السلام عليكم
تحيه طيبه لجميع الاعظاء الطيبين ,,,
طبعاً مثل ما قريتو عنوان الموضوع البارحه قابلت محلفين ,, و ال iom اتصلو بيه و كلولي عندك مقابله يوم الثلاثاء و ردو خابروني يوم الثنين و كالولي مقابلت تاجلت على يوم الخميس ..
رحت يوم الخميس للـ iom وصلت ساعه بالسبعه و ربع و دخلت جوه و بدوو يجون الناس
العدد جنه 7 شباب زكرتيه و 5 عوائل من ضمن العوائل 3 من حبايبنه المسيح .. طبعاً بدت السوالف و الضحك و التحشيش ولا عبالك جايين مقابله محلف و بدينه نتعرف واحد على الثاني اني رقم فايلي 123 و جان اكو واحد رقمه 107 و ولد 122 و العوائل استحيت اسالهم و اكو شباب حموضه ما يتحجون تكول ابوهم اوباما .. المهم كعدنه ننتضر و نسولف و بدووو يدخلون ناس مقابله اولى و ثانيه و قسم بصمات و دخلووو نسوان ثنين كبار و مره و ابنها و ولد شاب استلمو خط الرحله ..
طبعاً معلومه للي يروح للـ iom عن الوان الباجات الي لابس باج اصفر هذا محلفين و الي لابس باج رصاصي هذا مقابله اولى و ثانيه او بصمات و الي لابس اخضر دوره تثقيفيه و الي لابس اللون الاسود هذا ديستلم خط رحله,,,,
نجي للمهم .. طبعا انتضرت اني من ساعه سبعه و ربع لحد ساعه 2:45 يله صاحو اسمي و رحت للمقابله
اول ما دخلت كعدت عرفني عن نفسه و كمنه رفعت ايدي و حلفت .. و بده يسألني الاسئله الاعتياديه الي تجاوب بـ نعم او لا
وراها بده يخش بالغميج على القصه و شباب اوصيكم بالتواريخ لان اني لعب بيه طوبه بالتواريخ يمكن كل تاريخ عاده عليه 11 مره و مو بنفس الوقت يروح يروح و يرجع على التواريخ ..
و الجيش و الخدمه العسكريه مهمه هوايه يلحون بيها و على السلاح وين اتعلمت تستخدم سلاح و عن حزب البعث و علاقتك بالارهابيين و هل تمول ارهابيين ...
طبعاً ما سألوني على الاقامه ولا جاب طاري و الاسئله جانت كلها بعد 2003 و مكانات العمل لحد ما طلعت من العراق .. و سألوني على نوع التهديد و المكان و كم مره اتهددت و اني كتله حته بالتلفون هددووني كلي ليش ما بدلت خطك كتله الارهابي مثل ما بسهوله يوصلك بسهوله يجيب رقمك الجديد .. و سألني منو تتوقع الارهابيين سنه لو شيعه لو اكراد ؟؟ كتله ما اعرف و لح عليه بالسؤال هوايه كتله ما اعرف لان الارهابي يجي ملثم ما تعرفه منين و منو .. و سالني سني لو شيعي ؟؟ كتله سني كال اثبتلي طبعاً ثبتت من اللقب و سالني على اللقب شنو يعني و شرحتله ..
و سالني ليش ما ترجع للعراق الوضع هسه اتحسن بالعراق و احسن من قبل .. طبعاً كتله لا ما اكدر و انطيته الاسباب .. و بعد هوايه اساله روتينيه و من القصه ..
طبعاً الي يروح يقابل يحفظ التواريخ و القصه مالته و يتوكل على الله و ليخاف و حته اذا عصب المحلف او تنرفز او كام يصيح تره مساله عاديه هوه يريدك تتوتر و تتنرفز و يريد يخربطك ...
طبعاً استلام الضرف يوم 10\9\2011 يعني بعد العيد
تحياتي للجميع و اتمنالكم الموفقيه
غزوان الاعظمي
