اخوان وصلتني رسالة من usaid بخصوص العمل

[رائد حكومي]

شلونكم اخواني وخواتي
وصلتني رسالة من هاي المنظمة تطلب الحضور الى مقرها لغرض الاختبار . علما ان عقد العمل كما مكتوب سنة فقط وانا موضف في احدى الدوائر الحكومية البسيطة براتب 480 الف فقط , بماذا افعل انا محتار, اترك الوضيفة مع الحكومة العراقية , وما يضمن لي بعد فترة شهرين او ثلاثة اشهر اذا التحقت العمل مع usaid  يطردوني وينهون خدماتي , وهل هي صحيح منظمة محظوظ الذي يعمل فيها وراقية جدا , علما لاتوجد اجازة في الدائرة

[رائد حكومي]

وين الردود اخواني

[$$$$$]

اخويه العزيز اني جنت مثل حالتك اشتغل بالدوله وجتيني فرصه العمل ويه الجماعه بس بوكتها عفت الدوله لان راتبي جان 204 الف ونص بس انصحك اذا ببالك فرصه السفر لامريكا ولو مظل بيها وكت يمكن كلها كم شهر يعني تكدر وره متشتغل فد 3 اشهر تحصل ركومنديشن من السوبر فايزر مالتك وتقدم على برنامج اللجوء iom واذا مبالك السفر اكعد بالدوله واسكت والله كريم وانت بعد اعرف بوضعيتك

[lyoo]

اني اويد كلام اخي مدري اختي $$$$$ 
اذا بالك السفر الى امريكا فحاول من هسه تشتغل وياهم وتقدم على ركمنديشن وهيه الاهم تحصلها بحكم علاقاتك اللي راح تشتغل وياهم واذا عندك عرف اضبط تحصلها بيومين لكن اذا تعرف مراح تحصل شي وراح تخصر وضيفتك فلا تجازف
واذا بيها مجال من شغلك الحكومي اتكللهم اريد اجازه وجرب بالشغل الجديد واتمنى يفيدك

[اسمر زيونة]

  مبروك اخوية ...
  على اي مشروع  ب  USAID  خابروك حتى اكدر افيدك لآنها راعية لكثير من المشاريع في المنصور والكرادة والمنطقة الخضراء

[iraqi_pride]

اني برايي تعوف الدولة و تشتغل وية المنظمة و تكمل العقد سنة وياهم و تطفر للاردن تقدم لجوؤ وكان الله يحب المحسنين
و انت اعلم بظروفك و الله يوفقك... صلي استخارة

[رائد حكومي]

شكرا اخواني الاعزاء على هذه الاجوبة , اني حلمي هو السفر الى امريكا , واتمنى ان اغادر العراق واخلص وارتاح , حتى بالوضيفة مالتي ممرتاح فاريد اشتغل وية هذه USAID  بس اريد اعرف فوائد العمل وياهم , شنو معنى الريكومندش , اخوان ساعدوني

[iraqi_pride]

من تريد تقدم على لجوء لامريكا راح يطلبون منك ورقة تثبت انك جنت تشتغل وية الامريكان هاي اذا مقدم عال اي او ام (منظمة الهجرة الدولية) فالريكومنديشن هي ورقة توصية من مديرك بيها المدة الي اشتغلت وياهم و شاشتغلت و وية منو و اسم المنظمة

[رائد حكومي]

مكتوب في الورقة - مكتب بغداد , اني تحجيلي وساعديني , خما خطرة اذا اشتغل وياهم مثل بالمنصور او الكرادة من حيث الدخول والخروج الى الموقع العمل , وشنو تفاصيل المشاريع مالتهم بالكرادة والمنصور وغيرها , وهل صحيح محظوظ الي يشتغل وياهم

[LACOSTE]

السلام عليكم , تحياتي الك
اخوية العزيز اني حبيت انطيك رأي بالموضوع اولا بما انه انت موظف حكومي ودزولك شورت لست على المقابلة معاهم روح قابل واختبر وكمل المقابلات البقية لحين ما يتصلون بيك ويكولولك تعال وقع العقد واشتغل ويانا ذاك الوكت تكدر تترك العمل مع الحكومة او تكدر تاخذ اجازة حتى تضمن خاف بعد فترة يبطلوك من عملك هذا
وطبعا بيها فوائد هواية العمل مع ال يو اس ايد تزكية وايضا رواتبهم زينة

واتمنالك التوفيق
شكرا

[رائد حكومي]

شكرا اخوية على الجواب , بس اني اذا وقعت العقد شلون راح ايبطلوني من الشغل بعد فترة قصيرة مثل , اني او ما اتعينت واني اراسل الشركات الاجنبية , علمود اطلع الى امريكا , بلكت احصل وياهم شغل واخلص من العراق

[lyoo]

اخي اني اوويد كلام iraqi
حاول تشتغل وتسوي علاقات وياهم حتى ينطوك ركمنديشن وهذام اهم شي هو السبيل الوحيد اذا قدمت على الي اي او ام حتى يقبلوك
وجازف بيها شباقي من العمر

[رائد حكومي]

اخوان اذا اشتغلت مثل ثلاثة اشهر وبطلوني , اكدر اقدم على برنامج iom  او siv  , لو لازم احصل ريكومندش يلة اكدر اقدم , يعني اني وية علاقاتي وية المنظمة , يعني اذا محصلت ريكومندش اكدر اقدم لو لا

[iraqi_pride]

اذا ما تحصل التزكية ما تكدر تقدم عالاي او ام لان شلون تثبتلهم انت جنت تشتغل وياهم؟
بس بحالة انه عندك عنوان المسؤول مالتك و رقم تليفونه بحيث يخابروه و يسألوه و هذا طبعا لازم يكون عندك اذا عندك تزكية او لا
لان اذا ما حصلو المسؤول مالتك تنرفض قضيتك او تنام عليها الطابوكة مثل ما صار وية هواية ناس
يسموهة employment verification

[رائد حكومي]

اسئل هل يؤثر انسحاب القوات الامريكية على الشركات الاجنبية لو لا , لو هي باية في العمل

[Black Angel]

السلام عليكم ورحمة الله

اخوية العزيز بالبداية اهم شي تعرف هل انت تشتغل مع ال usaid مباشرة ام عن طريق منظمة متعاقدة مع ال usaid لانه حسب معلوماتي ال usaid تطلب نوه من التجيك الامني يروح لواشنطن وعادة ال usaid يخلون منظمات تسوي مونتير او اوبريشن لمشاريعها والي هي ب 3 مناطق
(الشمال تشمل موصل وكركوك وكردستان وسطة وهي بغداد انبار ديالى صلاح الدين والجنوب اصبحت معروفة ) وبعد ان يشتغل الشخص فترة العقد مالته الي تكون بين 10-12 شهر مع هذه المنظمة يتم تحويله الى ال usaid
بالمناسبة رواتبهم مو شي ثابت يتغير حسب الشخص وكفائته ونوع عمله وانت تعرف هذا الشي لان اكيد ارسلولك الفورم الخاص بيهم وسالوك عن رواتبك للسنين ال 3 او ال 4 الاخيرة لان من خلالها راح يحددون الراتب الي تستحقه وهكذا
فانت حدد عزيزي اولا انت وراح تشتغل شنو طبيعة عملك والمناطق الي تشتغل بيها شنو راتبك شنو التبعات القانوينة اذا كسرت العقد وياهم ورة متحدد هاي الامور راح تكدر تاخذ فكرة انت شتريد تسوي ولاتنسى انت تعرف ظروفك افضل من غيرك فالقرار الك وحدك

[رائد حكومي]

عندي كم سؤال
1- شنو الفرق بين شخص يعمل مع usaid مباشرة او مع منظمة متعاقدمة معها
2- اذا حصلت ريكومندش من السوبرفايزر مالتي اكدر اقدم على برنامج iom او siv واني بعدني اشتغل وياهم .
3- اذا كملت السنة عمل معهم هل ينهون عقدي ام استطيع الاستمرار معهم .
4- حسب معلوماتكم هل قامت هذه المنظمة باخراج عراقيين الى امريكا عن طريق برنامج iom او siv  بعد اعطاء الى موضفيها ريكومندش