نصيحة لخوكم الحلي ارجو تدخل الكل لان رئيكم عندي مهم!!!

[جاسم الحلي]

السلام عليكم اخواني اخواتي العنكاويين
 انشاء الله ربي كلكم اتسافرون وابسرع وقت ممكن كولو يارب !!!

اخواني احب احجيلكم قصتي بس رجأ بدون استهزاء بل الموضع ؟ واعرف القرار عايد الي !
اخواني اني مترجم سابق ومقدم علئ iom ومكمل كلشي من 18\1\2011 وبعد ذالك صار عندي طفل والحمدلله لان كنا ننتظره بفارق الصبر وانتم تعرفون الاجرأت طبعااااااااا لحد الان اني مادخلت الموضع هههه !! وماريد اكسر واهسكم بل السفر..... اخوان موضع ال iom طويل حيل لان اكو جماعة صار 5 سنوات ينتظرون هسسسسسسسه راح ادخل الموضع  اخواني اني هسه حاير واني مترجم وصار سنة وشوية كاعد بدون اي عمل زين اني عندي زوجة وطفل واني قبل كلشي افكر بيهم مافكر بنفسي لان ماريد ابهذلهم ولان زوجتي طلع تعينها علئ الصحة لان هيه خريجة علوم حياة بايلوجي والحمدلله فازت بل القرعة وصار التعيين بس لحد الان ممباشرة هذا 1 اما 2 اني حالتي المادية متوسطة يعني امتلك سيارة +قطعة ارض واذا ابيعهم لازم اضيف مايقارب 10,00000 مليون دينار ياله اكدر اشتري بيت اما من ناحية اني مترجم منطقتي كلها تعرف اني مترجم واشوف النظرة الحقيرة بعيونهم علية بس مايكدر يحجونها بل المباشر بس اعتقد اذا سنحت الفرصة ...الله اعلم ؟؟ هسه قرأت موضع في عينكاوا اني احد الاشخاص يستقطعون منه اجور النقل 114 دولار كل شهر وهو عائلتة مكونه من 5 نفرات بعد 6 اشهر الي صرف علية بيها مع العلم عندة عمل ماعندة زين اني ولله خايف اخاف يطلعلي السفر وتصير ماعرف اشلون يعني اخاف اروح واخسر الي عندي واضل مضحكة  3 اخاف زوجتي تخسر الوظيفة وبعد ماتتعيين لو تطلع نخلة براسها ومن باب عندي طموح ااروح لمريكا لان العراق ميصير براسه خير وهذا شي كلنا نعرف بيه زين اني لا اكدر افتح مصله بهل الكم درهم الي عندي اخاف ساعة الساعة يكلولي ياله وهنة مثل خلالات العبد اذا خسرتهن بعد لااكدر اشتري بيت ولا اكدر ارجعهن اخواني واخواتي صحيح القرار عايد الي بس اريد اعرف رأيكم الله يخليكم يجوز من خلل أراء الاخوان والاخوات اكدر اقرر ورجأ رجأ رجأ بدون استهزاء بل الموضع ولو ما انتم اخواني واخواتي اني ماكتب تفاصبل عن حياتي هيج لان اني معتبر عينكاوا عائلة .....


واحب اسمع ردودكم لاتبخل بل الرد .




اخوكم جاسم الحلي

[home front]

مساء الخير بحسب رأيي الشخصي لتضيع فرصة السفر وروح ومهما تواجه من متاعب مو اصعب من وضعنا وثانيا انت عندك قطعة ارض عيفها لتبيعها واذا لاسامح الله مرتاحيت هناك على الاقل من ترجع عندك قطعة ارض تكدر تبنيها او تبيعها لأن الاسعار دتصعد تحياتي

[malak.ali]

بأختصار شديد


اذا ضيعت فرصة السفر من ايدك راح تبقى طول عمرك متندم

نصيحة اخت لاخوها اذا اجاك السفر سافر وجرب حظك

[عصفورالنار]

 السلام عليك ولله ياخي اني حسيت بيك وبضعك لان اني حالتي نفس حالتك اني زوجي ظابط بلجيش الحالي وبرتبه مقدم والحمدلله عايشين وراتبه امكفينه وعنده بيت اهله ملك وهو الوحيد الى اهله ودنتظر موعد السفر بس الشغله ومابيه الواحد ميكد يرفض هيجي شي حتى لو يعرف امساوئه اخاف يندم وبعدين الندم ميفيد بس  زوجتك متكد ادوم ومن يطلع السفر تاخذ اجازه وحتى لو منطوه خلي اتبطل لان ايجوز شغلتك اطول و بعدين ا ظيع المشيتين وطبع احب اكل شي اني اهلي ابمريكا وكلونه شغل اهنا كلش صعب وماكو واذ جيتو تحلمون اشوفون هيجي راتبب بس ابنفس الوقت هم انكول اروح ولك جزيل الشكر وعذرني طولته عليك

[محارب]

حسبي الله ونعم الوكيل
يا أخي حالي من حالك وما اعرف شكول
 الله يعينك وينور دربك




اخوك
ابو سمسوم

[assaad2011]

السلام عليكم شلونك اخوية اولا دير بالك على نفسك وعائلتك وفكر جيدا قبل القرار لكن
 احكيلك عن نفسي اذا تحققت مثل هاي الفرصة ولو كنت اعمل براتب خمس ملايين وصار عندي سفر الى امريكا اكيد راح اقرر اروح لامريكا حفاظا على عائلتي
وانتة بكيفك والله يسهل امورك وتختار الصح اكيد

[Fatboy]

شوف صديقي طبعا ردود الاخوة كلهة اتعبر عن وجهة نظرهم,,,,, القرار الاول والاخير الك طبعا الوضع بالعراق ما اتوقع يتعدل وبنفس الوقت انتة اذا اتسافر وتروح راح تبدي من الصفر بس اريد انصحك نصيحة وحدة خليهة ابللك اذا اتروح بالسلامة اهناك فالايجابيات اكثر بهواية من السلبيات خاصة انتة عندك طفل والنصيحة هي لتقارن الحياة اهناك بالحياة الي اتعيشهة بالعراق لان بس راح تبدي اتقارن حياتك بالي جنت عايش بي بالعراق راح ايصير عندك هوم سك وراح ترجع ترجع..... الي ايريد شي ايعوف شي وربك ميسد باب اذا ميفتح واحد بمكانة ,,,,, اعرف الي اتريدة بحياتك واخذ القرار وية زوجتك واعرف انه الحياة هناك مراح يستقبلوك بالورد,,,, واتمناللك الموفقية

[جاسم الحلي]

السلام عليكم
طبعا اني صاحب الموضع


يعني مثل malak.al ومثل كلش حباب واشكر الاخوان : المنتظر للابد Fatboy عصفورالنار home frontاشكركم كلكم واريد بعد الاخوان يدخلون وينطون رأئيهم ارجع واكول مثل malak.a ومثل كلش حباب مثل موضوعي ايضا حايرين  اخوان احنة ارباب عوائل يعني الخطئ الي انخطئة مو هين علينا راح يأثر سلبيا علئ عوائلنا وانتم تعرفون هذا مو مثل الاعزاب والله لو اعزب اني اروح لو انام علئ الرصيف مادير بال لان اني رجل انام لو بل الزبالة زين احنة باقيين لا شغل ولا عمل ولانكدر ندفع رشوة حتئ نتعيين خاف انسافر ! ومثل احد الاخوان يكول دكاترا عافو الدكتوراء وراحو اي صح لان عندة مبلغ الي يعيشة عيشة زينة واذا رجع هو دكتور يسوي عيادة راح خلال سنة يرجع امورة مثل ما كانت واذا اني وانت الي عدنة عوائل واعمارنا راح تجاوز الحد القانوني للتعيين اشلون بينا اخوان هذا القرار مو سهل للعندة عائلة وانتم تعرفون هذا لاتاخذكم فرحت السفر اني اخاف نتدم علئ ونخسر الاول والتالي اني اريد أتاكد هل احنة علئ طريق الصواب ؟؟؟ هذا الموضع صحيح شخصي بس اعتقد بيه فائدة لجميع لاجئ عندة عائلة !!! احنة واكعين بورطة ورطنة نفسنا من اشتغلنا وي الامريكان والعراق اوف العراق مابية مستقبال ابد مابية ارجو الرد

[durar]

مساء الخير بحسب رأيي الشخصي لتضيع فرصة السفر وروح ومهما تواجه من متاعب مو اصعب من وضعنا وثانيا انت عندك قطعة ارض عيفها لتبيعها واذا لاسامح الله مرتاحيت هناك على الاقل من ترجع عندك قطعة ارض تكدر تبنيها او تبيعها لأن الاسعار دتصعد تحياتي

رأيي من رأي الأخ هوم فرونت
اتمنالك الموفقية

[عصفورالنار]

اخي العزيز ارجع وكول هسه انته لو الكل ادكل ميفيدك السفر وسئلني اني المنتدى والقارب والاهل ويجوز حتى زوجتك انت  هم اتروح ومتكدر ترفضه

[جاسم الحلي]

اختي العزيزى عصفور الخير والجنة انشاء لله مو عصفور النار !!

صح هذا الكلام احنة مضلومين بل العراق وهذا شي واقعي ومانكدر انغيرة ابد وفرصة السفر ترة هاي فرصة مثل مواحد يشيلك من النار يخليك بل الجنة .... وصحيح بل العراق نعمل ونتعب وبامريكا ايضا بس احنة اني وانتي والاخ كلش حباب ارباب عوائل لازم انفكر اكثر من العزاب اني مصر علئ السفر حتئ اكول اني ميخالف انضلمت بس خلي اوفر لطفلي حياة افضل من حياتي اني من مواليد 1983 انولدت بل الحرب وتررعت بل بالحرب وصبيت او صرت صبي بل الحصار وشبيت بحرب 2003 وشبابي بل الطائفية شنو الي شفتة اني ماكو شي بس احنة كاعد ندمر بل التأخير ولازم انضبط امورنا انتي واحدة من الناس زوجج مقدم يعمي عمرة يمكن فوك 40 سنه يعني مابية حيل يشتغل شغلة صعبة اشلون يروح بأمريكا يصفط ويكعد اني خايف هذا الانتظار كلة واخاف يكلولك انت مرفوض هاي اشلون بالة اسف اذا زعجتج اختي

[مهندسه]

مساء الخير بحسب رأيي الشخصي لتضيع فرصة السفر وروح ومهما تواجه من متاعب مو اصعب من وضعنا وثانيا انت عندك قطعة ارض عيفها لتبيعها واذا لاسامح الله مرتاحيت هناك على الاقل من ترجع عندك قطعة ارض تكدر تبنيها او تبيعها لأن الاسعار دتصعد تحياتي

مساء الخير اخويه
ادعي الله يسهل عليك امرك
الحجي مضبوط home front
لتبيع القطعه هسه وربما تحتاجها في وقت اخر
واذا تكدر انتقل الى منطقه اخرى وان شا الله تسافر وتحصل شغل والتسهيل من الله
والرزق على الله واصور اخونا ابو قمر كال هوايه اكو شغل بتكساس لان متاثرت بالاقتصاد

[عصفورالنار]

ولله ياخي حجيك كله صح بس شسوي اشجابر على المر غير المر منه بس تدري ولله اني صارلي كم سنه ابسط المور  ااني اخاف من اليل وماكدر انام المشكله ماكو امان تر ى الانسان  لو اشكد ميملك اذ ممرتاح مبعينه كلشي

[abo shams]

اخي العزيز بصراحة لازم تحسم الموضوع

لانه بهذا التردد اذا سافرت ويه اول عقبه تلكاك رح اتلوم نفسك كثير و ايظا اذا بقيت اذا اي منغص صار وهي كثير بالعراق رح تتالم لانه ما اخذت

 الفرصه ... امريكا لا هي الفردوس بيه تعب وصعاب وبيه امان و ضمان حقوق بشر .. و العراق بعد اكو داعي احجيلك على سوالفه .. اخي انته

صاحب القرار يعني بس اتخلي ببالك السفر لا تنضر الى قطعة ارض لان بالتاكيد مارح ترجعله ولا تنضر الى وضيفه دوامه ثلاث ساعات وراتبه تتبارك

الله و الشهر كلله عطل

[malak.ali]

عيني مادام انته صاحب عائله حافظ على عائلتك واطفالك واضمن مستقبلهم

احنه هم عائله مثلكم ووالدي اكبر منك بالعمر وعنده 3 اولاد وآني ووالدتي ومع ذلك يكول لو اعرف اجدي هناك ولا راتب 10 ملايين هنا

المهم اضمن سلامة اطفالي واضمن كرامتهم[/color][/size]

[انيس الجالسين]

الزميل الكريم .. جاسم الحلي
لو تأملت قليلاً بحال العراق واهله لوصلت الى نتيجة وقرار ثابت ، وهذا ما اسشعره في مشاركاتك الانفة ، لكن انت يبدو متردد بعض الشيء
، وربما تحتاج لبعض القصص الواقعية من حياة الزملاء الذين سافروا لامريكا وكيفية العيش والفرق بين البلد الحالي وامريكا (مع انه لا مقانة اطلاقاً)
المهم : انا موظف حكومي وراتبي جيد نوعا ما ولدي عائلة ايضا لكن توصلت لقرار نهائي ، ان العيش هنا في العراق ظلم لنفسي ولكرامتي ولانسانيتي اولاً وظلم لزوجتي واطفالي ثانياً ، وربما لا احتاج لسرد السلبيات الموجودة في العراق ، فالكل يعرفها جيداً ، لكن عندما اجد أن الانسان في امريكا له حريته في التعبير والعيش والكرامة ، والقانون يسري على الجميع ، اجد ان هذه الامور هي اهم بكثيييييييييييييير من اي مبلغ او منصب يمتلكه العراقي وهو فاقد لكرامته وانسانيته ، لذلك تجدني انتظر ساعة السفر بفارغ الصبر .
سبقني اخوتي في السفر والحمد لله ، واذكر لك احدهم وهو بعمرك وله عائلة من زوجة وطفلة ، كان هنا في العراق لا يملك شيء ، وربما يعيش على ما نقدمه له من معونة ، وسافر قبل سنتين تقريباً ، الان هو بفضل الله اولاً يملك  سيارة له ولزوجته واستطاع ان يجمع بعض المبالغ وهذا من خلال عمل بسيط جدا ، (عامل في احد الاسواق ) ، طبعا هذا لا يعادل شيء من الراحة والطمأنينة والحياة المستقرة التي يعيشها ، بل الان يملك من الطموح ما يجعله ينظر الى المستقبل بعين المتفائل في تحسين الحياة والوضع المادي
ربما لست بحاجة لسرد هذه القصص الشخصية لك ، لكن من باب توضيح بعض الامور لدى الكثير من الاعضاء او الانتفاع ببعض القصص الواقعية لتزيد بها قناعتك باتخاذ القرار المناسب
انصحك بمراجعة بعض المواضيع التي تشرح واقع الحياة في امريكا ، وسبل العيش فيها ، وخاصة مواضيع الزميل العزيز ابو قمر
وايضاً ، انصحك في الوقت الحالي ان تعيش حياتك الطبيعية ، بدون التعويل على قرار المنظمة بالسفر او عدمه ، لان الاجراءات طويلة وربما تستغرق الوقت ، لذلك عش حياتك طبيعي ، لحين ان يأتي يوم السفر ، وحينها اترك الجمل بما حمل ، ولا تهدر الفرصة التي تهيئت لك والتي يتمناها الملايين من العراقيين او من اي دولة اخرى ، ولك ان تتأمل !!!

[مهاجر المهاجري]

راح انصحك نصيحه مال اخ لاخوه واني هسه بامريكا وشفت شلعان الكلب بس لاتكول هذا ميريدلي الخير لانه انته عندك فد شي بالعراق الي هو الكاع وتعيين زوجتك وبالمستقبل شيل من منطقتك وشوفلك تعيين الله الرزاق - هسه راح اكلك النصيحه لاتجي وتضيع سنوات عمرك هنا بلافائده خوب انت تكول هذا الشخص عنده خمس نفرات ياخذون منه فوك الميه دولار اني 3 نفرات ياخذون مني 119 دولار والحبل على الجرار والله تبقى على ضيم العراق احسنلك وانت اذا حلاوي يعني اذا ساكن بالحله فالحله خوش شغل بيه اخويه من بغداد صارله 8 سنوات يشتغل بالحله على كل حال انت حر

واذا تكول ليش مترجع لعد ان شاء الله اني ملتزم بعقد بس اخلصه المده مالته ارجع ان شاء الله

[yasir fakhri]

أخي جاسم الحلي السلام عليكم اولا احب ان اذكرك بالقول الماثور ماخاب من استخار ولاندم من أستشار وبما انه حضرتك عندك عائلة المفروض ميكون قرارك وحدك يعني تاخذ راي اهلك بالموضوع لانه الوصول الى اميركا ليس بالشئ السهل والنجاح فيها ليس بالشئ المستحيل لابل وممكن ان تجد فيها فرصة افضل من عشرة فرص تجدها في العراق وكل شئ بالحياة يجب ان يتم بالاتفاق مع وجود النية والرغبة وثانيا العراق يبقى ةطنك ووطن اهلك واجدادك اي ليس لاحد ان يحرمك من هذا الحق اي الرجوع او العيش في العراق وايضا احب ان اذكرك ان الفرص لاتأتي كل يوم لتدق بابك وكما قال امير المؤمنين علي عليه السلام (عليكم بأغتنام الفرص فأنها تمر مرور السحاب)
نصيحتي لك ان لاتفوت هكذا فرصة وان تهئ نفسك وعائلتك لهذا المشروع الكبير رغم الصعوبات التي سوف تواجهها في البداية واميركا وايضا بعض الدول الاوربية هل بلاد الناجحين والمصرين على تحقيق النجاح ولاتجعل فشل او تلكؤ بعض الناس عملا محبطا لك وتوكل على الله والرزق موجود اين ماتذهب وتروح.
أخوك ياسر

[azzawi1982]

السلام عليكم شلونك اخويه اني نصيحتي ان باسرع وقت اطلع وخلي قطعة الكع لاتبيعه ولو الله اليستر باجر عكبه يجيبولك سند من الطابو وتطلع وبيوعه الكع الالف واحد هههه الله لايكوله طبعا بس كلشي اتوقع من العراق العظيم اخي والله اني من جنت بالعراق اعرف علماء ودكاتره والله العظيم شاهد عليه خبراتهم راهيبه وكل فتره وفتره تجيهم دعوات من بلدان عربيه واوربيه حته يلقون محاضره باختصاصهم بس المشكله ضلو بالعراق وتمسكوا بوضيفتهم بس تدري من يجي واحد ابتدائية ماعنده وميعرف يكتب اسمه اصلا وماتشتري بفلس يجي ويكتل هالانسان العالم والي كضه كضه عمره يقره حته وصل الهل مرحله يجي هذا الحشره يخلص عليه والله قهر وجريمه بحق العراق فياأخي نصيحه اتوكل على الله وسافر وان شاء لله زوجتك تلكه احسن وضيفه هناك وانته هم وتمشي حياتك واتمنالك الموفقيه


اخوك العزاوي

[sparky]

"لو تجري جري الوحوش غير رزقك ماتحوش"
استخر الله واخذ بالاسباب المطروحه من الاخوه الطيبين وتعليقاتهم اللي مشكورين جدا عليها
وربنا ييسر امورك باي قرار تتوصل له والقرار الذي ستتخذه انت فقط وبالتوفيق

[مجروح واكابر]

حبيبي مشي امورك منا لوكت السفر وكضيها شلون مجان بسيارتك :
من ينطوك موعد سفر بيع سيارتك وخلي فلوسها بجنطة زوجتك لا تخليها بجيبك لان حتصرفها
وقطعة الارض لتبيعها
روح سافر وراح يكون عندك كم فلس سند وياك وبنفس الوقت عندك قطعة ارض بالعراق
روح جرب شوف وضعك  ودبرها منا منا اذا شفت نفسك تحب البقاء ابقة واذا متحب ارجع ..
النسبة لتعيين زوجتك  كمله هسة وخليها تداوم كم يوم وراها سويلها اجازة امومه 6 أشهر
واكو اجازة سنوية بدون راتب 
تحيااتي

[مغترب بلا وطن]

بأسم الشعب والحزب 

اولا : اذا تريد تسافر لامريكا لازم تحرك السفن وراك , يعني متباوع ليورة لا على وضيفة ولا على سياره , امريكا بالبداية صعبة خصوصا اول سنه , والنظره الى الوراء تخليها اصعب وتعيشك بكابوس ليل نهار. اذا تريد تطلع لامريكا وتعيش مرتاح لازم تشيل هذا التردد منك ومتباوع ليورة ابد.

ثانيا: بالنسبة للوضيفة يا محفوظ السلامه والبكة ترة الوضايف بالعراق هية عباره عن بطاله مقنعة , كاعدين ويثردون سوالف وياخذون راتب , ميسوون اي انجازات واقعية.

ثالثا : انت مو اول واحد هيجي , اكو قبلك الالوف نفس حالتك بيهم الي اختار امريكا وبيهم الي اختار العراق و الاغلبية العظمى اختاروا امريكا.

رابعا : تعال هنا واحجيلي الحجي بيناتنا محد يسمع  اذا زوجتك رافضة السفر وانت متردد ف وية اول صعوبه تشوفوها بامريكا راح تطينلك عيشتك  الميت ميتي واعرف شلون مدفون 

الخيره فيما اختاره الله  , روح الزم شباج ابو الحسنين هو يدليك على الدرب

ابو عروبه 
هاي ساره كاليفورنيا الله يذكرها بالخير سمتني ابو عروبه  , هية وينها يمكن انتحرت   

[Banjamen]

اخوان اكو اشياء غير المادة ولو المادة جدا مهمة بس كلمن وعندة وجهة نظر بالموضوع من ناحية ظروف كل شخص  ترة البعد عن الاهل والوطن والاصدقاء هم صعب جدا ومحد يعرف هشي الا لمن الواحد يسافر  ويبقة اشهر وسنين خارج العراق وبعدين يعرف شنو اقصد,,, بس لا تنسى اي قرار انت تاخذة اتوكل على الله بي دائما, وشوف مصلحتك وين بدون ضغوطات ومغريات ,, انت اذا قانع بعيشتك بالعراق وتشوف البقاء بي مستقبل الك ولعائلتك واحب الك من الهجرة والغربة ابقى واذا مقانع وضايج وتشوفة مابي مستقبل والدول الاجنبية احسن الك ولعائلتك فقرار السفر بعدة بيدك والوقت ما خلصان  فكر هواي وخذ راحتك ,,, اني اعزب وعايش بعمان بس الصدك اني بكد ما العراق ممعروف مستقبلة شنو وبكد ما تأذيت من عقول الكثير من العراقيين داخل العراق والامن والطلايب الدتصير بالعراق بس اكتشفت ان العراقيين اهون من الكثير من البشر  و اني ضعيف عاطفيا اتجاة البعد عن اهلي واصدقائي وناسي اليحبوني واليحتاجوني ان اكون يمهم دوم ... اسأل ربي ان يصبرني ويوفقني بالليحبه ويرضاه الي وتمنالك كل التوفيق والسعادة باي خطوة تخطيهة...

[جاسم الحلي]

بأسم الشعب والحزب 

اولا : اذا تريد تسافر لامريكا لازم تحرك السفن وراك , يعني متباوع ليورة لا على وضيفة ولا على سياره , امريكا بالبداية صعبة خصوصا اول سنه , والنظره الى الوراء تخليها اصعب وتعيشك بكابوس ليل نهار. اذا تريد تطلع لامريكا وتعيش مرتاح لازم تشيل هذا التردد منك ومتباوع ليورة ابد.

ثانيا: بالنسبة للوضيفة يا محفوظ السلامه والبكة ترة الوضايف بالعراق هية عباره عن بطاله مقنعة , كاعدين ويثردون سوالف وياخذون راتب , ميسوون اي انجازات واقعية.

ثالثا : انت مو اول واحد هيجي , اكو قبلك الالوف نفس حالتك بيهم الي اختار امريكا وبيهم الي اختار العراق و الاغلبية العظمى اختاروا امريكا.

رابعا : تعال هنا واحجيلي الحجي بيناتنا محد يسمع  اذا زوجتك رافضة السفر وانت متردد ف وية اول صعوبه تشوفوها بامريكا راح تطينلك عيشتك  الميت ميتي واعرف شلون مدفون 

الخيره فيما اختاره الله  , روح الزم شباج ابو الحسنين هو يدليك على الدرب

ابو عروبه 
هاي ساره كاليفورنيا الله يذكرها بالخير سمتني ابو عروبه  , هية وينها يمكن انتحرت   

                                                                اخواني وينكم انت الي في امريكا

اما اخواي انت مغترب بلا وطن !!! اني مسوي اجتماع وي زوجتي وي اهلا زوجتي وي اهلي الكل اتكلي اتوكل علئ الله وروح انا موضع التعيين حاسبين احسابه ناخذاجازة ياما مرضية ويأما بدون راتب سنة ونتوكل علئ الله والواحد يحجيها مالت الله زوجتي المرأة اتكول وياك لو للنار لو للجنة ونشتغل اهناك ونساعد والله كريم لان العراق مابية مستقبل وصدكني احنة المترجمين !! علينة خط احمر يعني ساعة الساعة الحكومة اتشيلنا لان الحكومة احزاب باجر اذا صوتو علية بل البرلمان راح يطلعونا احنا مدخلين امريكا للعراق ويعني المايكل ياكلة 10 سنين اذا مو اعدام وصك وقتل ومعلوماتنا كلها عدهم ..... ارجع واعتب واكول وين اخوانا الي بامريكا لان همة اهل تجربة انريد أراهم مو بس الي اهواي عوأئل متكلة علي الله واتريد تفتهم الموضع اهناك قبل الاتروح اخوووووووووووووواني ارجوكم يعني وينكم .

[ABO SARAH]

السلام عليكم

تحياتي اخي العزيز. اخي العزيز رأيي لا تفوت فرصة السفر حتى تاخذ فرصتك ولا تشعر بالندم بعدين لكن الاهم من هذا انه لازم تواصل حياتك هنا بطريقة طبيعية يعني كانه انته عايش حتى تستقر بالعراق لان موضوع الانتظار موضوع مؤذي جدا الله لا يشوفه لصالح عبادة. اخوية الفرصة لا تفوتهه والي جاب سيارة يكدر يجيب ثانية وفكر بمستقبلك انته ومستقبل اطفالك هل السفر راح يغيرلك وضعك لو لا. رأيي عيش حياتك الطبيعية وبنفس الوقت قدم على السفر وباذن الله تتوفق بالاثنين وتترتب امورك اكثر.

تحياتي الك وبالتوفيق.