شون روتين غبي

[ساموراي]

السلام عليكم اليوم رحت اسوي معامله مال الجنسيه لمولود جديد اريد اضيفه للكيس مالتي وكانت الولادة اول بارح واليوم من مشيت بيهة للمعامله الكشرة يكول ابو الجنسيه ميصير تسويهة الا بعد شهر يعني من يوصل البريد  والنوب شهادة الميلاد الا تتصدق وهذا همين بعد اسبوعين وعلى هالرنه طحينج ناعم اروح لهذا يكول ميصير واروح لهذاك يكول ميصير والكل صارت تبيع وطنيات ونزاهة براسي زين يا اخوان اكو فد حل لهذة المشكله

[ĈAŃDŶ]

الف مبروك المولود الجديد يتربى بعزك  شسوي اخوية انتظر احنا مكتوب على جبينا انتظار طويل الامد

[ابو ايمن المياحي]

مبروك المولود الجديد عمي هذا العراق انته خوما جديد عالعراق يعني لو تنتضر لو تنطي فد خمسين الف وتجيك وانته كاعد بالبيت !!!!

[ابو فراس]

السلام عليكم اخي الكريم

اني بره العراق وهم صارت بيه نفس الحاله اني رحت سالت كتلهم بيان الولاده شكد يرادله ويوصل من بغداد الى صلاح الدين كلولي المندوب لازم يجمعهن يله يروح يعني يحتاج 5 اشهر وخبلوني بس سويت رحت للمندوب الي يوصل بيان الولاده وانطيته هل قاسمه الله وره 3 ايام كان بيان الولاده واصل للجنسيه

اخوك ابو فراس

[عمدة فرجينيا]

عالخير المولود الجديد يتربى بعزكم انشالله
ياخوية انتظر شبيك مستعجلشكو عندك هسة قابل راح يجيك موعد سفر هو انتظار انتظار اقلها اتلهي روحك بالروحة والجية

[ابو فرقان]

الف مبروك عالمولود الجديد ... هو هذا العراق العظيم لذلك انة طلعت جنسية البنتي من صار عمرهة 4 سنوات حتى لا امر بهاي المشاكل هههه

[ساموراي]

الأخوات والأخوة

ماكنتوشه
وابو ايمن المياحي
وابو فراس
الملاك الحائر
dying to leave

اشكركم جزيل الشكر على الردود الجميله والله يبارك بيكم....  وولكن الورطه  هنا اني مقابل قبل سبع اشهر بالسفارة ولازم اضيف الطفله باسرع ما يكون للقضيه وهنا تكمن العبرات

[lyoo]

الف مبروك على المولود الجديد ----بس حبيت اهني 

[كوكي 2004]

ألف مبروك على المولودة الجديدة ويارب تكون وجه السعد عليكم والحمد لله على سلامة المدام أخي ساموراي
الله يسهل أمرك وتكمل معاملتك على خير والله ليعوزك لأحد أنت وكل المنتظرين 000000 آمين يارب العالمين







                أختك كوكي

[alzandawi]

مبروك المولود  الجديد جعله الله من ابناء السلامه اخوية اذا محتاجهة وبلسرعة انطي كم فلس ليش تتاخر علمود  هذا يرفع وذاك يكبس  والله يسهل امرك
دمرونا بلعروجات مالتهم ماعرف شوكت حنصير مثل العالم  العالم بلنت تحل كل المشاكل واحنه لازم فد 100مرة ونجي وكلشي ماكو

[steven_siv]

احسن من صالحك هاي شتسوي بالجنسية يكبر الف مرة يلعنها 

[ساموراي]

اخ lyoo  اشكرك وان شاء الله الموفقيه
المنتضر للأبد  اشكرك اخلي العزيز وان شاء الله تخلص وتصير سوالف
كوكي   اختي العزيزة اشكرك جزيل الشكر على كلامك الطيب واتمنالك كل خير ويا ربي يسلمك ويسهل امرك
alzandawi  اشكرك اخي العزيز وربي يحفضك ....حاولت وياهم بس ما فاد مع العلم اني قبل سنتين انطيت خمسين الف لنفس الأشخاص وهسه صارو نزيهين
steven_siv  صديقي هيه لو مو شغلتي بيهة اروحلهة ؟؟؟ لا والله فلا اوصل

[alzandawi]

همة من يصيرون نزيهين تكول شكد يخافون الله بارك الله بيهم ومن ياخروك ويدمروك بلروحه والجية  تكول الله ينتقم منهم دنيا واخره والله ياخوية اني شاعر بمعاناتك لانه مقدم على جواز بلسفارة وهاية الله شاهد صارلة سنه و8اشهر اركض وراهموماعرف شوكت حتفض  الحبل على الجرار

[cool050]

الف مبروك عالمولود الجديد ويتربى ابعزك انشاء الله

[ABO SARAH]

السلام عليكم

تحياتي اخي العزيز ومبروووووووك المولود الجديد وان شاء الله يكون من اصحاب الحظ السعيد بهاي الحياة واتصور هاي احلى دعوة.

اخي العزيز نفس الموقف صار وياي وفضيته بخمسين الف. ولو الموضوع يكلب عليه المواجع بس راح احجيلك شلون:

تروح للجنسية واكيد راح تلاكي الدلالين مال الشغلات الي متصير الا بالفلوس وتكللهم وتفضهه. بالنسبة الي انطيت رشوة لضابط جان وياي بالمدرسة وعشرة عمر بيني وبينه وبكل صلافة وقلة ادب غير متوقعة طلب مني 50 الف حتى يكملهه ومجان كدامي غير خيار انطيته وريحت راسي من قهر الدوائر. بالمناسبة جابلياهه للبيت وهسه من يشوفني بالشارع يطلع نصه من السيارة حتى يسلم عليه.

اسف على الاطالة والله يسهلك

[home front]

مساء الخير اولاً مبروك المولود الجديد وثانياً الروتين عدنا بالعراق قاتل واحجيلك قصة الهوية مالت اطفالي توأم انولدو بالامارات سنة 2007 وسنة 2010 رحت اطلعلهم هوية احوال فكالو صدق البيان مالت الولادة من الخارجية رحت وكفت من 7 الصبح الى ساعة 10 دخلت الموظف شاف البيان وانطاه لرئيس القسم فكلي روح لعباس خلي يأكد انه هذا الختم مالته فكتله ياشباك عباس كلي انت شتحجي عباس بالقنصلية العراقية بدبي وحقيقة انصدمت كتله يعني اسافر علمود الختم زين ليش متراسلوه كلي ماعدنا حالياً اتصال مشترك المهم طلعت رحت لصديقي وهو يعرف سايق بحماية هوشيار زيباري وثاني يوم دخلت وية السايق طبعاً بدون اي سرا كبل طبينا وعلى المدير عدل وخلال 3 دقائق ختمولي البيان
فهذا هو حالنا ونكول الله كريم

[ABO SARAH]

السلام عليكم

ولو هاي ثاني مرة ارد بس اتحملوني.

كطعت مهر بالاردن واتزوجت بالامارات ورجعت للعراق عندي طفلة. اجيت اصدق العقد كالو القنصلية الاردنية مغلقة ونصحوني اسوي حجة زواج للتعويض عن العقد اتصوروا انه خلوني اسوي فحص دم الي ولزوجتي لانه اجراء روتيني للمتزوجين الجدد وغصبن عني سويته بعد سنتين من زواجي لانه اجراء روتيني. عاش العراق.

[الطيار العراقي]

15000 بجيب الشرطي الي بالباب والشهر يتحول بقدرة قادر الى دقيقة هههههههههههههههههههه

[yasir fakhri]

الف مبروك على المولود الجديد وانشاءالله يكون من ابناء السلامة

[kunda]

اخوية ساموراي جان عندي موضوع اسمة كروب المنتظرين سفر وطفل وراح تلكا بيه كل هالامور بالتفصييييل الممل بس خل اشوفة وين وارفعلك اياه

[ام الهنا]

اخوية ساموراي جان عندي موضوع اسمة كروب المنتظرين سفر وطفل وراح تلكا بيه كل هالامور بالتفصييييل الممل بس خل اشوفة وين وارفعلك اياه

http://www.ankawa.com/forum/index.php/topic,470620.msg5004150.html#msg5004150

[شنايزر]

الف مبروك المولود الجديد وانشاء الله قدوم فرح وسرور

وبالنسبة للجنسية تخلص وداعتك ومثل ماكالو الاخوان اتلها بالروحة والجية وانشاء الله تخلص

[kunda]

ام الهنا ملكة رفع المواضيع الترابية ههههههههههههه
 يابا نسيت اباركلك على المولود الجديد ...اخ ساموراي

[ام الهنا]

ام الهنا ملكة رفع المواضيع الترابية ههههههههههههه
 يابا نسيت اباركلك على المولود الجديد ...اخ ساموراي

ادلــل .. أقوى من الشدّة .. أطول من المدّة ... أحدّ من السين 

ام الهنا

[Ali leo]

مبروك المولود الجديد حبي

اسرع الطرق الى روما اثنين حمر للعرضجي وهاي هيه واشوف اشلون تجيك الجنسية للباب وانت واكف حتى مكبوسة لان احنة في عصر السرعة
المعتمد على الرش.....؟

اخوك علي ليو

[ساموراي]

اشكركم جزيل الشكر على الردود وان شاء الله تتحقق كل احلامكم وامنياتكم شكرا مرة ثانيه للجميع

[ابو حنين الطائي]

الف الف مبروك المولود وان شاء الله تتربى بعزكم وبامريكا
اخوية العزيز ما عندك غير انه تتفق وية موظف الصحة وعلى كولة اخوية ابو فراس وتنطيه هالقاسمة الله حتى يسرعها
ويارب تسهل عليك المسألة وتطلق الجنسية
تمنياتي للجميع بالموفقية واصدار الفيز

اخوك ابو حنين