كروب جماعــة اعــادة مقابلــة المحلفيـــن للمرة الثانيـــة
شلونكم اخوان المهاجرين ؟؟ادري ادري بيكم تعبانين وضايجين بس يا اخوان لازم نصّبر نفسنا ونتكل على رب العالميــن لان شكد ما نضوج ما يفيد بس نضوج ونتكأب ونأثر على نفسنا .ترى الأمم ولا يهمهم ..
اخوان احنا كلنا استفادينا من تجارب غيرنا ممن عملوا مقابلة المحلفين وذكروا الأسئلة اللي سألوها الهم واللي يتوقعون اللي راح يسألها ..بس المهم استفادينا منها حتى لو ما سألونا مثلها بس احنا اخذنا احتياطاتنا بصورة جيدة واخذنا احتياط لكل سؤال طارىء..بما انه استفادينا منهم خلي غيرنا يستفاد من عدنا ومن تجاربنا مع السفير لان حسب ما افتهمنا بالسفارة ان كل مقابلة السفير بعد مرور فترة 15 شهر {سنة و3 أشهر} تصبح اكسباير يعني لازم تنعاد المقابلة من جد وجديد ..
يعني انا اعتقد ان جماعة السفير الشهر الثامن راح يسوون اعادة السفير مع الوفد اللي راح يجي بعد هذا الوفد واكيد جماعة الوفد العاشر هم راح يجيهم السرة على السنة الجديدة .اخوان لاتزعلون من كلامي.. هذا ما كالوه بالسفارة يوم امس ..لازم نتقبل الأمر الواقع .وانا قصدي ان الكل تستفاد من اللي عندا تجربة او احد اصدقائه او اقاربه...
انا البارحة يوم 10/26عملت اعادة السفير وكانت سهلة ما سألونا شي عن القصة او العسكرية
مع العلم انا كنت مأخذ كل احتياطاتي اللازمة .قسم من اللي سوو قبلنا كالو يسأل الأسئلة الرورتينة للعائلة كلها تجاوب بنعم او لا ؟ المهم احنا كل اللي سألونا هو المستجدات اللي صارت من مقابلة السفير قبل سنة و5 اشهر و5 أيام ولحد الآن مثلاً هل سافرت خارج لبنان؟ هل اعتقلت؟ هل يوجد زواج او خطوبة او ولادة طفل جديد او لاسامح الله وفاة ..ومن ثم وقعنا على الأوراق وكال هل عدكم سؤال؟؟
فأنا حكيت وكلت :احنا هسا صارنا سنة وخمسة اشهر و5 أيام وهسا رجعنا مرة الخ عدنا المقابلة .ليش؟؟يعني كل هاي المدة راحت بلاش ؟؟ثم احنا كنا بالعراق تعبانين ومظلومين وهسا هنا بلبنان تعبانين لأن احنا هنا مواطنين غير شرعيين ما عدنا حرية حتى ولو اعتدوا علينا ما نكدر نأخذ حقنا مثلا ان نشتكي لاننا نتجنب المشاكل ..واذا احنا مستقبلنا ضاع فليش مستقبل اطفالنا يضيع ؟؟نريد نسافر الى بلد مستقر ونستقر فيه. حتى اطفالنا يستقرون ويدرسون بالمدارس.. نريد نروح على بلد بيه امان واستقرار وحقوق الأنسان نريد نرتاح تعبنا ...فجاوب بكل لباقة وكال احنا اىسفين جدا على هذا التأخير التعليمات تجينا من مصادر العليا اكو ناس تمشي اجرائاتها الأمنية بسرعة واكو اشخاص اجرائاته تتأخر..فاحنا راح نساعدكم بهاي الفترة قدر المستطاع وانشاءالله راح تسافرون قريباً ..فكتلة شكرا .. واطلب من كل واحد يقابل السفير يعبر عن معاناتنا هنا بلبنان حتى حسون بينا لأن اذا ما حكينا معهم لا يبالون لأن بأعتقادهم احنا هنا مرتاحين ودنعيش وما يدرون احنا كل يوم دنموت موت بطيء.. المقابلة كلها طولت عشر دقائق بس جان ويانا عائلة سودانية قابلو معهم ثلاثة ارباع الساعة بس العراقيين عشر دقائق وربع ساعة.. وقبل المقابلة سوينا البصمات وبلغونا ان النتائج راح تستلموها اعتباراً من/12/1 الى 15 /12 بينما اللي سوو المقابلة لاول مرة نتائجهم من 15\11الى 30\11 وانشاء الله خير والكل تسافر باسرع وقت يا رب...
واطلب من كل الأخوان في المنتدى المشاركة لفائدة الجميع لأن احنا كلنا بحاجة لأن نساعد بعضنا البعض ..وأشكركم اخواني وأخواتــي مقدماً على كل المشاركات...
أخـــوكــم المـهــاجـــــــر
