بياي طريقه يدخاون للاردن لغرض العلاج واذا امكن اسم طبيب جيد ومجرب اختصاص قلب

[ام تسنيم1]

السلام عليكم اخوان عائله اصدقاء يردون يرحون للاردن ابوهم كلش مريض عجز شديد بالقلب ومي صاعد بالرئه  اذا امكن باي طريقه يحصلون فيزه ومنين   يعني هو الاب والام يرحون للعلاج ويرجعون مو اقامه دائمه     واذا اكو احد من اخوانا وخواتنه يعرفون اسم طبيب معروف وجيد باطنيه وقلبيه بلكن اسم الطبيب وعنوانه على شرط يكونون متاكدين انه خوش طبيب وعن تجربتهم الشخصيه  رجاءا  اذا احد يكدر يساعد  همه ابنهم الوحيد مهاجر  وبناتهم لايحلون ولايربطون   ادري بيكم متقصرون وشكرا مقدما

[ابو زيـــن]

السلام عليكم اسم الطبيب ابراهيم جراد المركز العربي بس طريقة دخولكم للاردن ماأعرف شلون تحياتي

[ام تسنيم1]

 عليكم السلام شكرا اخونا عادل على سرغه الجواب   بس مذكرت العنوان  همه ميندلون اول مره يسافرون للاردن اذا امكن فد داله  الله يبعد عنكم المرض بس انت مجرب هذا الطبيب ؟

[مهاجرين بلا حدود]

السلام عليكم اخت ام  تسنيم

هناك الدكتور ((( علي فرج صالح )) في مستشفى ابن الهيثم التخصصي )) شارع المدينة المنورة اختصاص قلبية وباطنية
والدكتور معروف جدا سواء ببغداد او عمان

الدكتور (( اسامة عكة )) اردني في مستشفى الخالدي ..ايضا يمدحون به


وماعدهم غير العافية
http://jo-medicalpages.com/profile.php?section=40&doctor=34


واذا يردون يقدومون على فيزة الاردن هناك مكتب بشارع الربيعي يضمن الفيزة ان شاءالله بتقارير طبية

وبارك الله بيج اختي

ابو محمد
عمااان

[ام تسنيم1]

 عليكم السلام شكرا اخونا ابو محمد الله لايراويلكم المرض    زين هذا المكتب مال شارع الربيعي مال شنو شركه نقليات ؟ واذا امكن اسم المكتب وشنو اقرب داله اله    بارك الله بيك وينطيك العافيه ويحقق امنياتك

[فصولي]

           السلام عليكم اختي العزيزة


         الدكتور اياد كاظم جحيل ...علم من اعلام الاطباء في القلب


        وهو عراقي وشهاده امريكية ...ومتخصص بعلاج الرؤساء ومنهم

   
        الرئيس يلسن الرئيس الروسي ......




                       فصولي  - العراق - 2008

[ام تسنيم1]

شكرا اخونا فصولي   وان شاء الله توصل بالسلامه وتتوفق بحياتك   ويسهل امرك     بس ماكتلي وين عنوان الطبيب         واذا اكو احد من الاعضاء يندل مكتب اللي بشارع الربيعي اللي ينطي الفيزه يوضحلي العنوان  واذا اكو غير مكان هم ياريت تدلونا     الله يجعلهه في ميزان حسناتكم     وشكرا مقدما

[tuna]

عيني ام تسنيم اني اخوية قبل شهر سوه عملية بعمان مال تبديل صمام الابهر واسهل طريقة واسرع فيزه تطلع يثلاثة او اربعة ايام عين طريق الخطوط الجوية الملكية الهاشمية واحسن جراح قلب هوه اسامة العكشة وطبيب قلبية جيد جدا يوسف القسوس وانشاء الله باجر اكتبلج العنوان بالضبط حيث ان اخوية سوه عملية جراحة قلب قبل حوالي شهر والان هوه صحته جيده باذن الله

[tuna]

 اختي تره هاي المكاتب تتاخر كلش عن طريق تجربة واذا هوه حالته مستعجل فماكو اسرع من الخطوط الاردنية تجيج الفيزه والتذكرة ب729 دولار للفرد تو وي

[alsafeer]

الدكنور زاهر الكسيح اختصاص قلبيه . خريج اميركا.

عنوانة شارع مستشفى الخالدي بناية الخير.

اسرع طريقةللحصول على الفيزا هو التقديم على الخطوط الجوية الملكية الاردنية

[الأعظمي]

عندي صديق قبل 4أيام رجع من عمان أجى سوى قسطرة يم دكتور القسوس لقبه بس أسمه نسيته دكتور بمستشفى عمان وهذا الدكتور أكثر من واحد دلانا عليه وخوش دكتور ممتاز وخبير ويخاف الله المهم الولد أجى أول مرة وية خاله لأنهم مقيمين وبعدين سوو حجز من المستشفى نفسها بأسم أمه لأن كتلت نفسها علمود أبنها متريد تعوفه وحده فسوولها الحجز من المستشفى على أعتبار مريضة وصار مرتين تسويها خلال 4أيام جتي لعمان بس وصلتها ورقة المستشفى بالأيميل وراحت حجزت تذكرة طيارة وجتي طبعآ عالملكية بس خلال 4أيام هي بعمان .
تحياتي وأحترامي للجميع

                                                                         الأعظمي

[وردة الكرادة]

عيوني ام تسنيم اني بابا قبل شهرين سوة عملية مال قسطرة بمستشفى التخصصي بس الدكتور ما اذكر اسمة بس الدكتور شاطر كلش  بس هية احسن شي المستشفى التخصصي وان شاء الله اجيبلج العنوان كامل من بابا

[ام تسنيم1]

شكرا لكل الاعضاء اللي جاوبوني  ماقصرتو والله وان شاء الله سباقين دائما لعمل  الخير اسال الله العضيم يجعلهه في ميزان حسناتكم ومتشوفون مرض ولااي مكروه     وان شاء الله  تحقيق امانيكم بالسفر والاستقرار   واخونا فصولي توصل بالسلامه ان شاء الله ونسمع عنك الاخبار الطيبه   شكرا مره ثانيه

[ابو زيـــن]

مرحبا ام تسنيم الدكتور موجود بالمركز العربي في الدوار الخامس في عمان وطبعا الدكتور سوه عملية (قلب مفتوح يعني تبديل الشرايين) الى والدتي قبل 5 سنوات وهي الان بصحة جيدة واي شي اني بالخدمة (طبعا تكلفت العملية مايقارب 2500 دينار مع المستشفى تحياتي

[ام تسنيم1]

شكرا اخونا العزيز عادل وان شاء الله دوام الصحه والعافيه للوالده   بارك الله بيك ماقصرت  شكرا