شلونكم شباب اريد احجيلكم قصة شاب عراقي هستوة متخرج ومكيف....شوفوا تفائله الزايد؟؟

[P AS]

•   السلام عليكم

شلونكم شباب اريد احجيلكم قصة شاب عراقي هستوة متخرج ومكيف....شوفوا تفائله الزايد؟؟
بعد فرض طوق امني.. واغلاق اربع شوارع.. كانت مغلقه اصلا بسبب المجاري الطافحه. انطلقت حملتي الخاصه لاعاده اعمار العراق. وبميزانيه تتجاوز الخمسطعش الف دينار .فمثل اي فلاح معاصر..لبست الدشداشه والشماغ...وشلت الكرك والخرماشه .. وشمرت عن سواعدي...وحطيت (الهيدفون) ابذني. وبديت ازرع الحديقه الاماميه المطله على الشارع.
وعلى ايقاع مجموعه من الاغاني الوطنيه الحماسيه..
ياكاع اترابج كافور
اليوم يومك يا بطل
العراقي ابو الغيره
وبوس الواوا
صعدت عندي النخوه والشهامه والغيره... وكلت ليش ياربي كل مهندس معماري يتخرج يشيل غراضه ويسافر. شلون كلبهم ينطيهم يسافرون ..ميكولون منو الي راح يبني العراق. اني لو تنقلب الدنيا مااعوفك ياعراق... صحيح اليوم ازرع حديقه .. بس انشالله باجر اصمم مطار ..وراها ابني ناطحه سحاب..الا اكلب العراق دبي. بس افرجها يارب. افرجها يارب على كل العراقيين.
وفي هذه الاثناء...هبت نسمه هواء منعشه. اعطتني الامل بان لحظه الفرج قريبه.
..فكلت يالله راح تفرج....
بعدين كامت الكاع تنهز جوه رجلي...
فكلت اي ياربي افرجها افرجها.
((بس هاي شبساع بعدني هستوني دعيت))

وبدت الكاع تتفطر والتراب يتناثر وكبت العجه..

هاي شنو صارت صدك
واني غمضت عيني و اصيح اي فرجت فرجت.
فررررررررجت
الله واكبر الله واكبر
فرجت
وبعد ان عادت لحظات الهدوء..فتحت عيني ..لاكتشف ان سبب هذه (الهزه) وجود ثلاث مدرعات امريكه توقفت على بعد امتار مني...
وفي ثواني..فتحت ابواب المدراعات و(طفر) منها مجموعه من المارينز.واحد انبطح. واحد ختل وره الكونكريت .واحد طفر على بيت الجيران .واحد نزل من مدرعه ورجع صعد بلخ.واحد راح ركض لجنبر الجكاير واشتره باكيت.
ثم تقدم احد الجنود بخطوات بطيئه وصاح.. بوجهي ..
اخصمك وانتشروا ابكل المنطقه...
اه..اسيبك لا
اتذكرت ان الهيدفون مازال يردح اباذني ....وبسرعه خاطفه نزعت الهيدفون ولحكت على اخر كلمتين للمترجم حيث قال...
انته شدسوي هنا
فقلت له بصوت طفولي بريئ و حنون
اننننني دازرررررررع
فهجم عليه بعنف وجرني من ياخه دشداشتي الانيقه وهوه يقول..
ها زين تعترف يعني
و هاي الاكياس السوده شنيه
كتله ..هاي درنات مال بتيته
ولك وفوكاها جايب اسلحه جديده
اصعددددددددددددد
يمعودين وخروا شصعد شنو السالفه
لحد يجرني
اصعددددددد يله
زين بس لحظه خلي اغسل ايدي متربه
ولك شتغسل شنو هل ارهابي النازوكي
وهجموا عليه وبدون رحمه وشدوا ايدي وعيني
بعد ان تجمع الناس من ورة (عياطي) ..صاح المترجم بالميكرافون ...
هذا الي جان يزرع عبوات بلمنطقه
هذا الجان لايص الوضع الامني ابغداد
صارلنا ساعه دنراقبه ..ولزمنا متلبس...
لابس شماغ ودشداشه..وديحفر..ويمه اكياس سود...وديصيح الله اكبر
ميسووي هيجي غير الارهابي المجرم
وين المهجرين خلي يرجعون
هاي هيه انحلت انحلت
فرررررررجت

((اي والله فرجت اني هم جنت داكولها قبل شويه))
واطلق سكان المنطقه اهازيج النصر وعمت الفرحه ارجاء المعموره
فقلت للمترجم باكيا
الله عليك هاي مدااتمثلون دعايه
لك يادعايه اصعد بعدين احجي
زين ابداعه جهالك هاي مو الكاميرا الخفيه يعني
ولك دصعدددددددددددد شكد تحجي
وبدفعه قويه( ادعبلت) الى داخل المدرعه المكيفه
واني لو ادري بيها هيجي تبريد جان اصعد بله مقاومه

.. وانطلق الرتل باتجاه القاعدة
وطول الطريق افكر بلخمسطعش الف لو مشتري بيها كارت ابو العشره
ومخابر بيها ولد خالتي بلامارات . جان يجوز يدبرولي فيزه..
يااعمار يابطيخ..شكد بطران اني
وفي هذه اللحظات العصيبه
انطلقت من سماعات الهيدفون اغنيه عزيزه علينا جميعا..وادعوكم لان تنشدوها معي
.موووووووطني .. موطني
الجلال والجمال والسناء والبهاااء
في علااااك

[(COBRA)]

فكره معبره ... وناضجه 
تتوازن فيه  روح النكته...... والواقعيه والتراجديا
مشكور   خوش قصه

[كوكي 2004]

الله عاااااااشت ايدك أخي شنو هل قصة الحلوة والمحزنة بنفس الوقت والي
تخلي الناس متفائلة 
وتخليهم يفكرون أأأأأأأأألف مرة قبل ميتخذون قرار العودة للعراق 

صدك عاش العراق بلد الديمقراطية
تسلم أخي وبالتوفيق أنشاء الله




              أختك كوكي \ عمان

[لوليه]

  حلوة قصة تعبر عن عراقنا العظيم  حلوة عجبتني اغنية بوس الواوا ,,,,,,,,,,,انت لو غنيتها جان عافوك 

[الريم 2000]

تسلم اخونة على القصة وماتدل على معانى حلوة ومعبرة والمعنى بقلب الشاعر واحييك على اناملك اللي كتبت ارتقاء القصة بلتوفيق---زينب

[Abdullah2006]

عاشت ايدك ع القصه المعبره عن واقع العراق ا

[شنايزر]

رووووووووووووووووعه

عاشت الايادي قصة جميلة جدا تعكس واقع مرير للبلد وهموم المواطن

[ميمي2010]

عاشت الايادي
بعد لا تفكر تزرع لا بتيتة ولا طماطة

[P AS]

اشكر كل اخواني واخواتي في هذا المنتدى الرائع الذي يزيل جزء ولو يسير من هموم المواطن العراقي البائس على اعجابهم بقصتي