكرا لعاشق تراب العراق وتدلل حبي عيوني الك .. وشكر ايضا لصاحب الكلمات الرائعة استاذي ابو دجلة والكتاب عندي حجمة ميكا وشوية اذا اتحب دزلي ايميلك عالخاص ادزلك اياه .. واني هسه ادور على موقع الدائرة بتكساس بوقتها اخوية زاك انطاني اياه واذا لكيته راح انزله عالعام .. وشكرا لسالي سعد الي دائما سباقة بالجواب والكلمات الطيبة .. شكرا لاخويا الغالي البحار ... وشكرا لسبورت اوكي لكلماتك الطيبة .. وشكر خاص ليوجد امل الي دائما يدعمنا ويقوينا بكلماته الرائعة ربنا لا يحرمني منكم ... وشكر لكل الاعضاء الي ديرون بكلماتهم الجميلة والي ديسئلون ...
جماعة من الاخوان سئلوني على التامين الصحي .. طبعا التامين الصحي للطفل مستمر .. وللام والاب 8 اشهر .. العيون واسنان ماكو هنا بتكساس .... وطبعا راح اكتب موضوع بالتفصيل فيما يخص هذا الموضوع ..
احد الاخوان سئل عن تامين السيارة او الي يعة بالانشورزم ... هنا التامين نوعين ون وي وتو وي ... الغالبية هما ون وي .. والسيارة العادية تدفع عليها حدود ال 30 دولار بالشهر تقريبا وماكو احد لحد الان متجاوز هذا الرقم ..
اكو جماعة ايضا سئلو عن موضوع المساعدات وراح اعيد واشرح الموضوع بالتفصيل الممل انشاء الله المرة الجاية تدلل اخوية هاشم وشكرا على كلماتك الحلوة ...
بالنسبة للمساعدات .. اخوانا الي يظل يدور مساعدات ميصير براسة خير ويظل فكر طول عمره .. المساعدات شلون مجان محسوبة على كد عيشتك فيت يعني دوب تكفيك حتى لو كانت عشر اسنين .. حبايبي انتم من توصلون لامريكا وصلتم لبلد الفرص .. وصدكوني اي شغلة تشتغلوها راح تظمن حياتكم وعيشة رائعة .. وكم سنة تشترون بيت .. والشغل موجود بس هيا توفيق من رب العالمين .. البارحة جيرانة العراقي الي حجيتلكم عليهم .. اشتغل بمحل فيتر ومبدئيا دياخذ 350 بالاسبوع وكاش يعني ماكو ضريبه عليه .. يعني الاسبوع ايجار مال شهر ... وهو مرتاح حيل بشغلة .. الشغل انشاء الله متوفر وتبقى كلها توفيق من رب العالمين .. بالنسبة الي دا ارتب بالرزيوما وباجر رايح للجامعة راح اسئللكم وانشاء الله اجيبلكم تفاصيل حلوة ... وهسه اني ما اكدر اقدم على اي شغل لين لا سوشيل ولا تصريح عمل عندي لسه دا انتظر يوصلوني ... بس دا اقرا لامتحان السواقة .. ويوميا مسوين كعدة اني وام قمر بالبيت حوالي خمس ساعات نتذكر ايام الدراسة ناشرين الملازم والكتب الالكترونية عالابتوب ودنقوي انكليزيتنا . وعدنة مترجم ناطق وهذا جدا مفيد الي يجيبة وياه ينطينه لفظ الكلمات الصعبة لين راح تشوفون الفظ هنا غير الي اتعلمنا ...
تحياتي واخوكم حاضر لاسئلتكم يا ورورد ...
بس اهم شي اني اول مدخلت دا ادور على نتيجة مقابلة اخوية عكعوك وشيبو يا ريت الي عنده معلومه يكتبلي هنا بهذا الموضوع بالي يمهم ...
تحياتي اخوكم ابو قمر
مساء الورد ..
طبعا نزولا على رغبة وسئوال اخوية ابو دجلة واخوان كثيرين دزولي على الخاص بشان الكتيب الخاص بامتحان السوق لمدينة تكساس راح انزللكم النك وهو بيه الكتاب وللعلم الفصول الرابع لل12 هيا المهمة وبالنسبة لاخوانا بغير ولايات فموضوع الكتيب جدا سهل وراح اشرح شلون تلكوه ..
بالنسبة لولاية تكساس ..
http://www.txdps.state.tx.us/ftp/forms/DLhandbook.pdfلغير ولايات ...
تدخل عالسيرج مال الياهو تكتب اول شي اسم ولايتك بالانكليزي وبعدها تكتب
كلمتين بس
driver's license
وبعدها راح تختار اول موقع بالنتيجة مال سيرج غالبا ميكون اول موقع تدخل في داخله وتبحث عن الملف الي هو غالبا ميكون بصيغة بي دي اف ...
والي تصعب عليه يدزلي عالخاص اسم ولايته واني ادورله اياه ..
تحياتي
اخوكم ابو قمر
مساء الورد ..
طبعا اليوم راح تشوفوني بحلتي الجديدة بدووون نجووووم ... معلية اريد نجاتي مااااااااااااا ... هههههه .. طبعا دا امزح وياكم .. ومليون مبروك للوردة ورد ولفالكون الرائع .. وللرومانسي الجميل ابن بغداد الحبيبة التألق ..
اليوم حاولت بهذا الموضوع ان اقدم نصائح وليس معلومات .. فسفرنا الى بلد جديد في النصف الثاني من الكرة الارضية يحتاج الى معلومات ونصائح لكي تشد من عزيمتنا .. لان النجاح في اي شي مرتبط بالروح المعنوية التي تقوده .
دائما نلاحظ بأن كلام اغلب الاجئين او المغتربين في أمريكا يتحدث عن صعوبة الأيام .. والاحباط الذي قد يحدث لكثير منهم مما يؤثر على بقيى حياته وقد يتخلل هذا الاحباط قرارات مستعجلة قد تدمر مستقبل عائلة بالكامل ..
المهم ان تفق على شيء مهم .. وهو انك كرب عائلة والحديث للعوائل لانها الاصعب في تحمل ظروف الحياة الجديدة او الصعوبات التي قد تتلاقاها في الايام الولى بالذات , فانت ككرب اسرة قبل سفرك وقرارك ببدأ حياة جديدة لابد ان تتسم بشيئين مهمين جدا .. الاول : ان لا تكون انانيا في التفكير وان يكون تفكيرك منطقي وعلمي وليس عاطفي لأنك المسئول الأول والاخير عن هذه العائلة .. الثاني : أن يكون تفكيرك قبل كل شي في المستقبل ومستقبل افراد اسرتك وخاصة الأطفال منهم ... غالبا الاحباط في الايام الاولى يستمر مع الاجىء الى وقت طويل جدا .. فتلاحظه دائما متشائم حتى لو تحسنت ظروفه .. وحتى لو وجد عمل دائما تجده محبط .. اذن من الافضل تجاوز الاحباط من اول لحظة وصولك .. والاحباط وطريقة تجاوزه سوف اذكره بالتفصيل بعد كم سطر من الظروري اكتبها للاخوان المنتظرين السفر او المترددين بالسفر ..
أمريكا ... الحياة الصعبة .. الازمة الاقتصادية .. المساعدات المحدودة .. التامين الصحي الذي لايستمر للكبار ..اللغة والتفاهم مع المجتمع الجديد .. الخوف على الصغار مما تراه بالتلفزيون من افلام قد تعكس عادات منافية لما تربينا عليه او قد تنافي ديننا وقائدنا .. هذه الكلمات تدور في ذهن جميع المتردين بالسفر ..
لنتكلم بموضوعية ، ولنفكر بموضوعية ، والتفكير بموضوعية يعني ان نرى ايجابيات الموضوع مع سلبياته أي قبل ان ننظر للجانب المظلم يجب ان نرى الشمس في البداية وبعدها نقارنها بالخيارات المتاحة لنا وبعدها يأي القرار السليم .. اي نقص في هذه الخوارزمية سوف يجعل القرار خاطىء ..
أمريكا حاليا هي اكبر واعظم دولة في العالم من حيث لتطور العلمي من حيث حقوق الانسان من حيث الحرية ومن حيث أمور اخرى كثيرة جدا ( انا هنا لست في إطار الترويج لامريكا .. وانا لست ع سياستها او سياسة بعض قيادتها التي اذت الكثير من الابرياء في لعراق ودول اخرى لست اتكلم عن لسياسة الخارجية والتي الجميع يرفضها حتى اغلب الشعب الامريكي انا اتكلم عن امريكا كنظام بلد داخلي كتعامل حكومة مع شعب ) أذن أمريكا هيا فرصة كبيرة لك كي يصبح اولادك في منزلة رفيعة من العلم والثقافة مما يجلك تضمن مستقبلهم وهذا هو اهم مبتغى لك كرب اسرة ، فالتعليم هنا مجاني واجباري من عمر الخمسة أو السادسة ( حسب الولاية ) التعليم في امريكا يعتبر من افضل اساليب التعليم في العالم ( شاهدت شيء مهم في دراستهم للرياضيات شيء اسمه تحويل الجمل الرياضية الى كلام , وهو شيء نفاقده بالعراق , يجعل الطالب يفهم المعادلة الرياضية ويعبر عنها بكتابته ) اذن انا ضامن دراسة اولادي الابتدائية والمتوسطةوالاعدادية او ما يسمى الهاي سكول مجانا حتى لو لم تكن لي مساعدات وحتى لو لم اعمل , وبعد الهاي سكول اذا كان ابنك متفوق فسيحصل على منح دراسة في الجامعات مجانا ، ولا اتصور ان لجامعات الامريكية في حاجة الى تزكية .. وللعلم مسئلة المنحة ليست شيء صعب انا عرفت هنا اكثر من عراقي حصل على منحة دراسية وبعد ايام ومجرد ان ينتهي العام لدراسي سوف ازف لكم خبر اثنان من اولاد لاجىء عراقي وقد حصلوا على منحة دراسية لأن الان هما الاوائل على اقرانهم رغم انهم وصلوا الولايات المتحدة قبل 6 اشهر فقط ، بصراحة العراقي يمتاز بالذكاء لكن الذكاء في العراق غير موجه او قد يكون موجه بالاتجاه الخاطىء ، لو نتكلم عن الحياة الصعبة في امريكا ، ممكن ان تسئل نفسك عندما سافرت للاردن او سوريا او مصر هل الحياة سهلة ؟؟؟ صدكني امريكا لاتزيد صعوبة حياتها عن هذه الدول وقد تكون اسهل الحاجز الوحيد هو اللغة ولو كسرت هذا الحاجز سوف تعيش حياة قد لم تكن تحلم بها طبعا بعد جهد وتعب لان لاشيء ياتي من غير تعب وجهد ..المساعدات المحدودة , نعم المساعدات محدودة لمدة 8 اشهر , لكن بعدها هل سوف ترمى بالشارع ، الجواب لا .. وسوف اعلل لك الحقيقة رغم اني لا اشجع على التفكير المستمر في المساعدات ففترة اشهر كفيلة بان تقوي لغتك وتجعلك ملم بالمجتمع وبتوفيق من رب العالمين سوف تجد عملا فالاعمال هنا متوفرة اكثر من سوريا والاردن ومصر بكثير اضافة انك عندما تعمل هنا تاخذ اجر يعيشك انت وعائلتك بحياة جيدة وغالبا ما يمكنك ان توفر من هذا الاجر ليس مثل الشرق الاوسط .. بعد الثمانية اشهر ممكن ان يفتح لك ملف في الولفر او التنف اذا كنت لم تجد عمل او كان مرتبك لا يتجاوز 1866 دولار ( حسب ولاية تكساس ) فسوف تحصل على راتب لك ولكل افراد الاسرة قد يسدد 80% من قيمة الأيجار طبعا حسب الولاية وقيمة الايجار .. وبالنسبة لسكن فازيدك معلومة .. اذا كنت من المتشائيم في ايجاد عمل فبأمكانك ان تقدم على بيوت الدولة بعد وصولك بثلاثة اشهر وخلال اربعة اشهر سوف تسكن وتدفع 10% من الاجار .. الحلول كثيرة .. لكن المهم أن اكل البيت وطبخ أم الاولاد لن يتوقف لان الفود ستامب سوف يستمر معك الى ان تجد عمل وبراتب يتجاوز 2400 دولار ( حسب ولاية تكساس ) ، والفود ستامب سيوفر لك جميع انواع الاكل وبمستوى قد يتجاز المستوى الذي كان في دول الجوار او في العراق لبعض الاجئين .
التأمين الصحي لأطفالم مستمر حتى يبلغون 21 سنة ، ولك ولزوجتك 8 اشهر فقط , لكن بمجرد حصولك على عمل سوف تحصل على تامين صحي شامل من صاحب العمل وهذا مضمون مئة بالمئة , اه نسيت الازمة الاقتصادية بصراحة انا لحد الان لم اجد أي ازمة !! قد يكون السبب الى ان بلداننا تعيش في ازمة ازلية ولهذا لم الاحظ الازمة المزعومة , الاكل متوفر واسعاره مقاربة لاسعاره في دولنا ، الدواء متوفر , البنزين ارخص من ما هو في بلدنا النفطي والخدمات متوفرة ، لم الاحظ انطاء الكهرباء بسبب الازمة ، ولم الاحظ متسول بالشارع ( قد تشاهد احيانا اشخاص يمشون بالشارع ووضعهم مزري هؤلاء ليسوا شحاتين هؤلاء مدمنين كحول ومخدرات وهذا وضعهم دائما ) ، ناتي الى العمل بصراحة فرص العمل بالنسبة لولاية تكساس جيدة انا اعرف اربع عوائل عراقية اثنان منهم ارباب اسرهم يعملون واثنان لازالوا يبحثون والكل قد وصل الولايات المتحدة قبل اربعة اشهر , بصراحة ازمة العمل هنا اقل بكثييييير من العراق و دول الجوار اصلا في دول الجوار معدومة ، مسئلة العمل ترتبط بعاملين مهمين هنا بامريكا ،
