اخي الغالي .. اولا كل عام وانتم بخير وانشاء الله ينعاد على الجميع وعلى كافة البشر وكافة الديانات بالخير والبركة والمحبة ...
سؤالك ينطرح دائما والاسئلة تختلف حسب التجارب الشخصية , وهنا راح احاول اوضح الك وللاخوان النظام العام او الشي الواقعي بشكل عام , ولايات الشمال تعتبر اقل فرص عمل من ولايات الجنوب اضافة الى ان الاسعار تعتبر اغلى نسبيا من ولايات الجنوب من ناحية اجار اكل كاز فواتير لكن المساعدات في ولايات الشمال تعتبر افضل بكثير من ولايات الجنوب , اما ولايات الجنوب ففرص العمل جيدة مقارنة بولايات الشمال والحياة ارخص من ناحية اجار اكل كاز فواتير لكن المساعدات فيها محدودة مقارنة بولايات الشمال ...
اذن الموضوع موازنة ومثل ما ذكرت سابقا الاقتصاد هنا مدروس من اشخاص مختصين واي عمل اقتصادي ناتج عن دراسة لاناس مختصين يعني مو مثل بلدانه الاقتصاد صاير بالفتاوي الوزير يفتي والموظفين يطبقون بدون اي دراسة او تفكير وانت وحضك يضبط القرار او لا واذا ما طبك نجرب قرار ثاني ..
نرجع لموضوعنا اني انطيتك بشكل عام ويمكن الاخوان الي عايشين في امريكا يوافقوني الرأي ... اجي احددلك بعض الولايات, افضل الولايات من ناحية المساعدات حاليا ولاية مين الي صايرة باقصى الشمال وعليها هجرة عراقية غير طبيعية لكن فرص العمل جدا محدودة , افض الولايات من ناحية العمل ولاية تكساس , الولايات الكبيرة او المزدحمة مثل كالفورنيا نيويورك فلوريدا الاينوي فرص العمل بيها متذبذبة المساعدات متوسطة لكن الحياة غاليا بالخصوص كاليفورنيا ونيو يورك وفلوريدا ولهذا العمل سيكون على قدر الفواتير والاجار وهذا شي نسبي يعتمد على عدد الي يعملون في العائلة الواحدة ..
نصيحتي عن تجربة .. حاول التركيز على العمل فهو نقطة النجاح والتقدم الاعتماد على المساعدات عبارة عن موت بطيء او سجن مؤبد , لان ببساطة السجن يوفر لك الاكل والسكن لكنك لا تستطيع ان تتمتع بالحياة , المساعدات نفس الموضوع بالضيط راح توفرلك الاكل والسكن لكنك لا تستطيع ان تتمتع بالحياة , والحياة في امريكا ليست اكل ومسكن كما في بلدانا العربية تفاصيل الحياة كثيرة جدا ومتع الحياة لا تتوقف عند الاكل والمسكن , الاكل والمسكن هنا يعتبر تحصيل حاصل ليس معجزة او انجاز , كمثال اذا كنت معتمد على مساعدات فراح تفكر مليون مرة حتى تعبي سيارتك بانزين لان معندك فلوس تعبي بيها واذا عندك فمبلغ قليل جدا وهذا يسحبنا انك راح تفكر مليون مرة قبل لا تطلع من البيت وتصرف البانزين واذا كان اكو سفرة لمنطقة جميله راح تفكر مليون مرة قبل الذهاب لان سيولة معندك فاكيد مراج تكدر تئجر فندق او تدفع البانزين او الاكل في مطعم محترم , واذا دخلت لمحل ملابس وشفت شي حبيته مراح تكدر تشتري واذا ردت تشتري فراح تفكر مليون مره , نفس الشي الموبايل والسيارة و و و ... اشياء كثيرة راح تحرم منها ... والاهم من كلشي راح يمر عمرك بدون محققت اي انجاز .. العمر هنا حيل غالي وكل يوم يمر غليك جدا غالي ..
وبهذا دائما اشجع علبى العمل حتى لو كان بسيط اقلها تشعر بقيمة نفسك وتكون حر ومو مقيد او سجين تفعل الي تريده , والاهم من كلشي اذا كعدت بالبيت من دون عمل راح يبدي عندك الهوم سك والي خليك تفكر بالرجوع وراح يوميا تعلك بينك وبين اهلك الي هما هم ضاجوا من السجن الي هما بيه , طبعا ماكو كهوة تروح تكعد عليها لان الشعب هنا كل بالشغل وان وجدت فما بيها الي انت تبحث عنه من اصدقاء وناس تشاقة وتسولف وياهم وذلك ببساطة لانك بعيد عن المجتمع فكيف تكون صداقات وانت كاعد بالبيت .. وهذا الموضوع اعتبره السبب الرئيسي برجوع البعض ..
ببساطة اذا اعتمدت على المساعدات فانت خارج امريكا لانك راح تكون سجين بيتك تاكل وتشرب ايه بس ماكو غيرها كانك كاعد ابيتك بالعراق بس الفرق ان الكهرباء متنكطع واكو خدمات واكو ناس تدفع عنك ولهذا مراح تستمتع بامريكا ولهذا ايضا اغلب الي رجعوا يكلك امريكا تلعب النفس خابصينا بيها ..
اتمنى ان اكون وضحت صورة مهمة الك قبل سفرك ووصولك الى ارض الامان ...
تحياتي
ابو قمر
