جواد القابجي
(( أبوذيــــّـــات ))*****************
( كم منزلٍ للعيشِ يألفه الفتى
وحنينه أبداً لأولِ منزلِ )
حنيني الأول الأحباب ++ مندار
هناك احليب أُمّي ارضعت ++ مندار
اشما أبعد او أنزل دار ++ مندار
أرد للبيه ريحة والديَّ
**********
بچیت ابدم على الراحو ++ وناحاي
حرت وين أنگل اجدامي++ وناحاي
تراني الناس چلمیت ++ وناحاي
بسبب فرگاهم اللي عِمل بيَّه
********
أعد حروفهم وسطور ++ وصفان
ورد مرّات ألوم العقل ++ وصفان
يجيك العاذل يوصِّفك ++ وصفان
غريبْ .. او لا أحباب ابهلبريَّه
***********
نعيش انشا الله ونسعد ++ ودُمْنه
ونكسب بالجمع اخوه ++ ودمنه ...... ودْ أُمَّنا
اولا نقبل أذى الظالم ++ ودَمنه
يسيح ابسبب أشرار البرية
**************
(هُم أرضعوني لبان الحبِّ من صغرٍ
لمّا ولَعتِ على ألبانهم فطموني )
حبيبي على حبَّه ++ علَّماني
ولمَّن ردته یگرب ++ علَّماني
أگله الفرگه سوَّت ++ عِلَّه ماني
گادر عالفراگ اشلون بيَّه
*************
سنين اتذكَّر اشصادفت ++ وهويت
ياما شفت من صعبات ++ وهويت
من سرت ابطريق الشوگ ++ وهويت
انترس گلبی محبّه او عاطفيّه
*************************
alkabci51@hotmail.com 
الكاتب
