ارجو من ذوي الخبره بال iom الدخوووول رجاءاااا رجاءاااااااا

[big show]

السلام عليكم ورمضان كريم عليكم يعود عليكم بالصحه والعافيه والبركه وسلامي لكل الموجودين بهذا المنتدى الغالي علينا والي يمدنا بالتفائل والصبر من خلال مشاركاتكم ومساعداتكم النا بالمعلومات القيمه

اخوان عندي مشكله ارجو من الجميع يجاوبوني عليها الي صايره بي او الي سامع وعنده معلومه صحيحه
اني مقدم على iom بغداد نهايه 2009 وكملت الفحص والمقابله الاولى والثانيه مع هيئه المحلفين وره 90 يوم من مقابله المحلفين يعني اليوم اجاني الايميل المصيبه
الايميل
هو انو اكو اتاج فايل فتحته بي شغلتين الشغله الاولى كتاب دليل الحياة في امريكا والشغله الثانيه ورقه سكنر هم داخليياها وبيها رقم الكيس نمبر مالتي واسمي وجوه مربعين الاول مكتوب كدامه للتأجيل والثاني مكتوب other  اني اجاني اكس مو مطبوع لا اكس شخبطه قلم على المربع الاول
صديقي خابرته كلي اليوم همين اجا ايميل بس حاطيله صح بالمربع الاول
ليييش اني اكس وهو صح مع العلم اني ويا نفس نص الرساله بالضبط ونفس الاتاج مينت الفرق هو اني اكس بالمربع الاول وهو صح

الله يخليكم ساعدوني بالمعلومه الي تعرفوها وياريت الي صايره ويا هاي الحاله يجاوبني وشنو معناتها واني جداا ممنون منكم واسف للاطاله

[(Michael)]

و عليكم السلام
اخي الكريم بالنسبة للتاشير على المربع الاول بx او صح لا يشكل فارق لانه مجرد تأشير لكن اذا كان التاشير على المربع الثاني فهنا المشكلة

[جورجيا]

ماكو اي مصيبه
كل ما هنالك اختلاف بلخطوط
يعني المحلف مالتك يستعمل ال اكس للتاشير على المربعات
والمحلف مال صديقك يحب يستخدم علامه صح
وماكو اي مشكله اخي العزيز
هي مجرد اختيارات شخصيه ابشكل الخط الي يستخدمه المحلف
جورجيا

[عراقي كرادي]

على ما اعتقد اخي العزيز هو موافقة مبدئية من قبل المحلف وتعقبه الاجراءات الادارية والدليل هو دليل الحياة في امريكا , اما التأشيرة ونوعها ماله علاقة مجرد كل شخص يستخدم تاشيرة معينه,

تحياتي

[big show]

اشكركم اخواني على ردودكم واني خابرت اكثر من واحد شفت ولد هو واخو مستلمين همين نفس رسالتي وهمين واحد صح على المربع الاول والاخو اكس على المربع الاول وثنينهم نفس المحلف وبنفس اليوم مقابلين وهمين دايخين كالو ياريت تسأل وتشوف اكو احد مستلم مثلنا ؟؟ معقوله اخوان اثنين ونفس المحلف ونفس اليوم مقابلين وجاييهم واحد اكس على المربع الاول والثاني جاي اكس للعلم الاكس جاي للولد الي اشتغل ويه القوات الامريكيه واخو عمره 21 سنه ومامشتغل واجا الصح
اخوان الي مستلمين نتيجه المحلف نفس نمط الرساله مالتي ؟ يعني ورقه سكنر وبيها شخطه قلم صح على المربع الاول ؟؟ ادري تعبتكم بس انتو تعرفون شنو النفسيه هسه وصرنا كومه هسه دننتظر جواب شافي منكم اخوان الله يخليكم لاتقصرون ويانا حتى لو بكلمه وحده تطيب خاطرنا وتمدنا بالصبر وتزيل القلق الي دنعاني منه وانشاء الله الكل يوم سفركم واكرر شكري للاخوه الي جاوبوني

[ألن في بلاد العجائب]

حبيبي الاكس و الصح متفرق المهم وين التاشير لان ل محلق اله طريقته بالتاشير

تحياتي
ألن

[big show]

اخويه الن التأشير على المربع الاول وهو بس مربعين المربع الفوك مكتوب كدامه تأجيل والثاني مكتوب كدامه other وسطر طويل فارغ
انتو كلكم هيجي شي جاييكم يعني ورقه سكنر ؟؟؟

[جورجيا]

اخي العزيز
رحت بحوشت بلاميل مالتي ولكيت
احنه 3 كيسات وقابلنه ابنفس اليوم
اني
والوالده واختي
اني مئشرلي اب اكس
واختي ايضا اكس
وامي علامه صح
نفس المحلف
نفس اليوم
 
امي ام الصح واختي ام الا اكس ثنيناتهن سافرن ابنفس اليوم
واني اجاني جدول سفر ورجعوني على التجيك من وره العينتين مال كنتاكي الله يقصف اجلهم
اخي لتضلون اتفكرون زايد ابهاي الاشياء الي لا تودي ولا اجيب بس قلق وتعب
هي تنحل انشاء الله
ارجو ان اتكون الفكره وصلت
جورجيا

[big show]

شكرا جورجيا والله تعبتكم اني واشكركم جزيل الشكر نزل مي بارد على قلبي هسه الله يبرد جمييييييييع الكلوب انشاء الله
 

[مس لارا]

بداية كل رمضان وجميع الاخوات والاخوة في هذا المنتدى بالف خير . ويارب يفرج هم كل مهموم . (الله) يسهل الامور عليك

اخ big show  . لأن بصراحة أحنه هم جنه حايرن بعد الايميل الي وصلنه وهي رسالة تأجيل لحين التأكد من أهلية التوطين من قبل (usRAP)

ويا الرساله كان اكو attachfiles عدد اثنين واحد منه كتاب المحلف ومؤشر على المربع الاول بكتابة يد وبحرفx والثاني عن الحياة في امريكا وهو نفس الكتاب الي جنه نشوفه مع الاخوة الي جانو حاضرين الدورة التثقيفية اثناء ماجنه بالمقابلة ...

وجنت مقرره اسال نفس سؤالك الي محيرك .على الاعضاء الي مر عليهم نفس الشيء .. وانته سهلت علينه وياريت الي عنده معلومه متاكد منه على نفس السؤال يجاوبنه وما يقصر ويانه مثل ما تفضلوا بعض الاعضاء وجابوك... ويريحونه  (الله) يريح بالهم يارب.

[big show]

مس لارا اهلا وسهلا بيج واني صح جنت دايخ وما اعرف شنو النتيجه وشنو معناها بس هسه اتأكدت من الاخوه ومن الناس الي ماقصروا ويانا بالجواب انو علامه الاكس او الصح الي تكون شخطه قلم مادام على المربع الاول يعني تأجيل وماكو مشكله مجرد علامه وتره الخطوره بالمربع الثاني لاسامح الله لو رفض جان كتبو بال other سبب الرفض وماينطوج كتاب دليل الحياه في امريكا جان دزولج خطوات اشلون اتقدمين الاستأناف فطمأني وماكو شي وحتى افرحج اكثر صديقي جايه اكس قبل شهرين والبارحه اجنه موافقه امنيه وكالوله انت على جدول السفر ... وانشاء الله اسمي جوه اسمج بالجدول مال السفر بأقرب وقت يا رب ..
طبعا ما ننسه فضل اخوانا هنا الجاوبونا وخاصه جورجيا خطيه دورت علمود تشوفلنا الحل ربي يسهل كل الامور عليكم وتسافرون وتصير سوالف

[مس لارا]

اشكرك أخ big show على ردك .. .. ,ان شاء الله الفرج القريب لك ويارب يفرج هم كل الاعضاء  وأحنه معهم.

[جورجيا]

تتدللون يمعودين
المهم انريح بالكم
حتى رب العالمين يريح بالنه
جورجيا

[ام مهند]

الف الف مبروك روح والهوه بظهرك لا تضل اي شغلة تاكل وتشرب وياك اطمأن وانتظر الامنية والله كريم

[(COBRA)]

اخي  العزيز ........... لايهم  التاشير باكس او صح .......لان اثنينهم موافقه المحلف
 وانشالله خير يكون واطمئن

[big show]

اشكرك خويه كوبرا والشكر الكل الاخوان

صديقي مقابل محلف صاله 92 يوم ولحد هسه لا حس ولانفس شنو الموضوع ؟؟؟؟؟؟

[مدام كوري]

لا تخاف اخويه ماكو شي انشاء الله
ومثل ما كالو  الاخوه الاعضاء ان شاء الله شغلتك ماشيه
بالموفقيه وان شاء الله نسمع اخبارك وانت بامريكا
اتوكل على الله ولتدوخ والي مقسوم الك اتشوفه
اختك ام شمس

[Columbus]

عادي اخويه ماكو فرق بين الاكس والصح المهم هو المربع

بس عندي سؤال الله يخليك شنو الاحرف الي مكتوبه باليد نهاية الصفحة وشكرا لك

[(COBRA)]

المكتوب  بليد  هو اسم المحلف الي قابلكم.......

[Columbus]

المكتوب  بليد  هو اسم المحلف الي قابلكم.......

لا حبيبي كوبرا الي قابلني كتب احرف غير الي كتبها على موافقة اهلي يعني نفس الشخص بحروف غير

[big show]

اشكرج اختي ام شمس وانشاء الله واحد يسمع اخبار الخ بأمريكا
وبالنسبه لسؤال الاخ Columbus  اني جوه مكتوب اسم المحلف الي قابلني لان اول مادخلت عرفني بأسمه ونفسه
ومن قريت الاحرف الجوه لكيت هذا اسمه تحياتي الك اخويه والموفقيه للجميع