ارجو النصح و الافادة ان امكن

[كاتسوموتو]

تحياتي لكل القائمين على هذا الموقع الجميل و للاعضاء الكرام و للمعلومات القيمة التي يشاركونا بها.
اني قبل اربع اشهر تقريبا كتبت كيف تعرضت عائلتي لضرب سيارتهم من قبل الامريكان و الخ من الامور من مستشفى و علاج و القضية الي صارت و هسه همه بالاردن بعمان و قدموا طلب الي افتهمته منهم مكان لاعادة التوطين و قابلوا و انطوهم 6 اشهر اقامة في عمان و كالولهم احنه نتصل بيكم بس صار شهر و نص تقريبا و لا حس و لا خبر , اني شخصيا بروسيا و هذي المعلومات الي افتهمتها بالتلفون , اذا ممكن احد يفهمني شنو القضية و شنية الاجراءات الي لازم يسووها بعد

[(COBRA)]

اخي كاتسوموتو
طبعا هم قدموا على اليوان ..... وانطوهم ورقه الحمايه لطالبي اللجوء ومدتها 6 اشهر قابل للتجديد وليس اقامه
ووهسه حاليا راح يكون ملفهم قيد الدراسه  ومن يشوفون بانه مستحقين توطين الى بلد ثالث  راح يرفعون ملفهم الى بلد التوطين  ويتصلون بيهم ويسون مقابله على التوطين ........  وغير شي او اجراء اخر ماكو ....... هاي هيه القصه مال  اهلك

[كوكي 2004]

أخي العزيز ممكن توضحلنه اكثر يعني بأي قسم قابلوا بال un وشنو نطوهم 6 شهور أقامة  

[m.a.m]

مرحبا اخي

اولا بالنسبة لسؤالك عن التقديم اكيد بالبداية يكون بالمفوضية وينطوهم ورقة حماية تجدد كل 6 اشهر واذا اقتنعو بقضيتهم يحولون الملف لقسم التوطين ويسوولهم مقابلة توطين ووراها يحولوهم للiom وينتظرون المقابلات وبالنسبة للوقت محد يعرف شكد اتطول الشغلة اكو ناس بسرعة واكو سنين الله العالم


         من الله التوفيق ويارب يسهل الامور للجميع


                اختكم ام حنين

[كاتسوموتو]

شكرا على التجاوب و الرد , الحقيقة اليو ان مبين مهتمين بيهم لان حتى ما خلوهم ينتظرون لان الوالدة جان عدها عملية فاول يوم رأسا سولهم الاجراءات و انطوهم ورقة الستة اشهر, ان شاء الله خير , همه حابين يطلعون لكندا من زمان جانت عدهم هاي الفكرة و بعد الحادث حيل تعبوا و ما يردون بعد يبقون بالعراق , اني والدتي خطية انضربت طلقة بالطائفية و النوبة الضربة مال الامريكان , طبعا مت تكدر تجرع العراق بعد

[m.a.m]

الله يشافي الوالدة ويحفظه ان شاءالله

اكيد اخي من شافو وضعيتهم سرعو شغلتهم وبالتوفيق ان شاءالله وحسب مدنسمع ان كندا صايرة اسرع من امريكا


           

[كاتسوموتو]

اشكرك اخي على مشاعرك الطيبة و يحفظ لك كل التعزهم ان شاء الله
الله كريم و ان شاء خير , المشكلة انه اني بعيد عنهم بالصيف ان شاء الله انزل للاردن و طبعا راح افتهم الشغلة احسن بالتلفون مو هلكد واحد بالتفصيل يكدر يعرف