جمعية اللاجئين المقدمين من دول الخليج

[zalatan1111]

بسم الله الرحمن الرحيم

السلام عليكم جميعا

سويت هذا الموضوع خصيصا للناس المقدمه على هجره ولجوء لامريكا من دول الخليج

اني مقدم على ال IOM  سنة 2009 من دولة خليجيه واني حاليا مقيم بيها

سويت مقابله اولى ومقابله ثانيه ومحلفين وفحص طبي

الفحص الطبي صار 3 اشهر  مضى عليه
وانطونه ورقة حماية مع العلم احنا ما طلبناها .. شنو السالفه ؟؟ ولااا ادري
ممكن احد يساعدني ويكلي شنو الموضوع رجاءا اخوان ترى من 2009 مقدمين 



الي عنده اي معلومه الرجاء يحطها مو بس رجاءا .. رحمه لجدك حطها لان مدا نعرف المن نسأل .. نخابرهم لو مايجاوبون لو يجاوبون وماينطونه اي جواب
وشكراااا اخواااان

[ابو ايمن المياحي]

up

[مروكو]

اني من البحرين من جماعة 2009  و اصلين  نفس المرحله وياك انت من اي دوله مقدم ؟؟؟
احنا منطونه ورقة حمايه 

[سوبرمان بغداد]

اخويه شنو ورقة حماية احنا هنا بالامارات ماكو هيج شي. ممكن تخبرنا اي دولة انت؟؟

اني من الامارات قابلت محلفين 2011-6 و سوينا الفحص الطبي. و لحد هذه اللحظه ننتظر امنية.

[مروكو]

اخويه  سوبر مان ورقه الحمايه هاي اكو عوائل بالبحرين هم انطوهم بدون ما يطلبوها   بس مو للكل  يعني احنا منطونه و ما اعرف ليش من سالت علها كالوا مبيها شي بس مكتوب بيها هذا الشخص لاجيء و نرجوا ان تساعدوه بكل الطرق الممكنه اذا احتاج المساعده  و هاي هيه و ما تعتبر اقامه مثل تركيا او الاردن و باقي الدول يعني ما منها اي فائده بالخليج اقامتنه نفسها باقيه عالكفيل و المحلفه بنفسها ناكدت من تاريخ انتهاءالاقامه عالجوازات اقل شي لازم بيها مجال 6 اشهر  و سمعت اكو عوائل طلبت مساعدات و ما اعرف اذا نطوهم او لا بس اتصور الي نطوهم ورقة الحمايه حطوهم عالمساعدات الله اعلم لان ما الها غير تحليل

[امجد العراقي]

اخي العزيز
انت بيا دوله ؟ من دول الخليج
وينك شو ماكو... ؟؟؟

[zalatan1111]

اسف على التأخير حبايب
اني مقدم من سلطنة عمان
 
يعني هاي ورقة الحمايه شسوي بيها  .. مو رح تنتهي اقامتي وذوله لا حس ولا خبر .. ومن اخابرهم كلشي ميفهمون
يكولون انتو على التشييك الامني وبس

ومره كالو رح نجي نشوف حالتكم ونساعدكم .. صار شهر من حجو هالحجايه وليومك هذا كشي ماكو 

[zalatan1111]

وممكن سؤال ..

كل ما ادخل على جمعية واشوف التعليقات مال ناس واسألتهم يكولون .. اني رقم ملفي 119 ولثاني يكول احنا جماعت ال 120

متكلولي شنو هاي الارقام ؟؟

شو اني ما عندي هيج رقم .. لو عندي وما اعرفه ؟؟

[مروكو]

السلام عليكم اخي عمر بالنسبه لهذه الارقام فهي خاصة بجماعة بغداد ما عليك منها
و مابيدنا شي غير نصبر و ننتظر الامنيه تخلص  محد يكدر يسوي اي شي
بس اقامتك اذا خلصت شنو متكدر تجددها ؟؟؟ وين الكفيل مالتك
و اذا متجدد اقامتك  من هسه تحرك و شوف بلكت هاي ورقة الحمايه تفيدك بشي  يجوز تعتبر لك اقامه حاول تسأل عنها .
 اكو عضو ويانه مقدم من سلطنة عمان اتصور اسمه ya3soob ان شاء الله مغلطانه حاول تراسله عسى و لعل يفيدك  بشي او تفيده بشي موفقييين يا رب

[سوبرمان بغداد]

اخونا انت تكدر اذا لا سامح الله طلعت من البلد تنقل ملفك لاي بلد ثاني و تكمل الاجراءات. و الله كريم وتسهل عليك

[ام رندو]

السلام عليكم
اخوان اني وعائلتي ساكنببن اليمن
ومقدمين على الامم من سنة 2010 وانطونا ورقة الحماية هذه وقبل الورقة سالوا عن كل شئ متعلق بينا حتى قالوا هي انتم سيعة ام سنة واخذوا الصور لنا واعطانا ورقة الحماية هذه علما بان الاقامة عندي يعني شافوها غير منتهية
هذه ورقة الحماية وفي اعلاها يوجد رقم قضيتك هو الفايل نمبر
هذا يفيدك لم يتصلون عليك ويسولك مقابلة حتى تمشي قضيتك
احنة لحد هذه اللحظة لم يتصل احد وسوف ادخل الامم المتج\ة للسنة الثامية حتى اجدد هذه الورقة
لان باليمن شغلتنا تعبانة جدا
وورقة الحماية هذه تفيدك لانها تعتبر انت لاجئ بتلك الدولة وميحتاج منك افامة
ويا ريت نبقى على تواصل اخوان وندرس قضاياتا
رمضانكم مبارك

[مروكو]

اختي ام رندو  شلونج ان شاء الله بخير و الله يصبركم على الوضع الي يمكم بس انتو سويتوا مقابلات  و فحص طبي او لا
و بالنسبه لورقة الحمايه بالخليج ما معترف بيها  و مجانوا ينطون لاحد بس بالجديد  نطوا لكم عائله شنو السبب منعرف ان شاء الله تكون بدال الاقامه احسن من رحمة الكفيل
و بالنسبه لرقم الكيس اكيد كل واحد عنده رقم بس هاي 119 و 120 بس لجماعة بغداد مو مثل ارقامنه

[gheed]

السلام عليكم اخواني الاعزاء احب اساعدكم بكم معلومه

اولا التقديم على اليو ان يتم بمقابله اولى وتدعى مقابله الحمايه وبيها ينطون ورقه الحمايه اللي مكتوب بيها انت طالب لجوء ومقدم على اليو ان و لذلك نرجو من الجهات المعنيه تقديم المساعده الممكنه لحامل هذه الوثيقه ( ورقه الحمايه ) وطبعا ينطوك بيها رقم للملف بمنظمه ال يو ان


ثانيا اكو مقابله ثانيه باليو ان تسمى مقابله التوطين وهي دراسه الملف اذا كان يستحق التوطين في بلد ثالث او لا وبيها تتحول صفه المتقدم من طالب لجوء الى لاجئ طبعا بعد الموافقه عليه


ثالثا بعد موافقه اليو ان على الفقره رقم اثنان يتحول ملف المتقدم الى المنظمه الدوليه للهجره ال iom  اذا تم قبول توطينه في الولايات المتحده او الى سفاره الدوله التي تم قبوله فيها

بالنسبه للولايات المتحده والiom فهناك عده مقابلات وهي
  
طبعا من يتحول الملف من منظمه اليو ان لل iom راح ينطوك رقم للملف جديد خاص بال iom وهاي الارقام تبدي 119 او 120 او 123 وغيرها وهكذا وهاي الارقام المذكوره او اللي تنذكر بالمنتدى هي فقط اول 3 ارقام من الملف باعتبار الاخوان يتحذرون ينطون رقم الملف كامل تعرفون ولد الحرام هوايه فينطون اول 3 ارقام حتى باقي الاخوه الاعضاء يعرفون تسلسل الملف من خلال الارقام الثلاثه الاولى
 

اولا مقابله اولى فقط معلومات وبصمات
مقابله ثانيه لسرد وقائع القصه اللي على اساسها دتطلب اللجوء
مقابله محلف وهو اشخص الفيصل في قبولك في الولايات المتحده او لا طبعا هذا شخص مدرب وماخذ دورات بعلم النفس يعني يسألك اساله يحاول من خلالها يعرف هل حقا انت مهدد وماتكدر ترجع للعراق لو كلاوات

بعدها فحص طبي

بعدها تجييك امنى

بعدها السفر بأذن الله


اي استفسار اني حاضر

[dr.m]

اولا الف شكر على هذه الجمعية الرائعة الجديدة....اخوان ممكن استفسار ؟؟؟؟اذا واحد يريد ينقل معاملته من الاردن الى البحرين ....شون المنظمة هناك ؟؟؟و اكو منظمة هناك لو مثل ما سمعنه انه المنظمة بالسعودية اقرب شي؟؟؟و اكو احد من جماعة البحرين دا يسافر؟؟؟
اخوكم من عمان

[مروكو]

اخويه dr_m اني بالبحرين و اعرف ناس نقلوا ملفهم من الاردن للبحرين و عادي ماشيه المعاملا ت و اكو ناس دتسافر بس عالعموم العدد قليل مقارنة بباقي الدول لان العراقيين بالبحرين عدههم قليل من الاساس و بالنسبه للمنظمه موجوده و كل المقابلات بيها مو بالسعوديه بس ببداية التقديم دزينا الاوراق للسعوديه لان بيها المكتب الرئيسي و خلص دورهم  بعد ما حولوا اوراقنا للبحرين و حددولنا اول مقابله و كل المعاملات حاليا ارتباطها مع مكتب عمان
و بالنسبة لورقهة الحمايه ارجع و اكول قابلنه كل المقابلات و كملنا الفحص الطبي و منطونه   

[gheed]

اني معلوماتي تكول انه ماكو نقل ملف من دوله الى اخرى وهاي المعلومه من موظف اليو ان نفسه في عمان

ارجو التأكد قبل الشروع بنقل الملف اخاف بعدين يكولولكم ميصير

[(¯`·. بـيـبـسي .·`¯)]

up

[samerhadad]

أخوان السلام عليكم

احب أكَللكم ان هذه الورقه مال الحمايه تره لاتقدم ولا تاخر  وما معترف بيهه في دول مجلس التعاون كون ان هذه الدول غير موقعه على اتفاقيه حمايه اللاجئيين .. واكبر دليل على كلامي اني اخويه كفيله كنسل اقامته ورادو يسفرو الهجره والجوازات وكَالوله هاي الورقه مال الحمايه ما نعترف بيهه  واخويه مقيم في مملكه البحرين .. نصيحه لوجه الله اللي عنده هذه الورقه لا يعول عليهه تره لاتقدم ولا تاخر يعني هاي ابره مال بنج انطوههه للناس حتى يسكتوهم واللي اقامته منتهيه خلي يدير باله على نفسه الى ان .. الله يفرجهه والسلام عليكم

[zalatan1111]

شكرا gheed على المعلومات الممتازه

بالنسبه ل موروكو .. احنا اوراقنا هسه بالسعوديه .. فاتصالنا دائما يكون بالسعوديه

اشو اكو ناس تابعين للسوديه واكو ناس للاردن .. شلون يصير ؟؟

وبالنسبه لورقة الحمايه .. لي هسه ما استفدنه منها شي ..

وهنا العمانيين فقره والثول عدهم يقرا 1000  .. يعني اكثر من مره اروح استفسر عن الورقه بخصوص الاقامه وانطيها لواحد يضل صافن على الورقه فد 10 دقايق .. شيشوف وشييفكر ما عرف .. وبعدين يكلي بلهجتهم ( صديقي ما اعرف كيف )

[مروكو]

كلامك صحيح اخويه عمر الي داشوفه البحرين على iom الاردن و ابو ظبي على  icmci  تركيا و هسه انت تكول السلطنه على السعوديه يعني موزعيها
الله كريم

[dr.m]

الف شكر الى مروكو على الجواب الوافي و يمكن الخطوة الجاية راح اجي للبحرين لان هنا بعد بالاردن صايرة الوضعية لا تطاق....هاية نبقى نصبر نفسنه بين الدول يومية بمكان والله كريم
و شكرا مرة ثانية لموروكو على على الجواب الوافي
اخوكم من عمان

[dr.m]

up

[zalatan1111]

الاخ dr.m

هوه ماكو مشكله بتغيير الملف من بلد لبلد .. بس الاحتياط واجب وانت اخذ احتياط وضل بالاردن اصبر شكد ما تكدر .. خلي ابالك تضل فد 6 شهور او اكثر بلكت يخابروك .. لان اذا تحول ملف اكو كم شغله تصير نحسنه وهيه نقل الاسماء وفتح ملف جديد الك بمكت الدوله الجديده وممكن انها تتعرقل .. هذه بس نقاط حبيت انبهك عليها .. لا اني والدي ما مغير ملف وما لاعب بأي شي وغلطانين بأسمه.. وبصراحه الي دا اشوفه اني انه ديمشون جماعة بغداد وسوريا ثم الاردن قبل اهل الخليج .. والله اعلم .. كلشي بأيد الله

وانشالله يارب ما تصير اي مشاكل .. موفق اخي

[ام رندو]

شكراا لكل الاخوان على مساعيهم الحلوة واجوبتهم
وشكراا gheed على المعلومات القيمة
بس الصراحة اخوان اني اهلي كانوا باليمن من 2006 وسافروا الله معاهم وبوكتها انطوهم ورقة الحماية وبعدين خابروهم ومشت المعاملة مثل ما شرحها gheed لكم
يعني كلها صح واحنة هسة منتظرين يخابرونا حتى تمشي معاملتنا للمقابلة الاولى من التوطين
بس اوووووووف  والف اوووووووف  باليمن السعيد
وخاصة الامم المتجدة بيها
كلش بطيئيين وتتاخر المعاملات سنيين شنسوي نصبر
اذا اني لاجئة وما عندي اروح لغير دولة غير المنظمة تساعدنا لو تبقينا معلكين وين نرررووووح

والله اكو ناس مقدمين من سنة 2007 و العام يعني من 2010 انطوهم موعد السفر لامريكا والكل فرحانة وباعوا غراضهم وصفووا كل شئ وانتظروا موعد الطائرة
تدرون وينهم هسة ؟؟

لحد الان هم هنا باليمن خطية ومساكين
لحد هذه اللحظة  مسافرووا
يقولون لهم البطاقات بعدها مجاية

شوفوا اخوان مو اقول انه الشغلة نعبانة
الله يصيرهم ويصبرنا والجميع على البلاوي هذه
وتنفتح لنا ابواب كبيرة بالشهر المبارك هذا
امين يا رب

[dr.m]

الف شكر اخوية عمر على نصيحتك و على الردود الرائعة
اخوكم من عمان

[zalatan1111]

السنة الماليه

 شنو فلم السنة الماليه ؟

هل رح يتوقف السفر بيها ؟؟؟

واذا توقف شكد ممكن يتوقف شهرين لو اكثر ؟

[مروكو]

 

[y3soob]

اخواني و اخواتي العزيزات، اول شي رمضان كريم و كل عام و انتو بالف خير.. طبعا احب اشكر الاخ عمر لان سوالنا هيجي كروب فعلا محتاجين نتنااقش لان كلش ملل.. صارلي فترة مدى افوت عالمنتدى لان ملل و ضوجة و صبرنا خلص.. عزيزتي مروكو شخبارج؟؟ بعدكم مثلنا بالانتظار؟؟ سمعت انه اكو عائلة من البحرين جوي قابلوا محلفين بمسقط شهر 12 الي فات... يعني ماكو شي ثابت وية الجماعه. طبعا احنا مخلصين فحص طبي و الكفيل موقع على الاوراق بس ليهسة ما استلمنا قرار المحلف النهائي انما كان الرد مالته تاجيل حالنا كل الكثيرين و احنا خايفين لا يكون بعدين جوابهم هو الرفض.. الله لا يكولها..
اخوية عمر مو الاخبار؟؟ كيف الامور؟؟ يعني انتي متعرف الثول مال الربع يا ورقه حماية يا بطيخ.. اكيد ميفتهمون و لا يعرفون يسوون شي.. بس هاي اول مرة اعرف اكو عراقيين مقدمين من السعودية من جماعه عمان لان الي هنا كلنا مقدمين لو اي او ام لو اس اي في..
بالمناسبة انت لاي مرحلة واصل؟؟ خلصت الفحص الطبي؟؟ مقابلتك جانت بشهر ال12 بالسفارة مو بالله؟؟ جان اكو احد غيرك انت  الاهل لو بس عائلتكم؟؟ لان فهمت من كلامك والدك هم مقدم؟؟ و هل استملت نتيجة محلف لو هم اجاك تاجيل مثلنا احنا و الباقين؟؟ ان شاء الله نبقى متواصلين

[dr.m]

up

[مروكو]

هلا والله نورت الجمعيه والله بعدنا على الانتظار ماكو اي جديد لا توقيع كفيل و لا امنيه و لا شي و شهر الجاي فحصي يصير اكسباير والله كريم

[dr.m]

up

[zalatan1111]

السلام عليكم y3soob
والله الحمدلله بخير احنا نشكر الله

شلونك انت وشلون امورك انشالله مرتاح ..
حبي احنا خلصنا محلفين وسوينا فحص طبي صار تقريبا 4 شهور .. وما اعرف شوكت الاكسباير مال فحص الطبي ؟؟؟؟؟

المهم احنا من سوينه المحلفين سالناهم شكد ممكن انشالله ونسافر ماجاوبو بس لمحو على اساس يردولنه خبر بعد 3 اسابيع من موعد التحليف الي هوه بشهر ال 12 بالسفارة

بعد ال 3 اسابيع دزينالهم ايميل وكالو رح تتأجل 4 اسابيع وهاي الاربع اسابيع صارت 7 شهور .. ونخابرهم يكولون انتو بعدكم على التشييك الامني .. واحنا عائله حبي كلنه تابعين للوالد بس اني الي كيس وحد وبورقة الحمايه كلنا موجودين بيها يعني اني اسمي ويا والدي  .. انتو انطوكم هاي الورقه ؟؟

انت شعندك شسوييت ؟؟ ولشوكت اجلوكم ؟؟

[مروكو]

السلام عليكم كيف ال حال ...
اخي عمر بالنسبه للفحص الطبي يصير اكسباير كل سنه او 6 اشهر حسب ما يخبروك اكو سنه و يعيدون و اكو 6 اشهر و يعيدون  و اكو حالات خاصه كل  3 اشهر يصير اكسباير

[y3soob]

اهلا مروكو.. الله يعينكم بعدكم صابرين شون سالفه هاي  .. شوكت تخلص مندري..
اخوية عمر، بالنسبة النا احنا مقدمين اي او ام و ما عدنا ورقة حماية، و احنا من قابلنا بشهر ال 12 بالسفارة كالولنا انتظروا شهر، و ورة الشهر اذا ما اتصلنا بيكم انتو اتصلوا بينا.. المهم ورة شهرين يالله حصلنا منهم رد المحلف بالتاجيل. و راها سوينا فحص طبي و اتصلوا بالكفيل من شهر الخامس و ليهسة ماكوشي نايمة علينا الطابوكة. يكولون تجييك امني.. شوكت يخلص الله اعلم و احتمال اصلا وراها ينطونا رفض لان اصلا منعرف قرار المحلف شنو ليهسة.. الله كريم ان شاء الله تفرج.. انت اتصل بيهم دزلهم ايميلات.. هم الي قابلوكم جانوا جايين من عمان اكيد فتكدر تتصل بالمنظمة بالاردن و تستفسر منهم و ان شاء الله ينطوك جواب.

[zalatan1111]

اهلا مروكو.. الله يعينكم بعدكم صابرين شون سالفه هاي  .. شوكت تخلص مندري..
اخوية عمر، بالنسبة النا احنا مقدمين اي او ام و ما عدنا ورقة حماية، و احنا من قابلنا بشهر ال 12 بالسفارة كالولنا انتظروا شهر، و ورة الشهر اذا ما اتصلنا بيكم انتو اتصلوا بينا.. المهم ورة شهرين يالله حصلنا منهم رد المحلف بالتاجيل. و راها سوينا فحص طبي و اتصلوا بالكفيل من شهر الخامس و ليهسة ماكوشي نايمة علينا الطابوكة. يكولون تجييك امني.. شوكت يخلص الله اعلم و احتمال اصلا وراها ينطونا رفض لان اصلا منعرف قرار المحلف شنو ليهسة.. الله كريم ان شاء الله تفرج.. انت اتصل بيهم دزلهم ايميلات.. هم الي قابلوكم جانوا جايين من عمان اكيد فتكدر تتصل بالمنظمة بالاردن و تستفسر منهم و ان شاء الله ينطوك جواب.

اوكي خويه بالتوفيق انشالله ويارب يخابرونه كلنا بالتاسع .. لان يكولون بشهر التاسع رح يدزون هوايا ناس
انشالله قربت اهم شي الدعاء وعدم اليأس

[مروكو]

الله كريم

[الامل 2]

وانا بعد انظم الكم احنا من سبعة اشهر قابلنه وكملنه 6 اشهر من الفحص مادري الفحص ينعاد بعد سنه او 6 اشهر

 الله كريم

[حرامي الورد]

السلام عليكم اخواني واخواتي
شكرا لكل من نظم هذه الجمعية وجعلها عامرة بالمشاركات القيمة لان معروف عن الاشخاص الكاعدين بالخليج دايخين بمعاملاتهم الي شكلها مالها تالي

اخواني اخواتي
اخوكم مقدم من قطر من شهر 11 او 12 الي فات "عذرا للنسيان" على الامم المتحدة - المفوضية السامية لشؤون اللاجئين قابت مرة واحدة مع الاهل وخبرني المسؤول بمعاودة الاتصال بية اذا رادو شي وهاي اني لحد الان يمكم لا خابروا ولا ابد بحيث احاول بفترات متقطعة اتصل عليهم استفسر عن المعاملة والاجابة فقط انتظر والاجراءات تغيرت بفعل الاوضاع بالمنطقة وقبل فترة سمعت "صدفة" من احد الاقارب قدم وياية باستلامه ورقة الحماية وتفاجأت لان مسؤول المفوضية جاي وموزع اوراق الحماية مع العلم اني عندي رقم ملف المهم رجعت اتصلت عليهم بلغني انه راح يشوف وسيلة يرسل بيها ورقة الحماية ؟؟؟ هو هذا حجي عليكم الله ؟؟؟ بالمناسبة ورقة الحماية مكتوب عليها "بالرجاء مساعدة حامل هذا الورقة لحين البحث في شأنه وايجاد حل - بما معناه"
والاغرب القريب الي استلم الورقة يكلي اني ممفكر بالسفر وقدمت دا اشوف حجيهم صدق لو كذب ؟؟
فاخوان حاولو تستفسرون عن اهمية ورقة الحماية من المفوضية نفسها .. فحسب الي سمعته انها ذات اهمية للتعامل مع قضيتك وان شاء الله العاقبة خير عليكم يا اخوتي وخواتي

[مروكو]

اهلا و سهلا بيك ويانا  اخونا حرامي الورد

بالنسبة لورقة الحمايه كل واحد يحجي شكل بس الي معروف بالخليج ما منها فايده لان اقامتنا عالكفيل و مستحيل اليو ان تنطينه اقامه و الي اكدلي هذا الشي بيوم مقابلة المحلفين اكدو على الاقامه و جيكوا الجواز و مدة الانتهاء لازم بيها مجال 6 اشهر اقل شي لويعتمدون على ورقة الحمايه ما كان اهتموا بموضوع الاقامه
بس باقي الدول سوريا لبنان الاردن تركيا لا هاي ورقة الحمايه مهمه تعتبر اقامه و بعض العوائل تحصل عليها مساعدات و لو بسيطه بس احسن من ماكو

[dr.m]

up

[iraq9]

اني هم نفس الشي حصلت على ورقة الاعتراف كلاجيء بسلطنة عمان بس المشكلة مدا اعرف شنو المرحلة الوراهة؟؟ يعني شنو راح تفيد بالتوطين لو لا؟

[مروكو]

اهلا بيك ويانا اخونه iraq9 ورقة الحماية حسب علمي متاثر عالتوطين

[iraq9]

اهلا بيك ويانا اخونه iraq9 ورقة الحماية حسب علمي متاثر عالتوطين

لعد شنو الغاية منهة ؟؟ يعني كلشي مراح انحصل منهة

[مروكو]

ورقة الحماية بالخليج شي شكلي عمري ما سمعت احد اخذها و استفاد شي منها بس باقي الدول تختلف

[حرامي الورد]

السلام عليكم اجمعين وكل عام وانتم بالف الف خير بمناسبة قرب حلول عيد الفطر اعاده الله عليكم وعلينا بالخير والبركة وتحقيق جميع الامنيات .. ودعواتي الخالصة براحة البال والطمأنينة والاستقرار الدائم .. اللهم امين انه السميع المجيب
اخوتي واخواتي عاجز عن شكركم على ردوكم وارجوا من الله ان نجد حل لوضعنا الذي لا يمكن وصفه بكلمات القليلة ولكن اوجزها ان الحمد والشكر لله جلت قدرته فهو قادر على ان يأخذ بيدنا من بعد كثرة الصبر

احبائي في الله
بالنسبة للموضوع الي كتبتة سابقا ذكرت بي الشخص قريب ولحد الان ما شاء الله مقيم .. سؤالي هل استفسر بطريقة غير مباشرة من دائرة الهجرة والجوازات الموجودة في قطر عن الورقة الخاصة باليو ان ام سأفتح علي وعلى اخوتي باب ؟؟
لان بصراحة سمعت قبل فترة قصة شاب لا سامح الله تم انهاء خدماته وكان يعمل باحدى الشركات الكبرى في قطر والي حجالي القصة يعرفة ويقول ان الشاب كان مقدم لجوء ومقابل مقابلة وحدة فقط ومن بلغت جهة العمل بانهاء الخدمات خلال شهرين اتصل بالمفوضية والمفوضية سرعت الاجراءات لان هذا الشخص يملك العديد من الادلة على ان الرجوع للعراق بي خطر علي وعلى عائلته ومن الشخص الي خبرني القصة قال ان الشاب حاليا في استراليا ..
صراحة سالفة تودي وسالفة تجيب واني حاير اتصل بالمفوضية صار الجواب مالهم نفسة كل مرة انتظر او ماكو شي جديد
ام اسال على الورقة وكلي خوف اني افتح باب جديد على اخواني؟؟
لك الحمد يا الله ونسأل الله لنا ولكم الصبر وان شاء الله العواقب خير وبركة

[مروكو]

اخي حرامي الورد تحية طبة .. سؤالك محير و يعتمد على الحظ بالدرجة الاولى
 احنا بالبحرين عدنا الشخص الي ينهون خدماته او الكفيل يستغني عنة ما يسلموه جوازه بيده يكولوله روح استلمة من المطار + تكت العودة للوطن يعني ما بيها مجال لاي نقاش و اذا ما غادر يتصلون بيه  و يسافر  يعجبة او ميعجبة بعد شلون يمكم ما اعرف اسال و تاكد قبل ما تسوي اي شي و الله يسهلك عليكم

[امجد العراقي]

السلام عليكم ورحمة الله وبركاته
رمضان كريم عليكم وعيدكم مبارك ...
اخوان اني شفت الموضوع بالبدايه كان منزله  omar123 ، وهذا واضح حتى من ردود الاخوان ، شو هسه انكلب اسمه الى zalatan  شنو السالفه ؟!!!
وردا على كلام الاخت من البحرين ، تره كلهه نفس الشي  بالخليج ، ايديهم والكنسله باي لحظه! مو تكول نظام كفاله وانما نظام استعباد ومهانه ومذله بمعنى الكلمه ..الله يجازي الي كان سبب بتدميرنه وتدمير بلدنه...
تحياتي لكل الاخوان سواء بهاي الجمعيه الرائعه او بالمنتدى ، واسال المولى القدير بحق شهر رمضان وليلة القدر ان يفرج على الجميع وانشاءالله الكل مسافرين ...

[مروكو]

اهلا اخي امجد رمضان كريم عليك و كل عام و انت بخير الاخ عمر غير اسمة 

[zalatan1111]

ربي يسهل الامور على العراقيين كلهم

اني متااااااااااااااااااااااااااااااااااااااااااااااااااااااااااااااااائل بشهر 9

كولو يالله

[الامل 2]

يالله    يالله    يالله         يالله         يالله       يالله        يالله         يالله       يالله       يالله

[حرامي الورد]

اللهم امين يا رب العالمين .. واني بعد جدا متفائل بشهر تسعة لان الكثير من الاخوة والاخوات بالمنتدى ذاكرين بان شهر تسعة اوضاع طالبي اللجوء قد تتغير فما علينا الا التفائل بالخير

الاخت الفاضلة مروكو مشكورة على الرد .. بالنسبة لهنا على حسب جهة العمل فالتبليغ بانهاء الخدمات مباشرة وفي حال تم الاتفاق على نقل الكفالة يعطي الكفيل مكفوله ورقة للنقل اما في حال الابعاد هنا يسلم الشخص جواز سفره على ان يغادر البلد خلال مدة يحددها الكفيل ولله الحمد لهذه اللحظة اغلب الي اعرفهم بعد شهرين من تاريخ الاخطار يجب ان يغادر البلد وهذه احسن السيئين كما يقال ..
راح اشوف شنو اكدر اسوي على موضوع الورقة لان ضروري اعرف مدى فائدتها للمقيم العراقي

اسال الله للجميع راحة البال والاستقرار في احضان بلد ملئه الامان

[الامل 2]

عيدكم مبارك و انشالله يارب نفرح بعد العيد بمواعيد سفر للجميع الاعضاء
يارب فرج علينا بموعد سفر دخلنا بشهر الثامن واحنا ننتظر الامنيه

قال تعالى في سورة النجم

(( لَيسَ لها مِنْ دونْ الله كَاشِفة ))

صدق الله العظيم

الحمد لله على كل حال

[مروكو]

عيد سعيد يعود عليكم بالصحة و السلامة و الموفقية و ان شاء الله عدي الجاي كلكم تعيدون بامريكا 

[zalatan1111]

اجمعين انشالله ..

شكرا على هاي المعايدات الحوله

ويارب يارب ينعاد على كل العراقيين بالصحه والعافيه وتحقيق الاماني

وعلى كولة موروكو انشالله العيد الجاي بأميركا خالي بأميركااااااااااااا
 

[مروكو]

up

[مروكو]

 

[zalatan1111]

شباب اكو خبر زين لاهل الخليج
ويارب بيها خير

اليوم اكو عائله عراقيه جماعتنا هنا بمسقط خابرو على الاردن وذوله العائله عدهم 3 كيسات
الاب والام بكيس وابناء 2 كل واحد كيس

خابروهم وسألوهم شصار من حالتنه .. كالولهم الاب والام خلصان التشييك الامني وهسه على قيد الاجراءات .. وماكالولهم غير هالحجي

الي عنده تعليق يكتبه رجاءا حتى نفتهم شنو الفلم
واني رح اسوي موضوع جديد واطلب بيه مساعدت اهل الخبره

اسم الموضوع : اتصلنا بالاردن والرد يبشر بخير .. مساعدة من اهل الخبره ( احنا اهل الخليج )

[الامل 2]

انشالله خير يارب يسافرون ونسافر وراهم
اريد نصيحتكم

احنا عندنه اطفال في المدرسه ولازم باجر اروح اسجلهم في مدرسه خاصه ودفع فلوس للسنه هذه  وللعام لان علينا اقساط متاخره ومادري محتاره اسجلهم لو لا لان احنا منتظرين الامنيه كملنه 7 اشهر ودخلنه بالثامن  انتم بالخليج سجلتم اطفالكم لو لا

[zalatan1111]

اختي العزيزه  امل 2

احنا هم واجهتنه نفس مشكلتج .. واني واحد من الضحايه الي ما كملت دراستها بسبب هذا الموضوع
والدي ما دفعلي اقساط الكليه لان خاف يخابرونه ونخسر هذه الفلوس ..

اني اكو انتضري لبداية شهر 10 اذا تقدرين .. اني ما ريد احبط المعنويات لكن في شهر 10 و11 و 12 السفر رح يصير يقل بنسبه عاليه بسبب السنه الماليه ( حسب ما سمعت من الشباب بالمنتدى )

اعتقد تكدرين تشرحين وضعكم لادارة المدرسه .. او تكوليلهم انج هسه ما تكدرين تدفعين واج رح تسجليهم بشهر العاشر .. وانشالله تسهل الامور

وربي يسهل اموركم ويخابروكم بالتاسع ويكولوكم يلى حضرو جوالاتكم سفركم بعد اسبوعين

[dynamic]

يا جماعة مسقط شلون قدمتوا فهموني

[الامل 2]

اخي zalatan1111  مشكور على الرد  احنا النظام بالكويت الدفع مع التسجيل وغير رسوم التسجيل علينا اقساط متاخره من العام  ومادري والله حيره.... الله يفرجها علينا وعليكم  الله يوفقك بحايتك  ولو الدراسه بالدول العربيه ماله مستقبل بس الواحد مايريد يحسون بالنقص عن جهال الناس وهم بعدهم بالثاني والاول ابتدائي  الله يعينه على هم الدنيا  

الحمد لله على كل حال


اختكم الامل2

[iraq9]

زين اني الي اعرفة ومتأكد منة انو جماعة سلطنة عمان تابعين على السعودية وهذا الكلام حصلتة منهم مباشر لانه بالبداية قدمت اوراقي للأمارات ودزولي ايميل كالو ملفك لازم يتحول للسعودية وهمة يتصفرون وياك, امانة عليكم محد يعرف اي عائلة عراقية سافرت من سلطنة عمان؟؟ لو شغلتهم كلة تخدير اعصاب

[zalatan1111]

اخ iiraq9

اني بسلطنة عمان وصارلي هوايا عايش بيها وصارلي من 2009 مقدم ولا مره سمعت عائله سافرت من سلطنة عمان

بس البارحه اكو عائله جماعتنه خابرو على اي او ام الاردن وملفهم بالاردن مثل ماهو ملفنا وملفات هوايا عوائل هنا بمسقط
كالولهم انه بعض كيسات عائلتكم خلصان التشييك الامني مالته وهسه تحت الاجراءات .. شنو الفلم محد يدري ؟؟!!

[y3soob]

من سلطنة عمان محد مسافر ليهسة.. حسب ما اتوقع راح يلمونا كلنا بطيارة وحدة و كبل لامريكا.. بالنسبة للتقديم، الي مقدم يو ان يكون اما امارات لو سعودية، الي مقدم اي او ام عاده من عمان، كل جماعه الاي او ام الي موجودين هنا مقدمين من الاردن و مسوين مقابلات بالاردن. بصراحه اني ما اتوقع سفر قريب، يعني يجوز بعد فد ست اشهر يالله يحنون علينا جماعه السلطنة.

[الامل 2]

up    up     up     up

[مروكو]

 

[iraq9]

هسة كبل شوية اتصلت على اليو ان السعودية جماعة  سلطنة عمان الي مقدمين على اليو ان كلي مسؤول الحماية الدولية عدهم زيارة للسطنة عمان قريبا وان شاء الله خير

[zalatan1111]

اي يا الله

شكرا على الخبر iraq9

بس ليش عدهم زياره همه شعليهم اهل السعوديه ؟؟

يعني بشنو ممكن يفيدونه ؟؟

[مروكو]

اهلا اخوان المكتب الاقليمي لل يو ان الخاص بدول الخليج مقرة بالسعودية و كلنا اوراقنا تروح للسعودية اول مرة بعدها نتحول على iom الاردن ما عدا الامارات تابعة ل icmc

[iraq9]

يعني يفيدون بتجديد ورقة اللجوء الي انطوهة لشكم عائلة الي قابلت بشهر 12 واحتمال يسوون مقابلة ثانية لانه اني سألتة على ملف عائلتي كال بعدة بالدراسة واي شي جديد احنة انخابركم

[حرامي الورد]

[/color

السلام عليكم اخواني واخواتي

ما شاء الله التواصل والامل والصبر عنوان لهذه الصفحة الرائعة
احب ابلغكم بقضيتين الاولي اتصلت على المفوضية بالسعودية في النصف الاول من شهر 9 للاستفسار عن اهمية او فائدة ورقة الحماية وانصدمت بالرد بعدم وجود اتفاقية مع دول الخليج ولكن بلغني بقدوم وفد مطلع العام الجديد

اتمنى اسمع اخبار حلوة عن كل الاخوة والاخوات

[y3soob]

مرحبا اخواني و خواتي، صارلي فترة ادور عالموضوع بس صار بالاخير و شوية عبالك صاير ملل و افوت للمنتدى دقيقة و اطلع لان ماكو خبر حلو كلها تتنتظر خاصة بالخليج تعبنا من الانتظار و الوضع مخربط منعرف باقين منعرف مسافرين  بس قلق و تفكير طول الوقت بس شنكول غير الحمد لله.. طبعا اول شي اني تذكرت انه اكو عائلة عراقية سافرت العام من مسقط الى امريكا و كانت على نفس الطيارة وية ناس طلعوا من البحرين و الامارات، و كان دخولهم امريكا يوم 30 نوفمبر يعني شهر الدعش. و كلهم بطيارة وحدة جانوا.. فبلكت يا الله نكون احنا هم على نهاية السنة سوية منشلعين.. هاي اولا و ثانيا بالنسبة للوفد مال سعودية الي راح يجي اتوقع هاي اخبار غير مفرحة للي منتظر موعد سفر لان معناها راح يرجعون يعيدون محلفين و فحص طبي و احنا كاعدين ننتظر صار دهر..
طبعا بالنسبة للي بعده ما مقابل ان شاء الله تتسهل اموركم يا ربي.. و اتمنى يكون سفرنا احنا الي نامت علينا الطابوكة وية جية الموظفين مو يدخلونا بمتاهات جديدة.. ان شاء الله خير و خلونا متواصلين يا اخواني و اخواتي و شكرا للجميع

[alzandawi]

السلام عليكم ورحمه الله وبركاته اخت مهى احنه هنانه المشكلة مقدمين وكاعدين بس ننتظر يعني اني مقدم صار 15شهر والى هسة كلشي ماكو منعرف شلون ديشتغلون ومنو مفضل بلنسبة الهم وليش  والله يسهل الامورويفرجهة عليكم وعليناوعلى كل المنتظرين

[zalatan1111]

اخ y3soob
 
ما اعتقد جية الوفد مشكله او انهم رح يسوون مقابله وتحليف وفحص .. الوفد الي رح يجي يتفقد عن حالاتنا هنا
ويحاولون يلكون حل لورقة الحمايه .. همه اصلا جيتهم لمساعدتنا ولتجديد اوراق الحمايه

بلكت جيتهم خير ياااارب

[امجد العراقي]

وينهم  اعضاء الجمعيه الورود
شو انكطعت الاخبار
شكو ماكو؟انشاءالله الامور طيبه
تحياتي

[خولة بنت الأزور]

اني معلوماتي تكول انه ماكو نقل ملف من دوله الى اخرى وهاي المعلومه من موظف اليو ان نفسه في عمان

ارجو التأكد قبل الشروع بنقل الملف اخاف بعدين يكولولكم ميصير

اختي العزيزة غيد ....
 ايصير نقل الملف من دولة الى اخرى لانه اكو اشخاص عادي نقلوا  مفلهم من سوريا الى الامارات

تحياتي

[حرامي الورد]

السلام عليكم اخواني واخواتي الغاليين
اعتذر جدا عن الانقطاع ومن فترة طويلة ممشارك بالصفحة العزيزة
طبعا خلال هذه الفترة اتصلت علينا المنظمة وسلمتنا ورقة الحماية وعليها نص مكتوب "عذرا لان محافظة نصا" ان هذا الشخص وعائلته في حماية المنظمة السامية لشؤون اللاجئين فيرجى تسهيل معاملته لحين ما تنظر المنظمة في اجراءاته وتوفير المكان المناسب" طبعا هذا الكلام مو نصا مثل ما كلتلكم ولكنه مقارب لما مكتوب بالورقة والورقة مختومة وعليها صورتي الشخصية على اعتباري ان المقدم على اللجوء او صاحب القضية "الكيس"، طبعا ورة مستلمت الورقة ماكو اي اجراء او اي اتصال ولكن موظف المفوضية بلغني ان مدة الانتظار ممعروفة فاكو ناس سافروا بسنة ونص وناس بسنتين وناس سحبوا ملفاتهم، بعدها اتصلت على المفوضية في السعودية بلغوني ان القضية صارت عند الوفد الامريكي وكل الي علينا ان ننتظر.
اتمنى اني فدتكم او اعطيتكم شوية بصيص امل واتمنى من الي مقدم من قطر يبلغني وين وصلت معاملته ولو اني اعرف ان العدد هنا قليلين جدا
تحياتي

[الامل 2]

اخي حرامي الورد الله يسهل امرك
ممكن تعطيني رقم المفوضيه بالسعوديه

[y3soob]

شنو الاخبار يا جماعه الخليج هل من جديد؟؟

[حرامي الورد]

مشكور لحضرتج اخت امل وعلى دعائج ودعواتي بتسهيل الامور لحضرتج
رقم مفوضية السعودية
0096614801815
تتصلين بيهم اما يوم السبت او الثلاثاء من الساعة 12 وحتى الساعة 2 الظهر
مرات يريد رجال واجوبته على قدر السؤال لا كلمة زيادة ولا كلمة ناقصة ومرات مرية ترد نفس القضية بس تنطي نجدة "طبعا مننكر انهم على المزاج"
وان شاء الله الطمأنينة من رب العالمين

[الامل 2]

اخي حرامي الورد شكرا على الرقم  حبيت اسالك احنا الكويت هم تابعين للسعوديه يعني يصير اتصل عليهم واستفسر

[امجد العراقي]

يابه ماكو جديد ؟
اخ  زلاتن وينك عزيزي
والله الك وحشه ..
شو منكطع سويت الجمعيه وبعد ماكو ؟.
انشاءالله خير
دعواتنا للجميع بالتوفيق والسفر.

[حرامي الورد]

اخي حرامي الورد شكرا على الرقم  حبيت اسالك احنا الكويت هم تابعين للسعوديه يعني يصير اتصل عليهم واستفسر

تأمرين اختي عسى الله يسهل امركم وامرنا ونفرح ببلد بي امان واستقرار
اما اذا كانت الكويت تابعة للسعودية فما عندي اي علم .. ولكن اذا انتي حابة تتأكدين اتصلي واستفسري وان شاء الله ربح الج ولاهل بيتج
قطر تابعة للسعودية لعدم وجود منظمة شؤون لاجئين او امم متحدة فقط مكتب لليونسكو وحتى اول مقابلة النا تمت مع الاهل والمنظمة باليونسكو
عذرا للاطالة

[iraq9]

مشكور لحضرتج اخت امل وعلى دعائج ودعواتي بتسهيل الامور لحضرتج
رقم مفوضية السعودية
0096614801815
تتصلين بيهم اما يوم السبت او الثلاثاء من الساعة 12 وحتى الساعة 2 الظهر
مرات يريد رجال واجوبته على قدر السؤال لا كلمة زيادة ولا كلمة ناقصة ومرات مرية ترد نفس القضية بس تنطي نجدة "طبعا مننكر انهم على المزاج"
وان شاء الله الطمأنينة من رب العالمين

طبعا الشخص الي راح يرد عليكم تونسي الجنسية هوة نفسة الي قابلني بمسقط ويعرف تسلسل قصتي واحداثهة بالتفصيل بس دائما يجاوب بنفس الكليشة راح تجي لجنة واتقرر وكلشي ماكو

[iraq9]

السلام عليك إخوتي آليوم اتصلو بية مكتب اليونيسف بمسقط استلم ورقة الحماية بس تجديد ماكو شي بس اتمنى اعرف اذا احد مسافر قبل من مسقط؟

[iraq9]

السلام عليكم إخوان جماعة مسقط احد عندة أخبار جديدة؟ شو حتى ورقة حماية ماكو بعد؟ شنو السالفة؟

[y3soob]

مرحبا اخوان.. بصراحه اخوية  اكو سفر من مسقط تقريبا كل شهر دى تطلع عائلة هذا الكلام من شهر التاسع 2012.. و الي دى نشوفه كلش هوايه عراقيين من هنا مقدمين.. بس معدل السفر عائله وحده بالشهر فقط!! و هالاسبوع هم اكو سفر ناس نعرفهم و ان شاء الله يوصلون بالسلامه و عقبالنا و عقبالكم جميعا يا رب.. اهم شي نبقى متواصلين

[كنداوية]

السلام عليكم اخواني واخواتي الكرام والكريمات ..

الله يعينكم ويعجل بسفركم بصراحة اني كلش انزعجت من التأخير في ملفاتكم بس معروفه الدوائر بدول الخليج للأسف كسل وتماطل
اكثر من اللزم فأكيد اليو ان بيكون مو على قد المسؤوليه هذا غير عن انهم ممتعودين على هالحالات وميحسون بيها ..

طبعا انا حاسه بيكم لان احنا هم  كنا في بلد خليجي بس رحنا الاردن وقدمنا هناك تلافيا للي قاعد يصير لكم اخواني ..

ما اقول غير يااارب نسمع ببشاير سفركم بالقريب العاجل ان شاء الله .

[iraq9]

السلام عليكم اخواني احد يبشرنا ع جماعة مسقط شو لا ورقة حماية مجددة ولامقابلة!!

[y3soob]

السفر من مسقط بالقطاره، كلش اعداد قليله، بالنسبه لورقه الحمايه ما عندي علم

[أبو الحكم]

رفع للفائدة العامة










أبو الحكم

[iraq9]

السلام عليكم اخوان شو صار فترة ومحصلت ولا رد من اليو ان في مسقط احد عندة معلومات جديدة؟

[iraq9]

السلام عليكم اخوان جماعة مسقط ترة ديسافرون من هنا هواية لامريكا وهسة سديت التلفون من اليو انت مال السعودية يكلي انتظرو والله كريم احد عندة اخبار جديدة لايبخل علينة