منتدى الهجرة واللجوء > مواضيع الحياة العامة في بلاد المهجر (امريكا)

ماهو الكردت ... كيفية بناءه ( موسوعة بناء الكردت في امريكا وكيفية تقويته وتجيكيه )

(1/23) > >>

أبو قمر:
مساء الورد ..
اولا احب ان اعتذر للجميع عن التأخر في كتابة هذا الموضوع لسببين , الأول : ان الموضوع طويل جدا وغريب عن ثقافتنا الاقتصادية ولهذا حاولت ان اسرد الموضوع بصورة مفهومة للجميع باختلاف ثقافاتهم , الثانية : التهاب اللوزتين الي دا اعاني منه صار 3 ايام ومديروح والي انتقل من قمر الى ام قمر وحاليا وصلني السرة , وطبعا اوجه الشكر لكل الردود في المواضيع السابقة والكلمات والمشاعر الطيبة الي تزيد من اصراري على الكتابة واسفى اذا مرديت على الجميع للظروف التي ذكرتها سابقا  ..
طبعا مراح اكتب الموضوع مهم للجميع لاني انشاء الله مراح انزل موضوع ميكون مهم للجميع الي ينتظرون والي في امريكا , ولهذا راح تكون مقدمتي عن موضوع دائما اسئل فيه عالخاص وانا اعرف ان هناك اجابات كثيرة في ارشيف المنتدى لكن ساحاول ان ابسط المفهوم لكل من راسلني ولكل محتار في هذا الموضوع طبعا بعد تجربة شخصية واسئلة وجهتها لامريكان يعملون في هذا الخصوص ,
مقابلة المحلف , موافقة المحلف , قيد الدراسة ، الامنية ... كلمات دائما يتسائل عنها الجميع .. راح اذكر العملية بسرعة حتى ندخل لموضوعنا الاوسع .. المحلف هو شخص عادي جدا يمتلك معلومات جيدا جدا عن اوضاع البلد السياسية والاقتصادية والاجتماعية , اضافة الى قرائته ملفك قبل مقابلتك وتحدديده لنقاط الاستفسار , المقابلة تعتمد على مقدار ثقة المحلف بكلامك وعدم وجود اي معلومات غريبة او غير طبيعية والمحلف راح يكون طول الوقت يسجل فقرات من اجاباتك وينتبه الى اسلوبك  في السرد وبعد المقابلة راح يقارن ما حدث في المقابلة مع ما ذكرت سابقا في المقابلتين الاولى والثانية , ماذا بعد في نفس يوم المقابلة المحلف سوف يضع قراره , موافقة, قيد الدراسة , رفض , فاذا كان كلامك غير منطقي والمحلف على يقين من ان هذا الكلام غير منطقي او هو على يقين بان خدمتك العسكرية في قطاع شارك في ابادة جماعية ( طبعا هو عنده معلومات مسبقة عن كافة الوحدات العسكرية وتاريخها ) راح تنرفض ، اما اذا كان كلامك منطقي وواضح وماكو اي تضارب بيه فانت راح تاخذ الموافقة 100% بنفس يوم المقابلة واذا حضرتكم اتجيكون ورقة النتيجة راح تلكون ان تاريخها نفس تاريخ المقابلة , زين مراح يجيك على معلوماتك لا نهائيا , ولا يروح لمنطقتكم ويسئل ابدا كلامك المنطقي وعدم تضاربك كافي جدا , قيد الدراسة شنو هو ان المحلف غير متاكد من معلومات معينة بقصتك او غير مقتنع فراح يحولها الى قيد الدراسة للتاكد من المعلومات الي انت ذكرتها , يعني ممكن يسئلون عن الشركة الي انت اشتغلت بيها يسئلون عن منطقتك وهكذا واكو جهات معينة اتساعدهم , وبعد متاخذ وقت معين اذا جتي بالتاكيد فراح تاخذ موافقة واذا اجتي بالتشكيك فراح تاخذ رفض , الاستئناف بمجرد طلبك للاستئناف راح يفتح ملفك ويدرس من قبل محلف اخر وتتم عليه نفس اجراءات قيد الدراسة .طيب الامنية , الامنية تبدا مباشرة بعد موافقة المحلف نفس يوم المقابلة وتبلش بارسال البصمات  وغالبا ما يحدد الفحص الطبي وفق لنتيجة الامنية الاولى الي تخص البصمات , يعني بالمختصر حتى ننجح بالموضوع شنسوي /
1-   قبل المقابلة الاولى والثانية تكتب كل ما راح يذكر وتمرره على جميع افراد العائلة وبعد المقابلة تعدل الي كتبته اذا حدث اي تعديل وتحتفظ بهذه الاوراق لمقابلة المحلف للمراجعة . بهذه الحالة راح تكون اجاباتك متطابقة 100% .
2-   عدم الخروج عن السؤال الاجابة على قدر السؤال , لتوضح اي شيء اذا ما طلب التوضيح , ابتعد عن المجادلة فهي اكثر شي مكروه عند الامريكان
3-   ابتعد عن الارتباك وعدم تهويل موضوع مقابلة المحلف , اغلب المحلفين راح يكونون لطاف وتعاملهم راقي ويكونون على قدر كبير من المساعدة , وبعض الاخطاء البسيطة منطقية الحدوث بسبب الارتباك وطول الفترة الي حدثت بيها احداث قصتك عن موعد مقابلتك فمن الطبيعي ان تنسى بعض الاشياء , وحط ابالك ان نسبة الرفض لا تقارن مع نسبة القبول والجميع يعرف هذا الشي فلا دائما تحط نفسك بالنسبة القليلة لان العامل النفسي مهم جدا للمقابلة .
4-   ادعي من الله ان يسهل ماهو خير لك , وصلي استخارة ,, واترك كلشي الى رب الكون فاذا كان خيرك بالسفر فراح تسافر واذا كان خيرك بالبقاء فراح تبقى , فالدعاء من الله بتسهيل ماهو خير لك علاج للقلق الي ممكن تعاني فيه ايام الانتظار .
واتمنى انشاء الله الموفقية للجميع .. نجي لموضوعنا الكردت ؟؟؟  الكردت ككلمة راح تسمعها بشكل كبير في امريكا , لكن الاهم ان لايحدث اي اختلاط بين هذه الكلمة واستخداماتها , اغلب الناس هنا تخلط بين استخدام الفيزة الكرات الشخصية بطريقة الكردت وبين الكردت الشخصي المرتبط بالريبورت وهذا خطأ شائع راح اوضحه هنا , عندما تفتح رصيد شخصي بالبنك البنك راح يعطيط فيزة كارت بأسمك تقوم من خلالها باستخدام حسابك في الشراء او في السحب من الصراف الالي , هذا الكارت عندما تشتري باستخدامه راح يكون عندك اسلوبين للدفع ( كردت أو ديبت ), الكردت معناه في حالة دفعك بهذا الاسلوب البنك راح ينطيك نقاط على حسابك البنكي والبنك متفق وياك سابقا ان انت اذا تجمع نقاط معينة الى جائزة من البنك , يعني اذا جمعت 2000 نقطة يرجعولك 20$ او كيفت كارت وهاي ال 2000 نقطة تحسب بمقدار ما تصرف يعني مثلا كل دولار نقطة , فعندما تصرف 2000 دولار راح يرجعلك 20$ , البنك ليش يشجعك انك تستخدم اسلوب الدفع بالكردت , لان البنك ببساطة يفرض رسوم على المحلات الي تشتري منها باستخدام الكردت يعني البنك ياخذ منهم رسوم معينة حسب فاتورة شرائك , ولهذا بعض المحلات العربية او الستورات الصغيرة متقبل ان تستخدم الكردت بالدفع , اما شنو الفائدة الي تستفادها انت لو دفعت بهذه الطريقة فهي ان الموضوع راح يكون اامن الك لان بهاي الطريقة مراح يحتاج منك ادخال الرقم السري مجرد توقيعك وممكن ان تسترجع الي دفعتها في حالة حدوث اي غلط بالدفع والبنك يرجعلك مبلغك خلال 3 ايام , بما معناه اذا انت شفت اي عملية دفع وانتم مقتنع بيها وكان اسلوب الدفع كردت تخابر البنك ويلغون العملية ويرجعون فلوسك , اما اذا كانت عن طريق الديبت والي تحتاج ان ادخل الرقم السري فمستحيل يكدرون يرجعولك المبلغ .طبعا هذا كل الي ذكرته يخص تعاملك الشخصي ويا البنك وذكرته حتى لا يحدث التباس بينه وبين موضوعنا الرئيسي .
 ومثل معلقت سابقا هذا الامر ما اله اي علاقة بالكريدت ريبورت مالتك , هاي فلوسك وانت حر تصرفها شلون متريد والكردت ريبوت ميهتم بفلوسك الخاصة , اهتمامه هو كيف تستخدم فلوس غيرك واترجعها بوقتها وكيف تعطي الاخرين حقوقهم من اجار وفواتير , اذن المفهوم الاساس الي يبنى عليه الكردت مالتك هو تعاملاتك المالية مع الاخرين وما يهتم نهائيا بتعاملاتك مع اموالك , ببساطة ممكن شخص عادي عندة كردت جدا عالية وممكن واحد مليونير كردته زيرو .
طيب شنو هو الكردت ريبورت والكردت سكور ( التقرير الائتماني , والدرجة الائتمانية ) ببساطة حتى اوضحها للجميع , الريبورت هو عبارة عن معلوماتك الشخصية وتعاملاتك مع جميع الشركات والبنوك ويدرج بيه دفعاتك ومنو يطلبك وشكد دتدفع ويمتى دفعت ويمتى مدفعت واذا عليك قضية مالية وهكذا اما السكور ( الدرجة ) فهي التقييم لهذا الريبورت , يعني بصورة اوضح مثل الامتحان لمن تمتحن ورقة الامتحان بيها اجابتك والمدرس راح يصلح الورقة ينطيك درجة عليها ، فورقة الامتحان هي الريبورت والدرجة هي السكور مع الاختلاف ان الريبورت والسكور يتغيرون بصورة دائميا وفق ما تقوم فيه بحياتك من تعاملات مالية .
بعد المقدمة اكيد صار عند الكثير فكرة واضحة عن الموضوع راح نجي هسه للتفاصيل وما يحدث :
في امريكا هناك ثلاث شركات مختصة باصدار وتعديل التقرير والدرجة مالتك وهذه الشركات لها اتصالات مباشرة مع البنوك وشركات القروض وشركات القروض المنزلي (مورتاج كومبني ) اضافة الى شركات الخدمات من انترنت وكهرباء والمجمعات السكنية ومعارض السيارات الخ ... يعني لها اتصال باي جهة مالية تتعامل معها الشكرات الثلاثة بالاسماء هي :
1-   ترانس يونين  www.transunion.com/
2-   ايكويفيكس www.equifax.com /
3-    ايكسبرين  www.experian.com
هذه الشركات بمجرد حصولك على سوشيل سكيورتي نمبر راح ينفتح ملفك وياهم وكانك انولدت جديد , طيب شنو مكونات هذا التقرير :
1-   المعلومات الشخصية  والي تضم اسمك بجميع صيغه , مواليدك , عنوانك القديم وعنوانك الجديد 
2-   الحسابات الخاصة فيك , من قرض ( مثل قرض الطيارة ) , كردت كارت ، قرض سيارة ، قرض بيت , راح يكون مذكر بيها بالتفصيل شكد قيمة القرض وشكد الدفعة وبيها رزنامة صغيرة اتبين الاشهر الي دافه بيها باللون الاخضر والاشهر الي متاخر بيها بلون اصفر او احمر , ونفس الشي بالنسبة للكردت راح يكون مكتوب بيها مقدار المبلغ الي مسموحلك بالكرات ومقدار كل فاتورة  ودفعاتك واعلى فاتورة واصلتك .
ملاحظة : البعض يقول انا صارلي سنتين ومعندي اي تاخير بفواتيري المي الكهرباء الايجار ليشم عندي درجة زينة ؟؟ ببساطة فواتير الايجار والكهرباء والمي والانترنت وغيرها متزيدلك الكردت سكور , بس بامكانها ان تنزله اذا متلتزم بيها يعني تدفع ماكو تغيير تتاخر بالدفع او متدفعة ادمرلك اياه , الي يساعد بالرفع هو استخدامك لاموال غيرك مثل كردت كارت مال بنك , قرض من بنك ، اثاث بالتقسيط ، سيارة بالتقسيط وهكذا .
3-   الحسابات الي فيها اشكالات مثل فاتورة مدافعها راح تلكه اسم الشركة ورقم الحساب مالك والتاريخ الي مفروض تدفع ومدفعت وهكذا لو كان بنك يطلبك او فاتورة مستشفى او اي مشاكل وهذه هي المصيبة الكبرى .
4-   طلبات نسخ من الريبورت مالتك لبعض الشركات والي تسمه ( Enquiries ) وهاي بيها نوعين نوع ميضر الي هو Soft  واكو نوع يضر الي هو Hard   .
طيب شلون ممكن اطلع على الكردت ريبورت مالتي ؟؟ عندك بالسنة مرى مجانا ان تطلع على الكردت ريبورت مال الشركات الثلاثة بس مشكلته مينطبك الدرجة وهذا الويب سايت للموقع وهو موقع موثوق 100% :
www.annualcreditreport.com/
طيب وين ممكن ان نشوف بعد مواقع الشركات نفسها تنطيك الفرصة ان تطلع على الكردت ريبورت مالتك مع الدرجة ب1$ او مجانا  على ان تكنسل عضويتك قبل مرور اسبوع . اما اذا حبيت تستمر بعضويتك فراح تدفع اشتراك شهري وراح تكون الك خدمات كثيرة منها ان يدزولك  اشعار في حالة اكو أي تعديل على الريبورت مالتك واكو شركات كثيرة عدها اشتراكات تنطيك امتيازات كثيرة .
الدرجة شلون تحسب كل شركة الها طريقتها بالحساب وفق عدد الحسابات الي عندك ووفق تاريخ الدفع مالتك ووفق اذا عندك مشاكل او لا والدرجات تتراوح ما بين 350 الى 850 حسب الشركة كل شركة الها رينج معين غالبا ميكون الكردت متوسط اذا كان ما بين 650- 719 ويكون جيد اذا ما كان بين 720-780 وممتاز اذا اعلى من هذا الشي وهاي الارقام تختلف من شركة الى اخرى كل شركة الها حساباتها , وعلى فكرة الشركات الي تاخذ منها القروض كثير منها متهتم للدرجة لانها عدها طريقتها الخاصة باحتساب الدرجة بعد ميدرسون الريبورت مالتك , يعني مثلا تريد تشتري بيت اكو بنوك تاخذ الريبورت والدرجة لشركة وحدة واكو بنوك تاخذ ل3 شركات وتقسم الدرجة على ثلاثة  واكو تاخذ لل 3 شركات وتاخذ الدرجة الوسط واكو من ياخذ الريبورت فقط وهو يحسب الدرجة وفق برنامج خاص بيه ..معنى الكلام المهم هو ان يكون ريبورتك نضيف وجيد , والمفارقة ا ن ممكن يكون عندك 720 درجة في شركة وشركة اخرى 650 ليش ؟ لان الشركات اللي تتعامل وياها ادز التقرير لشركة وحدة او ممكن شركتين حسب هي ويامن تتعامل , يعني مثلا قرض الطيارة الجهة الي انطتك اياه ادز المعلومات الى شركة وحدة من ضمن الثلاثة معناتها اذا عندك مشكلة راح تكون ظاهرة بشركة واحدة وهكذا باقي التعاملات , طيب شلون ابني الكردت وشنو المفيد والمضر الي ممكن اسويه :
1-   اول وصولك لامريكا وبعد حصولك على السوشيل روح الى احد البنوك الي تنطي سكيور كردت كارت منها بنك اوف امريكا او بنك وليس فاركو , هذا السكيور شنو تروح تنطيهم مبلغ من المال فالنفرض 400 دولار واتكللهم انطوني بيه كردت , شلون يعني هما راح ياخذون هاي الاربعمية تامين وينطوك كردت كارت معبة ب 400 وانت تصرف واتسدد الفواتير , هواي جماعة يخافون من موضوع الكردت كارت خايف من الفوائد , انتم تدفع أي فائدة اذا دفت فاتورتك بوقتها , يعني انت صرفت خلال الشهر 20 دولار واجتك الفاتورة 20 دولار لازم تدفها خلال 3 اسابيع انت تدفعها خلال هاي الفتره 20 دولار ماكو أي فائدة او أي عمولة اضافية ,اما اذا اتاخرت مدفعت فاكو فائدة لازم تدفعها , انت دائما ادفع فاتورتك بوكتها وشهر بعد شهر راح يصير عندك تاريخ , بعد مرور سنة تتصل بالبنك وتطلب منه ينطيك كردت ان سكيور البنك راح يطلب منك معلومات واكيد راح يوافقلك لان عندك تاريخ سنة دفعات جيدة وراح يدزولك شيك بالاربعمية الي دفعته وينطوك كارت جديد بمبلغ هما يحددوه ممكن 1000 وممكن 10000$ حسب التقرير مالتك ووتعاملانتك خلال السنة الفاتت .
2-   لا تحاول تقدم على كردت كارت في الفترة الاولى من وصولك لانك ببساطة راح تنرفض لان معندك تاريخ مالي , وكل مرة تقدم بيها على كردت راح البنك يطلب الريبورت مالتك ويعمل hard Enquiries  وهذا الشي راح ينزل الدرجة مالتك ما بين 2 – 4 نقاط في كل مرة تقدم بيها على كردت كارت , الفترة الاولى معندك غير السكيور كردت كارت .
3-   بعد فترة من وصولك بعض البنوك راح تقدملك عرض على كردت كارت لمساعدتك ببناء الكردت , انت مو تشمر العرض وتخاف وتكول العراقييون يكلولي ديربالك , لا انت افتح العرض وجيك على شغلتين شكد الانول في يعني شكد الاشتراك السنوي اذا كان 35$ وجوه فهذا اوكي  لان هذه الطبيعي للرسوم , بعض الشركات تحاول تستغلك لان معندك هستري فيكون الاشتراك الشهري كبير لتشترك بيها , البعض يكول اشترك بيها سنة سنتين واغلقه وراح اكله هذا اكبر غلط لان غلق اي حساب راح يضر جدا بالدرجة مالتك , من البنوك الي مجربه والي جربتها اني وام قمر كابيتل ون , فاني اوصي بيه لان حاليا هو يمكن الوحيد الي يقدم التسهيلات وغالبا مينطي اشتراك اول سنة مجاني , المهم ان تتاكد من ان العرض هيا بري كواليفي يعني انت موافقين عليك مبدئيا فميحتاج ان يجيكون الكردت ريبورت مالتك من تسجل عضويتك .
4-   الافضل ان دائما يكون عندك من 2 – 3 كردت كارت من بنوك , لا تحاول تضيع وقت ويا كارتات الستورات لان اغلبها ميدز معلومات للريبورت مالتك الى في حالة التاخير بالدفع , 

الموضوع يتبع لان تعبت والموضوع صار طويل راح اكمل النقاط بالموضوع القادم وشنو هيا الطرق الي ترفع الدرجة مالتك بسرعة كبيرة وشنو هي الامور الي تئذي الكردت مالتك , وامور كثيرة تخص هذا الموضوع واسف على الاطالة بس الموضوع يحتاجلها صفحات وانشاء الله نكمل بالموضوع القادم  وراح اكتبلكم بالموضوع القادم اشياء صارت معي اذت الكردت مالتي من دون اي ذنب الي وشلون صلحتها وشلون رفعت الكردت مالتي قبل شرائيي للبيت , واكيد راح انتظر اسئلتكم عالخاص وعلى العام .

تحياتي
أبو قمر
 

جوني جاك:
بارك الله بيك اخي وبانتظار المزيد
جوني جاك

نــــــــــوار تيتــــــو:
كومه  تشكرات للحلو ابو قمر

  مثل كل مرة ...تبدع وتمهر في كتاباتك

تحياتي

mrwan2:
بارك الله فيك اخي ابو قمر ... شكرا لهذا المجهود الرائع

الحديقه:
أبو قمر الله يكويك على فعل الخير بكتابة مواضيعك وأنت تعاني من اللتهاب اللوزتين وماعندك اله العافيه أنت والاهل ويبعدكم عن أي مكروه.

مشكور على هذا الموضوع الي ساردلنه بيه والي أنت مريت أكيد بيه من محلفين والموافقه الامنيه وكيفية بناء الكردت عند وصولك بالسلامه.
بالموفقيه الك لتخصيص وقت لكتابة مواضيع تفيد أخوانك بهذا المنتدى.

أخوك
الحديقه-عمان

تصفح

[0] فهرس الرسائل

[#] الصفحة التالية

الذهاب الى النسخة الكاملة