مساء الخير طلب مني احد الاعضاء نشر معلومات مقابلاتي عسى وان يستفيد منها بعض الاخوة والاخوات الذين لم يأتي موعد مقابلتهم بعد
المقابلة الاولى
طبعا نمت الساعة 1:30 بالليل وكعدت ساعة 4 الفجر وكعدت المرة والجهال وتركينا وبدلنا ملابسنا المهم صارت ساعة 6 وطلعنا وصلنا ساحة النسور ساعة 6 ونص ولكينا هواية ناس واكفين سرا يعني مايقارب ال 60 او 70 شخص عزاب وعوائل وكفنا بالسرا وجا جندي كال كل واحد iom يخلي هوية الاحوال داخل الجواز مالته وطبعا ابني محمد من وكفنا بالسرا كل 10 دقايق وكلي اريد اشاورك وانزل راسي ويشاورني ( بابا يلا خل نروح البيت صار ساعة واكفين ) وتقريبا ساعة وراها وصلنا باب حديد اخذو جوازاتنا ورا 10 دقايق طلع هذا الاجنبي دخل زوجتي واصغر اطفالي وبعدين اختي وباقي الاطفال وبعدين دخلت اني ولكيت تفتيش واخذو الجنطة من عندي وسجلو اسمي ورا شوية انطوني الجنطة ودخلت مكان تفتيش سونر المهم ودونا كرفان بيه عوائل كعدنا تقريبا 20 دقيقة وجتي وحدة مصرية صاحت اسمائنا وطلعونا برا وكالت يلا تعالو ورايا مشينا مسافة قريبة دخلونا صالة شوية اكبر من الكرفان الاول وجا شخص اردني انطانا تعليمات انه عينكم على الاطفال واذا سمعتو انفجار كلكم تتركون اغراضكم وترحون ورا الصبات وراها بخمس دقايق صاحو اسمي واخذوني اني واختي وزوجتي وكالو اتركو الاطفال المهم طبينا غرفة صغيرة بيها ميز و3 كراسي والبنية اللي اللي اخذت المعلومات مصرية بس الله يشهد كولش خوش انسانة وحيل مرتبة بالبداية كالت انت هسه مثل واحد ديقدم دعوى للقضاء واحنا نسجل الدعوى مالتك ونعرضها للمختصين وقبل هذا راح اخذ منكم معلومات تخص حياتكم المهم اني جنت اسمع انه لازم احفظ تواريخ الدراسة شوكت طبيت وشوكت طلعت وهذا شفته غير صحيح لأن البنية كلتلي انت مواليد كذا وبما انه مرسبت بالابتدائية يعني ورا 6 سنوات دخلت متوسطة في سنة كذا صحيح كلتلها صحيح واسئلة عامة شكد عدد الاخوة ومواليدهم وين ساكنين بغداد لو لا وشكم مرة تزوجت ووالدك شكم وحدة متزوج وكذلك والدتك وزوجتي نفس الاسئلة ورضيعتي سألوها بس عن دراستها واكتفو لأن هي نفس معلوماتي وبعدين اخذت المستمسكات تصورها وانطيتها الترجمة مال هويات الاحوال وشهادات الجنسية فشفتها فرحت وكلتلي احنا منجبرك على الترجمة بس انت زين سويت وراها كالت روحو ارتاحو ربع ساعة واصيح اسمك علمود مقابلة القصة وطلعنا ومرحنا كعدنا بالكرفان جوا لأن لكينا اكو كراسي برا الكرفان والجو طيب بقينا كاعدين برا وكلساع جاي واحد من ذولي الحرس بسكت على بيبسي على جاي على حلويات للجهال المهم ورا نص ساعة صاحت جتي البنية المصرية صاحت اسمي ورحنا اني واختي وزوجتي بالبداية وقعنا اوراق بانه هذي المعلومات اللي ياخذوها تبقى سرية وبعدين راحت زوجتي وبقينا اني واختي ووقعنا على اوراق في حالة قبولنا سيستقطعون اجرة الطيران على مدى 3 سنوات وراها كالت اني راح ابدي باختك فانت تكدر تتفضل واني اصيحك ورا نص ساعة او ساعة وطلعت وجا واحد مصري بيده كاميرا وكال المقابلة الاولى كلهم يدخلون جوا علمود ناخذلهم صور وهذا المصري كولش غثيث بحيث اللي شوية يتأخر او راسه اعوج يضل يحجي ويذب حسرات بس الحمد لله ارتاحيت لأن ابني علي طلع روحه وراها طلعنا برا الكرفان وجا واحد من الحرس كلي تحبون اجيبلكم دجاج كتله لا لأن احنا جايبين لفات ويانه بساعة جتي اختي وكعدنا سولفنا تقريبا 10 دقايق وجتي صاحت اسمي ودخلت وسألتني اول شي قبل 2003 شنو تعرضت اريد شي شخصي فاذكرتلها شي صار ويا والدي وبعدها سألتني شوكت بديت العمل وشوكت خلصت وسألتني عن التهديدات بالتسلسل وليش متكدر تستمر بالعراق وشنو تتأمل من توصل امريكا او شتريد تسوي هناك طبعا هي تسأل سؤال واجاوبها وهي تكتب يعني من كثر ماهي تكتب اني من يمي اصابعي تعبت ورا ماكملت القصة تقريبا ساعة كاملة والسبب في تأخير مقابلة القصة هو ترجمة القصة وراها كالت راح اقرا عليك اللي حجيته واذا اكو اشتباه وكفني وكلي وراها راحت جابت الاوراق من الطابعة وكالت وقع وكالت تطلب شي عندك شي تحب تظيفه كلتلها لا وطلعت ورا 10 دقايق جا المصري اخذنا واشارلنا على الباب اللي نطلع منه وطلعنا والحمد لله ساعة 3 ونص العصر واتمنى اكون وصلت فكرة طيبة
المقابلة الثانية
طبعا كالعادة عدنا تعداد الساعة 4 الصبح كعدنا وتريكنا وبدلنا ملابسنا وهذا يصيح جواريبي وين وذاك بردان وفوكه فوكه المهم طلعنا الساعة 6 ونص وصلنا ساحة النسور ساعة 7
ولكينا عائلة وحدة مكونة من زوج وزوجة كالو انتظرو الباب ينفتح 7 ونص بعدين جتي عائلتين ودخلونا عائلة عائلة وكعدنا بالكرفان
نص ساعة وراها جا الأخ المصري وكال كلكم مقابلة ثانية والكل جاوب نعم فكال يلا ورايا واخذنا للصالة مالت الانتظار وقبل مندخل كال
تجمعو وحجالنا انه اليوم المقابلة المصيرية والمحلف عنده 3 خيارات إما موافقة وتبقى الامنية وإما قيد الدراسة وتاخذ وقت بسيط
وإما لاسامح ألله رفض ويكدر يستأنف خلال 90 يوم
وجواب المحلف راح يجيكم خلال 60 يوم من تاريخ المقابلة واذا مجاكم جواب ابعثولنا ايميل
المهم ولاواحد كعد بالصالة لأن باردة وكلنا طلعنا برا على الشمس ورا نص ساعة صاحو اسمي ودخلوني وكلولي المكان ضيق منكدر ندخل زوجتك واختك وياك ومن تكمل تدخل زوجتك واختك واخذو وزن وطول وبصمات وصورة
وأول مكملت بصمات جتي المحلفة الأمريكية
وسألت عني فصاحني المترجم وكلي يلا جيب عائلتك وادخلو كلكم يم المحلفة ومن يطلعون ياخذون صور وبصمات الى اخره المهم دخلنا
وسلمت على المحلفة والصراحة هي بس تضحك وفرحانة بالجهال وكعدنا وعرفتنا بنفسها واعتذرت عن صغر الغرفة وكالت الشغلة يجوز تطول سنة او سنتين
اني مااعرف لأن انتو تعرفون عدنا هواية تدقيقات وامور بواشنطن والقرار بيدهم
وعرفتنا بالمترجم وكالت
تقبل بي فكلت نعم وكالت اذا ميعجبك بدله واذا تشوفه ميترجم صحيح كولي وبعدين حلفته انه تبقى المعلومات سرية ورفع ايده وقسم وبعدين
اني وزوجتي رفعنا ايدينا وكلنا ( اعاهدك ان اقول الحقيقة ) وخلص وبعدين طلعت ملفاتنا وتعرفت على اسمائنا واحد واحد وعدكم اسماء اخرى يعني كنية او اسم دلع
ومواليد الاطفال ووقعنا بعض الاوراق
وبالنسبة الية وقعت بالنيابة عن الاطفال وبقت تتشاقى وية بنتي وكلتلها بالعراق يتزوجون وهمه صغار لتتزوجين وكملي دراستج وكمنا نضحك كلنا وبعدين كالت راح ابدي اسألكم اسألة روتينية وجوابها نعم او لا اذكر منها
تحترم قانون امريكا
دعمت الارهاب
عندك مخطوف
دفعت فدية
تتعاطى المخدرات وحقيقة اني ضحكت وهية همينة ضحكت
شاركت بحرب
هل عذبت احد لأنه يخالف دينك او مذهبك
عندك باج دخول الخضراء جاوبت لا بس عندي باج مالت الشركة وردت اطلعه فكالت تكدر تدخل بالباج مالتك للخضراء
كلتلها لا بس للشركة فكالت مااحتاجه
وبعدين طلعت مصاص وانطت للأطفال وطلعو عائلتي وبقيت بس اني وكالت اي سؤال متريد تجاوب عليه براحتك وسألتني منتمي للحزب
جاوبت لا ومكالت ليش وشلون مثل مكالي البعض المهم خادم عسكرية جاوبت نعم شكد المدة 3 اشهر دفعت بدل وين المكان
شنو تدريبكم بس رياضة صباحية ومسير وتفكيك السلاح نظريا رميت رصاص كلا تلقيت دورات عسكرية غير هذا كلا سحبوك احتياط
كلا شكد جان البدل وبعدين سألتني على الشركة منو جان داخلها وشنو طبيعة العمل مالتها وانت شنو دورك بيها وتدربت على السلاح
بالشركة نعم يشترط في القبول ان يخضع المتقدم لأختبار رمي 10 رصاصات حتى يتم قبوله
شركتكم بس بغداد لو كل العراق شغلها الجواب كل العراق وبعدين بدينا بالتهديد والقصة طبعا هية تباوع بالقصة وتسأل شوكت أول تهديد احجيلي
شصار وترجع تباوع وتكول وبعدين شسمعت يعني مختصر مفيد من القصة تاخذ مقاطع وتسألك بس ابد مغالطتني ولا استفزتني
ولا حجت شي مموجود واني بالمقابلة الاولى كلتلهم عندي صور للتهديد وكتاب من المجلس المحلي بس هية ابد مطلبتها من عندي
وراها سألت ليش هددوك تعتقد كلت لأن اشتغل بشركة امريكية
ومنو ذولة مااعرف زين ليش يلاحقوك معافوك والله مااعرف شتعتقد يصيرلك اذا بقيت بالعراق الجواب يقتلوني وطبعا مسألتني ليش متروح
لغير محافظة أو كردستان وبعدين سألتني شكم مرة مسافر بحياتك فكلتها مااذكر بالضبط فكالت يعني اكثر من 10 مرات فبديت اذكرلها قبل السقوط شكد مسافر وبعدين ورا السقوط شكد بس نسيت اكلها اني سافرت قبل 4 اشهر لزيارة اخوية لمدة 3 ايام عادي لو لا
مع العلم الختومات بالجواز وصدوك نسيت هية ابد مكلبت الجوازات بس جانت تقرأ الأسم وبس واني جنت اسمع المحلف يشوف ختم ختم
يادول مسافر
وهل يوجد بجسمك وشم الجواب كلا وسألتني عندك كفيل نعم
بعدين كالت اني اكتفيت عندك سؤال تحب تسألني كلت لا وكالت اني اسفة للي حصلك واطلب منك تحافظ على نفسك بهذي الفترة
وكالت اسبوعين او 3 راح يجيك جوابي وهو انتظار فعادي لتقلق المسألة طبيعية وراها سلمت عليها وعلى المترجم وطلعت
يم عائلتي وسألت زوجتي واختي وكالو اخذنا صور وبصمات وكعدنا تقريبا نص ساعة وحقيقة جنت اسمع انه المحلف يطلع وياك وينادي على الشخص الثاني اخاف تحجي ويا واني مصار هيج وياية وبعدين جا المترجم وصاح اختي دخلت على المحلفة وراها بدقيقتين جا الاخ المصري
ودخلني وطلع ملفي وكال انت خلصت هسه بس وقع وانطيني عنوان كفيلك وروح للبيت فكتله اختي بالمقابلة كال عادي تريد تروح تريد تنتظر كتله لا انتظر وراها بنص ساعة او اكثر طلعت اختي وطبعا نفس الاسئلة واختي اثناء المقابلة بجت فتكول المحلفة دمعت وانطتني كلينكس وكالت لتبجين حبيبتي واني فهمته لأخوج انه يجيكم جوابي خلال اسبوعين وهو الانتظار لتخافين المهم الصراحة من قابلت المحلفة شعرت بأنه اني انسان واكو من يهتم بية وبعائلتي وبعدين طلعونا
واني اسف لأن طولتها وعرضتها بس اني قبل مااقابل جنت اتمنى واحد يشرح بالتفصيل علمود اكون مستعد ولهذا شرحت بالتفصيل والله يستركم ويسترنا ويحفظ الجميع واهم شي عن تجربة صلاة الشكر طبعا كل شخص بحسب دينه قبل كل موضوع تريد تقوم بي واترك الباقي على الله
وتحياتي للجميع
الفحص الطبي
رجعت من مستشفى ابن البيطار والحمد لله كملت الفحص الطبي طبعا اول شي بالباب شافو جوازاتنا ودخلونا بكرفان انتظرنا تقريبا نص ساعة وراها دخلونا بصالة صغيرة وصاحو اسمائنا وكل واحد ذكرلهم مواليده وانطونا محاظرة صغيرة عن ماهية الفحص الطبي والاطفال تحت سن 15 بس فحص سريري يعني لافحص دم ولا اشعة المهم اخذونا لمكان صغير اخذو طول ووزن وبصر وتجييك ضغط وسكر ودم وكلها مطولت ربع ساعة وراها رجعونا بكرفان شوية جبير وبقينا مايقارب ال 10 دقايق ودخلونا على الدكتور سألنا من الصغير للجبير مسوي عملية بحياتك عندك اصابة بجسمك والاطفال الذكور مطهريهم ويجيك اسمك بالجواز وية الفورما مالتك وتقريبا بقينا ربع ساعة وراها كالو ترحون تاخذون اشعة صدر ومكانها بس تعبر الشارع يعني مقابل مستشفى ابن البيطار وبالفعل عبرنا الشارع وصعدنا درج واخذنا اشعة مطولت 5 دقايق ورجعنا للبيت واتمنى اكون وصلت المعلومة
واسف للاطالة واتمنى اكون ساعدت الاخوة والاخوات في منتديات عنكاوا
