صديقي المحترم .. انا تطرقت للموضوع سابقا وايضا عدد من الاعضاء لكن عدم وجود فهرسة في المنتدى تجعل كل ما نكتبه ينغمر وسط الارشيف وكنت اتمنى ان يوضع حل لهذا الموضوع لكن كل ما نحجي بالموضوع ... نحجي ونسولف ونطلب وماكو رد او مبادرة يعني مثل المجلس العسكري بمصر اني احكم بهذا الاسلوب القديم هذا الي عندي تردون اتسولفون تظاهرون اتظاهروا بس لا تتصورون راح اغير من الاسلوب ... المنتدى هنا نفس الشي مشفت اي تطورات حقيقية بالتنظيم والفهرسة من 5 سنين ويسئل في ذلك المدير العام مو الاشراف الاشراف مبيدهم شي هذا الي استنتجته ..وهذا الي خله الكثير من الاعضاء يفقدون الرغبة في الكتابة لان مهما كتبت من كلمات ومعلومات قيمة يستفاد منه عامة الجمهور ليوم او يومين ومن ثم يختفي بالارشيف ...
ياريت واتمنى واطلب ان تقوم الادراة بدراسة فكرة ارشفة المواضيع مو وفق كتابها ولكن وفق محتوياتها مثل المكتبات الي دنشوفها ونروح نقرا بيها والامور مو صعب واكو كثير من الاعضاء ممكن ان يساعدون بموضوع الارشفة ومن خلال هذا الشي راح تقدم خدمة عظيمة للقارء وراح تقلل من مواضيع الحكولي او ساعدوني او عندي سؤال لان ارشيفنا بيه اغلب ما يبحث عنه المهاجر .. رغم اني متاكد محد راح يسمع كلماتي كالعادة لكن احب ان اذكر في كل مرة بلكي تحصل المعجزة ويسمعنا المدير العام ..
نجي هسه لموضوعك سيدي العزيز , مشكورة اختنا ام الهنا نقلت الشرح وطبعا هي دائما سباقة بعمل الخير مو غريب عليها لكن حتى نجعل من الموضوع مفيد راح اجاوبك على الاسئلة الي وضعتها باختصار :
1.هل الشخص الذي بدون عمل يحق اله التقديم
العمل في امريكا نوعين امبولاير وسيلف امبولاير .. يعني انت اما تكون موظف او تكون موظف نفسك يعني صاحب عمل خاص بيك هذا بشكل عام ... فانت اذا موظف راح يكون وياك الدبلي تو وتقدم على اساسها , اما اذا كانت صاحب بزنز ايضا راح تقدم على اساس اوراق خاصة بالبزنس مالتك وايضا هناك اعمال مراح يطلب منك اوراق .... اما اذا لم تكن لا موظف ولا صاحب عمل خاص فيجب عليك التقديم ايضا اذا كان عندك موارد مالية تجيك يعني عندك اسهم بالبورصة عندك بيت مئجره الى اخره من هذه الامور ...
هنا اريد اوضح مفهوم التاكس رتيرن مو دائما رتيرن يعني اعادة التاكس مو دائما تجيك فلوس ممكن انت تدفع فلوس يعني هي عملية ميزانية للدخل السنوي مالتك ومقدار مادفعته من ضريبة وفق مصاريفك وعدد افراد اسرتك الي ترعاهم .
2.هل الاطفال مشمولين بالتاكس ريتيرن
طبعا الاطفال هما الاساس والي راح يساعدك باسترجاع مبلغ جيد من الضريبة .. طبعا الاطفال الى حد 3 اكثر من ثلاثة لايمكن ادراجهم .. وجود طفل واحد راح يجعل منك هاوس هولد يعني رب اسرة ومن تقدم فايلك على انك رب اسرة راح يكون الك الحق بالحصول على لو انكم كريدت بالعربي دعم مادي لمحدود الدخل وهذا يمكن يوصل لل 4500 دولار حسب مقدار ما يدخلك ومقارنته بحد معين من قبل الحكومة الفدرالية وايضا وفق عدد الافراد فكلما كنت قريب من هذا الرقم كلما كان لو انكم كردت مالتك اعلى .. اذن الاطفال ضروريين جدا ..
3.شكد المبلغ تقريبا لكل شخص وللاطفال.
هذا السؤال يبعث مفهوم خاطء , لايوجد شيء اسمه شكد شخص اله شكد والطفل اله شكد لكن هناك عملية حسابية ببرنامج خاص موجود في مكاتب استرجاع التاكس وحتى على الانترنت وعلى فكرة كل المكاتب قانونا اطلع نفس الرقم لان المكتب يقوم بعملية ادخال فقط لبرنامج والبرنامج ينطيك الرقم وفق عدد افراد الاسرة وحالة الملف هل هو هاوس هولد او سنكل ووفق الدخل السنوي للشخص , لكن بعض المكاتب يضيفون اضافات اخرى تخص موضوع الاكسبينس راح تساعد في رفع المبلغ مالتك , لكن منهم من يضيف اضافات قانونيا ومنهم من يضيف بشكل غير قانوني ويعتمد على الحظ في وقوع ملفك ضمن الاودت التجييك او عدم وقوعه .. لكن دائما ما نقرب الارقام يعني دائما نكول الطفل راح ينطيك حوالي 900 الى 1000 وممكن اقل حسب الدخل مالتك وهكذا ..
4. في اي وقت من السنه يقدم وشوكت يستلم.
عادة ما تستقبل دائرة الاي ار اس الملفات بين 17او 19 شهر الواحد الى 20 بشهر الرابع .. لكن هذا ما يعني ان بعد هذا التاريخ يعزلون هناك استقبال لملفات بشكل خاص حتى بعد 20 اربعة ..
5. معنى التاكس ريتيرن انه الحكومه توزع فلوس لكل الشعب؟؟؟ في وقت معين من السنه؟؟؟ لعد ليش تاخذ منهم ضرايب؟؟؟؟؟؟؟؟؟؟؟؟؟!!!!!!!
ابدا هذا مو المفهوم للاسف بعض العراقيين الي في امريكا يتخيل هذا الشي .. الي ديصير ان الحكومة تاخذ ضريبة دخل منك وفق استمارة انت معبيها اسمها W4 والي من خلالها الدولة تقدر مصاريفك لان بيها حالتك الزوجية وعدد الي تعينهم بطريقة رياضية جميله وعلى هذا الاساس راح يحددون مقدار الضريبة الي راح تدفعها بكل شيك تستلمه .
بنهاية السنة الدولة اطبق نظام التكافل الاجتماعي شلون .. راح تقوم بعملية حساب دخلك السنوي من عمل واحد او عملين وعدد افراد الاسرة الي انت ترعاهم ومصاريفك الرئيسية اذا كان عملك بيه مصاريف تدفعها من جيبك او اذا كنت تدرس وما الى ذلك من امور ومقدار مادفعته من ضريبة .. فاذا كان دخلك بعد خصم المصاريف تحت رقم معين الدولة راح ترجعلك التاكس الي دفعتها طبعا الفيدرال تاكس وراح تنطيك منحة اسمها الو انكم كردت حسب عدد افراد اسرتك ودخلك .. يعني مثلا اذا انت صاحب عائلة مكونة من زوجة وطفلين ودخلك تحت العشرين الف راح يطلعلك مبلغ بحدود 5500 مثلا .. اما اذا كان الك دخل فالنفرض 60 الف دولار سنويا راح تدفع انت للدولة حدود 2500 خاصة اذا كانت الw4 الي عبيتها غير مطابقة لواقع حالك عند تقديم الملف ..
اذن الدولة تاخذ الضرايب كل السنة من الجميع لانها لاتعلم مقدار ما سيكون دخلك السنوي ونهاية السنة راح تشوف دخلك السنوي قليل ترجعلك ضريبتك وتبوس راسك وتنطيك منحة مالية .. اما اذا كان دخلك عالية راح تكلك ينراد تدفعلنا مبلغ عن ما حققته , طبعا الي يتذكر السنة الي فاتت رئيس الجمهورية اويامة دفع 490 الف دولار بالتاكس رتيرن مالته دخله كان حدود ال2 مليون طبعا مو راتبه كرئيس لا لتفهمون غلط راتبه الشهري كرئيس اقل من 30 الف دولار لكن اله املاكه العقارية والكتب الي الفها واني نزلت ملف الاقرار الضريبي مالته سابقا حاله حال اي فرد في امريكا ..
اتمنى ان تكون الصورة واضحة تحياتي للجميع ..
ابو قمر
