كيف اعمل صورة قيد و اترجمها

[Birch]

السلام عليكم

ممكن رجاءا تساعدوني اشلون اسوي صورة قيد و اترجمها مع العلم اذا كانت الجنسية محافظات.

تحياتي..........

بيرج

[Aiham_]

اخوية صورة القيد كتاب تاخذة من دائرة الجنسية , تقدم طلب  تاخذة من العرضحاجي للجنسية الي انتة بيها و راح ينطوك كتاب يسمو صورة قيد لغرض الترجمة .
يعني ما يصير اتة تكتبة و تسوي

[Birch]

شكرا اخي العزيز ايهم على الاجابة و التوضيح.

اذا رحت للجنسية الي بيها سجل النفوس مالتي و كتبت طلب و زودوني بكتاب صورة قيد لغرض الترجمة , بعده شنو اسوي ؟ يعني وين اترجمه و اصدقه ؟ ارجو التوضيح.

تقبل تحياتي...

[Aiham_]

بشارع الرشيد الجنسية العامة ينطوك صورة قيد مترجمة

[Birch]

شكرا اخي ايهم على الاجابة و ممنون منك  و ما قصرت.

يعني باختصار : اروح للدائرة الجنسية الي بيها الجنسية مالتي و اطلب صورة قيد لغرض الترجمة , وبعده اخذها للشارع للرشيد للجنسية العامة و ينطوني صورة قيد مترجمة, وبعده اصدقها بدائرة التصديقات بوزارة الخارجية. صح؟

[$$$$$]

حبي اكو ولد سوو الاتي:
تروح تاخذ صوره قيد من جنسيتك مو لغرض الترجمه بس صوره قيد وخلص وراها توديها لاي مكتب ترجمه معنمد والاغلب يترجمون يم مكتبه نادر بالكراده يم المسرح الوطني وهايهيه
لان همه كاتبين صوره قيد مترجمه وخلص ولا اكو داعي حتى تصدقها لا من الخارجيه ولا هم يحزنون وانت بعد بكيفك اخويه

[Aiham_]

حبي اكو ولد سوو الاتي:
تروح تاخذ صوره قيد من جنسيتك مو لغرض الترجمه بس صوره قيد وخلص وراها توديها لاي مكتب ترجمه معنمد والاغلب يترجمون يم مكتبه نادر بالكراده يم المسرح الوطني وهايهيه
لان همه كاتبين صوره قيد مترجمه وخلص ولا اكو داعي حتى تصدقها لا من الخارجيه ولا هم يحزنون وانت بعد بكيفك اخويه

شنو هالحجي يابة , ليش تجاوبون على شغلة ما تعرفوها , صورة القيد تتطلب منك الجوازات مال كل افراد العائلة ,  و اصلا الجنسية مالتك بس اتجهزك بكتاب للجنسية الي بشارع الرشيد و مناك تصدر مترجمة و مصدقة

رجاءا لا تجاوبون على شغلة ما تعرفوها


يا مكتب نادر يا بطيخ انتة صدك تحجي

[jack_of_arabia]

السلام عليكم ... أخي العزيز Birch بما انك مو من بغداد اللي عليك تسويه الاتي : تروح لدائرة الجنسية اللي صادرة منها جنسيتك وتسوي طلب لضابط الجنسية لغرض الحصول على قيد 57 لغرض الترجمة والتصديق , بعدين من تحصل على القيد راح يدزونك بكتاب مرفق مع القيد داخل ظرف للمديرية العامة اللي صاير بمحافظتك بعدين المديرية العامة اللي بمحافظتك راح يزودنك بكتاب جديد للمديرية العامة اللي ببغداد يخلون القيد والكتاب الجديد ايضاً بظرف ويدزونك لبغداد " يعني سالفة طويلة وبيها خسارة ", انت لا تروح ولا تعب نفسك للجنسية العامة اللي صاير بمحافظتك  , بعد حصولك على القيد من الجنسية مالتك تروح لاي مترجم قانوني بمحافظتك ويترجمه إلك ويختمه  وماكو اي داعي تروح تصدقه من الخارجية هذا كله كلام زايد واللي يثبت كلامي انا من سويت القيد ترجمته يم مترجم قانوني وبالمقابلة ما كالوا اي شيء وانت من راح يجيك موعد مقابلة راح تجي بيه فقرة " دفتر العائلة (قيد 57) صادر عن الجنسية العامة للجنسية مع ترجمة عنه من مكتب ترجمة قانوني" وكذلك اصدقائي اللي قابلوا سووا اللي انا سويته وما كان اي اعتراض من السفارة وراح ارفق إلك الملف اللي يثبت كلامي ... تحياتي . جاك

ملاحظة : يجب ان يحتوي القيد على صورة شخصية هذا شيء مهم.

لتحميل الملف : http://www.4shared.com/document/vM64VEOD/BGH_medical.html

[$$$$$]

اخ ايهم انت ليش ضايج؟؟؟
هاي السالفه صارت ويه 3 من جماعتي قابلو ومحد حجه اي شي بالسفاره واخذو اوراقهم بمجرد ماطلعو صوره القيد ودوها لمكتب نادر وخلص والايميل اللي تدزه السفاره واضح وصريح صوره قيد مترجمه يعني احنه ليش دائما نعقد الامور على نفسنه؟؟؟
وبعدين اني ماكتب اي شي ما متاكد من عنده
تحياتي الك ولتضوج

[alkorishe]

اخوية الله يكون بعونك صورة القيد راح اتعبك حبيبي انت استلم صورة القيد وبعدين اي مكتب معتمد ترجمها والسلام  الله يسر امرك

[storm2000]

السلام عليكم
اخوان انتو ليش ضايجين كلكم الحجي مالكم صحيح 100% , اني صارت وياية مشكلة بالرشيد بعد ماجبت صورة القيد 57 ومرحت لا مكتب نادر ولا غيرها اني ترجمتها لاني مو ابغداد ورحت للمقابلة يوم 13 بالسفارة ومحد كالي ليش وخلصت ورجعت

[الفاروق]

السلام عليكم
اسف للمداخله واغلب الحجي هو عندما تكون المقابله من اي او ام ولاكن اذا كانت المقابله في احد السفارات في دول الجوار وطلبوا صوره قيد مترجمه ومصدقه من الخارجيه
السؤال هل يتم تصديق صوره القيد المترجمه من اي مكتب بدون الرجعه الى الجنسيه العامه للمحافظه او الجنسيه العامه في بغداد من قبل دائره التصديقات في وزاره الخارجيه
ارجوا توضيح هذا الموضوع من قبل الاعضاء الذين لديهم خبره لكي تعم الفائده للجميع
وشكرا مقدما لكم

[ALQUBIAS]

ياشباب الطريقتين يشتغلن ومابيهن مشكلة بس خلي نفرض الولد مشت وياه الشغلة وسافر بخير وسلامة,إذا مستقبلا طلبوا منه أو من غيره  قيد 57 مترجم ومصدق من وزارة الخارجية العراقية لأي سبب كان,خلي نتوقع أي شي مستقبلا... وين راح ينطي وجهه الواحد بذاك الوكت؟همين سوي وكالة لشخص وجيب و  ودي  ....الطريقة الي كال عليهه الأخ ايهم بيهه( ضمان و أمان) والاغلبية ديتبعون هالشي ...بالنسبة للاخ صاحب الموضوع هيه شغلة ال SIV يرادلهه شخص متفرغ لمعاملته إذا عندك وقت سويهه مراجعات عادية ,وإذا ماعندك وقت سويهه بمكتب ترجمة قانوني...

شكرا للجميع

[Birch]

شكرا اخواني الاعزاء على الاجابة و المساعدة و التوضيح و يسلمواااا.

المشكلة صورة القيد طالبتها وزارة التعليم العالي من صديقي لانه يريد يدرس بالخارج ,فاتوقع يدرونها صادرة من الجنسية العامة بغداد مثل متفضل الاخ ايهم و يريدونها مصدقة من مكتب التصديقات بوزارة الخارجية.

سؤالي بدون زحمة عليكم , اذا طلبت صورة قيد من دائرة الجنسية الي بيها الجنسية مالتك و زودوك بالكتاب , وراها ضروري تروح للمديرية الجنسية العامة الي بمحافظتك ؟ لو تكدر تروح مباشر للمديرية الجنسية العامة بغداد لغرض التصديق و الترجمة؟

مع فائق الشكر و التقدير..........