أنتباه .. أنتباه جماعة عمان

[كوكي 2004]

السلام عليكم جميعآ
أخواني وأخواتي بصراحة ماحبيت أكتب هالموضوع ولكن من دا أشوف الناس تعبانه ومقهورة وقلقه كلت لازم ولابد أن أوضح
بعض الأموربالنسبة (( للمساعدات المادية من ال UN \ الراتب ))

قبل فترة وبأحد المواضيع كلت والله لو تدرون شنو التعليمات الجديدة على سنة 2012
وتكلمت عن بعض الأمور منها أنه أصحاب الأقامات السنوية بعد ميستحقون التوطين وهذا الكلام مو آني الي أكوله ولكن دول التوطين
ورد عليه أحد الأخوان وكال ماكو هيج شي وبوقته كلت أوكي والأيام القادمة رح تثبت كلامي وان شاء الله أطلع غلطانه

هسه نجي على موضوع الراتب
بداية شهر ( 1 \ 2012 ) نزلت قائمة بأسماء ( 1000 ) عزب تقريبآ وكانت التعليمات أعادة تقييم للوضع المادي
وبعد ماكمل التقييم ( أنقطعت المساعدات \ الراتب ) عن 90 % منهم أي العزاب وفقط ألي عنده تقرير طبي مصدق من مستشفى لوزميلا والأيطالي وتكون الحالة ( أنزلاق غظروفي بفقرات أسفل الظهر والأعاقات مثل بتر الساق أو اليد وطبعآ القلب والسرطان والفشل الكلوي )
هذه الأمراض فقط ألي ما أنشملت بالقطع

هسه نرجع على أستلام الفيزا كارت من مكتب المفوضية
أعزائي لاحظتوا كانوا من يسلمون الفيزا الموظفة تسأل أسئلة على سبيل المثال
أنت وين ساكن بنفس العنوان لو غيرت والشخص لا أرادي مثلآ لاوالله أنتقلت لمنطقة ثانية
أولادك بالمدارس طبعآ أذا تاركين الدراسة ينقطع الراتب وأذا مدارس خاصة ينقطع الراتب وأذا واحد تارك والآخرين يداومون أيضآ ينقطع الراتب

عندك أحد بالخارج أذا كال الشخص نعم زوجتي أو أختي أو والدتي معناها ينقطع لأن يعتبرون أنه الأقارب ديساعدون ماديآ

العراقيات المتزوجات من أردنيين  تم قطع الراتب عنهم لأن بزواجهه من الأردني يعني بأستطاعتهه أن تحصل على الأقامة ومن ثم الجنسية
وسبق وأن أجتمعوا بيهم ال UN وبلغوهم بأن أي سيدة عراقية ترغب بالحصول على الجنسية تجي تبلغ المفوضية وهمه رح يتكفلون بالمصاريف والي هي ( 350 دينار أردني ) والي مترغب همه ميجبروهه ولكن في كل الأحوال ينقطع عنهه الراتب

وحاليآ بدوا يطبقون نفس القرار على الأخوة العراقيين الي متزوجيين من الأردنيات
لأن بزواجه من الأردنية يستطيع أن يحصل على أقامة سنوية بكفالة الزوجة ومعناها يستطيع أن يعمل ويقوم بأسرته

أخواني وأخواتي كل هذه الأمور سببها أنه التمويل من دول الأتحاد الأوروبي قل بسبب الظروف والضغوط المشاكل الأقتصادية ألي ديتعرضولهه الدول الكبرى

اتمنى أن أكون وضحت ولو الشئ البسيط من الأشكالات الي دتصير بهاي الفترة
تحياتي للجميع ودعائي لكم بالموفقية

[كلي امل]

مشكوره كوكي انشاءالله كل العراقيين يسافرون ويخلصون من هذا الهم

[كوكي 2004]

رحم الله والديج حبي أموله ولا شكر على واجب
تحياتي

[الطموح]

شكرا لهذا التحليل الصحيح
ومعلومه جديده اطرحها هنا انه حصلت حادثه يوم امس من احد الاشخاص وقد حاول الانتحار وسرعان ما تداركو الحاله
منمن كانو بقربه وتسارعت الشرطه الى نقله الى المستشفى واليوم كنت حاضر في un
وقد شاهدت هذا الشخص ومع كل الاسف ماهو وشكله مايدل الا على شخص ومع كل احترامي لكل رائي منكم
مايدل الا على شخص له سوابق من تصرفاته ومجموعه الاشخاص ومنهم امره بل هي رجل بلباس امره
واعوذ بالله منهم وقد حظرت وسائل اعلام منهم قناة الحره ولكن لا فائده من شي فالرواتب قد قطعت ولا رجعه فيها
تقبلو فائق احترامي اخوكم الطموح عمان

[jack black]

  اختي كوكي2004 الغاليه مشكوره للموضوع والتوضيح حقيقه اسلوبك رائع وانشالله الاخوه يستفادون من الموضوع لانالبارحه موضوع عدم استلام المعونه  لاحد الاخوه كان جدا مؤلم حياج الله يااصيله

[كلي امل]

ميخالف لتضوجون ولا تتفاجئون هنا بسوريه من اول ما بلشت الرواتب فالمشمولين بيهة فقط النساء الي ماعدهم معيل وكبار السن الي فوق الستين بلعمر وماعدهم شباب و الي عنده تقرير طبي من العوائل الي بيهة شباب فيجوز شويه شويه ديقلصوهة بعمان ويسووهة مثل سوريه

[ام الهنا]

تسلمين كوكي عالى التنبيه ، ولو همه خططوا ونفذوا لكن يبقى رب العالمين اكرم الاكرمين هو ينظر لحالنا ويرحمنا ويسهل امورنا ونخلص .
تحياتي لك ...

ام الهنا

[امل الوصول]

مشكورة اخت كوكي على توضيح الامور والله الكل محتاج لاي شكل من المساعدة حتى ولو كانت جدا بسيطة بس شنكول  غير الله  كريم ويوم الي يجي سفرنا ونخلص من هلجدية الي هي اصلا من حق كل لاجئ  انو ينصرفلة راتب او  يتامنلة مسكن يعينة على اعباء الانتضار المضني والي مالة  حدود وهي شلون عيني فلوس تكفي وتوفي بس نكول الحمد الله على كل حال وانشاء الله السفر للجميع

[Edy Simon]

شكراً ام مصطفي المستشارة المالية الغالية

على هذي التوضيحات المفيدة والتي اغلب الساكنين
في الاردن يفتقروها, وعلى الجهود الكبيرة لجمعها ونشرها بالمنتدى...
الله يوفقج ويحقق طموحاتج وانشاء الله يعجل موعد سفرج يارب...

تحياتي
جوسي البغدادي

ملاحظة: شنو اخبار الشمج المشوي انشاء الله
اتحنيتو بيه, الف عافية بالهنا والشفا اكلتو

[رامي حاجبة]

الاخت كوكي

السلام عليكم وعساكم دوم بخير , كل المواضيع اللي اقراها اكيد لها تقدير عالي ومشكورة عليه , بس اريد اسئل على موضوع اللي عنده اقامة سنوية ميستحق اعادة توطين هاي شوكت وشلون ويمته واذا الموضوع بالاردن من الامم المتحدة فأكيد بسوريا نفس الشي ارجوا التوضيح لانه افتر الدلكو عندي وصرت ما اوجد زين ههههههههههه

تحياتي

ابو نورا ------------- سوريا

[كوكي 2004]

أخويه العزيز الطموح
مع أحترامي لرأي حضرتك هذا مو تحليل بل المعلومات من ناس شغلهم ووظيفتهم بهذا الأختصاص وحتى أعلى من
ال UN يعني بصراحة وللتوضيح أكثر (( عندي أصدقاء يشتغلون بمنصب عالي بمقر الأتحاد الأوروبي بعمان ))
وقبل فترة زرتهم بمقر الدائرة كأصدقاء وخلال الكعدة دارت أحاديث كثيرة من ضمنها (( موضوع المساعدات المادية ))
و (( التوطين ))

تحياتي لحضرتك

[كوكي 2004]

    أخويه العزيز  جاك بلاك
   لا شكر على واجب أحنه أخوان ولازم نساعد بعضنا البعض وأزمة وتعدي والكل يسافر ويرتاح من هالمشاكل

   عزيزتي أم الهنا ألله يهنيج ويسهل أمرج وان شاء الله عن قريب تفرحينه بالخبر المنتظر 
  أم الهنا تتذكرين قبل فترة من كتلكم والله لو تدرون كتيلي كوكي خير شكو آني الحمدد لله لاعندي راتب ولا شئ

  تحياتي ياطيبين

[كلي امل]

ابو ديانا ليش ماكو بالكروب دننتظرك

[كوكي 2004]

   حبيبتي الأخت   هبة فهد
   لا شكر على واجب وأكيد لازم أوضح بعض الأمور وان شاء الله باجر رح أوضح أمور أكثر

   الغالي جوسي أبو ديانا
  كلك ذوق ياطيب يا أصيل وأشكرك جدآ على دعواتك الحلوة
  والسمج كان يخبل ومكانكم خالي والله  

   تحياتي والله يرضى عليكم

[كوكي 2004]

   أخويه العزيز رامي حاجبه
  أبو نورا الورد
  بالنسبة للأقامة آني دا أتكلم عن الأقامة السنوية بالأردن وأكيد التعليمات بالنسبة للأقامة تختلف من بلد الى آخر
 يعني الأردن يختلف بتعليماته عن سوريا ومصر ولبنان ...... ألخ
 لأن الأقامة بالأردن تكون على شكل (( وديعة بالبنك وأستثمار ودراسة جامعية وتصريح عمل ...... ألخ ))
 وأقامتكم بسوريا تختلف عن كل الي ذكرته


   تحياتي ياطيب

[سوسو اسو]

لا عفيه دخيلكم كله ولا موضوع الاقامه
زين همه بيا مرحله ايجيكون يشوفون شنو نوع اقامه الشخص؟
باجر الصبح ديروح زوجي يقدملنه على اقامه سنويه (عمان)

لا عفيه اني ضجت وبكل الاحوال لازم نقدم على اقاامه حتى لو الموضوع يهدد السفر
ان شاء الله الخبر مو صحيح او يصير تغيير او استثناءات

تحيياتي

[كوكي 2004]

   سوسو حبيبتي لتضوجين بالنسبة لموضوع الأقامة
   الي عدهم معاملات توطين من زمان و واصله مرحلة مثل تحويل الملف الى ال IOM
   أو فحص طبي .....ألخ يعني من زمان هذا مامشمول بالتعليمات الجديدة

  لكن التعليمات بدت تطبق من بداية 2012 على الكيسات الي بعدهه ماواصله للتوطين يعني من تبدأ مرحلة دراسة الملف
  ويشوفون أنه صاحب الكيس أو العائلة كلها عدهه أقامة سنوية هذا رح ينركن على صفحة لأن يعتبر مستقر وغير مهدد بالأردن
  وأكو ناس فقراء وماعدهم أقامة ومهددين بالتسفير بأي لحظة هذولة من وجهة نظر دول التوطين مؤهلين ويستحقون أكثر


 تحياتي لحضرتج

[رامي حاجبة]

   أخويه العزيز رامي حاجبه
  أبو نورا الورد
  بالنسبة للأقامة آني دا أتكلم عن الأقامة السنوية بالأردن وأكيد التعليمات بالنسبة للأقامة تختلف من بلد الى آخر
 يعني الأردن يختلف بتعليماته عن سوريا ومصر ولبنان ...... ألخ
 لأن الأقامة بالأردن تكون على شكل (( وديعة بالبنك وأستثمار ودراسة جامعية وتصريح عمل ...... ألخ ))
 وأقامتكم بسوريا تختلف عن كل الي ذكرته


   تحياتي ياطيب

 شكرا على الرد والتوضيح وبالنهاية الله يستر

شكرا ياوردة

[سوسو اسو]

   سوسو حبيبتي لتضوجين بالنسبة لموضوع الأقامة
   الي عدهم معاملات توطين من زمان و واصله مرحلة مثل تحويل الملف الى ال IOM
   أو فحص طبي .....ألخ يعني من زمان هذا مامشمول بالتعليمات الجديدة

  لكن التعليمات بدت تطبق من بداية 2012 على الكيسات الي بعدهه ماواصله للتوطين يعني من تبدأ مرحلة دراسة الملف
  ويشوفون أنه صاحب الكيس أو العائلة كلها عدهه أقامة سنوية هذا رح ينركن على صفحة لأن يعتبر مستقر وغير مهدد بالأردن
  وأكو ناس فقراء وماعدهم أقامة ومهددين بالتسفير بأي لحظة هذولة من وجهة نظر دول التوطين مؤهلين ويستحقون أكثر


 تحياتي لحضرتج

كوكي حبيبتي ثينك يووو على التوضيح خفت كلش بالبدايه بس هسه ريحتيني
شلت هم داكول ويه نفسي ليش هيج ديصير ويانه
تحياتي الج قلبي

[amman76]

شكرا اخت كوكي لنقل التفاصيل







تحياتي
المهندس

[كوكي 2004]

تدلل أخونه المهندس
ولا شكر على واجب والله يوفق ويسهل أمر الجميع ان شاء الله


تحياتي لحضرتك

[Edy Simon]

ابو ديانا ليش ماكو بالكروب دننتظرك

عزيزتي ام ايموني الورد
شكراً على سؤالج.....

بس اني ما احب الحشاشين, اضوج منهم...

تحياتي لام الموضوع المتألقة...
عوافي عليج الهريسة العراقية...
بالهناء والشفاء للطيبين..

ابو ديانا

[روزة اليرموك]

الف شكر حبي كوكي علتوضيح وهذا من اصلج الطيب ولو هية موجديدة عليج لان دومج طيبة وتحبين الخير للكل

[الريم 2000]

اللة يرضى عليج يا اصيلة -----وشكرا للتنبيه-----زينب

[espero]

والله ياكوكي كلامك صحيح ..واعتقد احنه كتبنه وحجينه على موضوع الاقامة والسفر خراج الاردن ..ومكان السكن وتسجيل الاطفال بالمدارس
اني بوكتها سالني الموضف نفس الاسئلة هايه ....طبعا كانت كدامه ورقه يكتب بيها الاسماء والعنوان ووياها ملاحظات يكتبها كدام كل حاله
اني سألني كلي شنو شهادتك كتله مهندس ..كالي ليش ماتشتغل هنا ..كتله اتمنى اشتغل وقدمت على شركات كلش هويه وسجلت حتى بمواقع تشغيل عمل ومحد يقبل يشغلني ...
القصد احنه دائما انكول التاجر من يفلس ايكوم ايدور دفاتر عتك
ان شاء الله نخلص من هذا الوضع الكسيف حشاكم اليوم قبل باجر
تقبلي تحياتي اختي العزيزة

[bebo_baghdad]

شكرا على الموضوع والمعلومات بخصوص الراتب واعادة التقييم واني هم اكد هذا الحجي لانه صارت وياية
تحياتي

[ام الهنا]

    أخويه العزيز  جاك بلاك
   لا شكر على واجب أحنه أخوان ولازم نساعد بعضنا البعض وأزمة وتعدي والكل يسافر ويرتاح من هالمشاكل

   عزيزتي أم الهنا ألله يهنيج ويسهل أمرج وان شاء الله عن قريب تفرحينه بالخبر المنتظر 
  أم الهنا تتذكرين قبل فترة من كتلكم والله لو تدرون كتيلي كوكي خير شكو آني الحمدد لله لاعندي راتب ولا شئ

  تحياتي ياطيبين

اتذكر زين وتفضلي هذا الموضوع //
http://www.ankawa.com/forum/index.php/topic,551536.msg5447901.html#msg5447901

واشكرك على الدعاء الحلو ، وربي يسهل امرك وامورنا اجمعين ونسافر ونخلص ..

ام الهنا

[ألن في بلاد العجائب]

قبل كم يوم عندي صديق حصل على توطين الى امريكا و هو عنده اقامة مستثمر حمره و هوايه ناس عندهم اقامات طلعلهم توطين بال 2012

[فارس العراق 90]

شكرا كوكي على نقل  الخبر وبارك الله بيك

ممكن سؤال هم بعد اكو قطع رواتب لو صفوا لان اني عندي اثنين اولاد واحد سنتيين  عمره والثاني 8 سنوات بس ميداوم لان رادو بجبل الحسين ايسجلوه وملحكو بوكته كالو السنه الجايه فهذا هم اياثر عليه ممكن رايج لان هم سئلتني من سلمتني الفيزه كارت اولادك بلمدرسه كلتله لا واحد صغير والثاني انتو مسجلتوه حولتوني على انقاذ الطفل وهملو الشغله بوكته واعتذرو الي كالو السنه الجايه انشاء الله

شكرا لك واني الممنون الك اخت كوكي

[ابن شط العرب]

شكرا ً اختي العزيزة كوكي على المعلومات القيمة
ولقد ذكرت العبارة التالية:-
لأن بزواجه من الأردنية يستطيع أن يحصل على أقامة سنوية بكفالة الزوجة ومعناها يستطيع أن يعمل ويقوم بأسرته
فحبذا لو تعليمنا عن الطريقة التي يمكن لزوج الاردنية ان يحصل بها على ترخيص عمل حيث ان احد اصدقائي متزوج من اردنية ( ليست من اصول فلسطينية ) ولديه اقامة سنوية ولديه 3 اولاد ولديه وثيقة المفوظية وتحول ملفه الى IOM واكمل المحلفين وحصل على رفض واستأنف وما زال ينتظر ، والقي القبض عليه من قبل مفارز الاقامة والحدود لكونه يعمل بدون ترخيص وافرج عنه عن طريق طواريء الأمم المتحدة وبقي جوازه محجوزا ً في المركز الامني الى يومنا هذا. علما ً انه قدم طلبا للحصول على ترخيص عمل ورفض طلبه لأنه غير مستثمر وقدم طلبا ً لوزير العمل واحيل طلبه الى قسم الترخيص بعد ان همش عليه الوزير بتطبيق اللوائح والأنظمة المتبعة وطبقت بحقه اللوائح التي تنص  بأن يكون مستثمرا ً.
فحبذا اذا كانت لديك المعلومات عن الطريقة التي يمكنه الحصول فيها على ترخيص عمل.
حتى هناك من يقول ان الحاصلين على دورات IRD ومنظمة كير يمكنهم الحصول على ترخيص عمل ولدى مراجعتي انا شخصيا ً لكوني حاصل على مجموعة دورات كان الجواب لا يحق للعراقيين بالحصول على تراخيص عمل الا اذا كانوا مستثمرين او متعاقدين مع الدوائر الحكومية لكونهم ذوي اختصاصات معينة، وبالنسبة للمستثمرين الغير اردنيين فلديهم نسبة ضئيلة من العمالة يمكنهم تعينها اذا كانت من ضمن اختصاصات يحتاجها المشروع.
واذا الشغلة مضبوطة باجر اتزوج اردنية ( بس لا تسمع ام الجهال ) هم اقامة وهم ترخيص عمل وانشاء الله بعد عمر طويل من نخلص محلفين وتجي الامنية وندخل على جدولة السفر يحلها الف حلال على كولة العْربي لو انا ميت لو المرة ميتة لو امريكا رافضتنا لو اللجوء خلصان.

[ذو الفقار88]

الاخت الفاضله
هل صحيح الغرامات تندفع بس اذا اخذنه الزركه
شلون اذا مشت سنين وما اخذنه الزركه
الاقامه ينفع اخذلهم كمبيالات لو ورقة تثبت فلوس الاقامه مو مالاتي
ومو كالوا الاقامه السنويه مالها دخل بالتوطين لان الاقامه هي وضعنه الرسمي بالبلد المستقبل
ارجو  توضيح لي الشغله مدا افتهم بصراحه والله يحفظ جنابكم بالخير

[ابن شط العرب]

الاخت الفاضله
هل صحيح الغرامات تندفع بس اذا اخذنه الزركه
شلون اذا مشت سنين وما اخذنه الزركه
الاقامه ينفع اخذلهم كمبيالات لو ورقة تثبت فلوس الاقامه مو مالاتي
ومو كالوا الاقامه السنويه مالها دخل بالتوطين لان الاقامه هي وضعنه الرسمي بالبلد المستقبل
ارجو  توضيح لي الشغله مدا افتهم بصراحه والله يحفظ جنابكم بالخير

الاخ ذو الفقار السلام عليكم
مع الاعتذار من الاخت كوكي اولا لتجاوزي في الاجابة على اسئلتك الموجهة اليها.

هل صحيح الغرامات تندفع بس اذا اخذنه الزركه
هذا الكلام لا صحة له، الكارت الازرق هو اعتراف الاردن بانك لاجيء ولا يجوز تسفيرك قسريا ً. كان انلغت غرامات الذين حصلوا عليه.

شلون اذا مشت سنين وما اخذنه الزركه
الكارت الازرق لا يحل ولا يربط وجوده وعدم وجوده وجهان لعملة واحدة. اغلب الذين انجزت معاملاتهم وسافروا لم يكن لديهم كارت ازرق.

لاقامه ينفع اخذلهم كمبيالات لو ورقة تثبت فلوس الاقامه مو مالاتي
لا يجوز يريدون حساب بالبنك باسمك.

ومو كالوا الاقامه السنويه مالها دخل بالتوطين لان الاقامه هي وضعنه الرسمي بالبلد المستقبل
من خلال معلوماتي خلال ما يقارب 6 سنوات هناك كثيرون تم تسفيرهم وهم يحملون اقامات اردنية مستثمرين منهم وازواج اردنيات ومن لديهم اقامات وديعة، اذا كانت هناك تعليمات جديدة خلال الفترة الاخيرة فلا علم لي بها وربما الاخت كوكي لديها الاجابة.

[ذو الفقار88]

الاخ الفاضل  ابن شط العرب اشكرك على الرد
اني اقصد الكارت الازرق يعني توطين مو سمعت الي يتحول للتوطين ينطوه كارت ازرق وتنشال غراماته لان الامم تدفعهن
هل صح هذا الي سمعته ؟
والي يبقه فد كم سنة بدون توطين وملفه باليوان هنا هو يدفع غراماته ؟
وشغله الكمبيالات اقصد اخذ للمفوضيه ورقه تثبت الفلوس مال اقامه مو مني طالبهن من ناس
واني سالت خبراء بالمنتدى كالوا الاقامه السنويه مالها دخل بالتوطين يعني اذا عندك اقامه يصير يطلع لك توطين
اشكرك شكر موصول اخي ابن شط العرب

[Abnaa Al-Iraq]

شكراً لهذه المعلومات القيمة فعلاً رغم الاكرية سمع بها وقد طبق اغلبها بالفعل الله يعين العراقيين في كل مكان ويسهل امرهم أن شاء الله ...

[الهموندي]

السلام عليكم  اختي الفاضله كوكي اخواني واخواتي الاعزاء انا اخوكم مقيم في عمان منذ 19 سنه  دخلت الاردن بتاريخ 1993 تزوجت من فتاه اردنيه سنه 1996 حصلت على الاقامه السنويه  سنه 2000 ولاعتبار كوني زوج مواطنه اردنيه وكان هنالك قرار صادر من رئاسه الوزاء سنه1999 بمنح ازواج المواطنه الاردنيه على الاقامه السنويه بشرط حصولك على تصريح عمل طبعآ مع الاعفاء من جميع الغرامات المترتبه عليك  بالمناسبه منح تصريح العمل للمتزوج من اردنيه سهل جدآ  يعني ربط الاقامه بتصريح العمل  المهم هو معناه الزوجه لاتكفل الزوج حتى لو كانت اردنيه  وانا لازلت حاصل على الاقامه السنويه  صحيح قبل لاانسى قبل 3سنوات صدرت تعليمات بان الزوجه الاردنيه تكفل الزوج واقامتي حاليآ بكفاله الزوجه يعني بدول عمل والحمد الله والشكر  اختي الفاضله كوكي انا لحد هذا اشهر وانا استلم الراتب بدون انقطاع ومتوطن ومخلص كل شي صحيح شويه اتاخرت  بس مو معناه رفص واني من جماعه استلام المغلف 5-12-2009 وسويت اعاده بصمات قبل سنه وسويت اعاده محلفين 2-2 -2012  وسويت اعاده فحص طبي قبل 3 ايام والله يمكن الاحد اليى راح    اختي العزيزه اريد اعرف مصدر المعلومات اليى عندك من وين اجت    هذا السي في مالتي الي بالاردن      ها نسيت اكوللكم اني انتظر المغلف 24-3-2012  زين هسه اني عليمن محسوب على جماعه 5-12-2009 لو جماعه 24-3 2012    ههههههههههههههههه    اخوكم الهموندي   عمان

[espero]

يابه تره احنه نعرف الاخت كوكي كلش زين ...وماعتقد تنزل خبر هي مو متاكده منه ..وهذا ليس دفاعا عن كوكي ..بس لان الاخت الكل يعرفها بالمنتدى ....وتره فعلا بدت قوائم ايقاف الراتب على كثيرين  وتكدرون تقرون مواضيع المنتدى زين وتعرفون ..
بالنسبة لموضوع التوطين للي عنده اقامة ...فكلام كوكي كان تحديدا للذين لم يوطنوا لحد الان وقدموا اوراقهم لليو ان في عام 2012 ..يعني الموضوع جديد بهاي السنه
تقبلوا تحياتي والله من وراء القصد

[شنايزر]

ياجماعه فهمونا................

هسة هاي الاجراءات الجديده هل طبقت من شهر 1

لو راح تطبق بالاشهر الجاي

زين واللي مشت اموره راح يكمل لو راح هم ينقطع الراتب بالاشهر القادمه

وينج اختي كوكي الحكي على شنايزر ترى اليوم مانام 

[كلي امل]

صحيح واني أأيد كلام اخونة اسبيرو

[espero]

ياجماعه فهمونا................

هسة هاي الاجراءات الجديده هل طبقت من شهر 1

لو راح تطبق بالاشهر الجاي

زين واللي مشت اموره راح يكمل لو راح هم ينقطع الراتب بالاشهر القادمه

وينج اختي كوكي الحكي على شنايزر ترى اليوم مانام 

حبي شنايزر
بالنسبة للراتب العلس بده من الشهر الاول ..واكو جماعه انعلست بالثاني واخر جماعه انعلست قبل اسبوع براتب شهر شباط ...بعد اذا اكو علس على الاشهر الجاية الله اعلم

[كوكي 2004]

السلام عليكم جميعآ

بالبداية أقدم جزيل الشكر والتقدير لأخويه العزيز ( أسبيرو ) وأختي العزيزة ( كلي أمل ) على تصديقهم لكلامي .

هسه نرجع لموضوعنه لو ترتجعون  لأحد ردودي بالموضوع كلت أنه (( آني وأعوذ بالله من كلمة آني تربطني علاقة صداقة قوية جدآ بناس يداومون
بمكان مرموق وهو مقر الأتحاد الأوروبي بعمان وصدكوني هذوله الناس درجتهم الوظيفية عالية يعني يداومون ويه مدير المقر نفسه
وبالمناسبة معظم الموظفين أجانب يعني من دول الأتحاد الأوروبي )) وكلت كانت لي زيارة لهذوله الأصدقاء بمقر دائرتهم بصفة شخصية
يعني ماكنت رايحه بشغل وخلال الكعدة سولفنه بهواية أمور ومن ضمنهه موضوع التوطين والرواتب ....... والخ ))

وأعتقد ميحتاج أحلف أيمانات حتى الناس تصدك وآني مو من طبعي وأخلاقي أروج أو أتكلم بأمور آني مامتأكدة منها أو أتحدث بأخبار كاذبة
لأن حرام وعيب وآني محد جبرني أن أكول أو أكتب أشياء كذب أو أجامل على حساب الناس .

[كوكي 2004]

  أخي العزيز أبن شط العرب آسفة لأن البارحة ما جاوبتك على سؤالك لأن حبيت اتأكد من المعلومات أكثر لأن ما أحب
  أنطي معلومة بيهه شك أو خطأ ولو 1%

 عزيزي بالنسبة للأقامة وأنواعها

1 - أقامة أستثمار
2 - أقامة الوديعة الثابتة
3 - أقامة دراسة
4 - أقامة عمل
5 - أقامة بسبب المرض
6 - أقامة للمتزوج من أردنية أو متزوجة من أردني

بالنسبة لموضوع صديقك المتزوج من أردنية يمنح أقامة سنوية بكفالة الزوجة بس بشرط أن تودع بأسم الزوجة مبلغ ( 2000 دينار أردني )
وتسمى أقامة سنوية بدون عمل

وأذا حب الشخص أن يعمل لازم يتفق مع صاحب العمل أن يعمل أقامة على تصريح العمل وبهذه الحالة لازم تتغير الأقامة وتصبح أقامة
عمل وبالنسبة لموضوع جوازه المحجوز بالشرطة لازم زوجته الأردنية تروح تكلفله بمبلغ ( 3000 دينار أردني حتى يستلم جوازه من مخفر الشرطة )

يعني حسب القانون الأردني ميصير الشخص يحصل على نوعين من الأقامة السنوية
يعني يا أما أقامة عمل أو أقامة لأنه متزوج من أردنية وأعتقد هذا القانون موجود بمعظم الدول تقريبآ لايمكن لأي شخص الحصول على أكثر من نوع أقامة

وان شاء الله كدرت أن أوضح ولو الشي البسيط بهذا الخصوص

تحياتي لحضرتك

[كوكي 2004]

أحبائي وحبيباتي الأخوة والأخوات

روزة اليرموك ، الريم 2000 ، بيبو بغداد ، المغامر ، ألن في بلاد العجائب ، فارس العراق ، Abnaa Al-Iraq ، الهمنودي ، شنايزر

ألف شكر لحضراتكم جميعآ ولمروركم الجميل الله يوفقكم ويسهل أموركم ويجعل لكم من كل ضيق فرجآ ان شاء الله .

[كوكي 2004]

   الأخ الفاضل \ أيام زمان
  بالبداية آني أشكر حضرتك على أسوبك بالحديث
 وبدون متوجه أي تعليمات ألي أو لباقي الأعضاء بأن منكتب أي موضوع أو أي خبر اله يكون بي مصدر أو رابط أو يعتبر الخبر غير صحيح

أخي يعني أذا دا أكول هذه الأخبار من مصدرهه الرئيسي وكانوا ديحجولي من باب الصداقة الصدوقة
يعني تريدني أروح أكولهم بله بدون زحمة سوولي رابط أو أكتبولي كتاب رسمي بكل الحديث الي صار بيني وبينكم
حتى تكون لي مصداقية عند بعض الناس

آني ماجبرت أي شخص يصدكني أو يكذبني يعني آني أسوي الي يملي عليه ضميري أمام الله وهو وحده يعرف الي بداخلي وشنو قصدي
وحضرتك تريد تصدك مشكور أو تريد متصدك أنت حر أكيد .


شكري وتقديري لحضرتك

[كوكي 2004]

 الأخ العزيز ألن في بلاد العجائب

حضرتك تكول أنه صديقك عنده أقامة أستثمار حمره وتوطن على أمريكا توطن قبل كم يوم

أكيد كلام حضرتك صحيح
بس أذا ممكن أريدك تسأل صديقك هو مسجل بل UN من أي سنة ؟
وايضآ اسأله ملفه بالتوطين من شوكت ؟

يعني أكيد ملفه ماتحول للتوطين قبل كم يوم ؟

أعتقد كلامي كان واضح أنه التعليمات الجديدة تغيرت تغيير جذري والأيام القادمة تثبتلكم ان شاء الله .


تحياتي لحضرتك

[كوكي 2004]

  أخويه الهمنودي
 أذا كان سؤالك وأستفسارك بقصد الأستهزاء فأكولك شكرآ لحضرتك

اما أذا كان سؤالك فعلآ بقصد أن تستفسر بشكل حقيقي فأكولك
أكيد أنت تنحسب على جماعة 2009 والدليل رحت قبل كم يوم سويت أعادة فحص لأن كلنا نعرف أنه القرارات وبكل الدول لا يمكن
أن تكون رجعية يعني القرار الجديدة وبكل المجالات لايكمن أن تشمل القدماء
يعني آني من كلت تعليمات 2012 يعني هذه السنة وحتى لو الشخص تحول ملفه للتوطين يوم 31 \ 12 \ 2011
يعني هو انحسب على 2011 وليس على 2012 .


تحياتي لحضرتك

[كوكي 2004]

  أخويه العزيز المغامر
 هو مو القصد أنه الشخص الي يملك 25 ألف دولار لايستحق التوطين والناس العطالة بطالة تستاهل

أخي قوانين التوطين تغيرت يعني أبسط شي قبل كانت أمريك يعني أول منفتح التوطين بشكل رسمي بسنة 2007 كانت تريد عدد
 يعني كاموا يوطنون آلاف وكل عملية التوطين من المقابلة الى يوم السفر متستغرق 8 أشهر

بينما حاليآ صارت المسألة مو كمية وعدد بل صارت ( أنتقاء ) يعني من حيث القصة والأمراض المزمنة والعسكرية ومكان العمل السابق
والأختصاص وطريقة التهديد ........ والخ


يعني المقيم السنوي بالأردن يعتبر وجوده نظامي وغير مهدد ومستقر ماديآ ونفسيآ
بينما غير المقيم يعتبر شبه مهدد وبدليل لا يستطيع العمل والحالة المادية ضعيفة ويعتبر وجوده بالأردن يشكل ضغط مادي
من ناحية المساعدات المادية والمساعدات الطبية والتعليم ..... الخ فمن وجهة نظر دول التوطين أنه يوطنون هؤلاء الناس
ويخلوهم يستقرون في بلدان التوطين حتى يأسسون لحياة جديدة همه وعوائلهم وأطفالهم


بعدين المفوضية هي مجبرت أي شخص أن يروح يداين أو ياخذ مبالغ من أي شخص في سبيل أن ياخذ أقامة سنوية لأن
معظم الناس عايشة بدون أقامة والي عنده فلوس يعمل والي ماعنده محد جابره وهذا الكلام ميقنعهم لأن الأقامة رح تكون بأسمك والمبلغ مودع بالبنك بأسمك





تحياتي لحضرتك

[كوكي 2004]

أخي وصديقي العزيز شنايزر

والله بصراحة أكذب عليك أذا أكولك اطمأن وهذا الكلام يشمل الكل وحتى آني من الناس
أخويه الكل استلموا الفيزا وال UN كانوا قادرين أن ميسلمون لبعض الناس الفيزا ولكن مارادوا أن يتصادمون وتصير مشاكل بداخل
البناية فتحاشيآ للمشاكل
سلموا الفيزا لكل اللاجئين وبعدين بدوا يصفون
وحاليآ بدوا القطع عشوائي من شهر 2 وصاعدآ كل شهر 200 كيس تقريبآ
ولحد البارحة مقطوع الراتب عن 1500 كيس تقريبآ والله يستر من الأيام القادمة .


تحياتي ياطيب

[يا صبر ايوب]

مشكوره اختنه العزيزه كوكي على جهودك الطيبه
 
الله يستر من تاليها اعتقد همه يريدون العالم ترجع

لانه سفر ماكو فلوس ماكو يعني شنو معناها والعاقل يفتهم

تحياتي لك

[كوكي 2004]

مية هلا بأخويه العزيز أبو صابر
ماكو داعي للشكر لأن أي واحد من الأخوه والأخوات أكيد مرح يقصر لو كان بمكاني وكلكم خير وبركة
ان شاء الله

تحياتي لحضرتك

[روزة اليرموك]

هلو حبي كوكي ولو ضوجناج من كثر الاسئلة مالتنة كولة ابو المثل لدلي عربي علباب بيتك 
بس حي والله ماعدنة غير رب العالمين وانت حبي شنو تقصدين بالقطع العشوائي يعني حتى لو الواحد ماعندة اقامة وماراجع للعراق وعندة اولاد بالمدرسة راح يكون مشمول بالقطع العشوائي  لو شنو عفية

[شنايزر]

لاحول ولا قوة الا بالله ما قول الا ..........................


حسبي الله ونعم الوكيل

[mys]

شكرا للاخت كوكي على هذه التوضيحات وشكر لكل من ساهم في اغناء هذا الموضوع الحيوي وامنياتي لكم بالسفر القريب

اخوكم

[الهموندي]

السلام عليكم   اختي الفاضله كوكي انا اكن لك كل الاحترام والتقدير  صدقيني انا لم اقصد اي شي من الشق الاخبر من كلامي انا سالت وكان السولي الى جميع اخواني    واخواتي في هذا البيت الرائع بيت عين كاوا  بداعي المزاح وليس بداعي الاستهزاء اطلاقآ   اختي الفاضله كماتعرفين هنالك جمعيات في هذا المنتدى كثيره ومنها جمعيه استلام مغلف بكذا تاريخ والاخرى  بكذا تاريخ ومن ضمنها جمعيتنا جمعيه 5-12-2009 وبعدها افتتاح جمعيه جديده جمعيه 24-12-2012 ولانني سوف استلم مغلف ثاني بعداعادتي للمحلفين بهذا التاريخ احببت وبطريقه المزا ح مع من اكون وعلى من انحسب فقط ليس اكثر من هذا     اختي الفاضله كوكي ومع ذالك انا اقدم لك اعتذاري

[espero]

شكرا للجميع وللاخت كوكي خاصة
ربي ايفرج علينه كلنا

[دارين العراقيه]

اضم سؤالي لسؤال الاخت روزة اليرموك وارجوا من الاخت كوكي الاجابة علية واكون شاكره اليكي

[كوكي 2004]

مراحب للطيبين
الأخوات العزيزات روزة اليرموك و دارين العراقية

اليوم خلي نتكلم عن المساعدات المادية من ال un أو مايسمى الراتب

العدد الكلي بالنسبة للمستفيدين من الراتب هو ( 4000 / 4500  كيس )
والتعليمات والقرارات الجديدة تكول لازم ( ثلث هذا العدد فقط هو الي رح يبقى يستلم المساعدات يعني الراتب )
يعني خلي نوضح أكثر
الي العدد الكلي الي رح ينشمل بالقطع هو مابين ( 2000 / 2500 كيس ) وبهذه الحالة
الي تم القطع عنهم من بداية شهر 2/ 2012 ولحد الآن بحدود ( 1000/ 1100 ) وباقي العدد رح يكون كل شهر بحدود
(40 / 50 كيس ) الى أن يكمل العدد المقرر

·········································································

هسه نجي على أسباب القطع
أخواني وأخواتي

قوانين ال un تكول آني من أنطيك مساعدة مادية هذه المساعدة هي وقتية
يعني السقف الزمني للمساعدات المادية كحد أعلى هو ( ثلاث سنوات ونصف )
طيب من يرجعون للملفات ديلكون أكو كيسات دتستلم رواتب من 5و 6 و 7  سنوات
بينما دخلوا لعمان عوائل وعزاب من بداية  2011 ولحد الآن ما أستلوا مساعدات مادية وحتى ماتمت زيارتهم لتقييم الوضع المادي اصلآ
والسبب هو ( عدم وجود سيولة كافية تغطي هذه الأعداد الكبيرة من اللاجئين )

يعني بصريح العبارة وخلي نكون واضحين أكثر
همه رح يقطعون من مجموعة حتى ينطون لمجموعة ثانية

لأن قانونهم يكول آني أنطيت المساعدات بشكل مؤقت يعني كم سنة بس حتى ترتب أمورك وتستقر بين ما
تتوطن وتسافر أو تشتغل أو تتزوج ·······الخ
لأن أحنة مو موظفين أو متقاعدين حتى نظل مدى الحياة نعتمد على المساعدات وهي بالفعل أسمهه ( مساعدات مؤقتة )


أرجو ان أكون وضحت ولو الشئ البسيط  عن الخشنات 
والله ولي التوفيق
تحياتي
ودعائي للجميع بعدم قطع المساعدات يارب

[فارس العراق 90]

الله ايعين الجميع شكرا الك اخت كوكي بمعنى انو القدامه الي تنقطع عليهم المساعدات

زين احنه جماعه 2011 حسب تصورج هم تنقطع لو لا

الله ايسهل امر الجميع

[espero]

عيني كوكي شلون اكو 4500 عائلة بس
اذا همه بقوا ايوزعون بطاقات تقريبا 20 يوم وكل يوم يوزعون تقريبا 250 واحد وبايام الجمع والسبت يوصل لل 400
فكولي اكو عشرة الاف عائلة اذا مو اكثر

[كوكي 2004]

أخي فارس العراق
همه بدوا يدققون على هوايه أمور من ضمنها

السكن وأقصد الموقع أو المنطقة
أذا كان أكو اطفال بالعائلة بعمر الدراسة وبالذات أذا غير مسجلين بالمدارس يعني أذا أكو ثلاث أطفال بالعائلة
ثنين منهم يداومون و واحد لا  أعتبر الراتب ينقطع

وهنا ملاحظة مهمة ( أذا العائلة كالت الطفل يداوم مدرسة وهو بالحقيقة ميداوم مدرسة رح يفاجئون العائلة بطلب كتاب تأييد من المدرسة بأن الطالب مايزال
بمقاعد الدراسة لو لا )

الي عدهم طلاب بالهدارس الخاصة مشمول بالقطع ايضآ
يغيير السكن من مناطق شرقية الى مناطق غربية رح ينقطع الراتب

الي عنده ذهاب وعودة من العراق ايصآ ينقطع عنه الراتب


وتدلل أخي فارس
وآني حاضرة لأي أستفسار
تحياتي

[فارس العراق 90]

لا اخويه ما اعتقد اكثر من 4000 لان من وزعو المنحه مال وزاره الهجره كالو 4000 لان مانطوا بس الي عدهم بطاقه صراف

[كوكي 2004]

أخويه اسبيرو
شلونك ياطيب

عزيزي مع أحترامي لحضرتك وأعوذ بالله من كلمة آني
آني متأكدة من العدد لأن هو القطع بدأ قبل توزيع الفيزا وحتى خلال التوزيع بالأيام الأولى كانوا يدققون على معلومات
واسئلة كثيرة وكثير ناس ماسلموهم الفيزا وكلولهم أحنه نتصل بيكم ولكن في بعض الأيام حدثت بعض المشادات الكلامية من بعض الأشخاص
مع الموظفة الي كانت تسلم الفيزا
فقزوا أن يسلمون الكل وبعدين يصير القطع حتى متصير مشادات ومشاكل داخل البناية
وأرجع اكولك العذ الصافي الي ديستلم المساعدات هو بحدود 4500 كيس وليس لاجئ
يعني الكيس أحتمال يكون 10 أشخاص بالملف واحتمال يكون واحد

والأيام القادمة رح تثبتلك صحة كلامي
اسبيرو شلون يعني تريد انطيك اسم الموظفة الي كانت توزع حتى تقتنع  

تحياتي يا أطيب أنسان

[فارس العراق 90]

شكرا الك اخت كوكي والله ايوفقج انشاء الله ويسهلج امر السفر

بس عندي سوال اخير ولو راح اضوجج اني لدي 2 اولاد واحد سنتين ونص والثاني 8 سنوات واني قدمت بدايه 2011 واستلمت الراتب شهر 7 2011

وساكن جبل الحسين من اول مجيت وزاروني وانطوني الراتب بس عندي شغله من ردت اسجل ابني بشهر التاسع 2011 ملحكو ايسجلوه راجعت اليوءن وحولوني لانقاذ الطفل وهم ملحكو ايسجلوه  واشتكيت الهم وكالو الله كريم انتضر السنه الجايه ومن استلمت البطاقه تعرفين سئلتني كلتلي اولادك بلمدرسه كلتله واحد صغير والثاني انتو لحد هاي اللحضه مشفتولي جاره كالت بعدين انخابرك وانشوفله جاره واستلمت البطاقه واستلمت الرمز نفس الرمز  مغيروه فشنو تصورج هم عليه نقطه ضعف لو لا واني شاكرا لكي

[كوكي 2004]

أخويه فارس
ظل لح عليهم بالتلفون وأطلب قسم الصحة والتعليم واعتقد تضرب رقم 3  واسألهم عن موضوع ابنك
مو عن شي بس حتى تتسجل الكالمة والملاحظة أنه أنت حاب أبنك يتسجل وميكولون أنه ماصدك
وكعد وسكت عن الموضوع

ورح انطيك ملاحظة مهمة
أذا الطفل يعني بشكل عام يعاني من مرض خطير مثل السرطان أو الفشل الكلوي أو مرض بالدماغ أو الصرع ······الخ
أو بعض الأمراض النفسية وما شابه مثل التبول اللا أرادي وغيرها

كل هذه الفءات تتسجل بمدارس خاصة وعلى نفقت المفوضية
أما أذا الطفل لا يعاني من أمراض فصدكني لو مهما تحاول ما رح يسجلوا غير بس بمدارس حكومية
وحتى لو حولوك على انقاذ الطفل ايضآ رح يسجلوا بمدارس حكومية

يعني لو تروح لأنقاذ الطفل على الأقل تشوفهم نفسك وتذكرهم بأن أنتظرتهم وهمه مانطوك خبر بس حتى تثبت أنه راجعت
والله وحده هو اليستر ويوفق عباده
تحياتي وامانة شتحتاج آني حاضرة حتى لو 100 سؤال بس بعد السؤال ال 50 رح آخذ عمولة  ;

[ذو الفقار88]

الاخت الفاضله
كتبت لجنابكم بالخاص وبالعام  اهنا
ارجو المساعده مع الشكر الموصول

[فارس العراق 90]

اخت كوكي بارك الله بيك والله ايسهل امركم بسفر باذن الله

ولله ماقصرتي وانشاء الله اتصل بلمفوضيه يوم الاحد وهم ابلغهم وشكرا الج مره ثانيه

بلنسبه للعموله اله اسوي اسئلتي فوق الخمسين حتى انطيج عموله 

[كوكي 2004]

فارس أنت أخويه العزيز وتدلل أنت وكل الأخوه والأخوات وان شاء الله ما أقصر ويه أي شخص بأذن الله
بس ها غيرت رأيي رح أسوي العمولة على 25 سؤال حتى أستلم أسرع 
تدلل ويدلل الجميع
بالتوفيق ان شاء الله

[فارس العراق 90]

فارس أنت أخويه العزيز وتدلل أنت وكل الأخوه والأخوات وان شاء الله ما أقصر ويه أي شخص بأذن الله
بس ها غيرت رأيي رح أسوي العمولة على 25 سؤال حتى أستلم أسرع 
تدلل ويدلل الجميع
بالتوفيق ان شاء الله

رحمه الله والديك متقصرين دوم انتي الله ايحفضج انشاء الله السفر السريع باذن الله

[كوكي 2004]

أخويه العزيز ذو الفقار
ماوصلتني رسالة عالخاص أرجو أن تبعث رسالتك مرة ثانية
ورح أبعثلك الرد وآني الممنونة
وآني اتأسف لحضرتك
تحياتي

[ذو الفقار88]

أخويه العزيز ذو الفقار
ماوصلتني رسالة عالخاص أرجو أن تبعث رسالتك مرة ثانية
ورح أبعثلك الرد وآني الممنونة
وآني اتأسف لحضرتك
تحياتي

شكر موصول وجنابكم متقصرون الف رحمه لموتاكم  الله ايديمكم اختي الفاضله

[كوكي 2004]

والله يا أخي مغامر يكذب عليك الي يكولك أنه يعرف العدد لأن شغلة التوطين معقدة
يعني مثل ماذكرت مسبقآ أمريكا سابقآ كانت تركز عالعدد ولكن بالسنين القليلة الماضية بدت مرحلة الأنتقاء

ولهذا السبب تشوف شروط التوطين صارت معقدة أكثر
يعني سابقآ شيل وكرف وتسفير لأمريكا والطيران مملحك
وايضآ
قبل كان الملف من يتحول للتوطين مجرد أن تم المقابلة متشوف أله شهر أو شهرين الملف
اتحول لل iom
بينما حاليآ تشوف الملف من يتحول للتوطين يبقى تحت الدراسة من قبل لجنة التوطين مو أقل من 7 شهور الى شنة أو أكثر
وبعدين يتحول
وأنت قيس على كل هالأمور
ولكن صدكني محد يعرف الأعداد الحقيقة أله لجنة التوطين وهذا يتم وفق تعليمات منقبل دول التوطين

تحياتي

[دارين العراقيه]

شكرا الج اختي كوكي على الجواب - الله يجازيج كل خير - بالنسبة للنقاط الي صاروا يدققون علية مثل ماذكرتي لاخونة
فارس العراق كله ماتشملنة كعائلة - هم ممكن ينكطع علينة الراتب لو لا - يعني شغلة تدقيق على نقاط معينة بقطع الراتب
لو هم ورى الحض مثل السفر

[espero]

أخويه اسبيرو
شلونك ياطيب

عزيزي مع أحترامي لحضرتك وأعوذ بالله من كلمة آني
آني متأكدة من العدد لأن هو القطع بدأ قبل توزيع الفيزا وحتى خلال التوزيع بالأيام الأولى كانوا يدققون على معلومات
واسئلة كثيرة وكثير ناس ماسلموهم الفيزا وكلولهم أحنه نتصل بيكم ولكن في بعض الأيام حدثت بعض المشادات الكلامية من بعض الأشخاص
مع الموظفة الي كانت تسلم الفيزا
فقزوا أن يسلمون الكل وبعدين يصير القطع حتى متصير مشادات ومشاكل داخل البناية
وأرجع اكولك العذ الصافي الي ديستلم المساعدات هو بحدود 4500 كيس وليس لاجئ
يعني الكيس أحتمال يكون 10 أشخاص بالملف واحتمال يكون واحد

والأيام القادمة رح تثبتلك صحة كلامي
اسبيرو شلون يعني تريد انطيك اسم الموظفة الي كانت توزع حتى تقتنع  

تحياتي يا أطيب أنسان

والله ياطيبه يابنت الطيبين اني استنتجت هذا الرقم من خلال ايام توزيع البطاقات والازدحام الي كان يوميا
اني استلمت يوم 29 بالشهر يعني بالوقت الضايع ووصل التسلسل بهذاك اليوم الى 400 ملف
طبعا احنه منكدر اناقشك عيني ست كوكي فقط  ليطمأن قلبي بسسسس
جزاك الله كل خير ياطيبه

[كوكي 2004]

أخويه العزيز ذو الفقار
بعثتلك الرد عالخاص وتدلل

حبي دارين
ان شاء الله متنطبق عليج التعليمات والشروط ومينقعط عنج وعن الجميع يارب
وبالتوفيق ان شاء الله

[فارس العراق 90]

الاصت عليه بس لاينقطع شنو شروط كوكي الحكيلي  الاحد انام باب اليوءن

[كوكي 2004]

أخويه فارس
عدنه وحدة من الأخوات بالمنتدى عدهه أولاد وممسجلتهم بالمدرسة وكانوا يستلمون راتب
وراحت أستلمت الفيزا الجديدة بس ماأستلمت الراتب يعني قطعوا وخابروهه من
ال un قبل ميقطعون راتبهم وكلولهه أذا ماسجلتي الأولاد بالمدرسة رح نقطع عنكم الراتب
وفعلآ قطعوا عنهم من شهر 1 / 2012

بس أنت أذا ماقاطعين عنك لتتحارش بيهم بس روح على الشؤون الأجتماعية وكللهم آني أجيت عليكم علمود أبني وأنتوا ما رديتولي أي جواب هسه شلون لأن أنتوا دتقطعون
الرواتب على الناس الي مامسجلين أولادهم بالمدارس وشوف شيكلولك

وان شاء الله خير

[فارس العراق 90]

انشاء الله ابلغهم   ورحمه الله والديك الله ايسهلك انشاء الله

[شنايزر]

اختنا العزيزة كوكي

بارك الله بيج عالمعلومات القيمة والمساعده في الردود على الاسئلة

سؤالي لكل ماذكرتي بالنسبة للقطع

هل يلعب تقرير الباحث او الباحثة الاجتماعيه التي تزور اللاجئ في البيت دور في القطع او لا ........ يعني هل يتم اخذ توصياتها او توصياته في القطع او بالاستمرار بالمساعده

                                             وشكرا

[افرجها ياربي]

طبعا كلام كوكي من الالف للياء صحيح .. بس الراتب غلط مو موضوع ميزانية .. سبب قطع الراتب هو اني .. لان تطوة اول راتب استلمة ثاني يوم اجة الخبر مال كطع ماكو هيجي رجلي خضرة عليكم .. اخوكم احمد

[/b][/i][/color][/font][/size]

[روزة اليرموك]

شكرا عزيزتي كوكي وتسلمين علاجابة ياوردة والله اليستر ان شاء الله

[immigrant1972]

شكرا جزيلا اختنا الغالية كوكي على المعلومات القيمة المفيدة لاخوانا بالمنتدى .... بخصوص الراتب ..زاود الاستفسار من حضرتج عن هذا الموضوع فيما اذا كان مضوع الراتب قد الغي من قبل اليو ان بالنسبة للحالات الجديدة ام لا ... فنحن قدمنا على الراتب في بداية الشهر الثامن من عام 2011  .. وسجلت الباحثة الاجتماعية باليو ان انه حالتنا خاصة وفعلا بعد اسبوعين قامت باحثة بزيارتنا في مكان السكن وسجلت كافة المعلومات وقامت باخذ صور  علما باننا  عائلتين نسكن بستوديو صغير  وعددنا الكلي 9 اشخاص وانا لدي اطفال عدد 2 بعمر ثلاث سنوات  ولحد الان لم نحصل على نتيجة ...سؤالي هو ... هل نحن من المشمولين بالراتب  وهل صرف رواتب المساعدة قد توقف ام ان هنالك امل بصرف الراتب بعد تصفية امور الرواتب القديمة ...علما باننا اتصلنا بالمفوضية قبل شهر  وقالو لنا بان هنالك حاليا تصفية للملفات القديمة ولم يتم منح اي راتب جديد منذ الشهر 7 من عام 2011 ولحد الان .

مع فائق الشكر والتقدير لجهودك معنا

[كوكي 2004]

   أخويه العزيز شنايزر

بالنسبة للباحثة الي تقوم بالزيارة صدكني رأيها لايقدم ولا يأخر لأن كثير من الباحثات يكتبون بصدق وبأمانة وبما يرضي الله
و من بعدهم يجي المسؤولين يدققون ملف الزيارة ويأشرون عليه يستحق أو لا يستحق وبعدهه يبعثوا بالأيميل لل UN
ومن يوصل الملف للشؤون الأجتماعية ( قسم الرواتب ) ايضآ يبدون التدقيق ومراجعة الملف

وهنا المفاجئة يعني الملف المكتوب عليه يستحق الراتب المفوضية ممكن تشوفه غير مستحق
والملف الي يكتبون عليه لا يستحق المفوضية بعد مادققه تشوفه يستحق

يعني قسم الرواتب بالمفوضية يستلم التقرير من قسم الرواتب بمنظمة ال IRD ولكن لاتعتمد اعتماد نهائي على قراراتهم
والي همه يشوفوا صح يسووا .

تحياتي لأخويه الغالي شنايزر

[كوكي 2004]

أخويه العزيز أفرجها يارب

العفو أخويه الورد أنت لا تطوة ولا شي الله ليكول 
بس هي أحتمال صدفة يعني أنت بديت تستلم وبدأ القطع بنفس الوقت لا أكثر ولا أقل وكلمن ياخذ رزقه
وأكيد ربك مقسم الأرزاق .


تحياتي لحضرتك

[التائها خارج وطنها]

اخوية امير العراقي احنا مقدمين هل سنة واني مقيمة وقابلنا اول مقابلة مال تسجيل يوم 22/1/2012 ورا مقريت الحجي مال الاخت كوكي واللي شفته ممكن يكون صحيح وبي وجهة نظر اسودت الدنيا بعيني وبديت اايس من السفر ومحتارة ودا افكر بالرجوع واعوف كلشي معرف حيرررة وواحد ميعرف شي يسوي !!!
بس حجيك هم مقنع وصحيح بس منعرف اللي راح يصير شنو معرف ؟؟!!!

[espero]

مرحبا اخوان
بالنسبة للاقامة السنوية في عمان  وهي تسبب مشكلة في التوطين او الي عندة اقامه مه يطلعلة توطين اتوقع بيه نوع من المبالغة ولانه اذا اكو هيج قرار فهو يمشي على كل الدول مو يمشي على عمان مه يمشي على سوريا او تركيا او مصر تعرفون ليش لان المنظمات من طلع هيج قرارت هذا قرارات ملزمة للجميع مابيه استثنائات وماكو شي اسمه هذا عنده فلوس  فه ميحتاج توطين هذا الكلام مو واقعي لان ابسط شي راح انطيكم مثال هسة اغلب الدول التي تنطي لجوء تنطي بس للي يكفل نفسة ماديا او احد يكفله ويصرف عليه وهاي الدول تريد حاليا ناس عده فلوس مو تكون عالة على المجتمعاتهم مع الحترامي للفقير ومو قصدي انتقص منه بس هذا الواقع مع الاسف وحتى السفارة الكندية في بغداد فاتحة لجوء بس للمستثمر والتاجر والكفائات للمهدد هو وعائلته واني بنظري بالمستقبل القريب راح ينطون اولويه للي يكدر يتكفل بدفع تكاليف السفر ويوجد له راس مال حتى يبداء حياته لعد هي امريكا ليش وقفت التوطين حاليا بسبب عجزها عن حل مشاكل العراقيين الذين ذهبوا الى امريكا و لحد هذه الحظة اغلبهم لم يدفع تكاليف الطيران ولم يجد عمل له ولم يندمج بالمجتمع وهذه حسب رايي ولله اعلم . وانشاء لله كل العراقيين لله يسهللهم ينولون الي يريدوا

عذرا اخي بس انت خلطت بين الهجرة واللجوء ....سفارة كندا تنطي هجره بناءا على الاستثمار والكفاءات ,,الي حجت عليه كوكي هو اللجوء الانساني
تقبل تحياتي

[espero]

اخوية امير العراقي احنا مقدمين هل سنة واني مقيمة وقابلنا اول مقابلة مال تسجيل يوم 22/1/2012 ورا مقريت الحجي مال الاخت كوكي واللي شفته ممكن يكون صحيح وبي وجهة نظر اسودت الدنيا بعيني وبديت اايس من السفر ومحتارة ودا افكر بالرجوع واعوف كلشي معرف حيرررة وواحد ميعرف شي يسوي !!!
بس حجيك هم مقنع وصحيح بس منعرف اللي راح يصير شنو معرف ؟؟!!!

كولي يالله اختي ..بعدك بأول الطريق ..ان شاء الله تتوطنون بأسرع وقت ...

[التائها خارج وطنها]

شكرا للاخ اسبيرو والاخ امير العراقي ونصبر ونشوف تاليها ومثل متكولون قسمة ونصيب هي

[ابو ايمن المياحي]

للرفع

[كوكي 2004]

السلام عليكم جميعآ
أخي أمير العراقي
بالبداية احب أن أشكرك على مرورك على موضوعي
واحب أكولك كل ألي حضرتك ذكرته من معلومات عن التوطين صح ولكن أحب أن أوضحلك بعض الأمور أذا ممكن

حضرتك ذكرت أنه الدول حاليآ ترغب بالناس الأغنياء والمتمكنين أكثر من الفقراء والسبب أنه يكدرون يعيلون نفسهم
وهنا رح أكولك مع أحترامي الشديد لحضرتك هذا التفسير غلط ولازم نفرق بين ( اللجوء الي يتم عن طريق المفوضية
السامية لشؤون اللاجئين ) وبين ( الهجرة الي تم عن طريق تقديم طلب الى سفارة الدولة الي ترغب بالسفر ألهه والي يتم تقديم الطلب بصورة مباشرة
لسفارة تلك الدولة ) وطبعآ شروط الهجرة معروفة وتكدر تطلع عليهه على موقع سفارات الدول مثل كندا وأستراليا

وطبعآ أقدم شكري الجزيل لأخويه العزيز أسبيرو لتوضيحه الفرق بين اللجوء والهجرة


هسه نرجع على موضوع التوطين
طبعآ كلامك  مضبوط أكو ناس جانت مسويه بغداد عمان باب الشرجي
وأكيد هذا سابقآ ولكن حاليآ وبالذات من منتصف سنة 2011 ولحد الآن بدوا يشددون على الي يشوفون بجوازه
ختم ذهاب وعودة من والى العراق وبدليل كلنه نلاحظ بين فترة وفترة ( يسوون تطابق بيانات ) ويبدون يبلغون اللاجئين بالحضور لمبنى ال un
واكيد لمعرفة منو راح لبغداد ومنو ماراح
وأعتقد كل الأعضاء يأيدوني بهذا الكلام والكل صار ويا هذا الشي

وارجع وأكولك كثير من الناس الي راحوا للعراق وقابلوا محلفين أجاهم رفض بسبب الذهاب للعراق لأن يعتبروهم غير مهددين

وصدكني آني ( أسمع وأجي أكول وأنقل مثل ماحضرتك ذكرت )











ولكن والله والله ما أجي وأكتب كلمة وحدة أذا آني مامتأكدة منهه ومن ناس يشتغلون بمكانات ومنظمات كبيرة ومرتبطين بعمل ويه ال un وهذوله الناس ما ألهم مصلحة يكذبون   

[التائها خارج وطنها]

اختي كوكي
شلونج ؟؟
اني قريت موضوعج وعندي ااستفسار لان اني مقيمة واريد اسال ان المقيم مينطو توطين لامريكا بس ؟؟لو تشمل بقية الدول الاوربية ؟؟؟
وهل كندا مشمولة يعني مينطون للعندة اقامة ؟؟؟
زين اذا الموضوع هشكل يعني مابيها امل الشغلة وهاي كعدتنا بعمان ؟؟؟

[شكوماكو]

نعم يااخت كوكي كلامج جدا صحيح وكثير من اللي نرفضوا هم لانهم قد ذهبوا الى العراق وعادوا الى الاردن.

[espero]

اخت كوكي .. زين اني فايت وطالع لعمان مرة وحدة بس قبل ما اقدم لجوء ...
يعني فتت لعمان 15 يوم وطلعت .. و وراها ب3 اشهر رجعت لعمان وقدمت لجوء وبعد ما طلعت ورة التقديم
فهل حالتي مشمولة بكلامج .. لو المهم انو ما يكون رجع بعد التقديم

تحياتي وشكرا على تعاونج

من رخصة الاخت كوكي ..
اخي العزيز
في كل مرحله من مراحل التوطين راح ينشاف جوازك ...وراح تنسال عن كل تاريخ ...المهم تكون مقنع بالجواب عن كل سؤال ....وبالهجره بالذات ان شاء الله راح يدققون التواريخ بصورة مركزه ...القصد انه شنو ..تحاول تكون اجاباتك منطقية ومترابطه ....يعني مثلا اتكول اني جيت للاردن زيارة او علاج او استكشف الوضع وبعدين رجعت للعراق صفيت اموري ..او اشي يجي متناسق ويه قصتك
تقبل تحياتي وشكرا للاخت كوكي

[كوكي 2004]

أخويه العزيز شكوماكو

أشكرك على ملاحظتك وأحب أضيف وأاكد المعلومة
عندي بنت أخويه وزوجهه أجاهم رفض بسنة 2009 من المحلفين ومن ترجمنه الرفض طلع كاتبلهم المحلف
( تبين لنا أن العودة للعراق لاتشكل خطر وتهديد على حياتك ) لأن همه بهذيج الفترة رايحين للعراق وكلتلهم
والله رح تصيرلكم مشكلة بسبب الروحه للعراق بس ماصدكوا ومن أستلموا الرفض كالت بنت أخويه عمه والله كلامج
طلع صحيح ولحد الآن يسمعون حسكم لاتحول ملفهم لأي دولة ولا بي أي تغير وكاعدين وساكتين


أخي مغامر



همه ما ألهم علاقة لو رايح وجاي 100 مرة لأن ماكنت مسجل بل un يعني أنت حر
بس من سجلت بعد ميصير تروح لأن بهذه الحالة تكون بنظرهم مو صادق بكلامك

يعني خلي نكون صريحين أكثر
معظم العراقيين من طلعوا من العراق بعد 2003 كالوا أحنه طلعنه بسبب التهديد وخفنه على أرواحنه وعوائلنه وطلعنه لأن نريد الأمان
و لهذا من يشوفون واحد راح ورجع من العراق رح يعيدون النظر بملفه حتى لو كان الملف بالتوطين

وبالنسبة لدخولك الأول يعني ال 15 يوم تكدر ترتب أقوالك بأن تكولهم مثلآ
أجيت أشوف أقاربي جايين من الخارج وماكدروا يجون للعراق أو صديقي مثلآ
أو جبت أخويه أو والدتي أو أختي للعلاج وجنت مامفكر أبقى لأن ماكنت متهدد وبعدين أجيت لعمان بسبب
شوف أنت شذاكر بقصتك وهكذا

تحياتي للجميع وبالتوفيق

[saradear]

شكرا ً اختي العزيزة كوكي على المعلومات القيمة
ولقد ذكرت العبارة التالية:-
لأن بزواجه من الأردنية يستطيع أن يحصل على أقامة سنوية بكفالة الزوجة ومعناها يستطيع أن يعمل ويقوم بأسرته
فحبذا لو تعليمنا عن الطريقة التي يمكن لزوج الاردنية ان يحصل بها على ترخيص عمل حيث ان احد اصدقائي متزوج من اردنية ( ليست من اصول فلسطينية ) ولديه اقامة سنوية ولديه 3 اولاد ولديه وثيقة المفوظية وتحول ملفه الى IOM واكمل المحلفين وحصل على رفض واستأنف وما زال ينتظر ، والقي القبض عليه من قبل مفارز الاقامة والحدود لكونه يعمل بدون ترخيص وافرج عنه عن طريق طواريء الأمم المتحدة وبقي جوازه محجوزا ً في المركز الامني الى يومنا هذا. علما ً انه قدم طلبا للحصول على ترخيص عمل ورفض طلبه لأنه غير مستثمر وقدم طلبا ً لوزير العمل واحيل طلبه الى قسم الترخيص بعد ان همش عليه الوزير بتطبيق اللوائح والأنظمة المتبعة وطبقت بحقه اللوائح التي تنص  بأن يكون مستثمرا ً.
فحبذا اذا كانت لديك المعلومات عن الطريقة التي يمكنه الحصول فيها على ترخيص عمل.
حتى هناك من يقول ان الحاصلين على دورات IRD ومنظمة كير يمكنهم الحصول على ترخيص عمل ولدى مراجعتي انا شخصيا ً لكوني حاصل على مجموعة دورات كان الجواب لا يحق للعراقيين بالحصول على تراخيص عمل الا اذا كانوا مستثمرين او متعاقدين مع الدوائر الحكومية لكونهم ذوي اختصاصات معينة، وبالنسبة للمستثمرين الغير اردنيين فلديهم نسبة ضئيلة من العمالة يمكنهم تعينها اذا كانت من ضمن اختصاصات يحتاجها المشروع.
واذا الشغلة مضبوطة باجر اتزوج اردنية ( بس لا تسمع ام الجهال ) هم اقامة وهم ترخيص عمل وانشاء الله بعد عمر طويل من نخلص محلفين وتجي الامنية وندخل على جدولة السفر يحلها الف حلال على كولة العْربي لو انا ميت لو المرة ميتة لو امريكا رافضتنا لو اللجوء خلصان.

اخي اتصل على منظمة الااغثة والتنمية الدولية ird واتصل بسرعة كانه المعلومات اللي عندك مو صحيحة بالنسبة للتصاريح اتصل بالمنظمة وانشالله خير الرقم 5563399 واسال على التصاريح العمل
سارة - عمان