موضوع محير وموقف محرج - اخواني اخواتي اللي يكدر يساعد لا يقصر

[dannybasim]

اخواني اخواتي الاعزاء
لي قريب عزيز عليَ سافرت عائلته الى تركيا وقدموا على الهجرة الى امريكا وهو بقى هنا لانه عنده اعمال ما يقدر يتركها هنا لاسباب خاصة به المشكلة انه كان يعمل سابقا بديوان الرئاسة السابق والحرس الخاص وهسه عائلته هناك قالوا لليونفي المقابلة الثانية انه تاركهم حتى لا يسافر معهم بس المشكلة انه عائلته حايرين اذا يسألوهم وين كان يعمل هل يبلغون انه كان يعمل بديوان الرئاسة ام لا، لانه محتارين وخايفين اذا يكولون حقيقة عمله السابق اخاف يأخروهم بتركيا وبالمقابل ديخافون اذا ميكولون عن حقيقة عمله السابق اخاف يدققون وراهم ويكتشفون الحقيقة واحتمال من يوصلون لامريكا اذا رادوا يعملون له قضية لم شمل ويكتشفون تاريخه المهني السابق اخاف يعرقلون قضيته
اخواني القضية متشابكة واني حاير بشنو انصحهم انتو انصحوني حتى اكدر اساعدهم
تحياتي اخواني واخواتي الاعزاء

[فرعون مصر]

اخي خلي يحجون الصراحه ولا يخافون ماكو مشكله

[malak.ali]

اذا يكذبون وينكشف كذبهم هي هاي المشكله

[كوكي 2004]

والله ومن تجارب ناس أصدقاء وأقارب

الحرس الجمهوري والحرس الخاص والمخابرات والأمن العام وفدائيوا صدام هذوله كولهم عليهم علامات أستفهام
لأن يعتبرون أكثرهم مشارك بجرائم ضد الأنسانية لأن أكثرهم شاركوا بدخول الكويت وحلبجة والأنتفاضية الشعبانية وغيرهه
طبعآ هذا الكلام مو أحنه الي نكوله ولكن دول التوطين عدهه معايير معينه
صحيح كثير من هذه الصنوف أنقبل توطينهم لأن كدروا يثبتون أنهم ماشاركوا بأي شي .

تحياتي لحضرتك وبالتوفيق انشاء الله

[dannybasim]

الاخوة ياروحي ، فرعون مصر ، والاخت malak.ali شكرا جزيلاً على مروركم العطر
بس والله يا اخوان حيرة شيسووون هما حايرين اكيد اني ويه الاخت ملاك مليون بالمية انه الكذب مشكلة كبيرة لانه اذا اكتشفوا الكذب يسوولهم مشكلة بس تتوقعون انه مراح يأخروهم اذا كالوا الحقيقة مع العلم انه الرجل مثل ما كلت ممسافر وياهم يعني بس الاولاد والزوجة والاولاد شباب مخادمين عسكرية
انتظر ردودكم
وتحياتي لكم جميعا

[Edy Simon]

عزيزي ابو الموضوع....
اكدر اكلك من خبرتي الحكمة هي النجاة في الصدق......
اذا حجه الصحيح مهما كان افضل ان يضم او بعدين يكتشفون انه كذب عليهم او راح يجي رفض انه اقواله كاذبة......
حسب علمي انه اهوايا من هذولا الاكبار السابقين طلعو اواهوايا دول رفضتهم او اهوايا دول اللي رفضت العراقيين مثل السويد حوتهم, لذا انصح ان يقولون الصدق او الله كريم
تحياتي
جوسي البغدادي المانيا

[lyoo]

النجاة في الصدق بس هسه هم بلوة

[dannybasim]

 اخواني في عينكاوا يعني اتوكل على الله وانصحهم انه يكولون الصدك
تحياتي لجميع من ساعدوني

[عماربغدادي]

السلام عليكم اخي صاحب الموضوع

احجيلك عن معرفه من اشخاص اعرفهم في عمان انهم نفس شغلت الجماعه الي كان

حرس خاص او حرس جمهوري او ضابط حجو الصدق صدكني 90بالميه اجاهم رفض

اني احجيلك اهنا في الاردن ويمكن اكثر الاعضاء يعرفون هذا الشي بس مع الاسف

من واحد يحجي الحقيقة يرفض وبقت الشغله يمك ويارب الله يسهل امورهم


اخوكم عماربغدادي

[steven_siv]

اهم شي دفتر الخدمة وين مكتوب تاريخ الخدمة على ضوئها يحجي و2 شي ياحبيبي هذولة تجذب يصدكوك تحجي الصدك يكذبوك
تحياتي

[مياده حناوي]

اخي صاحب الموضوع,,نصيحتي الك عن تجربه,, لايكول عن شغله السابق ومادام هو ما موجود بالقضيه ف ماكو داعي للكلام عن عمله السابق واذا ال يو ان سألوهم وين ابوكم خلي يكولون بقى بالعراق لان امه مريضه وأذا سألوهم شنو عمله خلي يكولون كاسب,,ومن يوصلون بالسلامه الى امريكا وسوون لم شمل خلي يكول هو عن عمله السابق بالمقابله مال السفاره وبهذه الحاله رح يكون بالسليم من ناحيه هو كال الحقيقه  عن عمله السابق ومن ناحيه اخرى ما يكدرون يرفضوه لان عائلتها في امريكا ولم الشمل قضيه انسانيه اولا وأخيرا...
مع احترامي ل آراء الآخرين .

[احبكم1]

اذا كالولهم جان بالحرس الخاص او بالحرس الجمهوري خل ينسه بالمستقبل شي اسمه امريكا وهاي عن تجارب يو ان تركيا بالخصوص

فدير بالك اتكولهم عن عن عمله السابق خل ايكولون فيترجي احسن والنجاه في الصدق هاي بس ابوكت الرسول مو هسه
لان اني كلت الصدق ودكوني تااااااااااااااااااااااااجيل سنه وبتركيا
وتدلل

[strongway]

اخونا صاحب الموضوع .... تره افضل شي اخونا هو الصدق

ولعلمك راحوا هوايا وهسه هم في امريكا وكانوا اعضاء فرقة في الحزب وطبعا من تمت مقابلتهم حجوا الصدق ...بس اهم شي يكون مو  من ضمن قائمة البلاك لست ...

فدير بالك اخي من الكذب يعني حتى لو هسه ما حجيتوا الصدق على اعتبار هو الان مش معاكم ولكن عندما يصير لم الشمل رح يجيكون وراه  وخاصة هسه ديدققون هوايا بهذا الشي من بعد احداث كنتاكي اي مو مثل قبل كان اهون ...
فتوكلوا على الله والي كاتبه رب العالمين يصير  ....

وكل من وحظه ونصيبه والمقسوم له ....

[ام الهنا]

 اخواني ولو آني ما أعرف بهاي الامور ، لكن الشخص مجرد اسمه بالحرس الخاص تكون عليه علامة استفهام حته لو كان عمله اداري يعني مبيهه تمييز ؟
وصحيح اعرف عائلة لاتزال بالاردن مقدمين من 2005 ولهسه يسمعون حسكم ممتحرك ملفهم خطوة وحده من اليو ان .
ان شاء الله تسمع جواب شافي .

ام الهنا